Luˇkaꞈ 6
6
Jawˇ nah lah-eu gaˇ kawˆ naˇ haˬ-euˬ
(Maꞈtehˬ 12.1-8; Maˬkuˆ 2.23-28)
1Jawˇ nah#6.1 Heu-aˬ, Yuˇdaˆ tsawˇ haˬ-euˬ Jawˇ nah-ahˇ ehˇ-eu meh. 12.1-ahˇ haw-awˬ ngeh nah, Yeˬsuˇ cehˇ yaˇ-ahˇ iˇ paˆ gʼeh ngeh, aˬ yawꞈ-euˬ zaˬ lahˇ deuˬ cehˇ nmˇ tseuˆ-awˇ, aˬ laꞈ neh cehˇ pyuˇ tsuiꞈ doˆ dzaˬ-euˬ meh. 2Paˬliˬsehˇ tiˬ paˆ na deuˬ ehˇ-eu, “Aˬ jeˬ miˇ neh Jawˇ nah-ahˇ maˬ mˇ kʼmˬ-eu jeˬ naw maꞈ mˇ te.”
3Yeˬsuˇ ehˇ-eu, “Daˬbiˇ hawˇ-eu aˬ yawꞈ-euˬ mehˬ nah caw teh-euˬ tsawˇ haˬ deuˬ hawˬ mehꞈ laˇ ngeh, Daˬbiˇ aˬ joˆ-ehˇ jahˇ-euˬ gaˇ kawˆ naw maꞈ maˬ ya gui haw-aˬ loˇ. 4Miˬyehˇ-euˬ nymˇ laꞈ kʼoeˇ aˬ yawꞈ uˇ leˇ-awˇ, aˬ yawꞈ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ, Miˬyehˇ-ahˇ lawˇ nehˬ taˬ-euˬ kaˬ muˇ dzaˬ-euˬ maˬ ngeuˇ-a loˇ. Dzaˇ kʼoeˇ piˇ ma deuˬ maˬ ngeuˇ naˇ maˬ dzaˬ kʼmˬ-eu maˬ ngeuˇ-a loˇ.”
5Yeˬsuˇ paˇ ehˇ-eu, “Tsawˇhaˬ-euˬ Zaˬmaˇ-aˬ, Jawˇ nah-ahˇ uˆ lahˇ-eu Sahˬpaˬ meh.”
Aˬ laꞈ tiˬ pyawˬ shiˇ-euˬ tsawˇ haˬ tiˬ gʼaˬ
(Maꞈtehˬ 12.9-14; Maˬkuˆ 3.1-6)
6Jawˇ nah yawˬ nah yawˬ-ahˇ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ Yeˬsuˇ uˇ leˇ-awˇ, mehˬ nehˬ tsoˆ nehˬ-euˬ meh. Aˬ laꞈ aˇ maˇ pyawˬ shiˇ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. 7Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ Yeˬsuˇ-ahˇ yaw lehˬ poˆ mawꞈ-eu miˇ neh, Jawˇ nah ngeh nah aˬ yawꞈ naˇ gawˇ laˆ taˬ nehˬ nga loˇ lehˇ haw luꞈ-eu meh. 8Yeˬsuˇ aˬ yawꞈ maꞈ-euˬ nui noeˬ haw mawˇ-awˇ, aˬ laꞈ tiˬ pyawˬ shiˇ-euˬ tsawˇ haˬ kʼoeˇ gʼaˬ-ahˇ “Heu gaˇ yawꞈ laˇ-awˬ” lehˇ ehˇ nehˬ ngeh, tsawˇ haˬ kʼoeˇ gʼaˬ kʼoeˇ gaˇ yawꞈ leˇ-euˬ meh. 9Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ-ahˇ ngaˇ naˇ haˬ nyaˇ. Jawˇ nah ngeh nah Zahˇ dawˬ kʼoꞈ dawˬ aˬ dui-ahˇ aˬ jeˬ bi mˇ laꞈ ta. Yaw muiˬ jeˬ bi mˇ laꞈ ta loˇ. Maˬ muiˬ-eu jeˬ bi mˇ laꞈ ta loˇ. Aˬ cawˬ-euˬ saꞈ laˇ-ahˇ ka kʼoꞈ-eu jeˬ bi mˇ laꞈ ta loˇ. Aˬ cawˬ-euˬ saꞈ laˇ-ahˇ laˆ cawˆ-eu jeˬ bi mˇ laꞈ ta loˇ.” 10Yeˬsuˇ aˬ yawꞈ maꞈ-ahˇ tiˬ jawˬ haw doe-awˇ, aˬ laꞈ tiˬ pyawˬ shiˇ-euˬ tsawˇ haˬ kʼoeˇ gʼaˬ-ahˇ “Aˬ laꞈ caw ja-awˬ” lehˇ ehˇ nehˬ-euˬ meh. Tsawˇ haˬ kʼoeˇ gʼaˬ aˬ laꞈ cawˬ ja ngeh, laꞈ shiˇ shiˇ-eu taˬ leˇ-euˬ meh.
