Tegnum 8

1Xaulus pumzoo puab tua Xatefanus hab.

Xaulus Tsimtxom Cov Ntseeg

Txij nub ntawd lug pawg ntseeg huv lub nroog Yeluxalees pib raug kev tsimtxom nyaav heev. Taagnrho cov ntseeg suavdlawg txawm tsiv uasaab uasua moog thoobplawg lub xeev Yudas hab xeev Xamalis, tsuas tshuav cov timthawj lawm xwb. 2Muaj qeeleej txivneej kws fwm Vaajtswv txhaj tuaj muab Xatefanus lub cev moog log, puab quaj hab hlub Xatefanus kawg le.

3Tabsis Xaulus nrhav kev ua kuas pawg ntseeg puamtsuaj moog; nwg moog huv ib lub tsev rua ib lub tsev, nwg muab cov ntseeg kws yog quaspuj hab txivneej caab moog kaw rua huv tsev lojcuj. #Tegnum 22:4-5; 26:9-11

Filiv Qha Txuj Moo Zoo Huv Xeev Xamalis

4Cov ntseeg kws tsiv uasaab uasua moog ntawd, puab moog txug twg puab kuj qha Txuj Moo Zoo txug ntawd. 5Filiv moog rua huv ib lub nroog luj#8:5: ib lub nroog luj; tej phoo ntawv qub kws xuas teg sau, muaj ib lub nroog. kws nyob rua huv xeev Xamalis, nwg qha has txug tug Mexiyas rua cov tuabneeg ntawd noog. 6Thaus suavdlawg nov Filiv qha hab pum tej txujci tseemceeb kws nwg ua, puab txawm ua tuabzoo noog nwg qha. 7Muaj ntau tug ntsujplig phem tau quaj qw nrov heev hab tau tawm huv ntau tug tuabneeg moog lawm. Ntau tug tuabneeg tuagteg tuagtaw hab tuabneeg cegtawv cale zoo mob huv tuabsi. 8Cov tuabneeg kws nyob huv lub nroog ntawd, suavdlawg zoosab kawg le.

9Muaj ib tug txivneej hu ua Ximoos, nwg nyob huv lub nroog ntawd tau ntev lug lawm hab nwg yog ib tug kws txawj ua khawvkoob. Nwg txeev ua rua cov tuabneeg Xamalis xaav tsi thoob lug ntawm qhov kws nwg pheej khaav has tas nwg yog ib tug tuabneeg tseemceeb; 10ua rua taagnrho cov tuabneeg kws nyob huv lub nroog ntawd, suav txij tug hlub txug tug yau puavleej noog nwg tej lug. Puab has tas, “Tug txivneej nuav yog Vaajtswv lub fwjchim kws hu ua ‘Lub Fwjchim Luj Kawg Nkaus.’ ” 11Puab noog nwg lug heev, vim nwg tej khawvkoob kws nwg tau ua ntev lug lawm.

12Tabsis thaus puab ntseeg Filiv tej lug qha kws has txug Vaajtswv lub Tebchaws hab has txug Yexus Khetos, tes puab suavdlawg, tsi has quaspuj lossis txivneej, txawm ua kevcai rausdlej huv tuabsi. 13Ximoos los kuj cale lug ntseeg Yexus lawm hab. Thaus Ximoos ua kevcai rausdlej taag lawm, nwg txawm nrugnraim Filiv hab cale xaav tsi thoob txug tej txujci tseemceeb kws nwg pum Filiv ua.

14Thaus cov timthawj kws nyob huv lub nroog Yeluxalees nov tas cov tuabneeg Xamalis tau txais yuav Vaajtswv Txujlug lawm, cov timthawj txawm khaiv Petus hab Yauhaas moog saib puab. 15Thaus obtug moog txug, obtug txhaj thov Vaajtswv rua puab kuas puab tau txais Vaaj Ntsujplig tug Dlawbhuv. 16Ruaqhov Vaaj Ntsujplig tug Dlawbhuv tseem tsi tau lug nrug cov ntseeg ntawd ib tug twg nyob le, puab tsuas yog tau ua kevcai rausdlej huv tug Tswv Yexus lub npe nkaus xwb. 17Yogle ntawd, Petus hab Yauhaas obtug txhaj tsaa teg rua puab, tes puab txhua tug txawm tau txais Vaaj Ntsujplig tug Dlawbhuv.

18Thaus ob tug timthawj tsaa teg rua cov ntseeg ntawd, Ximoos pum tas puab cale tau txais Vaaj Ntsujplig tug Dlawbhuv, tes nwg txawm muab nyaj rua Petus hab Yauhaas obtug, 19hab has rua obtug tas, “Thov meb muab lub fwjchim nuav rua kuv hab, sub thaus kuv tsaa teg rua leejtwg, tug ntawd txhaj yuav tau Vaaj Ntsujplig tug Dlawbhuv.”

20Tabsis Petus teb nwg has tas, “Thov kuas koj cov nyaj cale nrug koj puamtsuaj moog, ruaqhov koj xaav tas koj tseem yuav muab nyaj yuav tau Vaajtswv qhov khoomplig ntawd hab! 21Koj yuav tsi muaj feem lossis yuav koom nrug peb ua tegnum nuav tsi tau, ruaqhov koj lub sab tsi ncaaj rua Vaajtswv. 22Cale tso koj tej kev txhum tseg hab thov Vaajtswv zaam qhov kws koj lub sab cale xaav tau tej yaam kws tsi zoo ntawd. 23Ruaqhov kuv pum tas koj lub sab puvnpo txuj kev khib hab txuj kev txhum tub khi tau koj lawm.”

