Tegnum 27

Paulus Caij Nkoj Moog Tim Lub Nroog Loos

1Thaus muaj kev pumzoo has tas puab yuav xaa peb moog tim tebchaws Italis, tes puab txawm muab Paulus hab ob-peb tug tuabneeg raug txim cob rua Yulius kws yog cov Loos tug thawj tubrog pawg pua kws saib paab tubrog kws hu ua “Fuabtais Paab Tubrog.” 2Peb nce moog rua huv lub nkoj kws tuaj peg lub nroog Adamitius tuaj. Lub nkoj ntawd taabtom yuav moog rua tim tej nroog kws muaj chaw nreg nkoj huv xeev Exias, tes peb txawm caij moog. Alitakhus kws yog tuabneeg Makedaunias kws tuaj tim lub nroog Thexalaunikes tuaj kuj nrug peb moog hab.

3Nub tomqaab peb moog txug huv lub nroog Xidoos. Yulius muaj lub sab hlub Paulus, nwg txhaj ca Paulus moog saib Paulus cov phoojywg sub puab txhaj paab tau tej kws nwg tuncua. 4Thaus peb caij nkoj tawm ntawm qhov chaw ntawd moog, peb moog rua saab kws muaj chaw tivthaiv cua kws yog saab ntawm lub povtxwv Xaipas, ruaqhov lub sijhawm ntawd muaj cua ntsawj hlub heev. 5Peb tau caij nkoj hlaa havtxwv kws yog moog ze lub xeev Kilikias hab xeev Paafilias, peb maamle moog txug lub nroog Milas kws nyob huv tebchaws Likias. 6Thaus peb tseem nyob huv Milas, tug thawj tubrog pawg pua txawm moog nrhav tau ib lub nkoj tuaj nraag lub nroog Alexaadias tuaj, lub nkoj ntawd yuav moog rua tim tebchaws Italis, yogle ntawd nwg txhaj muab peb caij lub nkoj ntawd moog.

7Peb lub nkoj moog qeeb heev, vim muaj cua ntsawj hlub tom hauvntej tuaj. Peb moog tau ntau nub, peb maamle moog txug huv lub nroog Kanidus. Cov cua ntawd ua rua peb moog tsi tau ncaajnraim ntxiv lawm, peb txhaj lem nkoj lawv ntug moog rua nraag lub povtxwv Khetes, kws yog hlaa cegkaum kws hu ua Xalemaunes moog. 8Peb caij nkoj lawv ntug povtxwv moog xwb vim moog nyuaj kawg le, peb txhaj moog txug ib qhov chaw kws hu ua Chaw Zoo Nreg Nkoj kws nyob tsi dleb ntawm lub nroog Laxe-as.

9Peb nkim sijhawm nyob rua ntawd tau ntev loo, ua rua tsi cobphum rua peb caij nkoj moog ntxiv lawm, ruaqhov tub dlhau Nub ua Kevcai Theej Txhoj#27:9: Nub ua Kevcai Theej Txhoj: yog thaus lub cuaj hli xaus lossis thaus lub kaum hli xab, lub caij nuav yog lub caij kws fuabcua tsi zoo, ua rua kev caij nkoj tsi cobphum hlo le. lawm. Yogle ntawd Paulus txhaj has rua suavdlawg has tas, 10“Cov kwvtij, kuv pum tas yaav nuav rua tod, peb txuj haukev yuav tsi yoojyim le lawm; lub nkoj hab tej khoom kws peb thauj moog yuav puamtsuaj luj heev, tsi taag le ntawd xwb, ntshe tseem yuav muaj tuabneeg tuag hab.” 11Tabsis tug thawj tubrog pawg pua noog tug tsaav nkoj hab tug tswv nkoj lug tshaaj le noog Paulus lug. 12Lub caij ntuj no tsi zoo nreg nkoj rua ntawm qhov chaw ntawd, yogle ntawd feem coob txhaj pumzoo caij nkoj tawm qhov chaw ntawd moog kuas txug rua tom lub nroog Faunis hab moog su rua tod thaus lub caij ntuj no. Lub nroog Faunis yog ib qhov chaw nreg nkoj nyob rua huv lub povtxwv Khetes kws tig rua saab qaabteb nubpoob hab saab qaumteb nubpoob.#27:12: saab qaabteb nubpoob hab saab qaumteb nubpoob; lossis saab qaumteb nubtuaj hab saab qaabteb nubtuaj.

