Hawˇseˬ 8
8
Tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ Sahˬpaˬ Miˬyehˇ muiˇ-eu
1Sahˬpaˬ Miˬyehˇ ehˇ-eu dawˬ-aˬ,
“Daˇ heh ciˬ tsehꞈ-awˇ baw gaˬ-awˬ.
Ngaˬ-euˬ dawˬ ma saˇ jaˇ hawˇ-eu,
ngaˬ-euˬ zahˇ dawˬ kʼoꞈ dawˬ deuˬ-ahˇ,
ngaˬ-euˬ tsawˇ haˬ puiˬ-euˬ miˇ neh,
muiˇ-eu deuˬ kʼaˬ dzeˇ ma loꞈ-ehˇ,
ngaˬ-euˬ miˇ kʼahˬ heu kʼahˬ laꞈ kʼoeˇ,
byoeˇ uˇ leꞈ-eu lehˇ gʼeh-eu meh.
2Nga maꞈ-euˬ Miˬyehˇ-oˇ nawˬ-ahˇ,
nawˬ-euˬ Iˇsaˬleˬlaˆ tsawˇ jeuˬ
siˬ nya ma lehˇ yawꞈ maꞈ guˇ kʼawꞈ,
3yaw muiˬ jeˬ-ahˇ byehˇ-euˬ miˇ neh,
muiˇ-eu deuˬ neh bi kʼehˬ tehꞈ-a.
4“Aˬ yawꞈ maꞈ sahˬ paˬ ka-euˬ kʼawꞈ,
ngaˬ-ahˇ maˬ gʼoe-ehˇ mˇ-euˬ meh.
Aˬ yuiꞈ aˬ tsu tseˇ doˆ-euˬ kʼawꞈ,
ngaˬ-ahˇ maˬ gʼoe-ehˇ mˇ-euˬ meh.
Aˬ yawꞈ maꞈ-euˬ pyuˇ kʼoˇ shuiˇ kʼoˇ,
tahˬ pahˬ aˬ ma mawˇ kawˇ kʼaˇ-awˇ,
yawˬ ha ya luˬ ya seˇ-iˇ ni,
yawˬ haˇ yawˬ ha bymˬ luꞈ-eu meh.
5Saˬmaˬliˆ meuˬ uˬ duˬ tahˬ-eu,
shuiˇ mawˇ neˇ mawˇ kawˇ kʼoeˇ kawˇ-ahˇ,
ngaˇ tiˬ pawꞈ-iˬ maˬ haw nahˇ nya.
Mawˇ kawˇ kʼoeˇ-ahˇ uˬ duˬ tahˬ-eu,
aˬ myah byehˇ dzeh-eu lehˇ gʼeh ta.
6Iˇsaˬleˬlaˆ ba jiˬ tehˆ-euˬ,
mawˇ kawˇ kʼoeˇ miˬ yehˇ maˬ ngeuˇ-a.
Saˬmaˬliˆ-euˬ mawˇ neˇ mawˇ kawˇ,
kʼehꞈjiˇ kʼoeˆjiˇ gaˇkeuˆ tehꞈ-a.
7Jaˬ lehˇ aˇ yoeˬ sehˬ-euˬ miˇ neh,
jaˬ lehˇ lehˇ ma ya yehˬ tehꞈ-a.
Cehˇ nmˇ maˬ myah laˇ-euˬ cehˇ yaˇ,
hawˬ mˇ saꞈ-awˇ maˬ dzaˬ nya-a.
Paˇ mˇ saꞈ dzaˬ nya law hawˇ kʼawꞈ,
aˬ cawˬ tsawˇ jeuˬ dzaˬ jiˇ tehꞈ-a.
8Iˇsaˬleˬlaˆ-euˬ miˇ kʼahˬ kʼawꞈ,
aˬ cawˬ-euˬ miˇ kʼahˬ deuˬ loꞈ-ehˇ,
saˇ baoˬ yaw pehꞈ-ahˇ duˇ-eu meh.
9Bawˇ tsahˬ mahˬ tahˬ laˆ-ahˇ duˇ-eu,
nui ma gʼahˇ-eu Iˇsaˬleˬlaˆ,
Aˬshuˇliˆ miˇ kʼahˬ-ahˇ le-awˇ,
caw ba laꞈ lehˇ shaˇ leˇ-euˬ meh.
Aˬ cawˬ-ahˇ pyuˇ shuiˇ tawˆ nehˬ-awˇ,
yawˬ ha-ahˇ bi haw piˇ-euˬ meh.
10Aˬ yawꞈ maꞈ-ahˇ kuˇ uiˬ jiˇ-awˇ,
ngaˇ kʼehˬ nehˬ-eu lehˇ gʼeh-eu ma.
Aˬshuˇliˆ miˇ kʼahˬ-euˬ sahˬ paˬ,
yawꞈ maꞈ-ahˇ kʼehˬ le kʼaˆ le gaˇ,
gʼawˬ myahˇ maˬ gʼeh-ehˇ ya daˬ meh.
11“Iˇsaˬleˬlaˆ tsawˇ haˬ deuˬ neh,
iˬ baˇ bi shawˇ laˇ-eu gʼaˇ duˬ,
lawˇ duˬ paˇ tsoˆ lahˬ-euˬ kʼoeˇ-aˬ,
iˬ baˇ mˇ lahˬ lahˬ gaˇ duˇ meh.
12Zahˇ dawˬ kʼoꞈ dawˬ aˇ muiˇ aˇ seh,
aˬ yawꞈ maꞈ-ahˇ boꞈ mehˬ nehˬ kʼawꞈ,
maˬ gaˬ maˬ mawˇ haw-euˬ loꞈ-ehˇ,
myaˆ haw maˬ cawˬ ni byehˇ tehꞈ-a.
13Lawˇ gaˇ shehˇ gaˇ gaˬ-eu laꞈ kʼoeˇ,
ngaˬ-ahˇ shaˬ jiˇ lawˇ nehˬ laꞈ-awˇ,
lawˇ dzaˇ aˬ yawꞈ maꞈ dzaˬ-eu meh.
Sahˬpaˬ Miˬyehˇ pyeuꞈ-eu ngaˇ-aˬ,
kʼoeˇ loˇ mˇ gaˇ laꞈ kʼaˬ maˬ cehˇ.
Aˬ yawꞈ maꞈ neh mˇ-euˬ iˬ baˇ,
ngaˇ maˬ ngehˇ ni kʼehˬ poˆ nehˬ-awˇ,
Iˇjiˇtuˆ paw bi gʼoꞈ-iˇ ma.
14“Iˇsaˬleˬlaˆ tsawˇ haˬ deuˬ-aˬ,
beh-euˬ yaw sahˇ gʼaˬ-ahˇ ngehˇ-awˇ,
sahˬpaˬ hawˇ nymˇ tsoˆ luꞈ-eu meh.
Yuˇdaˆ tsawˇ haˬ meuˬ teˬ lahˬ-awˇ,
ziꞈ dah ni gawˬ ziꞈ taˬ-euˬ meh.
Ehˇ kʼawꞈ ngaˇ miˬ dzaˬ pyehˬ gʼeh-awˇ,
aˬ yawꞈ maꞈ-euˬ hawˇ nymˇ hawˇ-eu
meuˬ deuˬ-ahˇ bi puiˆ dzaˬ jiˇ ma.”
Currently Selected:
Hawˇseˬ 8: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