11Ehˇ kʼawꞈ, tsawˇ haˬ kʼoeˇ deuˬ nui ma pehˇ dui dui-awˇ, Yeˬsuˇ-ahˇ aˬ joˆ-ehˇ jahˇ nehˬ paˬ nga lehˇ, aˬ yawꞈ maꞈ yaw kaˬ bawˬ dzaˬ-euˬ meh.
Gʼaˬ kʼehˇ tseˇ nyiꞈ gʼaˬ-ahˇ tseˇ doˆ-euˬ
(Maꞈtehˬ 10.1-4; Maˬkuˆ 3.13-19)
12Aˇ nah aˇ yamˬ kʼoeˇ laꞈ kʼoeˇ, Yeˬsuˇ gawˬ jawˬ-ahˇ daˆ leˇ-awˇ guiˬ lahˬ shaˇ-euˬ meh. Uˬ ciꞈ miˇ lah-ehˇ Miˬyehˇ-ahˇ guiˬ lahˬ shaˇ bya-euˬ meh. 13Uˬ bya bya laˇ ngeh, aˬ yawꞈ-euˬ zaˬ lahˇ deuˬ-ahˇ kuˇ-awˇ, tseˇ nyiꞈ gʼaˬ tseˇ doˆ-awˇ, gʼaˬ kʼehˇ lehˇ myahˇ nehˬ-euˬ meh. 14Tseˇ doˆ-euˬ tseˇ nyiꞈ gʼaˬ-aˬ, aˬ yawꞈ neh Beˬtuˆluˆ lehˇ myahˇ nehˬ-euˬ Siˇmoˬ hawˇ-eu Siˇmoˬ-euˬ aˬ nyiˇ Aˬdehˬlehˬ, Yaˬkoˆ hawˇ-eu Yoˇhaˬ, Piˇliˇpuˆ, Baˬtawˇlaˬmehˇ, 15Maꞈtehˬ, Toˇmaˆ, Aˬlaˬpehˇ-euˬ aˬ li Yaˬkoˆ, Zeˬloˆ#6.15 ‘Zeˬloˆ’ lehˇ ehˇ-eu-aˬ, Loˇmaˆ sahˬ paˬ uˆ lahˇ-eu uˬ moˆ tiˬ pawꞈ-iˬ maˬ jawˇ mawꞈ-eu Yuˇdaˆ tsawˇ haˬ deuˬ-ahˇ ehˇ-eu meh. lehˇ kuˇ-eu Siˇmoˬ, 16Yaˬkoˆ-euˬ aˬ li Yuˇdaˆ, aˇ nah Yeˬsuˇ-ahˇ ahˬ dzaˬ-euˬ gʼaˬ pyeuꞈ-eu Yuˇdaˆ Iˇsaˬgaˬliˬoˆ, heu deuˬ meh.
