Yawˇlaˆ 1
1
1Heu-aˬ, Peˬduˇlaˆ-euˬ aˬ li Yawˇlaˆ jawˇ gaˇ keuˆ le-euˬ Sahˬpaˬ Miˬyehˇ-euˬ dawˬ meh.
Dzaˬ la gʼo cehˇ cawˆ-iˇ gaˇ tsawˇ ngoeˇ ngoeˇ-euˬ
2Tsawˇ mawˬ tsawˇ kʼaˆ deuˬ naˇ haˬ-awˬ.
Yuˇdaˆ miˇ kʼahˬ laꞈ kʼoeˇ jawˇ-eu,
yawˬ gʼaˬ yawˬ na luꞈ naˇ haˬ-awˬ.
Naw maꞈ-euˬ ziˇ laꞈ kʼoeˇ maˬ ehˇ,
aˬ poeˬ aˬ bawˇ-euˬ ziˇ maˬ ehˇ,
heu loꞈ-ehˇ gʼeh-eu gaˇ kawˆ heu,
puˬ haw mawˇ haw-euˬ jaˆ meh loˇ.
3Naw maꞈ-euˬ aˬ buˇ aˬ li-ahˇ,
gaˇ kawˆ kʼoeˇ naw maꞈ ja nehˬ-awˬ.
Tiˬ jo tiˇ jo ja ka gʼeh-awˇ,
tiˬ tsuiꞈ tiˇ tsuiꞈ mehˬ ka luꞈ-uˇ.
4Myaˬ dui dui-eu nyehˇ bahˇ baˬ maꞈ,
tiˬ maꞈ mehˬ nah tiˬ maꞈ oe-awˇ,
tiˬ maꞈ neh maˬ dzaˬ jiˇ-euˬ jeˬ,
tiˬ maꞈ paˇ teuꞈ byoˆ leꞈ-eu meh.
5Jiˇ dawˇ kʼaˆ-eu tsawˇ haˬ deuˬ-oˇ,
uˬ noeˬ beuˇ laˇ-awˇ neh ngoeˇ-awˬ.
Aˬ gaꞈ dzaˇ uiˇ kʼaˇ dawˇ-eu deuˬ,
yaw kʼaˆ-ehˇ guˇ guˇ-ehˇ ngoeˇ-awˬ.
Aˬ gaꞈ baw duˆ laˆ cawˆ jiˇ-awˇ,
aˬ gaꞈ dzaˇ uiˇ maˬ paˇ jaˆ meh.
6Nyehˇ bahˇ guiˇ maꞈ maꞈ ma oe-awˇ,
aˬ dui miˇ kʼahˬ-ahˇ deuˆ-euˬ meh.
Maˬ gui jiˇ coeˇ gaˇ keuˆ myaˬ-awˇ,
baoˬ huiˬ-awˇ gʼaˬ kʼaˆ dui dui meh.
Aˇ laˬ jaˬ shiˇ-euˬ juiˇ loꞈ-ehˇ,
aˬ yawꞈ maꞈ seuˬ taˆ dui dui meh.
7Aˬ dui maꞈ-euˬ aˬ gaꞈ yaˇ kmˇ,
aˬ yawꞈ maꞈ neh laˆ cawˆ jiˇ-awˇ,
siˬ guˬ aˇ bawˇ dawˬ tawˆ luꞈ kʼawꞈ,
aˬ yawꞈ maꞈ teuꞈ dzaˬ jiˇ-euˬ meh.
Baˆ kʼoˆ dawˬ tawˆ luꞈ dzaˬ jiˇ-awˇ,
uˬ laꞈ ba coˬ ni jaˆ-eu meh.
8Dahˬ dzaˬ-iˇ-eu lehˬ hmˬ taˬ-euˬ,
zaˬ kʼaˬ shiˇ shaw-euˬ baˬ da neh,
tsawˇ ngoeˇ ngoeˇ-eu zaˬ miˬ loꞈ-ehˇ,
miˇ kʼahˬ zaˬ dawˬ tawˆ luꞈ ngoeˇ-awˬ.
9Uˬ duˬ tahˬ nymˇ nymˇ ma laꞈ kʼoeˇ,
damˬ-eu dzaˬ la gʼo cehˇ hawˇ-eu,
aˬ gaꞈ dzaˇ uiˇ maˬ paˇ jaˆ meh.
Sahˬpaˬ Miˬyehˇ-ahˇ damˬ nehˬ-eu,
tiˬ jeˬ-iˬ maˬ jaˆ-eu miˇ neh,
piˇ ma deuˬ tsawˇ ngoeˇ ngoeˇ luꞈ meh.
