Maꞈtehˬ 6

Gamꞈ nehˬ-eu gaˇ kawˆ

1“Uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-eu muiˬ-eu jaˬ-eu gaˇ deuˬ-ahˇ naw maꞈ mˇ ngeh, aˬ cawˬ mawˇ ni mˇ-eu jeˬ taˬ bi pyeuꞈ. Kʼoeˇ loꞈ-ehˇ jahˇ naˇ, mˬ kʼoeˇ taˆ jawˇ-eu naw maꞈ-euˬ Aˬda naw maꞈ-ahˇ guiˬ lahˬ maˬ biꞈ-a.

2“Shaˬ-eu zahˬ-eu tsawˇ haˬ deuˬ-ahˇ gamꞈ nehˬ ngeh, awꞈ-aꞈ tahˬ kʼoˬ-ahˇ duˇ-eu tsawˇ haˬ deuˬ#6.2 ‘Awꞈ-aꞈ tahˬ kʼoˬ-ahˇ duˇ-eu tsawˇ haˬ’ lehˇ ehˇ-eu-aˬ, awꞈ-aꞈ tahˬ kʼoˬ aˇ siˬ loꞈ-ehˇ, laꞈ nyiˇ paw haw ngeh yaw muiˬ kʼawꞈ, laꞈ kʼoeˇ paw doeˇ dui dui-eu tsawˇ haˬ deuˬ-ahˇ ehˇ-eu meh. ‘Hypocrite’ lehˇ ehˇ-eu Heˬlaˬsaˇ dawˬ-ahˇ Aˬkaˬ gʼoˆ shaw nya ni yuˇ doˆ taˬ-euˬ jeˬ pyeuꞈ-eu meh. loꞈ-ehˇ, daˇ heh baw baw-ehˇ gamꞈ-eu jeˬ taˬ jahˇ. Aˬ yawꞈ maꞈ-aˬ, aˬ cawˬ bi ciˬ poeˬ-eu gʼaˇ duˬ, uˬ duˬ tahˬ nymˇ laꞈ kʼoeˇ maˬ ehˇ, gaˇ ma doe ni maˬ ehˇ, daˇ heh baw-awˇ gamꞈ nehˬ-eu meh. Ngaˇ dawˇ coe ni ehˇ nehˬ nyaˇ. Aˬ yawꞈ maꞈ-aˬ, yawˬ ha kʼaˇ za paˬ-ehˇ gʼeh-eu guiˬ lahˬ za gʼaˬ jiˇ-euˬ gaˇ duˇ meh. 3Ehˇ kʼawꞈ, shaˬ-eu zahˬ-eu tsawˇ haˬ deuˬ-ahˇ nawˇ gamꞈ nehˬ ngeh, aˇ maˇ laꞈ neh mˇ-euˬ jeˬ aˇ caˇ laꞈ maˬ bi siˬ ni jahˇ-awˬ. 4Nawˇ kʼoeˇ loꞈ-ehˇ jahˇ ngeh, aˬ cawˬ tiˬ gʼaˬ-iˬ maˬ siˬ nya-a. Ehˇ kʼawꞈ, tsawˇ haˬ zaˬ maˬ mawˇ nya-eu jeˬ-ahˇ mawˇ nya-eu nawˬ-euˬ Aˬda nawˬ-ahˇ guiˬ lahˬ biꞈ tehꞈ-a.