Mehˬ nehˬ tsoˆ nehˬ-awˇ naˇ gawˇ laˆ taˬ nehˬ-euˬ
(Maꞈtehˬ 4.23-25)
17Yeˬsuˇ aˬ yawꞈ-euˬ gʼaˬ kʼehˇ deuˬ nehˬ-ehˇ gawˬ jawˬ-ahˇ neh zaꞈ ka le-awˇ, myaˬ dui dui-eu zaˬ lahˇ deuˬ nehˬ-ehˇ deh ga-ahˇ yawꞈ luꞈ-eu meh. Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ, iˬ ma laˆ shaˆ lawˇ deh-ahˇ jaˆ-eu Duˇlu meuˬ hawˇ-eu Siˇdoˬ meuˬ-ahˇ jawˇ-eu tsawˇ haˬ deuˬ uˬ taꞈ, Yuˇdaˆ miˇ kʼahˬ kʼahˬ lah ni jawˇ-eu tsawˇ haˬ deuˬ uiˬ laˇ-awˇ, tsawˇ haˬ myaˬ dui dui-eu meh. Aˬ yawꞈ mehˬ nehˬ tsoˆ nehˬ gaˇ naˇ haˬ-eu gʼaˇ duˬ hawˇ-eu, aˬ yawꞈ neh naˇ gawˇ bi laˆ taˬ-eu gʼaˇ duˬ, aˬ yawꞈ maꞈ uiˬ laˇ taˬ-euˬ meh. 18Nehꞈ yaw jawꞈ uˇ-eu baˬ da neh shaˬ luꞈ-eu tsawˇ haˬ deuˬ-ahˇ, aˬ yawꞈ laˆ taˬ nehˬ-euˬ meh. 19Tsawˇ haˬ aˇ maꞈ dawˬ tawˆ luꞈ, aˬ yawꞈ-ahˇ ya toeˬ tuˆ ni leh jeh-eu meh. Aˬ jeˬ miˇ neh ehˇ naˇ, aˬ yawꞈ-euˬ laꞈ kʼoeˇ baoˬ doˆ le-awˇ, aˬ yawꞈ maꞈ dawˬ tawˆ luꞈ-ahˇ naˇ gawˇ bi taˬ leˇ-eu meh.
Guiˬ lahˬ huiˬ-eu hawˇ-eu ya noeˬ shaˬ-eu
(Maꞈtehˬ 5.1-12)
20Yeˬsuˇ aˬ yawꞈ-euˬ zaˬ lahˇ deuˬ-ahˇ haw-awˇ ehˇ-eu,
“Naw maꞈ shaˬ-eu zahˬ-eu tsawˇ haˬ deuˬ guiˬ lahˬ huiˬ-eu meh.
Aˬjeˬ miˇ neh ehˇ naˇ, Miˬyehˇ Miˇkʼahˬ naw maꞈ-ahˇ oꞈ-eu meh.
21“Naw maꞈ nymˬ-mˇ mehꞈ luꞈ shuꞈ luꞈ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, naw maꞈ ya dzaˬ ya dawˇ dehˆ tehꞈ-a.
“Naw maꞈ nymˬ-mˇ ya ngoeˇ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, naw maꞈ ya uiˇ tehꞈ-a.
22“Tsawˇhaˬ-euˬ Zaˬmaˇ mehˬ nah naw maꞈ caw teh-eu baˬ da neh, aˬ cawˬ naw maꞈ-ahˇ muiˇ-eu, naw maꞈ-ahˇ sawˇ dzeh-awˇ yehˬ bawˬ sehˇ lu-ehˇ ehˇ-eu, naw maꞈ-euˬ tsawˇ myahˇ cawˆ-iˇ ni jahˇ-eu, heu loꞈ-ehˇ gʼeh-eu deuˬ-ahˇ naw maꞈ ya daˬ ngeh, naw maꞈ guiˬ lahˬ huiˬ-eu meh. 23Kʼoeˇ loꞈ-ehˇ gʼeh-eu jeˬ naw maꞈ kʼoeˇ taˆ keuˆ le ngeh, laˬ kʼaˬ cehˇ cehˇ-ehˇ tsawˬ-awˬ. Aˬ jeˬ miˇ neh ehˇ naˇ, mˬ kʼoeˇ taˆ naw maꞈ gʼaˇ duˬ lehˬ hmˬ taˬ-euˬ laꞈ sawˬ huiˬ dui dui meh. Miˬyehˇ gʼaˇ duˬ ngehˬ dah-euˬ tsawˇ haˬ deuˬ-ahˇ kʼawꞈ, aˬ yawꞈ maꞈ-euˬ aˬ poeˬ aˬ bawˇ deuˬ neh kʼoeˇ loꞈ-ehˇ jahˇ nehˬ-euˬ meh.
