Tegnum 7

Xatefanus Tej Lug

1Tug Tuam Povthawj Hlub nug Xatefanus has tas, “Tej nuav puas muaj tseeb?”

2Xatefanus teb tas, “Mej cov ua kwv ua tij hab ua txiv, mej cale noog kuv has! Thaus peb yawmkoob Anplahaas tseem nyob rua huv tebchaws Mexuputamias kws nwg tseem tsi tau tsiv moog rua lub nroog Halaas, Vaajtswv tug kws muaj tshwjchim ci ntsaa-ab tau tshwm lug rua nwg pum #Chiv 12:1 3hab has rua nwg tas, ‘Koj cale tso koj tej kwvtij hab lub tebchaws nuav tseg, es moog rua ib lub tebchaws kws Kuv yuav qha rua koj.’ 4Yogle ntawd, nwg txhaj tawm huv tebchaws Khade-as moog rua lub nroog Halaas. Thaus nwg txiv tuag lawm, Vaajtswv txhaj has kuas nwg tsiv lug nyob huv lub tebchaws kws taamsim nuav mej nyob. #Chiv 11:31; Chiv 12:4

5“Thaus ntawd Vaajtswv yeej tsi tau pub ib nyuas yaam dlaabtsi rua Anplahaas le, txawm yog thaaj nyuas aav luaj xibtaws xwb los tub tsi tau, tabsis Vaajtswv coglug tseg has tas Vaajtswv yuav muab lub tebchaws ntawd rua nwg hab nwg cov xeebntxwv ua puab tug moog le. Lub sijhawm kws Vaajtswv coglug ntawd, Anplahaas tseem tsi tau muaj mivnyuas. #Chiv 12:7; 13:15; 15:18; 17:8 6Vaajtswv has rua Anplahaas has tas, ‘Koj caajceg yuav moog nrug lwmtsaav tuabneeg nyob huv luas lub tebchaws, puab yuav moog ua luas qhev hab raug luas tsimtxom 400 xyoo. #Chiv 15:13-14 7Tabsis Kuv yuav rautxim rua cov tuabneeg kws siv koj caajceg ua puab qhev, tomqaab ntawd, puab yuav tawm huv lub tebchaws ntawd lug pehawm Kuv nyob rua ntawm nuav.’ #Tsiv 3:12

8“Vaajtswv txhaj muab txuj kevcai txav rua Anplahaas ua lub cim qha txug Vaajtswv lulug cogtseg. Thaus yug Ixaj tau yim nub lawm, Anplahaas txawm muab Ixaj ua kevcai txav. Ixaj muab nwg tug tub Yakhauj ua kevcai txav, hab Yakhauj muab nwg kaum-ob tug tub kws yog peb tsaav tuabneeg cov yawmkoob ua kevcai txav. #Chiv 17:10-14; Chiv 21:2-4; Chiv 25:26; Chiv 29:31—35:18

9“Yakhauj cov tub txawm muaj lub sabkhib rua puab tug kwv Yauxej, puab txhaj muab nwg muag moog ua qhev rua tebchaws Iziv. Tabsis Vaajtswv nrugnraim Yauxej #Chiv 37:1; Chiv 37:28; Chiv 39:2, 21 10hab cawm Yauxej dlim ntawm txhua yaam teebmeem kws lug raug nwg. Thaus Yauxej moog cuag Falaus kws yog cov Iziv tug vaajntxwv, Vaajtswv pub rua nwg muaj ib tug cwjpwm kws ntxim nyam hab pub rua nwg muaj tswvyim zoo, Falaus txhaj tsaa nwg ua tug tswvxeev saib lub tebchaws Iziv hab saib txhua yaam huv Falaus lub loog. #Chiv 41:1-2

