Luˇkaꞈ 6:27-49

Ehˇ kʼawꞈ, ngaˬ-euˬ ehˇ dawˬ ya gaˬ-euˬ tsawˇ haˬ deuˬ pyeuꞈ-eu naw maꞈ-ahˇ ngaˇ heu loꞈ-ehˇ ehˇ-eu ma. Naw maꞈ-ahˇ muiˇ-eu tsawˇ haˬ deuˬ-ahˇ gaˬ-awˬ. Naw maꞈ-ahˇ bye-eu tsawˇ haˬ deuˬ-ahˇ yaw muiˬ jeˬ mˇ nehˬ-awˬ. Naw maꞈ-ahˇ yaˬ kʼehˇ yaˬ-eu tsawˇ haˬ deuˬ-ahˇ dawˬ ngehˬ gʼeh nehˬ-awˬ. Naw maꞈ-ahˇ yehˬ bawˬ sehˇ lu-ehˇ jahˇ nehˬ laꞈ-euˬ tsawˇ haˬ deuˬ gʼaˇ duˬ guiˬ lahˬ shaˇ nehˬ-awˬ. Nawˬ-euˬ baˬ ba-ahˇ tehˆ laˇ-eu tsawˇ haˬ-ahˇ, baˬ ba yawˬ pyawˬ yawˬ paˇ ciˬ daˬ nehˬ-awˬ. Kʼoeˇ taˆ dm daˆ taˬ-eu pehˇ kʼahˬ yuˇ geuꞈ laˇ-eu tsawˇ haˬ-ahˇ, laꞈ kʼoeˇ dm ahˇ taˬ-euˬ kahˇ kʼawꞈ bi yuˇ geuꞈ-awˬ. Nawˬ-ahˇ kʼaˇ shaˇ-eu tsawˇ haˬ-ahˇ biꞈ-awˬ. Nawˬ-euˬ myawˬ yuˇ geuꞈ-eu tsawˇ haˬ-ahˇ taˬ shaˇ kʼoꞈ. Aˬ cawˬ neh naw maꞈ-ahˇ kʼaˇ bi mˇ nehˬ mawꞈ-eu loꞈ-ehˇ, naw maꞈ aˬ cawˬ-ahˇ mˇ nehˬ-awˬ. “Naw maꞈ-ahˇ gaˬ-eu tsawˇ haˬ deuˬ-ahˇ tehꞈ-ehˇ gaˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ, yawˬ ha-ahˇ gaˬ-eu tsawˇ haˬ deuˬ-ahˇ gaˬ-eu siˬ nya meh. Naw maꞈ-ahˇ yaw muiˬ jeˬ mˇ nehˬ laꞈ-eu tsawˇ haˬ deuˬ-ahˇ tehꞈ-ehˇ yaw muiˬ jeˬ mˇ kʼoꞈ nehˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ kʼoeˇ loꞈ-ehˇ mˇ kʼoꞈ nehˬ-eu siˬ nya meh. Biꞈ kʼoꞈ laꞈ nya meh lehˇ noeˬ tmˬ coeˇ-eu tsawˇ haˬ deuˬ-ahˇ tehꞈ-ehˇ ngaˬ nehˬ paˇ nehˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ, kʼoeˇ loꞈ-ehˇ za kʼoꞈ gaˇ noeˬ tmˬ-awˇ, aˬ yawꞈ maꞈ yaw kaˬ ngaˬ nehˬ paˇ nehˬ-eu meh. Ehˇ kʼawꞈ, naw maꞈ-ahˇ muiˇ-eu deuˬ-ahˇ gaˬ-awˬ. Yaw muiˬ jeˬ mˇ-awˬ. Biꞈ kʼoꞈ nehˬ laꞈ gaˇ maˬ noeˬ tmˬ ni ngaˬ nehˬ paˇ nehˬ-awˬ. Kʼoeˇ loꞈ-ehˇ jahˇ naˇ, naw maꞈ gʼaˇ duˬ laꞈ sawˬ huiˬ dui dui-awˇ, Huiˬ dui Mahˇ dui dui-eu Gʼaˬ-euˬ zaˬ naw maꞈ pyeuꞈ laˇ tehꞈ-a. Aˬ jeˬ miˇ neh ehˇ naˇ, guiˬ lahˬ-ahˇ maˬ noeˬ mawˇ nya-eu tsawˇ haˬ hawˇ-eu haiˬ-eu tsawˇ haˬ deuˬ-ahˇ, aˬ yawꞈ gʼawˬ shaˬ gaˬ-eu meh. Naw maꞈ-euˬ Aˬda gʼawˬ shaˬ gaˬ-eu nui ma ahˇ-eu loꞈ-ehˇ, naw maꞈ kʼawꞈ ahˇ-awˬ. “Aˬ cawˬ-ahˇ yaw lehˬ taˬ poˆ. Naw maꞈ aˬ cawˬ-ahˇ yaw lehˬ maˬ poˆ naˇ, Miˬyehˇ naw maꞈ-ahˇ yaw lehˬ maˬ poˆ-aˇ. Aˬ cawˬ-ahˇ yaˇ kʼaˬ taˬ daˇ. Naw maꞈ aˬ cawˬ-ahˇ yaˇ kʼaˬ maˬ daˇ naˇ, Miˬyehˇ naw maꞈ-ahˇ yaˇ kʼaˬ maˬ daˇ-aˇ. Aˬ cawˬ-ahˇ iˬ baˇ pyehˬ nehˬ-awˬ. Naw maꞈ aˬ cawˬ-ahˇ iˬ baˇ pyehˬ nehˬ naˇ, Miˬyehˇ naw maꞈ-ahˇ iˬ baˇ pyehˬ nehˬ laꞈ tehꞈ-a. Aˬ cawˬ-ahˇ biꞈ-awˬ. Naw maꞈ aˬ cawˬ-ahˇ biꞈ naˇ, Miˬyehˇ naw maꞈ-ahˇ biˬ laꞈ tehꞈ-a. Miˬyehˇ naw maꞈ-ahˇ biꞈ nehˬ laꞈ ngeh, byah dui dui-eu cehˇ pehˬ-ahˇ neh pehˬ-awˇ, dehˬ teuˇ zuˆ teuˇ-eu uˬ taꞈ, pu cu cu ni tawˆ ahˇ-awˇ, naw maꞈ-euˬ pehˇ kʼahˬ pehˇ dahˬ-ahˇ shehˆ ahˇ nehˬ laꞈ tehꞈ-a. Naw maꞈ neh aˬ cawˬ-ahˇ kʼaˇ biꞈ nehˬ-euˬ myaˆ ni, Miˬyehˇ naw maꞈ-ahˇ biꞈ nehˬ laꞈ tehꞈ-a.” Kʼoeˇ naˇ, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ nehˬ-euˬ meh. “Myaˆ behꞈ cawˬ cawˬ tiˬ gʼaˬ tiˇ gʼaˬ gaˇ ma sheuˬ mehˬ nya meh loˇ. Nyiˬ gʼaˬ luꞈ duˬ kʼahˬ-ahˇ maˬ ga ahˇ-aˇ loˇ. Dzaw zaˬ-aˬ, mehˬ zaˬ naˆ maˬ tseˇ huiˬ dzehˬ mahˇ dzehˬ ta loˇ. Ehˇ kʼawꞈ, dawˬ tawˆ luꞈ dzaw luiˆ jiˇ-euˬ dzaw zaˬ tiˬ gʼaˬ-aˬ, yawˬ ha-ahˇ mehˬ-euˬ saˬ laˬ gʼaˬ naˆ ni huiˬ keuˆ leˇ nya-eu meh. “Yawˬ ha-euˬ myaˆ nuiˆ-ahˇ tsmˬ-eu diˬ tm-ahˇ maˬ shaˇ sawˇ-ehˇ, nawˬ-euˬ mehˇ nmˇ-euˬ myaˆ nuiˆ-ahˇ tsmˬ-eu myaˆ pawꞈ pawꞈ zaˬ tiˬ hmˬ-ahˇ aˬ jeˬ miˇ neh toeˬ ceh te. Yawˬ ha-euˬ myaˆ nuiˆ-ahˇ diˬ tm tsmˬ luꞈ-eu maˬ mawˇ nya gaˇ, ‘Nawˬ-eu myaˆ nuiˆ-ahˇ ahˇ-eu myaˆ pawꞈ ngaˇ pehˆ doˆ nehˬ nyaˇ’ lehˇ, nawˬ-euˬ mehˇ nmˇ-ahˇ nawˇ aˬ joˆ-ehˇ ehˇ leˇ coeˇ-eu nya. Awꞈ-aꞈ tahˬ kʼoˬ-ahˇ duˇ-eu tsawˇ haˬ -oˇ. Nawˬ-euˬ myaˆ nuiˆ-ahˇ tsmˬ-eu diˬ tm jeˬ huˬ baꞈ doˆ-awˬ. Kʼoeˇ sahˇ miˇ tsa, nawˬ-euˬ mehˇ nmˇ-euˬ myaˆ nuiˆ-ahˇ ahˇ-eu myaˆ pawꞈ aˬ joˆ-ehˇ jahˇ-awˇ pehˆ doˆ nehˬ paˬ nga lehˇ, nawˬ-ahˇ mawˇ duˬ laˇ tehꞈ-a. “Aˇ bawˇ yaw muiˬ-ahˇ aˇ siˬ yaw doeˇ maˬ siˬ le nya-a. Kʼoeˇ gaˇ duˇ ni, aˇ bawˇ yaw doeˇ-ahˇ aˇ siˬ yaw muiˬ maˬ siˬ le nya-a. Aˬ gah baw duˆ-ahˇ siˬ guˬ aˇ siˬ maˬ pyaˆ haw-aˬ. Aˬ gah laꞈ cehˇ baw duˆ-ahˇ aˬ gaꞈ aˇ siˬ maˬ pyaˆ haw-aˬ. Tsawˇ haˬ yaw muiˬ-aˬ, yawˬ ha-euˬ nui ma laꞈ kʼoeˇ jeˬ hmˬ taˬ-euˬ yaw muiˬ jeˬ yuˇ doˆ laꞈ-awˇ, tsawˇ haˬ yaw haiˬ-aˬ, yawˬ ha-eu nui ma laꞈ kʼoeˇ shaˇ dawˆ taˬ-euˬ yaw haiˬ jeˬ beuˬ doˆ laꞈ-eu meh. Aˬ jeˬ miˇ neh ehˇ naˇ, nui ma laꞈ kʼoeˇ kʼaˇ ahˇ-eu jeˬ, kʼaˬ meh-ahˇ ngehˬ doˆ laꞈ-eu meh. “Ngaˬ neh ehˇ taˬ-euˬ loꞈ-ehˇ naw maꞈ maˬ mˇ gaˇ neh, aˬ jeˬ miˇ neh ngaˬ-ahˇ ‘Sahˬpaˬ-o, Sahˬpaˬ-oˇ’ lehˇ kuˇ te. Ngaˇ jawˇ gaˇ laˇ-awˇ, ngaˬ neh mehˬ-euˬ dawˬ gaˬ-awˇ naˇ haˬ geuꞈ-eu tsawˇ haˬ-aˬ, aˬ joˆ-ehˇ gʼeh-eu tsawˇ haˬ-ahˇ duˇ-eu gaˇ kawˆ, ngaˇ naw maꞈ-ahˇ mehˬ nehˬ nyaˇ. Aˬ yawꞈ-aˬ, yaw naꞈ naꞈ-ehˇ kʼahˬ-awˇ, kʼaˬ lo kʼoeˇ taˆ ziꞈ dah ni maˇ-awˇ tsoˆ-euˬ nymˇ tsoˆ-eu tsawˇ haˬ-ahˇ duˇ-eu meh. Iˇ jeuˬ jeuˬ le-awˇ nymˇ kʼoeˇ nymˇ-ahˇ ciˬ tahˬ ciˬ tuˆ kʼawꞈ, ziꞈ dah ni tsoˆ taˬ-euˬ miˇ neh, maˬ luˆ maˬ laˆ laˇ-a. Ehˇ kʼawꞈ, ngaˬ neh mehˬ-euˬ dawˬ gaˬ-awˇ maˬ naˇ haˬ geuꞈ-eu tsawˇ haˬ-aˬ, dawˬ pehˬ maˬ laˆ ziꞈ ni nymˇ tsoˆ-euˬ tsawˇ haˬ-ahˇ duˇ-eu meh. Iˇ jeuˬ jeuˬ le-awˇ nymˇ kʼoeˇ nymˇ-ahˇ ciˬ tahˬ ciˬ tuˆ ngeh, tiˬ poˆ tehꞈ-ehˇ coˬ dzeh-iˇ-awˇ, coˬ pyaˆ coˬ shaˆ jiˇ-eu meh.