Maꞈtehˬ 7

Aˬ cawˬ-ahˇ yaw lehˬ taˬ poˆ

(Luˇkaꞈ 6.37-38,41-42)

1“Aˬ cawˬ-ahˇ yaw lehˬ taˬ poˆ. Aˬ cawˬ-ahˇ yaw lehˬ maˬ poˆ naˇ, naw maꞈ-ahˇ kʼawꞈ Miˬyehˇ yaw lehˬ maˬ poˆ-aˇ. 2Aˬ jeˬ miˇ neh ehˇ naˇ, aˬ cawˬ-ahˇ naw maꞈ yaw lehˬ poˆ-eu loꞈ-ehˇ, naw maꞈ-ahˇ kʼawꞈ Miˬyehˇ yaw lehˬ poˆ tehꞈ-a. Naw maꞈ aˬ cawˬ-ahˇ kʼaˇ haw doeˇ-euˬ naˆ ni, naw maꞈ-ahˇ Miˬyehˇ haw doeˇ tehꞈ-a. 3Yawˬ ha-euˬ myaˆ nuiˆ-ahˇ tsmˬ-eu diˬ tm-ahˇ maˬ shaˇ sawˇ-ehˇ, yawˬ ha-euˬ mehˇ nmˇ-euˬ myaˆ nuiˆ-ahˇ ahˇ-eu myaˆ pawꞈ pawꞈ zaˬ tiˬ hmˬ-ahˇ aˬ jeˬ miˇ neh toeˬ ceh te. 4Yawˬ ha-euˬ myaˆ nuiˆ-ahˇ diˬ tm tsmˬ luꞈ ngeh, ‘Nawˬ-euˬ myaˆ nuiˆ-ahˇ ahˇ-eu myaˆ pawꞈ ngaˇ pehˆ doˆ nehˬ nyaˇ’ lehˇ, nawˬ-euˬ mehˇ nmˇ-ahˇ nawˇ aˬ joˆ-ehˇ ehˇ leˇ coeˇ-eu nya. 5Awꞈ-aꞈ tahˬ kʼoˬ-ahˇ duˇ-eu tsawˇ haˬ#7.5 ‘Awꞈ-aꞈ tahˬ kʼoˬ-ahˇ duˇ-eu tsawˇ haˬ’ lehˇehˇ-eu dawˬ tsuiꞈ, 6.2-ahˇ haw-awˬ -oˇ, nawˬ-euˬ myaˆ nuiˆ-ahˇ tsmˬ-eu diˬ tm jeˬ huˬ baꞈ doˆ-awˬ. kʼoeˇ sawˇ miˇ tsa, nawˬ-euˬ mehˇ nmˇ-euˬ myaˆ nuiˆ-ahˇ ahˇ-eu myaˆ pawꞈ aˬ joˆ-ehˇ pehˆ doˆ paˬ nga lehˇ, nawˬ-ahˇ mawˇ duˬ laˇ tehꞈ-a.

6“Aˬ kuiˬ-ahˇ yaw muiˬ yaw shawˇ jeˬ taˬ biꞈ. Aˬ kuiˬ kʼoeˇ naw maꞈ-ahˇ kawꞈ laˇ tehꞈ-a. Aˬ zaꞈ-ahˇ aˇ caˇ caˇ kʼawꞈ sehˇ taˬ dzeh nehˬ. Aˬ zaꞈ kʼoeˇ aˇ caˇ caˇ kʼawꞈ sehˇ-ahˇ nawˬ pahˬ tehꞈ-a.