11“Tomqaab ntawd txawm muaj kev tshaib plaab thoobplawg tebchaws Iziv hab tebchaws Kana-aas, ua rua suavdlawg txomnyem kawg le. Peb cov yawmkoob nrhav tsi tau noj, 12Yakhauj nov tas nyob rua tebchaws Iziv muaj mov, tes nwg txawm khaiv nwg cov tub, kws yog peb cov yawmkoob, moog thawjzag rua tebchaws Iziv. 13Thaus puab rov moog zag thib ob, Yauxej txhaj qha nwg tugkheej rua nwg cov tijlaug paub, hab qha nwg tsev tuabneeg rua Falaus paub. #Chiv 45:1; Chiv 45:16 14Yogle ntawd, Yauxej txhajle xaa xuv moog rua Yakhauj kws yog nwg txiv hab taagnrho nwg txiv tsev tuabneeg, kws muaj xyaacaum-tsib leeg, lug nyob huv tebchaws Iziv. #Chiv 45:9-10, 17-18; Chiv 46:27 (LXX) 15Yakhauj txawm moog nyob rua nraag tebchaws Iziv; nwg hab nwg cov tub puavleej tuag taag rua nraag. #Chiv 46:1-7; Chiv 49:33 16Obtug#7:16: Obtug: yog Yakhauj hab Yauxej. lub cev tau raug muab coj rov lug log rua ntawm lub qhovntxaa kws nyob rua Sekhees. Lub qhovntxaa ntawd yog lub kws thaus u Anplahaas tau muab ib teg nyaj yuav ntawm cov tuabneeg Hamaus lug. #Chiv 23:3-16; 33:19; 50:7-13; Yaus 24:32

17“Thaus yuav txug lub sijhawm kws Vaajtswv yuav tau ua lawvle Vaajtswv tau coglug tseg rua Anplahaas lawm, thaus ntawd peb tsaav tuabneeg kws nyob huv tebchaws Iziv fuamvaam coob heev. #Tsiv 1:7-8 18Thaus kawg muaj dlua ib tug vaajntxwv kws yeej tsi paub txug Yauxej hlo le tau lug ua tug kaav tebchaws Iziv. 19Tug vaajntxwv ntawd tau dlaag hab ua phem rua peb tsaav tuabneeg hab tsimtxom peb cov yawmkoob, yuam kuas puab muab puab tej mivnyuas mog coj moog povtseg, kuas cov mivnyuas ntawd tuag moog. #Tsiv 1:10-11; Tsiv 1:22 20Thaus ntawd yog lub sijhawm kws yug Mauxes; nwg yog ib tug mivtub zoonraug heev. Nwg nam nwg txiv tu nwg huv tsev tau peb lub hlis. #Tsiv 2:2 21Thaus nwg raug muab rhu tawm huv tsev moog lawm, Falaus tug ntxhais txawm moog saws hab coj lug tu le nwg tub. #Tsiv 2:3-10 22Mauxes kawm paub cov tuabneeg Iziv tej tswvyim huv tuabsi, nwg txhaj dlhau moog ua ib tug tuabneeg kws muaj peevxwm heev rua phaab kev nqeg teg ua hab kev haslug.

23“Thaus Mauxes muaj noobnyoog plaubcaug xyoo, nwg tau txavtxim sab moog ncig saib nwg cov kwvtij Yixalayees. #Tsiv 2:11-15 24Nwg txawm pum ib tug tuabneeg Iziv tsimtxom ib tug tuabneeg Yixalayees; nwg txhaj moog paab tug tuabneeg Yixalayees hab ua pauj rua tug tuabneeg Iziv lug ntawm qhov kws nwg muab tug tuabneeg Iziv tua tuag. ( 25Nwg xaav tas nyaj nwg tsaav tuabneeg yuav totaub has tas Vaajtswv siv nwg lug paab kuas puab dlim, tabsis puab tsi totaub le.)

26“Nub tomqaab nwg pum ob tug tuabneeg Yixalayees taabtom sisntaus, nwg txawm cheem obtug kuas rov sishum, nwg has rua obtug tas, ‘Ob tug kwvtij 'e, meb tub yog kwvtij Yixalayees ib yaam, ua lecaag meb ib leeg tseem rov ntaus ib leeg hab?’ 27Tabsis tug kws ua txhum txawm muab Mauxes thawb ntag rua ibcaag hab has tas, ‘Leejtwg tsaa koj ua tug saib hab txavtxim rua peb? 28Koj xaav muab kuv tua ib yaam le naagmo koj tua tug tuabneeg Iziv hab lov?’ 29Thaus Mauxes nov le ntawd, nwg txawm tsiv tawm huv tebchaws Iziv moog nyob rua tebchaws Midias. Nwg hab nwg quaspuj txhaj yug tau ob tug tub nyob huv lub tebchaws ntawd. #Tsiv 18:3-4

