Yawˇnaˆ 2
2
Yawˇnaˆ-euˬ guiˬ lahˬ shaˇ dawˬ
1Ngaˬ shaˬ-euˬ uˬ maˆ laꞈ kʼoeˇ uˇ-awˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ Yawˇnaˆ heu loꞈ-ehˇ guiˬ lahˬ shaˇ-euˬ meh.
2“Nui ma cawˆ dui dui-eu laꞈ kʼoeˇ,
Sahˬpaˬ Miˬyehˇ-ahˇ ngaˇ kuˇ ngeh,
kuˇ dawˬ naˇ haˬ nehˬ laꞈ-euˬ meh.
Shiˇ-eu miˇ kʼahˬ dawˬ dah uˇ-awˇ,
caw ba nehˬ laꞈ lehˇ ngaˇ shaˇ ngeh,
shaˇ dawˬ naˇ haˬ nehˬ laꞈ-eu meh.
3Naꞈ dui dui-eu laˆ shaˆ dawˬ dah,
nawˇ ngaˬ-ahˇ biˬ puꞈ nehˬ laꞈ-awˇ,
ngaˬ-euˬ tiˬ jawˬ iˇ cuꞈ tehꞈ meh.
Nawˬ-euˬ iˇ tahˬ iˇ luˆ dawˬ tawˆ,
ngaˬ-euˬ kʼoeˇ taˆ cehˆ tsehˆ luꞈ meh.
4Nawˬ-euˬ myaˆ pyawˬ maˬ ya mawˇ gaˇ,
nawˇ ngaˬ-ahˇ byehˇ dzeh nehˬ laꞈ-awˇ,
nawˬ-euˬ Uˬ duˬ tahˬ nymˇ yaw shawˇ,
maˬ paˇ ya mawˇ haw-eu miˇ-a.
5Iˇ cuꞈ ngaˬ-ahˇ dahˬ suꞈ leꞈ-awˇ,
laˆ shaˆ dahˬ pymˬ sehꞈ-iˬ miˇ-a.
Laˆ shaˆ jaˆ guˬ jaˆ gaˆ deuˬ neh,
uˬ duˬ-ahˇ lahˇ cuꞈ-euˬ miˇ-a.
6Gawˬ jawˬ ciˇ tahˬ dawˬ dah jaˆ-awˇ,
gʼoˆ kaꞈ tiˬ jawˇ-iˬ maˬ pah-eu,
miˇ kʼahˬ-ahˇ ngaˇ ga keuˆ-euˬ kʼawꞈ,
naꞈ-eu miˇ oˆ miˇ kʼahˬ-ahˇ neh,
ngaˬ-euˬ Miˬyehˇ Sahˬpaˬ Miˬyehˇ,
ngaˬ-ahˇ sheuˬ kʼoꞈ doˆ laꞈ-euˬ meh.
7Ngaˇ shiˇ leˇ-eu myaꞈ leˇ luꞈ-awˇ,
nawˬ-ahˇ ngaˇ guiˬ lahˬ shaˇ ngeh jawˇ,
muiˬ-eu shawˇ-eu Uˬ duˬ tahˬ nymˇ,
laꞈ kʼoeˇ jawˇ-awˇ nawˇ gaˬ-euˬ meh.
8Poeˬ maˬ baw-eu mˇ myawˬ pyeuꞈ-eu,
tahˬ pahˬ aˬ ma mawˇ kawˇ deuˬ-ahˇ,
uˬ duˬ tahˬ-eu tsawˇ haˬ kʼoeˇ deuˬ,
nawˬ-ahˇ saˇ jaˇ puiˬ jiˇ-euˬ meh.
9Ehˇ kʼawꞈ, nawˬ-ahˇ ngaˇ ja ceuˬ-awˇ,
nawˬ-ahˇ lawˇ-eu shehˇ-eu laꞈ kʼoeˇ,
nawˬ-ahˇ saˇ jaˇ dzaˬ taˬ-euˬ jeˬ,
maˬ byehˇ dzeh ni ngaˇ mˇ byah ma.
Ka kʼoꞈ-eu guiˬ lahˬ yaw dzahˇ-aˬ,
Sahˬpaˬ Miˬyehˇ neh biꞈ-euˬ meh.”
10Kʼoeˇ naˇ, Yawˇnaˆ-ahˇ lawˇ deh-ahˇ meh dzeh doˆ-eu gʼaˇ duˬ ngaˬ shaˬ kʼoeˇ mawˇ-ahˇ Sahˬpaˬ Miˬyehˇ dawˬ biꞈ-awˇ, ngaˬ shaˬ kʼoeˇ mawˇ Yawˇnaˆ-ahˇ meh dzeh doˆ-euˬ meh.
Currently Selected:
Yawˇnaˆ 2: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