24“Ehˇ kʼawꞈ, naw maꞈ nymˬ-mˇ smˇ muiˬ muiˬ-eu deuˬ ya noeˬ shaˬ dui dui meh.
Aˬ jeˬ miˇ neh ehˇ naˇ, naw maꞈ nui kʼahˇ jaˆ-eu jeˬ naw maꞈ za dzeuˇ jiˇ-euˬ meh.
25“Naw maꞈ nymˬ-mˇ ya dzaˬ ya dawˇ luꞈ-eu tsawˇ haˬ deuˬ ya noeˬ shaˬ dui dui meh.
Aˬ jeˬ miˇ neh ehˇ naˇ, naw maꞈ kʼoeˇ taˆ mehꞈ-eu shuꞈ-eu jeˬ keuˆ le tehꞈ-a.
“Naw maꞈ nymˬ-mˇ uiˇ luꞈ-eu tsawˇ haˬ deuˬ ya noeˬ shaˬ dui dui meh.
Aˬ jeˬ miˇ neh ehˇ naˇ, naw maꞈ myaˆ biˇ ya doˆ-awˇ, tsawˇ ngoeˇ ya ngoeˇ tehꞈ-a.
26“Tsawˇ haˬ dawˬ tawˆ luꞈ naw maꞈ-ahˇ ja ceuˬ laˇ ngeh, naw maꞈ ya noeˬ shaˬ dui dui meh. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu jaˬ myawꞈ deuˬ-ahˇ kʼawꞈ, aˬ yawꞈ maꞈ-euˬ aˬ poeˬ aˬ bawˇ deuˬ neh kʼoeˇ loꞈ-ehˇ ja ceuˬ nehˬ-euˬ meh.
Yawˬ ha-ahˇ muiˇ-eu tsawˇ haˬ-ahˇ gaˬ-awˬ
(Maꞈtehˬ 5.38-48; 7.12a)
27Ehˇ kʼawꞈ, ngaˬ-euˬ ehˇ dawˬ ya gaˬ-euˬ tsawˇ haˬ deuˬ pyeuꞈ-eu naw maꞈ-ahˇ ngaˇ heu loꞈ-ehˇ ehˇ-eu ma. Naw maꞈ-ahˇ muiˇ-eu tsawˇ haˬ deuˬ-ahˇ gaˬ-awˬ. Naw maꞈ-ahˇ bye-eu tsawˇ haˬ deuˬ-ahˇ yaw muiˬ jeˬ mˇ nehˬ-awˬ. 28Naw maꞈ-ahˇ yaˬ kʼehˇ yaˬ-eu tsawˇ haˬ deuˬ-ahˇ dawˬ ngehˬ gʼeh nehˬ-awˬ. Naw maꞈ-ahˇ yehˬ bawˬ sehˇ lu-ehˇ jahˇ nehˬ laꞈ-euˬ tsawˇ haˬ deuˬ gʼaˇ duˬ guiˬ lahˬ shaˇ nehˬ-awˬ. 29Nawˬ-euˬ baˬ ba-ahˇ tehˆ laˇ-eu tsawˇ haˬ-ahˇ, baˬ ba yawˬ pyawˬ yawˬ paˇ ciˬ daˬ nehˬ-awˬ. Kʼoeˇ taˆ dm daˆ taˬ-eu pehˇ kʼahˬ yuˇ geuꞈ laˇ-eu tsawˇ haˬ-ahˇ, laꞈ kʼoeˇ dm ahˇ taˬ-euˬ kahˇ kʼawꞈ bi yuˇ geuꞈ-awˬ. 30Nawˬ-ahˇ kʼaˇ shaˇ-eu tsawˇ haˬ-ahˇ biꞈ-awˬ. Nawˬ-euˬ myawˬ yuˇ geuꞈ-eu tsawˇ haˬ-ahˇ taˬ shaˇ kʼoꞈ. 31Aˬ cawˬ neh naw maꞈ-ahˇ kʼaˇ bi mˇ nehˬ mawꞈ-eu loꞈ-ehˇ, naw maꞈ aˬ cawˬ-ahˇ mˇ nehˬ-awˬ.
