Tegnum 26

Paulus Has Dlaws Nwg Zaaj Taabmeeg Akipas

1Akipas has rua Paulus has tas, “Kuv tsocai rua koj has dlaws koj zaaj.” Paulus xyaab hlo teg hab has dlaws nwg zaaj le nuav:

2“Vaajntxwv Akipas, kuv suav has tas kuv muaj moo kawg le kws nubnua kuv tau lug sawv ntawm koj xubndlag has dlaws txhua zaaj kws cov Yudais komtxim rua kuv, 3ruaqhov koj paub zoo txug cov Yudais tej kevlig kevcai hab puab tej kev tsi sishum. Yogle ntawd, thov koj ua sabntev noog kuv has.

4“Txij thaus kuv yau lug txug najnub nua, cov Yudais puavleej paub tas kuv ua kuv lub neej zoo lecaag. Puab yeej paub taagnrho kuv lub neej, pib thaus kuv tseem nrug kuv tsaav tuabneeg nyob hab thaus kuv moog nyob rua huv Yeluxalees. 5Puab yeej ibtxwm paub kuv thaus u lug lawm, yog puab yeem ua timkhawv has tas kuv yog ib tug nyob huv cov Falixais paab kws coj kevcai ntseeg nruj heev los yeej tau. #Tegnum 23:6; Filipi 3:5 6Zagnua kuv lug sawv ntawm nuav has plaub tub yog vim kuv casab rua tej kws Vaajtswv tau coglug tseg rua peb cov yawmkoob lawm. 7Qhov ntawd yog qhov kws peb cov Yudais kaum-ob xeem casab ntsoov has tas peb yuav tau txais, es suavdlawg txhaj rausab ntso najnub najmo pehawm Vaajtswv. Tub yog vim qhov kev casab nuav ntaag lau, Vaajntxwv, es kuv txhaj raug cov Yudais kom! 8Ua lecaag mej cov kws nyob ntawm nuav txhaj suav has tas qhov kws Vaajtswv tsaa tau cov tuabneeg kws tuag lawm sawv rovqaab lug yog ib zaaj kws tsi txaus ntseeg?

9“Kuv txeev xaav huv lub sab has tas kuv yuav ua txhua yaam tawmtsaam Yexus tug kws yog tuabneeg Naxalev lub npe. #Tegnum 8:3; 22:4-5 10Kuv txhaj ua le ntawd nyob rua huv lub nroog Yeluxalees. Kuv tau txais fwjchim lug ntawm cov thawj povthawj hlub moog nteg cov ntseeg Vaajtswv coob leej coj moog kaw rua huv tsev lojcuj. Hab thaus puab muab cov ntseeg ntawd coj moog tua povtseg, los kuv tseem nrug pumzoo hab. 11Muaj ntau zag kuv muab puab rautxim huv tej tsev saablaaj hab yuam kuas puab tso puab tej kev ntseeg tseg. Kuv npautawg rua puab heev, kawg qhov kws kuv cale moog tsimtxom cov ntseeg kws nyob rua txawv nroog le hab.

Paulus Has Txug Qhov Kws Nwg Lug Ntseeg Vaajtswv

(Tegnum 9:1-19; 22:6-16)

12“Tub yog vimle nuav, cov thawj povthawj hlub txhaj tsocai hab xaa kuv moog peg lub nroog Damaxakas. 13Vaajntxwv, thaus taavsu kws kuv taug kev moog, kuv pum ib tug dluab ci sau ntuj tuaj kws tseem ci tshaaj lub nub lug puagncig kuv hab cov tuabneeg kws nrug kuv moog ntawd. 14Peb txhua tug txawm qaug taag rua huv aav, hab kuv nov ib lub suab ua lug Henplais has rua kuv tas, ‘Xaulus, Xaulus! Ua lecaag koj tsimtxom kuv? Qhov kws koj ntaus Kuv kuj yog rov ua rua koj mob xwb, ib yaam le tug nyuj kws nwg rov tuam nwg tug tswv tug paas ntaag.’ 15Kuv nug has tas, ‘Tug Tswv, koj yog leejtwg?’ Tug Tswv teb tas, ‘Kuv yog Yexus tug kws koj tsimtxom ntaag. 16Tabsis cale sawv, qhov kws Kuv lug tshwm rua koj pum nuav, yog Kuv lug tsaa koj ua Kuv tug tubkhai. Koj yuavtsum moog qha qhov kws nubnua koj pum Kuv#26:16: Tej phoo ntawv qub kws xuas teg sau, tsi muaj Kuv. hab tej kws Kuv yuav ua rua koj pum yaav tomntej rua suavdlawg paub. 17Kuv yuav cawm koj ntawm koj tsaav tuabneeg hab Lwmtsaav Tuabneeg. Kuv yuav xaa koj moog 18qheb puab lub qhovmuag hab tig puab tawm ntawm qhov tsausntuj lug rua ntawm qhov pumkev, hab tawm huv Xataas lub fwjchim lug cuag Vaajtswv, sub lug ntawm qhov kws puab lug ntseeg Kuv, puab lub txim txhaj yuav raug zaam hab txhaj tau lug nrug cov tuabneeg kws Vaajtswv tub xaiv ca lawm nyob uake.’

