Yawˇnaˆ 3
3
Sahˬpaˬ Miˬyehˇ-euˬ ehˇ dawˬ-ahˇ Yawˇnaˆ naˇ haˬ geuꞈ-euˬ
1Kʼoeˇ naˇ, Yawˇnaˆ jawˇ gaˇ Sahˬpaˬ Miˬyehˇ-euˬ dawˬ heu loꞈ-ehˇ paˇ keuˆ le-euˬ meh. 2“Huiˬ dui dui-eu Niˇnaˬbeˬ meuˬ kʼoeˇ meuˬ-ahˇ iˇ-awˇ, ngaˬ neh nawˬ-ahˇ bi ehˇ-euˬ dawˬ deuˬ tsawˇ haˬ kʼoeˇ deuˬ-ahˇ ehˇ nehˬ-iˇ-awˬ.” 3Kʼoeˇ ngeh, Sahˬpaˬ Miˬyehˇ-euˬ ehˇ dawˬ-ahˇ Yawˇnaˆ naˇ haˬ geuꞈ-awˇ, smˬ nah maˬ cah naˇ maˬ cah doe coeˇ-eu meuˬ meuˬ ma pyeuꞈ-eu Niˇnaˬbeˬ meuˬ-ahˇ iˇ-euˬ meh. 4Meuˬ kʼoeˇ meuˬ-ahˇ Yawˇnaˆ cah-iˇ-awˇ, tiˬ nah nah ga ni cah gʼaˬ ngeh, “Oeˬ tseˇ nah laꞈ kʼoeˇ Niˇnaˬbeˬ meuˬ ya luˬ ya seˇ-iˇ tehꞈ-a” lehˇ guˇ-euˬ meh.
5Niˇnaˬbeˬ meuˬ laꞈ kʼoeˇ jawˇ-eu tsawˇ haˬ deuˬ Sahˬpaˬ Miˬyehˇ-euˬ dawˬ-ahˇ jah-awˇ, yawˬ gʼaˬ na luꞈ maˬ dzaˬ maˬ dawˇ ni ya lah meh lehˇ aˬ yawꞈ maꞈ noeˬ tsehˆ-awˇ, aˬ yawꞈ maꞈ noeˬ poˆ gʼaˬ-euˬ gaˇ kawˆ bi siˬ-eu gʼaˇ duˬ, huiˬ zaˬ nyiˇ zaˬ dawˬ tawˆ luꞈ guˬ daˇ pehˇ zeuˇ mehˬ tsoeˬ dm-euˬ meh.
6Gaˇ kawˆ kʼoeˇ Niˇnaˬbeˬ sahˬ paˬ-ahˇ gaˬ keuˆ leˇ ngeh, aˬ yawꞈ-euˬ dzoeˬ dzaˬ nuiˇ mahˬ-ahˇ nuiˇ luꞈ-eu tuˇ laˇ-awˇ, sahˬ paˬ dm-eu pehˇ kʼahˬ pehˇ mahˇ lehˆ dzeh-awˇ, guˬ daˇ pehˇ zeuˇ mehˬ tsoeˬ dm-eu laꞈ kʼoeˇ, lehˇ tsaˇ jaˆ gaˇ nuiˇ-euˬ meh. 7Niˇnaˬbeˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ heu loꞈ-ehˇ dawˬ biꞈ-awˇ bi guˇ gaˬ doe-euˬ meh. “Heu-aˬ, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ neh biꞈ-euˬ dawˬ pyeuꞈ-eu meh. Tsawˇ haˬ maˬ ehˇ, mawˇ neˇ maˬ ehˇ, yawˇ maˬ ehˇ, tiˬ jeˬ-iˬ maˬ dzaˬ maˬ dawˇ ni ya lah meh. 8Tsawˇ haˬ hawˇ-eu jeˬ zaˬ dawˬ tawˆ luꞈ guˬ daˇ pehˇ zeuˇ mehˬ tsoeˬ ya dm meh. Yawˬ gʼaˬ na luꞈ nui ma keuˆ-eu laꞈ kʼoeˇ Miˬyehˇ-ahˇ guiˬ lahˬ ya shaˇ-awˇ, yawˬ ha neh mˇ-euˬ yaw lehˬ yaw ca jeˬ hawˇ-eu yaw haiˬ jeˬ-ahˇ ya byehˇ dzeh jiˇ meh. 9Miˬyehˇ nui ma paˇ laˇ-awˇ, nui ma pehˇ-eu taˬ leˇ-eu laꞈ kʼoeˇ, aˬ dui shiˇ gaˇ maˬ ya keuˆ-eu baw tehꞈ-a.”
10Aˬ yawꞈ maꞈ kʼoeˇ loꞈ-ehˇ jahˇ luꞈ-awˇ, aˬ yawꞈ maꞈ neh mˇ-euˬ yaw haiˬ jeˬ-ahˇ byehˇ dzeh-euˬ gaˇ Miˬyehˇ ya mawˇ ngeh, nui ma paˇ laˇ-awˇ, aˬ yawꞈ maꞈ-ahˇ kʼehˬ nehˬ kʼaˆ nehˬ ma lehˇ ehˇ taˬ gʼaˬ-euˬ kʼawꞈ, maˬ kʼehˬ nehˬ ni byehˇ-euˬ meh.
Currently Selected:
Yawˇnaˆ 3: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