32“Naw maꞈ-ahˇ gaˬ-eu tsawˇ haˬ deuˬ-ahˇ tehꞈ-ehˇ gaˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ, yawˬ ha-ahˇ gaˬ-eu tsawˇ haˬ deuˬ-ahˇ gaˬ-eu siˬ nya meh. 33Naw maꞈ-ahˇ yaw muiˬ jeˬ mˇ nehˬ laꞈ-eu tsawˇ haˬ deuˬ-ahˇ tehꞈ-ehˇ yaw muiˬ jeˬ mˇ kʼoꞈ nehˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ kʼoeˇ loꞈ-ehˇ mˇ kʼoꞈ nehˬ-eu siˬ nya meh. 34Biꞈ kʼoꞈ laꞈ nya meh lehˇ noeˬ tmˬ coeˇ-eu tsawˇ haˬ deuˬ-ahˇ tehꞈ-ehˇ ngaˬ nehˬ paˇ nehˬ naˇ, naw maꞈ aˬ jeˬ guiˬ lahˬ za nmˇ. Iˬ baˇ zaˬ deuˬ kʼawꞈ, kʼoeˇ loꞈ-ehˇ za kʼoꞈ gaˇ noeˬ tmˬ-awˇ, aˬ yawꞈ maꞈ yaw kaˬ ngaˬ nehˬ paˇ nehˬ-eu meh. 35Ehˇ kʼawꞈ, naw maꞈ-ahˇ muiˇ-eu deuˬ-ahˇ gaˬ-awˬ. Yaw muiˬ jeˬ mˇ-awˬ. Biꞈ kʼoꞈ nehˬ laꞈ gaˇ maˬ noeˬ tmˬ ni ngaˬ nehˬ paˇ nehˬ-awˬ. Kʼoeˇ loꞈ-ehˇ jahˇ naˇ, naw maꞈ gʼaˇ duˬ laꞈ sawˬ huiˬ dui dui-awˇ, Huiˬ dui Mahˇ dui dui-eu Gʼaˬ-euˬ zaˬ naw maꞈ pyeuꞈ laˇ tehꞈ-a. Aˬ jeˬ miˇ neh ehˇ naˇ, guiˬ lahˬ-ahˇ maˬ noeˬ mawˇ nya-eu tsawˇ haˬ hawˇ-eu haiˬ-eu tsawˇ haˬ deuˬ-ahˇ, aˬ yawꞈ gʼawˬ shaˬ gaˬ-eu meh. 36Naw maꞈ-euˬ Aˬda gʼawˬ shaˬ gaˬ-eu nui ma ahˇ-eu loꞈ-ehˇ, naw maꞈ kʼawꞈ ahˇ-awˬ.