Guiˬ lahˬ shaˇ-eu gaˇ kawˆ mehˬ-eu

(Luˇkaꞈ 11.2-4)

5“Nawˇ guiˬ lahˬ shaˇ ngeh, awꞈ-aꞈ tahˬ kʼoˬ-ahˇ duˇ-eu tsawˇ haˬ deuˬ#6.5 ‘Awꞈ-aꞈ tahˬ kʼoˬ-ahˇ duˇ-eu tsawˇ haˬ deuˬ’ lehˇ ehˇ-eu dawˬ tsuiꞈ, 6.2-ahˇ haw-awˬ. loꞈ-ehˇ taˬ jahˇ. Aˬ yawꞈ maꞈ-aˬ, aˬ cawˬ bi haw mawˇ-eu gʼaˇ duˬ, uˬ duˬ tahˬ nymˇ laꞈ kʼoeˇ hawˇ-eu gaˇ ma gaˇ tsmˇ doe ni yawꞈ-awˇ guiˬ lahˬ shaˇ-eu meh. Ngaˇ dawˇ coe ni ehˇ nehˬ nyaˇ. Aˬ yawꞈ maꞈ-aˬ, yawˬ ha kʼaˇ za paˬ-ehˇ gʼeh-eu guiˬ lahˬ za gʼaˬ jiˇ-euˬ gaˇ duˇ meh. 6Ehˇ kʼawꞈ, nawˇ guiˬ lahˬ shaˇ ngeh, kuˆ lawˆ laꞈ kʼoeˇ uˇ leˇ-awˇ, laˇ gʼoˆ piˬ tehˬ taˬ-awˇ, maˬ mawˇ laˇ-eu nawˬ-euˬ Aˬda-ahˇ shaˇ-awˬ. Tsawˇ haˬ zaˬ maˬ mawˇ-eu jeˬ-ahˇ mawˇ nya-eu nawˬ-euˬ Aˬda nawˬ-ahˇ guiˬ lahˬ biꞈ laꞈ tehꞈ-a.

7“Naw maꞈ guiˬ lahˬ shaˇ ngeh, lawˇ ciꞈ zaˬ deuˬ guiˬ lahˬ shaˇ-eu loꞈ-ehˇ, gaˇ dahˇ maˬ tsoeˬ-eu dawˬ gʼawˬ mya ni taˬ ngehˬ. Aˬ yawꞈ maꞈ guiˬ lahˬ gʼawˬ myahˇ ni shaˇ-eu baˬ da neh, Miˬyehˇ-ahˇ gaˬ leˇ tehꞈ-a lehˇ noeˬ-eu meh. 8Aˬ yawꞈ maꞈ loꞈ-ehˇ taˬ gʼeh. Aˬ jeˬ miˇ neh ehˇ naˇ, naw maꞈ maˬ shaˇ mi naˆ-ehˇ, kʼaˇ loˬ-eu jeˬ naw maꞈ-euˬ Aˬda siˬ nya luꞈ meh. 9Naw maꞈ guiˬ lahˬ shaˇ ngeh, heu loꞈ-ehˇ shaˇ-awˬ.

‘Mˬ kʼoeˇ taˆ jawˇ-eu nga maꞈ-euˬ Aˬda-oˇ,

Nawˬ-euˬ tsawˇ myahˇ-ahˇ yaw zeu baw luꞈ-uˇ.

10Nawˬ-euˬ miˇ kʼahˬ keuˆ le luꞈ-uˇ.

Nawˇ nui kʼahˇ shiˇ-eu jeˬ,

mˬ kʼoeˇ taˆ mˇ byah-euˬ loꞈ-ehˇ,

miˇ tsaˬ kʼoeˇ taˆ mˇ byah luꞈ-uˇ.

11Iˬ nah loˬ-eu dzaˬ-eu jeˬ,

iˬ nah biꞈ nehˬ laꞈ.

12Aˬ cawˬ mˇ bahˬ laꞈ-euˬ jeˬ-ahˇ,

nga maꞈ iˬ baˇ pyehˬ-euˬ loꞈ-ehˇ,

nga maꞈ mˇ bahˬ taˬ-euˬ jeˬ-ahˇ,

nawˇ iˬ baˇ pyehˬ nehˬ laꞈ.

13Iˬ baˇ muˇ juˇ mehˬ nah,

taˬ bi iˇ laꞈ,

Yaw haiˬ laꞈ kʼoeˇ,

bi dzeuˇ-iˇ laꞈ.’