Cua-Dlaaj Cua-Dlub Ntsawj Havtxwv

13Thaus muaj cua tuaj quas ntxag saab qaabteb tuaj, puab xaav tas nyaj yuav moog tau le lub sab xaav lawm hab, tes puab txawm nqug lub thauj lug rua sau lub nkoj hab caij nkoj lawv ntug povtxwv Khetes moog. 14Tabsis tuabplag xwb, txawm muaj ib nthwv cua hu ua “Cua Qaumteb Nubtuaj” ntsawj sau lub povtxwv Khetes tuaj. 15Nthwv cua ntawd txawm ntsawj peb lub nkoj, ua rua lub nkoj moog tsi tau rua tom hauvntej le lawm, tes peb txawm tso lub nkoj moog lawvle cua ntsawj lawm xwb.

16Thaus peb hlaa moog txug nraag ib lub nyuas povtxwv miv-miv kws hu ua Kaudas, cua ntsawj tsi heev ruaqhov muaj lub povtxwv ntawd thaiv lawm, peb txhaj nqug lub nkoj miv lug khi rua ntawm lub nkoj luj, tabsis peb nqug nyuaj kawg le. 17Thaus puab nqug tau lub nkoj miv rua sau lub nkoj luj lawm, puab txhaj muab hlua khi lub nkoj ruaj-ruaj. Puab ntshai tsaam puab laam moog tsoo cov xuabzeb ntawm ntug havtxwv Xawthis, puab txhaj muab dlaim ntaub cug cua txu, ca lub nkoj moog lawvle cua ntsawj.

18Cuadlaaj cuadlub pheej tsi txawj tu le, yogle ntawd nub tomqaab puab txhaj muab ib cov khoom kws puab thauj huv lub nkoj thau povtseg. 19Nub thib peb, puab txawm muab ib cov khoom siv huv lub nkoj thau povtseg hab. 20Peb tsi pum lub nub lossis tej nubqub tau ntau nub, hab cuadlaaj cuadlub los tseem ntsawj le qub. Thaus kawg peb yeej taag kev casab has tas sov peb puas yuav dlim le lawm.

21Tau ntau nub lawm kws suavdlawg tsi tau noj mov le, Paulus txawm sawvntsug taabmeeg puab hab has tas, “Cov kwvtij, yog mej ntxuv noog kuv lug, es peb tsi xob caij nkoj tuaj tom lub povtxwv Khetes tuaj, tes peb tej khoom tub tsi puamtsuaj taag le nuav. 22Tabsis kuv nquahu rua mej kuas tsi xob txhawj! Mej yeej tsi muaj ib tug kws yuav raug kev pluj-tuag le, tsuas yog lub nkoj xwb txhaj yuav puag. 23Ruaqhov naagmo tug Vaajtswv kws yog kuv tug Tswv hab tug kws kuv najnub pehawm, Nwg ib tug timtswv tau lug has rua kuv tas, 24‘Paulus, koj tsi xob ntshai! Koj yeej yuav tau moog sawv taabmeeg Xixas xwb. Vim Vaajtswv zoo rua koj heev, Nwg yuav cawm txhua tug kws nrug koj caij lub nkoj nuav tsi pub ib tug tuag le.’ 25Yogle ntawd cov kwvtij, mej tsi xob txhawj! Ruaqhov kuv ntseeg tas Vaajtswv yeej yuav ua lawvle qhov kws Nwg tau has lawm. 26Txawm lecaag los peb yeej yuav moog khuab rua ib lub povtxwv twg xwb.”

27Mo thib kaum-plaub kws cuadlaaj cuadlub ntsawj peb lub nkoj moog-moog lug-lug huv Havtxwv Meditelanees, mo ntawd kwvlaam ib taagmo, cov tuabneeg kws ua num huv lub nkoj xaav tas peb tub moog yuav txug tim ntug. 28Puab txawm dlauv ib txujhlua ntsuag moog rua huv havtxwv, hab pum tas dlej tseem tub 40 mev; tabsis tuabplag tomqaab ntawd puab rov ntsuag dlua hab pum tas tub 30 mev. 29Puab ntshai nyobtsaam lub nkoj moog tsoo pobzeb, puab txhaj muab plaub lub thauj tom tw nkoj tso rua huv havtxwv, hab tog seb yuav taavtwg maamle kaajntug.

