Tsiv Dlim 2

Yug Mauxes

1Thaus ntawd muaj ib tug txivneej kws yog xeem Levis, rov moog yuav nwg xeem ib tug ntxhais lug ua quaspuj, 2hab tug quaspuj ntawd yug tau ib tug tub rua nwg. Thaus tug quaspuj ntawd pum tas tug mivtub ntxim hlub heev, nwg txawm muab tug mivtub ntawd zais tau peb lub hlis. #Tegnum 7:20; Henpl 11:23 3Tabsis thaus kws nwg zais tsi tau tug mivtub ntawd ntxiv lawm, nwg txhaj muab ib lub tawb lojkov lug, hab muab roj ntoos leem tsi pub kuas dlej txeem tau rua saabhuv. Nwg muab tug mivtub ntawd tso pw rua huv lub tawb hab nqaa moog tso rua huv cov haav lojkov nraag ntug dlej. 4Tug mivtub ntawd tug muam txhaj sawv ibcaag dleb tsawv saib seb puas yuav muaj xwm dlaabtsi lug raug rua tug mivtub ntawd.

5Falaus tug ntxhais moog dlaa dlej nraag haavdlej, thaus kws nwg cov ntxhais qhev ncig uasi ntawm ntug dlej. Taamsim ntawd nwg txawm pum ib lub tawb nyob huv cov lojkov, tes nwg txhaj kuas ib tug nkauj qhe moog nqaa lug rua nwg. 6Thaus nwg muab qheb hlo saib, uacav nwg pum ib tug mivtub quaj-quaj nyob rua huv, ua rua Falaus tug ntxhais hlub nwg heev; nwg txhaj has tas, “Tug nuav yuavtsum yog cov Henplais le mivnyuas xwb.”

7Tug mivtub ntawd tug muam txhaj lug has rua Falaus tug ntxhais has tas, “Koj puas xaav kuas kuv moog nrhav ib tug quaspuj Henplais tuaj tu tug mivtub nuav rua koj?”

8Falaus tug ntxhais teb tas, “Aw, thov koj cale moog nrhav.” Yogle ntawd, tug ntxhais ntawd txhaj moog coj tug mivtub ntawd leejnam tuaj. 9Falaus tug ntxhais has rua tug quaspuj ntawd tas, “Koj coj tug mivnyuas nuav moog tu rua kuv, kuv maam muab nqezug rua koj.” Yogle ntawd, nwg txhaj coj tug mivtub ntawd lug tu.

10Thaus tug mivnyuas ntawd lujhlub lawm, leejnam txhaj coj moog cob rua Falaus tug ntxhais, kws nwg tau txais yuav tug mivnyuas ntawd ua nwg tug tub. Falaus tug ntxhais has tas, “Kuv muab tau tug tub nuav huv dlej lug, yogle ntawd, kuv yuav tis nwg lub npe hu ua Mauxes.”#2:10: Mauxes: Lub npe nuav has muaj ntsiv thooj le lulug Henplais kws has tas “muab tawm lug.” #Tegnum 7:21

Mauxes Tsiv Moog Rua Tebchaws Midias

11Muaj ib nub, thaus Mauxes hlub tav txiv lawm, nwg txawm moog ncig saib nwg tsaav tuabneeg, kws yog cov Henplais; nwg pum puab raug quabyuam ua num nyaav kawg le. Nwg pum ib tug txivneej Iziv muab ib tug Henplais kws yog Mauxes tsaav tuabneeg ntaus. #Henpl 11:24 12Mauxes txawm saib ncig pis leeg, hab pum tas tsi muaj leejtwg pum, tes nwg txawm muab tug tuabneeg Iziv ntawd tua hab muab coj moog zais rua huv cov xuabzeb lawm. 13Nub tomqaab Mauxes rov tawm moog hab pum ob tug txivneej Henplais taabtom sisntaus. Mauxes has rua tug kws ua txhum has tas, “Uacaag koj laam ntaus koj tsaav tuabneeg Henplais?”

14Tug txivneej ntawd teb tas, “Leejtwg tsaa koj ua tug kaav hab txavtxim rua wb? Koj yuav muab kuv tua ib yaam le koj tua tug tuabneeg Iziv ntawd hab lov?” Tes Mauxes ntshai heev hab nwg xaav tas, “Muaj tuabneeg paub txug zaaj kws kuv ua taag lug lawm lau.” #Tegnum 7:23-28 15Thaus Falaus nov zaaj nuav, nwg txhaj nrhav Mauxes tua povtseg, tabsis Mauxes tub xub tsiv moog rua tim tebchaws Midias lawm.

Muaj ib nub, thaus Mauxes taabtom nyobtsawg ntawm ib lub qhovdlej, #Tegnum 7:29; Henpl 11:27 16Yethoos kws yog tug povthawj hlub huv tebchaws Midias, xyaa tug ntxhais txawm tuaj ntaus dlej laub rua huv cov dlaab rua puab txiv cov yaaj hab cov tshis haus. 17Tabsis cov tuabneeg yug yaaj muab Yethoos cov ntxhais lawv tsiv. Tes Mauxes txhaj moog paab puab hab ntaus dlej rua puab cov tsaj haus. 18Thaus puab rov lug txug ntawm puab txiv kws yog Le-uyees, nwg nug puab tas, “Uacaag nubnua mej lug tsev ntxuv ualuaj?”

19Puab teb tas, “Muaj ib tug tuabneeg Iziv paab peb, tsi pub cov yug yaaj ua phem rua peb; nwg tseem ntaus dlej rua peb hab peb tej tsaj haus hab.”

20Yethoos nug nwg cov ntxhais has tas, “Nwg nyob qhovtwg? Ua lecaag mej tseem muab nwg tsotseg rua tom qhovdlej lawm hab? Cale moog hu nwg lug nrug peb noj mov.”

21Yogle ntawd, Mauxes txhaj txavtxim sab nrug Yethoos nyob rua huv tebchaws Midias. Yethoos muab nwg tug ntxhais Xipaulas rua Mauxes yuav, 22hab yug tau ib tug tub rua Mauxes. Mauxes has tas, “Kuv yog tuabneeg txawv tebchaws nyob huv lub tebchaws nuav, yogle ntawd, kuv tis kuv tug tub nuav lub npe hu ua Nkawsoos.”#2:22: Nkawsoos: Lub npe nuav has muaj ntsiv thooj le lulug Henplais kws has tas “tuabneeg txawv tebchaws.”

23Tau ntau xyoo tomqaab nuav, cov Iziv tug vaajntxwv tau tuag, tabsis cov Yixalayees tseem pheej quajntsuag rua txuj kev ua qhev hab quaj thov kev paab. Puab tej suab quaj moog txug Vaajtswv, 24Vaajtswv nov puab tej suab quaj hab ncu txug tej lug kws Nwg tau cogtseg rua Anplahaas, Ixaj, hab Yakhauj lawm. #Chiv 15:13-14 25Nwg pum cov Yixalayees txuj kev ua luas qhev mas Nwg hlub puab kawg le.#2:25: hlub puab kawg le; Ib phoo ntawv qub-qub thaus u sau has tas qha Nwg tugkheej rua puab.

Currently Selected:

Tsiv Dlim 2: HNJ2022

Highlight

Copy