Shaˇ-awˬ, poˆ-awˬ, laˇ gʼoˆ-ahˇ kʼoˆ-awˬ

(Luˇkaꞈ 11.9-13)

7“Shaˇ-awˬ. Shaˇ naˇ za tehꞈ-a. Poˆ-awˬ. Poˆ naˇ mawˇ tehꞈ-a. Laˇ gʼoˆ-ahˇ kʼoˆ-awˬ. Kʼoˆ naˇ pah nehˬ laꞈ tehꞈ-a. 8Aˬ jeˬ miˇ neh ehˇ naˇ, shaˇ-eu tsawˇ haˬ yawˬ gʼaˬ na luꞈ-ahˇ Miˬyehˇ biꞈ nehˬ tehꞈ-a. Poˆ-eu tsawˇ haˬ yawˬ gʼaˬ na luꞈ poˆ mawˇ nya ni, Miˬyehˇ caw ba tehꞈ-a. Laˇ gʼoˆ-ahˇ kʼoˆ-eu tsawˇ haˬ yawˬ gʼaˬ na luꞈ-ahˇ kʼawꞈ, Miˬyehˇ pah nehˬ tehꞈ-a. 9Naw maꞈ laꞈ kʼoeˇ, yawˬ ha-euˬ aˬ li kaˬ muˇ shaˇ dzaˬ gaˇ, kʼaˬ lo gʼoˆ nehˬ-eu aˬ da jawˇ meh loˇ. 10Maˬ ngeuˇ naˇ, yawˬ ha-euˬ aˬ li ngaˬ shaˬ shaˇ dzaˬ gaˇ, aˇ lawˇ nyehꞈ nehˬ-eu aˬ da jawˇ meh loˇ. 11Naw maꞈ iˬ baˇ mˇ-eu tsawˇ haˬ pyeuꞈ kʼawꞈ, yawˬ ha-euˬ zaˬ-ahˇ yaw muiˬ jeˬ biꞈ nehˬ-eu kʼoeˇ naˆ ni siˬ nya naˇ, mˬ kʼoeˇ taˆ jawˇ-eu naw maꞈ-euˬ Aˬda pyeuꞈ-eu Miˬyehˇ-aˬ, aˬ yawꞈ-ahˇ kʼaˇ shaˇ-eu tsawˇ haˬ deuˬ-ahˇ, yaw muiˬ jeˬ biꞈ-eu aˇ naˆ ni paˇ siˬ nya dzehˬ nmˇ.

12“Aˬ cawˬ neh yawˬ ha-ahˇ kʼaˇ bi mˇ nehˬ mawꞈ-eu loꞈ-ehˇ, aˬ cawˬ-ahˇ mˇ nehˬ-awˬ. Aˬ jeˬ miˇ neh ehˇ naˇ, dawˬ heu dawˬ-aˬ, Moˇseˬ-euˬ Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ neh mehˬ taˬ tsoˆ taˬ-euˬ dawˬ deuˬ laꞈ kʼoeˇ, dawˬ ma yaw dzahˇ pyeuꞈ-eu meh.

Gʼoˆ kʼehˬ yaw suꞈ

(Luˇkaꞈ 13.24)

13“Gʼoˆ kʼehˬ yaw suꞈ-ahˇ uˇ leˇ-awˬ. Luˬ-iˇ seˇ-iˇ-eu gaˇ ma-euˬ gʼoˆ kʼehˬ-aˬ, jeˇ dui dui-awˇ, gaˇ ma saˇ lehˆ ni dahˇ-eu miˇ neh, uˇ leˇ-eu tsawˇ haˬ yaw myaˬ meh. 14Ehˇ kʼawꞈ, dehˬ-eu saꞈ laˇ gaˇ ma-euˬ gʼoˆ kʼehˬ-aˬ, suꞈ dui dui-awˇ, gaˇ ma shaˬ dui dui-eu miˇ neh, gaˇ ma kʼoeˇ kahˇ poˆ mawˇ-eu tsawˇ haˬ yaw cuiˆ meh.