10Deh yaˇ deuˬ neˇ leuꞈ ni jaˆ-awˇ,
dzaˬ la gʼo cehˇ cawˆ-iˇ jiˇ-awˇ,
aˬ gaꞈ baw duˆ koˆ-iˇ jiˇ-awˇ,
saˬ loˬ aˇ bawˇ nyoeˬ jiˇ-euˬ gaˇ,
miˇ tsaˬ tsawˇ ngoeˇ ngoeˇ luꞈ-eu meh.
11Deh yaˇ mˇ dzaˬ-eu deuˬ ngoeˇ-awˬ.
Aˬ gaꞈ yaˇ mˇ-eu deuˬ ngoeˇ-awˬ.
Aˬ jeˬ miˇ neh ehˇ naˇ,
cehˇ hawˇ-eu lawˬ loeˇ cawˆ-iˇ-awˇ,
sahˬ lahˬ dawˬ tawˆ cawˆ jiˇ-euˬ meh.
12Aˬ gaꞈ baw duˆ deuˬ koˆ jiˇ-awˇ,
siˬ guˬ aˇ bawˇ nyoeˬ jiˇ-euˬ meh.
Aˇ siˬ aˇ bawˇ deuˬ shiˇ jiˇ-awˇ,
laˬ kʼaˬ cehˇ duˬ maˬ paˇ jaˆ meh.
13Lawˇ duˬ-ahˇ jawˇ-eu piˇ ma deuˬ
guˬ daˇ pehˇ zeuˇ dm-awˇ ngoeˇ-awˬ.
Uˬ duˬ tahˬ nymˇ nymˇ ma laꞈ kʼoeˇ,
uˬ ciꞈ miˇ lah-ehˇ ngoeˇ leˇ-awˬ.
Naw maꞈ-euˬ Miˬyehˇ-ahˇ damˬ-eu,
aˬ gaꞈ dzaˇ uiˇ hawˇ-eu cehˇ pyuˇ,
laˬ doˆ-iˇ kʼaˇ maˬ paˇ za meh.
14Maˬ dzaˬ-eu zahˇ jahˇ-awˇ lah-awˬ.
Tsawˇ haˬ aˇ maꞈ kuˇ uiˬ jiˇ-awˬ.
Aˬ yuiꞈ aˬ tsu, tsawˇ mawˬ tsawˇ kʼaˆ,
miˇ kʼahˬ zaˬ yawˬ gʼaˬ yawˬ na luꞈ,
Miˬyehˇ Sahˬpaˬ Miˬyehˇ jawˇ gaˇ,
Uˬ duˬ tahˬ nymˇ-ahˇ uiˬ leˇ-awˇ,
Sahˬpaˬ Miˬyehˇ-ahˇ ngoeˇ haw-awˬ.
15Baoˬ huiˬ-eu gʼaˬ-euˬ aˬ laꞈ neh,
laˆ cawˆ-eu jeˬ bi keuˆ le-eu,
Sahˬpaˬ Miˬyehˇ-euˬ aˇ nah kʼoeˇ,
yaw kawˇ ma-ehˇ keuˆ le luꞈ meh.
16Nga maꞈ-ahˇ mawˇ laˇ mawˇ laˇ-ehˇ,
dzaˬ la gʼo cehˇ cawˆ jiˇ-euˬ meh.
Miˬyehˇ-euˬ Uˬ duˬ tahˬ nymˇ-ahˇ,
laˬ kʼaˬ cehˇ-eu maˬ paˇ jaˆ meh.
17Miˇ tsa ka-euˬ siˬ yoeˬ shiˇ-awˇ,
cehˇ pi ahˇ taˬ-eu maˬ jaˆ-ehˇ,
cehˇ jiˇ yawꞈ ngehꞈ coˬ-iˇ-eu meh.
18Gaˆ dzaˬ kʼaˇ maˬ za-eu miˇ neh,
mawˇ neˇ deuˬ mahˇ mahˇ-ehˇ jawˇ-awˇ,
yawˇ deuˬ tsoˆ leˇ-awˇ jawˇ-eu meh.
19Jeˬ zaˬ gaˆ kʼahˬ, aˇ bawˇ sahˬ kʼaˆ,
miˬ dzaˬ neh bi puiˆ-euˬ loꞈ-ehˇ,
nyoeˬ jiˇ kʼoˆ jiˇ-euˬ baˬ da neh,
Sahˬpaˬ Miˬyehˇ-oˇ nawˬ-ahˇ ngaˇ,
gaˇ kawˆ heu guˇ gaˬ luꞈ-eu ma.
20Iˇ cuꞈ lawˇ gawˆ gui-iˇ jiˇ-awˇ,
gaˆ kʼahˬ puiˆ dzaˬ jiˇ-euˬ miˇ neh,
bawˇtsahˬ jeˬzaˬ nawˬ-ahˇ guˇmeh.
Currently Selected:
Yawˇlaˆ 1: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