30Cov tub ua num huv lub nkoj xaav nrhav kev tsiv, puab txawm muab lub nkoj miv dlauv moog rua huv havtxwv, puab uatxuj ua le puab yuav muab cov thauj hlau kws nyob tom taubhau nkoj tso tog rua huv dlej. 31Tabsis Paulus has rua tug thawj tubrog pawg pua hab cov tubrog has tas, “Yog cov tub ua num ntawd tseem tsi nyob rua huv lub nkoj nuav hab, tes mej yeej yuav tsi dlim le.” 32Yogle ntawd cov tubrog txawm muab cov hlua kws khi lub nkoj miv txav hab tso lub nkoj miv rua dlej ntsawj moog.

33Thaus yuavlaug kaajntug, Paulus nquahu kuas suavdlawg noj mov. Paulus has tas, “Mej tub tog tau kaum-plaub nub lawm, hab yeej tsi tau noj ib yaam dlaabtsi le. 34Yogle ntawd, kuv thov mej kuas cale noj mov sub mej txhajle yuav tsi tuag. Txawm ib txuj nyuas plaubhau ntawm mej taubhau los yeej yuav tsi poob le.” 35Thaus Paulus has le ntawd taag, nwg txawm muab ib lub ncuav lug ua Vaajtswv tsaug taabmeeg suavdlawg hab muab ndlais noj. 36Puab txawm zoosab zog tuaj, tes txhua tug txhaj muab mov lug noj. 37Taagnrho peb cov kws nyob huv lub nkoj yog muaj 276#27:37: 276; Tej phoo ntawv qub kws xuas teg sau, muaj 275; lwm phoo muaj kwvlaam 76. leej. 38Thaus puab noj mov taag lawm, puab muab cov nplej kws puab thauj moog thau povtseg rua huv havtxwv kuas lub nkoj sib mivntsiv.

Lub Nkoj Tawg Taag

39Thaus kaajntug lawm, cov tub ua num huv lub nkoj tsi paub tas sov yog dlaim aav twg, tabsis puab pum ib ceg havtxwv kws muaj xuabzeb, tes puab txawm xaav tas yog ua tau, puab yuav coj lub nkoj moog nreg rua ntawd. 40Puab txawm muab tej hlua kws khi cov thauj txav hab tso cov thauj rua huv havtxwv; tuablub sijhawm ntawd puab txawm dlaws cov hlua kws khi ob tug dluav kws tswj lub nkoj povtseg, hab puab nthuav dlaim ntaub cug cua nyob tom taubhau rua cua ntsawj lub nkoj kuas ncaajnraim moog rua tim ntug, tes peb txawm moog ncaajnraim rua tim cov xuabzeb lawm. 41Tabsis lub nkoj cale moog nrau ib thooj xuabzeb kws nyob huv havtxwv ua rua lub nkoj cale nreg; tog taubhau nkoj cale moog dlaig ruaj nreeg hab tsi uazug le lawm, hab dlej ndlaas muajceem heev tuaj tsoo yaav tw nkoj tawg taag.

42Cov tubrog ntshai tsaam cov tuabneeg raug txim ua luam dlej tsiv, puab txawm npaajsab yuav muab cov tuabneeg raug txim ntawd tua povtseg huv tuabsi. 43Tabsis tug thawj tubrog pawg pua xaav cawm Paulus, nwg txhaj txwv tsi pub kuas puab ua le ntawd. Nwg has kuas cov kws txawj ua luam dlej cale dlha rua huv dlej hab ua luam dlej moog rua tim ntug uantej; 44cov kws tsi txawj ua luam dlej cale moog tuav cov txag hab tej yaav ntoo kws luv ntawm lub nkoj hab ua luam dlej moog rua tim ntug. Suavdlawg ua le ntawd, suavdlawg txhaj moog txug tim ntug huv tuabsi tsi muaj ib tug tuag le.

Currently Selected:

Tegnum 27: HNJ2022

Highlight

Copy