Paulus Has Txug Nwg Tegnum

19“Vaajntxwv Akipas, tub yog vimle ntawd, kuv txhaj tawv tsi dlhau lub suab kws has sau ntuj lug. 20Kuv xub qha rua cov kws nyob huv lub nroog Damaxakas, dlhau ntawd kuv moog qha rua cov kws nyob huv lub nroog Yeluxalees, tomqaab ntawd kuv moog qha thoobplawg huv lub xeev Yudas hab qha Lwmtsaav Tuabneeg, kuas suavdlawg yuavtsum tso puab tej kev txhum tseg hab tig lug cuag Vaajtswv, hab ua tej kws qha tau has tas puab yeej tso puab tej kev txhum tseg lawm tag. #Tegnum 9:20, 28-29 21Tub yog vimle ntawd es cov Yudais txhajle tuaj nteg kuv huv lub Tuamtsev hab npaajsab yuav muab kuv tua povtseg. 22Tabsis Vaajtswv najzag paab kuv lug txug najnub nua, kuv txhajle tau tuaj sawv ntawm nuav ua timkhawv qha rua mej suavdlawg, tsi has tug hlub lossis tug yau noog. Kuv tsi tau has lwm zaaj le, kuv tsuas has tuab zaaj kws cov xwbfwb cev Vaajtswv lug hab Mauxes tau qha tseg has tas yeej yuav muaj le ntawd xwb: 23has tas, tug Mexiyas yuav raug kev tsimtxom, hab Nwg yuav yog thawjtug kws sawv huv qhovtuag rovqaab lug. Nwg yuav qha qhov kaaj kws yog txuj kev cawmdlim rua cov Yudais hab Lwmtsaav Tuabneeg.” #1Klt 15:20; Yaxaya 42:6; 49:6

24Thaus Paulus taabtom has dlaws Paulus zaaj tsi tau taag, Fexatus txawm qw nrov-nrov rua Paulus has tas, “Paulus, koj vwm lawm! Tej kev txawjntse kws koj kawm ua rua koj vwm lawm!”

25Paulus teb tas, “Fexatus, kuv tsi vwm! Kuv yeej meejpem hab tej lug kws kuv has nuav yeej muaj tseeb tag. 26Vaajntxwv Akipas, kuv muaj cuabkaav qha tej nuav rua koj, ruaqhov koj yeej paub tej nuav taag huv tuabsi lawm, vim tej nuav tsi tau tshwmsim zais nkoog kws yuav tsi muaj tuabneeg paub. 27Vaajntxwv Akipas, koj puas ntseeg tej lug kws cov xwbfwb cev Vaajtswv lug tau sau tseg? Kuv paub tas koj yeej ntseeg.”

28Vaajntxwv Akipas has rua Paulus has tas, “Koj nyavnyuas qha ibplag nuav xwb, koj txawmsiv xaav tas koj yuav yum tau kuv lug ua ib tug ntseeg Yexus nua lov?”

29Paulus teb tas, “Txawm yog yuav qha tuablu hab ntev los xij, kuv thov Vaajtswv kuas koj hab taagnrho mej txhua tug kws taabtom noog kuv qha nubnua, kuas mej dlhau lug zoole kuv, tsuas yog thov kuas mej tsi xob raug luas muab saw hlau khi le kuv raug nuav xwb.”

30Tes Vaajntxwv Akipas, tug Tswvxeev Fexatus, Npawnikes hab taagnrho cov tuabneeg kws nyob ntawd txawm sawv, 31hab thaus puab tawm moog lawm, puab sisthaam has tas, “Tug txivneej nuav tsi tau ua ib qhov txhum kws tsimnyog tuag lossis txaus muab kaw rua huv tsev lojcuj.” 32Vaajntxwv Akipas txhaj has rua Fexatus has tas, “Yog tug txivneej nuav tsi xob thov moog has tim Xixas tes peb cale muab nwg tso moog los yeej tau.”

Currently Selected:

Tegnum 26: HNJ2022

Highlight

Copy