14Aˬ jeˬ miˇ neh ehˇ naˇ, aˬ cawˬ neh naw maꞈ-ahˇ mˇ bahˬ-euˬ iˬ baˇ-ahˇ naw maꞈ pyehˬ nehˬ naˇ, naw maꞈ neh mˇ bahˬ-euˬ iˬ baˇ-ahˇ, mˬ kʼoeˇ taˆ jawˇ-eu naw maꞈ-euˬ Aˬda pyehˬ nehˬ laꞈ tehꞈ-a. 15Ehˇ kʼawꞈ, naw maꞈ aˬ cawˬ-ahˇ iˬ baˇ maˬ pyehˬ nehˬ naˇ, mˬ kʼoeˇ taˆ jawˇ-eu naw maꞈ-euˬ Aˬda kʼawꞈ, naw maꞈ neh mˇ bahˬ-euˬ jeˬ-ahˇ iˬ baˇ maˬ pyehˬ nehˬ laꞈ-aˇ.

Maˬ dzaˬ-eu zahˇ jahˇ-eu gaˇ kawˆ

16“Naw maꞈ maˬ dzaˬ-eu zahˇ jahˇ ngeh, aˬ cawˬ bi mawˇ-eu gʼaˇ duˬ jahˇ-eu tsawˇ haˬ deuˬ loꞈ-ehˇ, myaˆ pyawˬ nyoeˬ kʼeuˇ ni taˬ gʼeh. Aˬ yawꞈ maꞈ maˬ dzaˬ ni dzahˬ luꞈ gaˇ aˬ cawˬ haw siˬ nya ni, myaˆ pyawˬ ciˇ jawꞈ ni jawˇ-eu meh. Ngaˇ maˇ jawˆ ni ehˇ nehˬ nyaˇ. Aˬ yawꞈ maꞈ-aˬ, yawˬ ha kʼaˇ za paˬ-ehˇ gʼeh-eu guiˬ lahˬ za gʼaˬ jiˇ-euˬ gaˇ duˇ-eu meh. 17Naw maꞈ maˬ dzaˬ-eu zahˇ jahˇ ngeh, myaˆ duꞈ puꞈ shawˇ-awˇ, uˬ duˬ kaˆ juˇ-awˬ. 18Kʼoeˇ loꞈ-ehˇ jahˇ ngeh, naw maꞈ maˬ dzaˬ ni dzahˬ luꞈ-eu gaˇ kawˆ, tsawˇ haˬ zaˬ deuˬ maˬ mawˇ nya kʼawꞈ, tsawˇ haˬ zaˬ maˬ mawˇ nya gaˇ jawˇ-eu naw maꞈ-euˬ Aˬda mawˇ tehꞈ-a. Tsawˇ haˬ zaˬ maˬ mawˇ nya-eu jeˬ-ahˇ mawˇ luꞈ-eu naw maꞈ-euˬ Aˬda, naw maꞈ-ahˇ guiˬ lahˬ biꞈ laꞈ tehꞈ-a.

Mˬ kʼoeˇ taˆ pyuˇ shuiˇ myawˬ gahˬ poˆ uiˬ taˬ-awˬ

(Luˇkaꞈ 12.33-34)