24Ximoos txawm has rua Petus hab Yauhaas has tas, “Thov meb thov Vaajtswv rua kuv, kuas kuv tsi xob raug tej kws meb has ntawd ib qho le.”

25Thaus Petus hab Yauhaas obtug has obtug tej lug povthawj hab qha tug Tswv tej lug rua suavdlawg noog taag lawm, obtug txawm rovqaab moog rua nraag lub nroog Yeluxalees. Thaus obtug taug kev moog, obtug qha Txuj Moo Zoo rua ntau lub zog kws nyob huv xeev Xamalis.

Filiv Hab Tug Nom Kws Yog Tuabneeg Itiupias

26Tug Tswv ib tug timtswv lug has rua Filiv has tas, “Koj cale sawv hab moog rua saab qaabteb,#8:26: moog rua saab qaabteb; lossis thaus taavsu. taug txujkev kws tuaj tom lub nroog Yeluxalees tuaj moog rua nraag lub nroog Nkaxas.” (Nwgnuav tsi muaj leejtwg moog txujkev ntawd lawm.)#8:26: Nwgnuav tsi muaj leejtwg moog txujkev ntawd lawm; lossis Txujkev nuav yog kev moog tom taj suabpuam. 27Yogle ntawd, Filiv txhaj sawvkev moog. Thaus nwg taabtom taug kev moog, nwg ntsib ib tug nraugsaam kws yog tuabneeg Itiupias, hab yog ib tug nom kws saib puj vaajntxwv Kaadakes kws kaav tebchaws Itiupias lub txhaab nyaj. Tug nom ntawd tuaj moog pehawm Vaajtswv huv lub nroog Yeluxalees, 28hab taabtom caij lub tsheb neeg rov lug tsev; thaus ntawd, nwg taabtom nyeem Yaxayas, kws yog tug xwbfwb cev Vaajtswv lug phoo ntawv.

29Vaaj Ntsujplig tug Dlawbhuv txawm has rua Filiv has tas, “Koj cale moog kuas ti-ti rua ntawm lub tsheb neeg ntawd.” 30Filiv dlha ceevnrooj moog hab nwg nov tug nom ntawd taabtom nyeem Yaxayas, kws yog tug xwbfwb cev Vaajtswv lug phoo ntawv. Filiv nug has tas, “Koj puas totaub txug zaaj kws koj nyeem ko?”

31Nwg teb tas, “Tub tsi muaj leejtwg paab txhais rua kuv, es kuv yuav ua lecaag totaub?” Nwg txawm kuas Filiv nce moog nrug nwg nyob huv lub tsheb neeg. 32Vaajtswv Txujlug kws tug nom ntawd taabtom nyeem yog has le nuav:

“Puab coj Nwg moog ib yaam le coj tug yaaj moog tua,

zoo ib yaam le tug mivnyuas yaaj kws nyob tuabywv rua luas txav nwg cov plaub.

Nwg tsi qheb ncauj has ib lus le. #Yaxaya 53:7-8 (LXX)

33Puab ua saib tsi taug Nwg hab txavtxim tsi ncaaj rua Nwg.

Tsi muaj leejtwg yuav taug tau Nwg le caajceg,

ruaqhov Nwg txujsa tub raug muab rhu tawm huv lub nplajteb nuav moog lawm.”

34Tug nom ntawd nug Filiv has tas, “Thov koj qha rua kuv seb, tug kws tug xwbfwb cev Vaajtswv lug has nuav, yog has txug leejtwg? Nwg has txug nwg tugkheej lossis nwg has txug lwmtug?” 35Filiv txawm pib ntawm nqai kws tug nom ntawd taabtom nyeem, kws yog qha txug Txuj Moo Zoo has txug Yexus rua tug nom ntawd noog. 36Thaus obtug caij tsheb neeg moog txug ntawm ib qhov chaw kws muaj dlej; tug nom ntawd txawm has rua Filiv has tas, “Ntawm nuav tub muaj dlej lawm, kuv ua kevcai rausdlej puas tau maj?” 37#8:37: Tej phoo ntawv qub kws xuas teg sau, ntxiv nqai 37 nuav rua: Filiv has rua nwg has tas, “Yog koj ntseeg tag-tag, tes koj yeej ua kevcai rausdlej tau kawg.” Nwg teb tas, “Kuv ntseeg tas Yexus Khetos yog Vaajtswv tug Tub.”

38Tug nraugsaam ntawd txawm cheem lub tsheb neeg kuas nreg, tes obtug txawm nqeg moog rua huv dlej, hab Filiv muab nwg ua kevcai rausdlej. 39Thaus obtug tawm huv dlej lug, tug Tswv tug Ntsujplig txawm coj Filiv moog rua lwmqhov lawm. Tug yawm ntawd tsi pum Filiv ntxiv le lawm, tabsis nwg txawm caij tsheb neeg moog tsev hab zoosab kawg le. 40Muaj tuabneeg pum Filiv nyob peg lub nroog Axautus; thaus nwg moog rua peg lub nroog Xixaleyas, nwg qha Txuj Moo Zoo thoobplawg tej nroog kws nyob rua ib cheebtsaam ntawd.

Currently Selected:

Tegnum 8: HNJ2022

Highlight

Copy