Aˬ cawˬ-ahˇ yaw lehˬ taˬ poˆ
(Maꞈtehˬ 7.1-5)
37“Aˬ cawˬ-ahˇ yaw lehˬ taˬ poˆ. Naw maꞈ aˬ cawˬ-ahˇ yaw lehˬ maˬ poˆ naˇ, Miˬyehˇ naw maꞈ-ahˇ yaw lehˬ maˬ poˆ-aˇ. Aˬ cawˬ-ahˇ yaˇ kʼaˬ taˬ daˇ. Naw maꞈ aˬ cawˬ-ahˇ yaˇ kʼaˬ maˬ daˇ naˇ, Miˬyehˇ naw maꞈ-ahˇ yaˇ kʼaˬ maˬ daˇ-aˇ. Aˬ cawˬ-ahˇ iˬ baˇ pyehˬ nehˬ-awˬ. Naw maꞈ aˬ cawˬ-ahˇ iˬ baˇ pyehˬ nehˬ naˇ, Miˬyehˇ naw maꞈ-ahˇ iˬ baˇ pyehˬ nehˬ laꞈ tehꞈ-a. 38Aˬ cawˬ-ahˇ biꞈ-awˬ. Naw maꞈ aˬ cawˬ-ahˇ biꞈ naˇ, Miˬyehˇ naw maꞈ-ahˇ biˬ laꞈ tehꞈ-a. Miˬyehˇ naw maꞈ-ahˇ biꞈ nehˬ laꞈ ngeh, byah dui dui-eu cehˇ pehˬ-ahˇ neh pehˬ-awˇ, dehˬ teuˇ zuˆ teuˇ-eu uˬ taꞈ, pu cu cu ni tawˆ ahˇ-awˇ, naw maꞈ-euˬ pehˇ kʼahˬ pehˇ dahˬ-ahˇ shehˆ ahˇ nehˬ laꞈ tehꞈ-a. Naw maꞈ neh aˬ cawˬ-ahˇ kʼaˇ biꞈ nehˬ-euˬ myaˆ ni, Miˬyehˇ naw maꞈ-ahˇ biꞈ nehˬ laꞈ tehꞈ-a.”
39Kʼoeˇ naˇ, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ nehˬ-euˬ meh. “Myaˆ behꞈ cawˬ cawˬ tiˬ gʼaˬ tiˇ gʼaˬ gaˇ ma sheuˬ mehˬ nya meh loˇ. Nyiˬ gʼaˬ luꞈ duˬ kʼahˬ-ahˇ maˬ ga ahˇ-aˇ loˇ. 40Dzaw zaˬ-aˬ, mehˬ zaˬ naˆ maˬ tseˇ huiˬ dzehˬ mahˇ dzehˬ ta loˇ. Ehˇ kʼawꞈ, dawˬ tawˆ luꞈ dzaw luiˆ jiˇ-euˬ dzaw zaˬ tiˬ gʼaˬ-aˬ, yawˬ ha-ahˇ mehˬ-euˬ saˬ laˬ gʼaˬ naˆ ni huiˬ keuˆ leˇ nya-eu meh.
41“Yawˬ ha-euˬ myaˆ nuiˆ-ahˇ tsmˬ-eu diˬ tm-ahˇ maˬ shaˇ sawˇ-ehˇ, nawˬ-euˬ mehˇ nmˇ-euˬ myaˆ nuiˆ-ahˇ tsmˬ-eu myaˆ pawꞈ pawꞈ zaˬ tiˬ hmˬ-ahˇ aˬ jeˬ miˇ neh toeˬ ceh te. Yawˬ ha-euˬ myaˆ nuiˆ-ahˇ diˬ tm tsmˬ luꞈ-eu maˬ mawˇ nya gaˇ, ‘Nawˬ-eu myaˆ nuiˆ-ahˇ ahˇ-eu myaˆ pawꞈ ngaˇ pehˆ doˆ nehˬ nyaˇ’ lehˇ, nawˬ-euˬ mehˇ nmˇ-ahˇ nawˇ aˬ joˆ-ehˇ ehˇ leˇ coeˇ-eu nya. 42Awꞈ-aꞈ tahˬ kʼoˬ-ahˇ duˇ-eu tsawˇ haˬ#6.42 ‘Awꞈ-aꞈ tahˬ kʼoˬ-ahˇ duˇ-eu tsawˇ haˬ’ lehˇ ehˇ-eu dawˬ tsuiꞈ, Maꞈtehˬ 6.3-ahˇ haw-awˬ. -oˇ. Nawˬ-euˬ myaˆ nuiˆ-ahˇ tsmˬ-eu diˬ tm jeˬ huˬ baꞈ doˆ-awˬ. Kʼoeˇ sahˇ miˇ tsa, nawˬ-euˬ mehˇ nmˇ-euˬ myaˆ nuiˆ-ahˇ ahˇ-eu myaˆ pawꞈ aˬ joˆ-ehˇ jahˇ-awˇ pehˆ doˆ nehˬ paˬ nga lehˇ, nawˬ-ahˇ mawˇ duˬ laˇ tehꞈ-a.