19“Naw maꞈ yawˬ ha gʼaˇ duˬ miˇ tsaˬ kʼoeˇ taˆ pyuˇ shuiˇ myawˬ gahˬ taˬ poˆ uiˬ taˬ. Miˇ tsaˬ kʼoeˇ taˆ poˆ uiˬ taˬ naˇ, shmˇ kaw kaw leˇ nya, boeˬ dzaˬ leˇ nya-awˇ, smˇ kʼoeˬ kʼawꞈ kʼoeˬ nya meh. 20Ehˇ kʼawꞈ, mˬ kʼoeˇ taˆ naw maꞈ-euˬ pyuˇ shuiˇ myawˬ gahˬ poˆ uiˬ taˬ-awˬ. Kʼoeˇ gaˇ-aˬ, shmˇ kaw maˬ kaw leˇ nya, boeˬ maˬ dzaˬ leˇ nya-eu uˬ taꞈ, smˇ kʼoeˬ kʼawꞈ maˬ kʼoeˬ leˇ nya-a. 21Aˬ jeˬ miˇ neh ehˇ naˇ, naw maꞈ neh pyuˇ shuiˇ myawˬ gahˬ kʼaˇ poˆ uiˬ taˬ-euˬ tsahˇ-ahˇ, naw maꞈ-euˬ nui ma jaˆ tehꞈ-a.

Gʼawˇ mawˇ-euˬ tsiˇ kʼmˬ

(Luˇkaꞈ 12.34-36)

22“Myaˆ nuiˆ-aˬ gʼawˇ mawˇ-euˬ tsiˇ kʼmˬ pyeuꞈ-eu meh. Kʼoeˇ miˇ neh, nawˬ-euˬ myaˆ nuiˆ yaw muiˬ naˇ, nawˬ-euˬ gʼawˇ mawˇ mawˇ lah-ehˇ yaw shehꞈ bya tehꞈ-a. 23Ehˇ kʼawꞈ, nawˬ-euˬ myaˆ nuiˆ maˬ muiˬ naˇ, nawˬ-euˬ gʼawˇ mawˇ mawˇ lah-ehˇ zahˇ tsui ni jaˆ tehꞈ-a. Kʼoeˇ miˇ neh, nawˬ-euˬ laꞈ kʼoeˇ ahˇ-eu yaw shehꞈ kʼoeˇ zahˇ tsui ni gʼeh naˇ, yaw zahˇ kʼoeˇ aˇ naˆ ni doeˇ nmˇ.

Miˬyehˇ hawˇ-eu pyuˇ shuiˇ myawˬ gahˬ

(Luˇkaꞈ 16.13; 12.22-31)

24“Tsawˇ haˬ tiˬ gʼaˬ-iˬ sahˬ paˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ-aˬ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.

25“Kʼoeˇ miˇ neh, naw maꞈ-ahˇ ngaˇ heu loꞈ-ehˇ ehˇ-eu ma. Naw maꞈ yaw dehꞈ dehꞈ nya ni, aˬ joˆ-ehˇ ya dzaˬ ya dawˇ-eu gaˇ kawˆ hawˇ-eu, naw maꞈ-euˬ gʼawˇ mawˇ gʼaˇ duˬ aˬ joˆ-ehˇ ya dm ya gʼaˬ-eu gaˇ kawˆ kʼahˬ taˬ lahˇ. Yaw dehꞈ dehꞈ-eu jeˬ-aˬ, dzaˬ dzaˬ dawˇ dawˇ naˆ maˬ tseˇ poeˬ-awˇ, gʼawˇ mawˇ kʼawꞈ, dm gʼaˬ dm lmˇ naˆ maˬ tseˇ poeˬ-eu maˬ ngeuˇ-a loˇ. 26Kʼoeˇ taˆ paw zaw luꞈ-eu aˇ jiˇ deuˬ-ahˇ haw sheˇ. Aˇ jiˇ kʼoeˇ deuˬ cehˇ maˬ ka-a. Cehˇ maˬ yehˬ-a. Cehˇ jiˇ-ahˇ cehˇ maˬ pi ahˇ-a. Ehˇ kʼawꞈ, mˬ kʼoeˇ taˆ jawˇ-eu naw maꞈ-euˬ Aˬda, aˇ jiˇ kʼoeˇ deuˬ-ahˇ bi dzaˬ bi dawˇ-eu meh. Aˇ jiˇ kʼoeˇ deuˬ naˆ maˬ tseˇ naw maꞈ poeˬ dzehˬ-eu maˬ ngeuˇ te loˇ. 27Kʼahˬ lahˇ-eu miˇ neh yawˬ ha-euˬ ziˇ tiˬ caˆ bi mahˇ dzehˬ laˇ nya-eu aˬ suˇ gʼaˬ jawˇ te.