Aˇ siˬ hawˇ-eu aˇ bawˇ

(Luˇkaꞈ 6.43-44)

15“Miˬyehˇ gʼaˇ duˬ ngehˬ dah-eu jaˬ myawꞈ deuˬ-ahˇ yahˇ-awˬ. Aˬ yawꞈ maꞈ-aˬ, laꞈ nyiˇ paw haw ngeh yawˇ zaˬ loꞈ-ehˇ nahˬ jawˆ ni gʼeh gaˇ duˇ kʼawꞈ, laꞈ kʼoeˇ paw haiˬ dui dui-eu kʼaˬ yehˇ pyeuꞈ-eu meh. 16Aˬ yawꞈ maꞈ mˇ doˆ shaˇ doˆ laꞈ gaˇ haw naˇ, aˬ yawꞈ maꞈ aˬ joˆ-ehˇ gʼeh-eu tsawˇ haˬ pyeuꞈ-eu gaˇ kawˆ, naw maꞈ-ahˇ siˬ laˇ tehꞈ-a. Aˬ gah baw duˆ-ahˇ aˬ gaꞈ aˇ siˬ pyaˆ haw-euˬ jaˆ ta loˇ. Aˇ daꞈ aˇ bawˬ-ahˇ siˬ guˬ aˇ siˬ pyaˆ haw-euˬ jaˆ ta loˇ. 17Aˇ bawˇ yaw muiˬ-ahˇ aˇ siˬ yaw muiˬ siˬ le-awˇ, aˇ bawˇ yaw doeˇ-ahˇ aˇ siˬ yaw doeˇ siˬ le-eu meh. 18Aˇ bawˇ yaw muiˬ-ahˇ aˇ siˬ yaw doeˇ maˬ siˬ le nya-a. Kʼoeˇ gaˇ duˇ ni, aˇ bawˇ yaw doeˇ-ahˇ aˇ siˬ yaw muiˬ maˬ siˬ le nya-a. 19Aˇ siˬ yaw muiˬ maˬ kʼaˇ siˬ le-eu aˇ bawˇ deuˬ tuˇ dzeh-awˇ, miˬ dzaˬ-ahˇ baꞈ puiˆ-eu meh. 20Kʼoeˇ gaˇ duˇ ni, Miˬyehˇ gʼaˇ duˬ ngehˬ dah-eu jaˬ myawꞈ deuˬ-ahˇ, aˬ yawꞈ maꞈ neh mˇ doˆ shaˇ doˆ laꞈ-euˬ jeˬ-ahˇ haw-awˇ siˬ laˇ tehꞈ-a.

Naw maꞈ-ahˇ ngaˇ maˬ siˬ

(Luˇkaꞈ 13.25-27)

21“Ngaˬ-ahˇ ‘Sahˬ paˬ-oˇ, Sahˬ paˬ-oˇ’ lehˇ kʼaˇ kuˇ-eu tsawˇ haˬ yawˬ gʼaˬ na luꞈ, mˬ taˆ Miˇkʼahˬ-ahˇ ya uˇ leˇ-eu maˬ ngeuˇ-a. Mˬ kʼoeˇ taˆ jawˇ-eu ngaˬ Da nui ma tsaˬ-eu jeˬ mˇ-eu tsawˇ haˬ deuˬ tehꞈ-ehˇ ya uˇ leˇ-eu meh. 22Yaˇ kʼaˬ daˇ-eu aˇ nah keuˆ le ngeh, ‘Sahˬ paˬ-oˇ, Sahˬ paˬ-oˇ, nga maꞈ nawˬ-euˬ tsawˇ myahˇ-ahˇ gʼoe-awˇ Miˬyehˇ-euˬ dawˬ mehˬ-euˬ maˬ ngeuˇ-a loˇ. Nawˬ-euˬ tsawˇ myahˇ-ahˇ gʼoe-eu laꞈ kʼoeˇ nehꞈ teh doˆ-awˇ, zahˬ leˇ paˬ-ehˇ gʼeh-eu jeˬ kʼawꞈ mˇ-euˬ maˬ ngeuˇ-a loˇ’ lehˇ, tsawˇ haˬ gʼawˬ mya gʼaˬ ehˇ tehꞈ-a. 23Kʼoeˇ ngeh, ‘Naw maꞈ-ahˇ ngaˇ maˬ siˬ. Miˬyehˇ nui ma maˬ tsaˬ-eu jeˬ mˇ-euˬ tsawˇ haˬ deuˬ-oˇ, ngaˇ maˬ mawˇ gaˇ iˇ byoˆ-awˬ’ lehˇ, aˬ yawꞈ maꞈ-ahˇ ngaˇ ehˇ nehˬ ma.