Aˇ siˬ-ahˇ haw naˇ aˇ bawˇ-ahˇ siˬ nya meh
(Maꞈtehˬ 7.16-20; 12.33-35)
43“Aˇ bawˇ yaw muiˬ-ahˇ aˇ siˬ yaw doeˇ maˬ siˬ le nya-a. Kʼoeˇ gaˇ duˇ ni, aˇ bawˇ yaw doeˇ-ahˇ aˇ siˬ yaw muiˬ maˬ siˬ le nya-a. 44Aˬ gah baw duˆ-ahˇ siˬ guˬ aˇ siˬ maˬ pyaˆ haw-aˬ. Aˬ gah laꞈ cehˇ baw duˆ-ahˇ aˬ gaꞈ aˇ siˬ maˬ pyaˆ haw-aˬ. 45Tsawˇ haˬ yaw muiˬ-aˬ, yawˬ ha-euˬ nui ma laꞈ kʼoeˇ jeˬ hmˬ taˬ-euˬ yaw muiˬ jeˬ yuˇ doˆ laꞈ-awˇ, tsawˇ haˬ yaw haiˬ-aˬ, yawˬ ha-eu nui ma laꞈ kʼoeˇ shaˇ dawˆ taˬ-euˬ yaw haiˬ jeˬ beuˬ doˆ laꞈ-eu meh. Aˬ jeˬ miˇ neh ehˇ naˇ, nui ma laꞈ kʼoeˇ kʼaˇ ahˇ-eu jeˬ, kʼaˬ meh-ahˇ ngehˬ doˆ laꞈ-eu meh.
Nymˇ tsoˆ-eu nyiˬ jeˬ
(Maꞈtehˬ 7.24-27)
46“Ngaˬ neh ehˇ taˬ-euˬ loꞈ-ehˇ naw maꞈ maˬ mˇ gaˇ neh, aˬ jeˬ miˇ neh ngaˬ-ahˇ ‘Sahˬpaˬ-o, Sahˬpaˬ-oˇ’ lehˇ kuˇ te. 47Ngaˇ jawˇ gaˇ laˇ-awˇ, ngaˬ neh mehˬ-euˬ dawˬ gaˬ-awˇ naˇ haˬ geuꞈ-eu tsawˇ haˬ-aˬ, aˬ joˆ-ehˇ gʼeh-eu tsawˇ haˬ-ahˇ duˇ-eu gaˇ kawˆ, ngaˇ naw maꞈ-ahˇ mehˬ nehˬ nyaˇ. 48Aˬ yawꞈ-aˬ, yaw naꞈ naꞈ-ehˇ kʼahˬ-awˇ, kʼaˬ lo kʼoeˇ taˆ ziꞈ dah ni maˇ-awˇ tsoˆ-euˬ nymˇ tsoˆ-eu tsawˇ haˬ-ahˇ duˇ-eu meh. Iˇ jeuˬ jeuˬ le-awˇ nymˇ kʼoeˇ nymˇ-ahˇ ciˬ tahˬ ciˬ tuˆ kʼawꞈ, ziꞈ dah ni tsoˆ taˬ-euˬ miˇ neh, maˬ luˆ maˬ laˆ laˇ-a. 49Ehˇ kʼawꞈ, ngaˬ neh mehˬ-euˬ dawˬ gaˬ-awˇ maˬ naˇ haˬ geuꞈ-eu tsawˇ haˬ-aˬ, dawˬ pehˬ maˬ laˆ ziꞈ ni nymˇ tsoˆ-euˬ tsawˇ haˬ-ahˇ duˇ-eu meh. Iˇ jeuˬ jeuˬ le-awˇ nymˇ kʼoeˇ nymˇ-ahˇ ciˬ tahˬ ciˬ tuˆ ngeh, tiˬ poˆ tehꞈ-ehˇ coˬ dzeh-iˇ-awˇ, coˬ pyaˆ coˬ shaˆ jiˇ-eu meh.
Currently Selected:
Luˇkaꞈ 6: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.