Hawˇseˬ 14
14
Iˇsaˬleˬlaˆ-ahˇ Hawˇseˬ shaˇ juˬ-eu
1Iˇsaˬleˬlaˆ tsawˇ haˬ deuˬ-oˇ,
nawˬ-euˬ Sahˬpaˬ Miˬyehˇ pyeuꞈ-eu,
Miˬyehˇ jawˇ paw gʼoꞈ kʼoꞈ laˇ-awˬ.
Naw maꞈ-euˬ iˬ baˇ baˬ da neh,
naw maꞈ pehˆ toˆ tahˬ sehꞈ-euˬ meh.
2Guiˬ lahˬ shaˇ dawˬ heu yuˇ laꞈ-awˇ,
lawˇ-eu shehˇ-eu tiˬ jeˬ loꞈ-ehˇ,
Sahˬpaˬ Miˬyehˇ-ahˇ damˬ nehˬ-awˬ.
“Nga maꞈ-euˬ iˬ baˇ pyehˬ laꞈ-awˇ,
nga maꞈ shaˇ dawˬ naˇ haˬ nehˬ laꞈ.
Nga maꞈ saˇ jaˇ dzaˬ-euˬ loꞈ-ehˇ,
nawˬ-ahˇ nga maꞈ ja ceuˬ-eu ma.
3Aˬshuˇliˆ miˇ kʼahˬ nga maꞈ-ahˇ,
ka kʼoꞈ nehˬ nya-eu maˬ ngeuˇ-a.
Guiˇ deuˆ-eu dziˬ mahˬ kʼoeˇ deuˬ kʼawꞈ,
nga maꞈ-ahˇ maˬ haw piˇ nya-a.
Tahˬ pahˬ aˬ ma mawˇ kawˇ deuˬ-ahˇ,
nga maꞈ-euˬ Miˬyehˇ ngeuˇ ma lehˇ,
tiˬ jawˇ-iˬ maˬ paˇ kuˇ poˆ ma.
Uˬ duˬ tahˬ shaˇ kʼaˇ maˬ za-ehˇ,
shaˬ laˇ taˬ-euˬ tsawˇ haˬ deuˬ-ahˇ,
Sahˬpaˬ Miˬyehˇ nawˇ ya mawˇ ngeh,
gʼawˬ shaˬ gaˬ nehˬ laꞈ-eu meh” lehˇ,
Miˬyehˇ-ahˇ guiˬ lahˬ shaˇ leˇ-awˬ.
Iˇsaˬleˬlaˆ bi dehꞈ paˇ ma lehˇ Sahˬpaˬ Miˬyehˇ saˇ jaˇ dzaˬ-eu
4Sahˬpaˬ Miˬyehˇ ehˇ-eu dawˬ-aˬ,
“Ngaˬ-euˬ tsawˇ haˬ paˇ sheuˬ kʼoꞈ-awˇ,
nui ma laꞈ kʼoeˇ keuˆ ni gaˬ-awˇ,
nui ma pehˇ-eu jeˬ byehˇ dzeh ma.
5Miˇ tsaˬ gui-awˇ kʼoˆ dui dui gaˇ,
uˬ yehˇ yehˇ shehˬ nehˬ-eu loꞈ-ehˇ,
Iˇsaˬleˬlaˆ-ahˇ ngaˇ haw ma.
Aˬ yawꞈ maꞈ aˇ yehˆ yehˆ laˇ-awˇ,
Leˬbaˬnoˬ aˇ bawˇ deuˬ loꞈ-ehˇ,
duˬ ciˇ ziꞈ dah ni jaˆ tehꞈ-a.
6Aˬ yawꞈ maꞈ baw nmˬ nmˬ laˇ-awˇ,
saˬ loˬ aˇ bawˇ loꞈ-ehˇ muiˬ-awˇ,
Leˬbaˬnoˬ gawˬ jawˬ-ahˇ dehꞈ-eu,
shuˬ liˇ aˇ bawˇ kʼoeˇ deuˬ loꞈ-ehˇ,
yaw saꞈ saw dui dui laˇ tehꞈ-a.
7Ngaˇ bo saˆ haw piˇ-eu uˬ moˆ.
Aˬ yawꞈ maꞈ paˇ jawˇ poˆ laˇ-awˇ,
dzaˬ la gʼo cehˇ paˇ ka poˆ-awˇ,
aˬ gaꞈ siˬ dui dui-eu loꞈ-ehˇ,
baw dui za dui dui le tehꞈ-a.
Leˬbaˬnoˬ gawˬ jawˬ-ahˇ doˆ-eu,
muiˬ-eu aˬ gaꞈ dzaˇ uiˇ loꞈ-ehˇ,
aˬ yawꞈ maꞈ tsawˇ myahˇ doˆ tehꞈ-a.
8Iˇsaˬleˬlaˆ tsawˇ haˬ deuˬ-aˬ,
tahˬ pahˬ aˬ ma mawˇ kawˇ deuˬ-ahˇ,
tiˬ pawꞈ-iˬ maˬ paˇ taꞈ leˇ-ehˇ,
aˬ yawꞈ maꞈ-euˬ guiˬ lahˬ shaˇ dawˬ,
ngaˇ naˇ haˬ-awˇ ngehˬ gʼeh nehˬ ma.
Aˇ paꞈ tiˬ jawˇ-iˬ maˬ ga-eu,
naˇ shmˇ muiˬ-eu aˇ bawˇ loꞈ-ehˇ,
ngaˬ-euˬ naˇ shmˇ-ahˇ bi awˆ ma.
Aˬ yawꞈ maꞈ-ahˇ guiˬ lahˬ shehˬ-eu,
guiˬ lahˬ gawˆ mehˇ ngaˇ pyeuꞈ-eu ma.”
Aˇ saˬ saˬ-eu dawˬ
9Zaˬ siˬ tsawˇ gahˇ byah-eu tsawˇ haˬ,
gaˇ kawˆ heu deuˬ noeˬ siˬ luꞈ-uˇ.
Noeˬ siˬ noeˬ mawˇ nya-eu tsawˇ haˬ,
gaˇ kawˆ heu deuˬ gʼoˆ shaw luꞈ-uˇ.
Aˬ jeˬ miˇ neh ehˇ naˇ,
Sahˬpaˬ Miˬyehˇ-euˬ gaˇ ma-aˬ,
yaw tsaˬ yaw dawˇ gaˇ ma pyeuꞈ-awˇ,
kʼaˇ sui kʼaˇ dawˇ-eu tsawˇ haˬ deuˬ,
gaˇ ma kʼoeˇ kahˇ-ahˇ cah-eu meh.
Ehˇ kʼawꞈ, iˬ baˇ mˇ-eu tsawˇ haˬ,
gaˇ ma kʼoeˇ kahˇ-ahˇ maˬ haw ni,
pehˆ toˆ-awˇ coˬ dzeh-iˇ-eu meh.
Currently Selected:
Hawˇseˬ 14: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