30“Tomqaab plaubcaug xyoo dlhau moog lawm, muaj ib tug timtswv ceebtsheej tau lug tshwm rua huv cov nplaimtawg ntawm ib tsob ntoo rua Mauxes pum nyob rua tom taj suabpuam kws ze lub Roob Xinais. #Tsiv 3:1-10 31Thaus Mauxes pum le ntawd, nwg xaav tsi thoob le; nwg txawm txaav moog saib ze-ze, tabsis nwg nov tug Tswv lub suab has tas, 32‘Kuv yog koj cov yawmkoob tug Vaajtswv, yog Anplahaas, Ixaj hab Yakhauj tug Vaajtswv.’ Mauxes ntshai ua ibce tsheenyo hab tsaa tsi taug qhovmuag saib le. 33Tabsis tug Tswv has rua Mauxes tas, ‘Koj cale hle koj nkawm khau, ruaqhov qhov chaw kws koj sawv ntawm ko yog qhov chaw dlawbhuv. 34Kuv tub pum Kuv tsaav tuabneeg raug kev tsimtxom nraag tebchaws Iziv, Kuv tub nov puab lub suab quajntsuag lawm, Kuv txhaj lug cawm kuas puab dlim. Zagnua, koj cale lug, Kuv yuav khaiv koj moog nraag tebchaws Iziv.’

35“Tug Mauxes nuav yog tug kws cov Yixalayees tsi leeg yuav hab yog tug kws puab nug has tas, ‘Leejtwg tsaa koj ua tug saib hab txavtxim rua peb?’ Qhov kws tug timtswv ceebtsheej lug tshwm huv tsob ntoo kws muaj nplaimtawg rua nwg pum, tub yog Vaajtswv khaiv nwg moog ua tug saib hab paab kuas puab dlim ntaag. #Tsiv 2:14 36Nwg yog tug kws coj cov Yixalayees tawm huv tebchaws Iziv, yog tug kws ua tej txujci tseemceeb hab tej kws tuabneeg xaav tsi thoob huv tebchaws Iziv hab ntawm ntug dlej Havtxwv Lab hab nyob tom taj suabpuam tau plaubcaug xyoo. #Tsiv 7:3; Tsiv 14:21; Teev 14:33

37“Mauxes yog tug kws has rua cov Yixalayees has tas, ‘Vaajtswv yuav tsaa ib tug huv mej cov lug ua tug xwbfwb cev Vaajtswv lug rua mej, ib yaam le Nwg tau tsaa kuv.’#7:37: ib yaam le Nwg tau tsaa kuv; lossis zoole kuv. #2Kev 18:15, 18 38Mauxes yog tug kws nrug cov Yixalayees nyob uake tom taj suabpuam; nwg nrug peb cov yawmkoob uake, hab nrug tug timtswv ceebtsheej kws lug has rua nwg sau Roob Xinais nyob, hab nwg yog tug kws tau txais Vaajtswv tej lug cajsa kws nwg tau muab cev rua peb. #Tsiv 19:1—20:17; 2Kev 5:1-33

39“Tabsis peb cov yawmkoob tsi noog nwg lug; puab muab nwg thawb ntag rua ibcaag, hab puab xaav rovqaab moog rua tebchaws Iziv. 40Puab txhaj has rua Aloos has tas, ‘Koj cale nchuav ib cov nyuas vaajtswv lug ua cov coj peb kev. Peb tsi paub tas sov muaj xwm dlaabtsi lug raug rua Mauxes tug kws coj peb tawm huv tebchaws Iziv lug lawm.’ #Tsiv 32:1 41Tes thaus ntawd puab txawm nchuav tau ib tug mlom zoole tug nyuj; puab muab tsaj tua hlawv fij rua tug mlom, hab ua rooj noj rooj haus lug hawm tug mlom kws puab txhais teg puab ntawd. #Tsiv 32:2-6 42Vimle ntawd, Vaajtswv txhaj tso puab tseg hab ca puab pe tej nubqub kws nyob sau nruabntug, lawvle tau sau tseg rua huv cov xwbfwb cev Vaajtswv lug phoo ntawv has tas: #Amaus 5:25-27 (LXX)

“ ‘Cov Yixalayees! plaubcaug xyoo kws mej nyob tom taj suabpuam,

tej tsaj kws mej muab tua fij ntawd,

yog mej tua fij rua Kuv nua lov?

43Mej kwv tug dlaab Maulej lub tsevntaub,

hab mej tug dlaab Lefas lub nubqub,

tej ntawd yog tej mlom kws mej txhais teg puab rua mej pe.

Vimle ntawd, Kuv yuav ntab mej kuas tsiv dlhau lub nroog Npanpiloos moog.’