28“Aˬ jeˬ miˇ neh dm gʼaˬ dm lmˇ gaˇ kawˆ naw maꞈ kʼahˬ lahˇ te. Bawˇ tsahˬ-ahˇ dehꞈ-eu aˇ yehˆ gaˇ kawˆ shaˇ noeˬ haw sheˇ. Aˬ yawꞈ maꞈ saˬ laˬ maˬ gʼawˇ, saˬ nmˇ maˬ zaꞈ-a. 29Ehˇ kʼawꞈ, ngaˇ naw maꞈ-ahˇ ehˇ nehˬ nyaˇ. Yaw shehꞈ kʼahˬ sehˇ huiˬ dui dui-eu sahˬ paˬ Sawˇlaˬmoˬ neh dm-euˬ poeˬ dui dui-eu dm gʼaˬ dm lmˇ-aˬ, aˇ yehˆ kʼoeˇ tiˬ yehˆ naˆ ni kʼawꞈ maˬ haw muiˬ-a. 30Iˬ nah dehꞈ luꞈ kʼawꞈ, ni shawˬ miˬ dzaˬ-ahˇ bi jehˆ puiˆ jiˇ-eu bawˇ tsahˬ jaˆ guˬ jaˆ gaˆ-ahˇ Miˬyehˇ kʼoeˇ naˆ ni bi dm bi gʼaˬ-eu ngeuˇ naˇ, naw maꞈ-ahˇ kʼoeˇ naˆ maˬ tseˇ maˬ bi dm maˬ bi gʼaˬ-aˇ loˇ. Aˬ jeˬ miˇ neh jah-eu gʼaˬ byehˆ byehˆ te.

31Kʼoeˇ miˇ neh, aˬ joˆ-ehˇ ya dzaˬ ya dawˇ-eu gaˇ kawˆ hawˇ-eu, aˬ joˆ-ehˇ ya dm ya gʼaˬ-eu gaˇ kawˆ kʼahˬ taˬ lahˇ. 32Lawˇ ciꞈ zaˬ deuˬ-aˬ, kʼoeˇ loꞈ-ehˇ gʼeh-eu gaˇ kawˆ tehꞈ-ehˇ shaˇ noeˬ luꞈ meh. Kʼoeˇ deuˬ dawˬ tawˆ luꞈ-ahˇ naw maꞈ loˬ meh lehˇ, mˬ kʼoeˇ taˆ jawˇ-eu naw maꞈ-euˬ Aˬda siˬ nya luꞈ meh. 33Miˬyehˇ-euˬ Miˇ kʼahˬ hawˇ-eu aˬ yawꞈ-euˬ yaw tsaˬ yaw dawˇ jeˬ-ahˇ jeˬ huˬ poˆ-awˬ. Nui jeˬ dawˬ tawˆ luꞈ, aˬ yawꞈ naw maꞈ-ahˇ biꞈ lahˬ laꞈ tehꞈ-a. 34Kʼoeˇ miˇ neh, ni shawˬ gʼaˇ duˬ iˬ nah kʼahˬ taˬ lahˇ. Ni shawˬ nah kʼahˬ lahˇ paˬ-ehˇ gʼeh-eu jeˬ, ni shawˬ nah tiˬ byah tiˬ loꞈ jaˆ luꞈ meh. Yawˬ nah na luꞈ, aˬ yawꞈ ngeh nah kʼahˬ lahˇ-eu jeˬ tiˬ loꞈ jaˆ meh.

Currently Selected:

Maꞈtehˬ 6: AHK

Highlight

Compare

Copy