Nymˇ tsoˆ-eu nyiˬ jeˬ

(Luˇkaꞈ 6.47-49)

24“Ngaˬ neh mehˬ-euˬ dawˬ-ahˇ ya gaˬ-awˇ naˇ haˬ geuꞈ-eu tsawˇ haˬ yawˬ gʼaˬ na luꞈ, kʼaˬ lo kʼoeˇ taˆ nymˇ tsoˆ-eu#7.24 ‘Kʼaˬ lo kʼoeˇ taˆ nymˇ tsoˆ-eu’ lehˇ ehˇ-eu-aˬ, zeuˇ dahˇ dahˇ-awˇ tsoˆ gaˇ ehˇ-eu naˆ maˬ tseˇ, kʼaˬ lo lo ma kʼoeˇ taˆ kʼawˇ zeuˇ ziꞈ dah ni ka-awˇ tsoˆ gaˇ ehˇ mawꞈ-eu meh. Yuˇdaˆ tsawˇ haˬ-euˬ nymˇ tiˬ paˆ na deuˬ kʼoeˇ loꞈ-ehˇ tsoˆ taˬ-euˬ meh. noeˬ dahˇ doe-eu tsawˇ haˬ-ahˇ duˇ-eu meh. 25Uˬ yehˇ yehˇ le-awˇ, iˇ jeuˬ jeuˬ le-eu uˬ taꞈ, jaˬ lehˇ lehˇ ma ciˬ tahˬ ciˬ tuˆ laˇ kʼawꞈ, kʼaˬ lo kʼoeˇ taˆ tsoˆ taˬ-euˬ miˇ neh, nymˇ kʼoeˇ nymˇ maˬ coˬ-iˇ-a.

26Ngaˬ neh mehˬ-euˬ dawˬ-ahˇ ya gaˬ-awˇ maˬ naˇ haˬ geuꞈ-eu tsawˇ haˬ yawˬ gʼaˬ na luꞈ, kʼaˇ shuiꞈ kʼoeˇ taˆ nymˇ tsoˆ-eu aˬ dzawˬ aˇ gah-ahˇ duˇ-eu meh. 27Uˬ yehˇ yehˇ le-awˇ, iˇ jeuˬ jeuˬ le-eu uˬ taꞈ, jaˬ lehˇ lehˇ ma ciˬ tahˬ ciˬ tuˆ laˇ ngeh, nymˇ kʼoeˇ nymˇ coˬ dzeh-iˇ-eu meh. Coˬ dzeh-iˇ-eu kʼoeˇ-aˬ, coˬ pyaˆ coˬ shaˆ jiˇ-eu meh.”

Baoˬ ahˇ-eu laꞈ kʼoeˇ mehˬ-eu tsoˆ-eu

28Yeˬsuˇ dawˬ kʼoeˇ deuˬ mehˬ nehˬ tsoˆ nehˬ gʼaˬ ngeh, aˬ yawꞈ mehˬ nehˬ tsoˆ nehˬ gaˇ ya gaˬ-euˬ tsawˇ haˬ aˇ maꞈ kʼoeˇ deuˬ zahˬ dui dui leˇ-euˬ meh. 29Aˬ jeˬ miˇ neh ehˇ naˇ, aˬ yawꞈ mehˬ-eu tsoˆ-eu kʼoeˇ-aˬ, Zahˇ dawˬ kʼoꞈ dawˬ mehˬ-eu saˬ laˬ deuˬ mehˬ nehˬ tsoˆ nehˬ gaˇ maˬ duˇ-ehˇ, baoˬ tiˬ byah ni ahˇ-eu laꞈ kʼoeˇ mehˬ-eu tsoˆ-eu jeˬ pyeuꞈ-eu meh.

Currently Selected:

Maꞈtehˬ 7: AHK

Highlight

Compare

Copy