44“Thaus peb cov yawmkoob tseem nyob tom taj suabpuam, puab muaj lub Tsevntaub Sisntsib nrug puab. Lub Tsevntaub ntawd puab ua lawv nraim le tug qauv kws Vaajtswv tau muab qha rua Mauxes lawm. #Tsiv 25:9, 40 45Tomqaab ntawd, peb cov yawmkoob tau kwv lub Tsevntaub kws peb cov yawmsuab muab rua puab nrug Yausuas moog; puab tau moog txeeb tau lwmtsaav tuabneeg lub tebchaws, kws yog Vaajtswv tub ntab cov tuabneeg tawm ntawm lub tebchaws ntawd uantej moog lawm. Lub Tsevntaub nyob rua huv lub tebchaws ntawd lug txug Daviv tam. #Yaus 3:14-17 46Daviv yog ib tug kws Vaajtswv txaussab heev rua, nwg txhaj thov Vaajtswv kuas ca nwg ua ib lub chaw rua Yakhauj tug Vaajtswv#7:46: Yakhauj tug Vaajtswv; tej phoo ntawv qub kws xuas teg sau, muaj cov tuabneeg Yixalayees. nyob. #2Xamu 7:1-16; 1Xwm 17:1-14 47Tabsis thaus kawg Xalumoos yog tug kws ua lub tuamtsev ntawd rua Nwg. #1Vaaj 6:1-38; 2Xwm 3:1-17

48“Tabsis Vaajtswv tug kws muaj Fwjchim Tshaajplawg tsi nyob huv lub tsev kws tuabneeg txhais teg ua; lawvle tug xwbfwb cev Vaajtswv lug has tas,

49“ ‘Tug Tswv has tas, ntuj ceebtsheej yog Kuv lub zwmtxwv;

hab nplajteb yog Kuv lub chaw tag taw.

Mej yuav ua lub tsev zoo lecaag rua Kuv nyob?

Kuv lub chaw su yuav nyob rua qhovtwg? #Yaxaya 66:1-2

50Txhua yaam nuav tsi yog Kuv txhais teg tsim lov?’ ”

51Xatefanus has ntxiv tas, “Uacaag mej yuav tawv ncauj ualuaj! Uacaag mej lub sab yuav zoo nkaus le cov tuabneeg kws tsi paub Vaajtswv le! Uacaag mej yuav tsi nov Vaajtswv Txujlug le! Mej najzag tawmtsaam Vaaj Ntsujplig tug Dlawbhuv ib yaam nkaus le mej cov yawmkoob! #Yaxaya 63:10 52Puas tau muaj ib tug xwbfwb cev Vaajtswv lug kws mej cov yawmkoob tsi tau tsimtxom le? Puab tua cov kws qha txug yaav pegsuab has tas Vaajtswv tug Tubkhai kws ncaajnceeg yuav lug. Nwgnuav mej yog cov kws ntxeevsab rua Nwg hab yog cov kws muab Nwg tua povtseg. 53Mej yog cov kws tau txais Vaajtswv txuj kevcai kws yog timtswv ceebtsheej muab ntaag, los mej yeej tsi ua lawvle tej kevcai ntawd le!”

Xatefanus Raug Muab Pobzeb Ntaus

54Thaus cov thawjcoj huv Koomhum qebsab nov Xatefanus has le ntawd, puab npautawg heev, puab zawm nav quas zog rua nwg. 55Tabsis Xatefanus puvnpo Vaaj Ntsujplig tug Dlawbhuv, nwg tsaa qhovmuag saib sau ntuj, nwg pum Vaajtswv tug tshwjchim ci ntsaa-ab hab pum Yexus sawv ntawm Vaajtswv saab xis. 56Xatefanus has rua puab has tas, “Mej saib seb, kuv pum roojntug ceebtsheej qheb hab pum Tuabneeg Leejtub sawv ntawm Vaajtswv saab xis!”

57Thaus ntawd cov thawjcoj huv Koomhum qebsab txawm muab teg lug pus pobntseg hab qw nrov-nrov. Taagnrho puab txawm dlha moog rua ntawm Xatefanus, 58muab nwg caab tawm rua saabnrau ntug nroog hab muab pobzeb ntaus nwg. Cov timkhawv kws nkaug nwg txawm hle puab tej tsho tso rua ntawm ib tug hluas kws hu ua Xaulus kutaw. 59Thaus puab taabtom muab pobzeb ntaus Xatefanus, nwg txawm thov Vaajtswv has tas, “Tswv Yexus, thov Koj txais yuav kuv tug ntsujplig!” 60Nwg txhuscaug ndlua hab has nrov-nrov has tas, “Tug Tswv! Thov koj zaamtxim rua puab.” Thaus nwg has le ntawd taag, tes nwg txawm tusav nrho lawm.

Currently Selected:

Tegnum 7: HNJ2022

Highlight

Copy