Hawˇseˬ 7
7
1Iˇsaˬleˬlaˆ tsawˇ haˬ deuˬ-ahˇ,
naˇ gawˇ dawˬ tawˆ laˆ taˬ nehˬ-awˇ,
paˇ bi dehꞈ doˆ laˇ ma ehˇ ngeh,
ngaˬ-euˬ myaˆ-ahˇ mawˇ laˇ-eu-aˬ,
aˬ yawꞈ maꞈ neh mˇ byah taˬ-euˬ,
yaw haiˬ hawˇ-eu yaw cawˆ tehꞈ meh.
Tiˬ gʼaˬ tiˇ gʼaˬ mehˇ shuiˇ shuiˇ-eu,
aˬ cawˬ nymˇ-ahˇ smˇ kʼoeˬ kʼoeˬ-eu,
gaˇ ma doe ni tahˇ joe joe-eu,
heu deuˬ aˬ yawꞈ maꞈ mˇ-eu meh.
2Yaw haiˬ kʼaˇ mˇ dzeuˇ-euˬ dawˬ tawˆ,
ngaˇ maˬ ngehˇ ni noeˬ taˬ meh lehˇ,
aˬ yawꞈ maꞈ maˬ noeˬ mawˇ leˇ-a.
Aˬ yawꞈ maꞈ neh mˇ-euˬ iˬ baˇ,
aˬ yawꞈ maꞈ-euˬ tiˬ jawˬ byah-awˇ,
maˬ mawˇ laˇ-ehˇ maˬ gʼeh nya-a.”
Sahˬ paˬ sahˬ ma deuˬ-ahˇ sehꞈ-eu
3Sahˬpaˬ Miˬyehˇ ehˇ-eu dawˬ-aˬ,
“Aˬ yawꞈ maꞈ-euˬ nui ma laꞈ gʼoꞈ,
sahˬpaˬ laˬ kʼaˬ cehˇ ni mˇ-awˇ,
aˬ yawꞈ maꞈ-euˬ jaˬ myawꞈ mehˇ shuiˇ,
sahˬ ma nui saˇ bi za-eu meh.
4Aˬ yawꞈ maꞈ-euˬ puiˬ-eu nui ma,
kaˬ muˇ jahˇ-eu gʼaˬ maˬ dah-ehˇ,
maˬ laˆ nyehˆ ni bi jaˆ tawˬ-euˬ,
doꞈ-eu tsawˬ bu-ahˇ duˇ-eu meh.
5Sahˬ paˬ bawˬ-iˬ gʼeh-eu aˇ nah-ahˇ,
sahˬ paˬ hawˇ-eu yaw huiˬ deuˬ-ahˇ,
yawꞈ maꞈ jiˇ baˬ bi dawˇ yehꞈ-awˇ,
tsawˇ uˬ laˆ uˬ jiˇ nehˬ-euˬ meh.
6Yawꞈ maꞈ nui ma yaw gʼoꞈ mˇ-eu,
nui ma miˬ dzaˬ doꞈ laˇ taˬ-euˬ,
uˬ ciꞈ miˇ lah laꞈ kʼoeˇ buiˇ-awˇ,
uˬ shawˬ miˬ lmˇ nyehˆ laˇ-eu meh.
7“Yawꞈ maꞈ nui pehˇ lahˇ dui dui-awˇ,
sahˬ paˬ sahˬ ma-ahˇ sehꞈ-euˬ meh.
Sahˬ paˬ tiˬ gʼaˬ saˇ-iˬ tiˬ gʼaˬ,
sehꞈ byoˆ sehꞈ laˆ jiˇ nehˬ-euˬ kʼawꞈ,
caw ba laꞈ lehˇ ngaˬ-ahˇ shaˇ-eu,
tsawˇ haˬ tiˬ gʼaˬ-iˬ maˬ jawˇ-a.”
Miˇ kʼahˬ nui deuˬ-ahˇ gʼoe-eu Iˇsaˬleˬlaˆ
8Sahˬpaˬ Miˬyehˇ ehˇ-eu dawˬ-aˬ,
“Iˇsaˬleˬlaˆ tsawˇ haˬ deuˬ-aˬ,
hawˬ tahˬ tiˬ pyawˬ ba-euˬ loꞈ-ehˇ,
aˬ cawˬ miˇ kʼahˬ-ahˇ gʼoe luꞈ meh.
9Aˬ cawˬ-ahˇ gʼoe-eu baˬ da neh,
yawˬ ha-euˬ gʼaˬ-ahˇ teuꞈ laˇ-eu,
aˬ yawꞈ maꞈ-ahˇ maˬ siˬ leˇ-a.
Aˬ yawꞈ maꞈ-euˬ aˇ nah aˇ yamˬ,
gʼawˬ myahˇ maˬ jaˆ ehˇ pyeuꞈ laˇ-euˬ,
aˬ yawꞈ maꞈ maˬ noeˬ mawˇ nya-a.
10Iˇsaˬleˬlaˆ miˇ kʼahˬ laꞈ kʼoeˇ,
aˬ yawꞈ maꞈ neh yaw haiˬ mˇ-euˬ,
aˬ yawꞈ maꞈ gaˬ dehˆ taˬ-euˬ meh.
Kʼoeˇ naˆ naˆ-ehˇ pyeuꞈ laˇ taˬ kʼawꞈ,
aˬ yawꞈ maꞈ-euˬ Miˬyehˇ pyeuꞈ-eu,
Sahˬpaˬ Miˬyehˇ jawˇ-eu paw dzeˇ,
aˬ yawꞈ maꞈ maˬ gʼoꞈ pyawˇ laˇ-a.
11Iˇsaˬleˬlaˆ-euˬ bawˬ toˆ-aˬ,
kʼaˬ kʼoeˬ dawˇ ga tiˬ mawˇ loꞈ-ehˇ,
Iˇjiˇtuˆ-ahˇ tahˬ shaˇ-iˇ haw,
Aˬshuˇliˆ-ahˇ cehˆ keuˆ leˇ haw,
tsawˬ toeˬ tsawˬ daˆ-ehˇ shaˬ luꞈ meh.
12Ehˇ kʼawꞈ, ngaˇ baw gʼaꞈ kʼmˇ tsehˆ-awˇ,
aˇ jiˇ kʼmˇ mi dzaˬ-eu loꞈ-ehˇ,
aˬ yawꞈ maꞈ-ahˇ nyehꞈ mi jiˇ-awˇ,
yaw haiˬ mˇ dzeuˇ yaꞈ-euˬ aˇ poeˬ,
aˬ yawꞈ maꞈ-ahˇ ngaˇ kʼehˬ nehˬ ma.
13“Ngaˬ-ahˇ byehˇ dzeh yaꞈ-euˬ miˇ neh,
aˬ yawꞈ maꞈ ya noeˬ shaˬ luꞈ-uˇ.
Ngaˬ-ahˇ muiˇ-awˇ puiˬ-euˬ miˇ neh,
luˬ-iˇ seˇ-iˇ gaˇ keuˆ luꞈ-uˇ.
Aˬ yawꞈ maꞈ-ahˇ ka kʼoꞈ mawꞈ kʼawꞈ,
aˬ yawꞈ maꞈ uˬ duˬ tahˬ-eu-aˬ,
ngaˬ-ahˇ mehˇ shuiˇ shuiˇ-eu tehꞈ meh.
14Aˬ yawꞈ maꞈ guˇ-awˇ shaˇ-eu dawˬ,
nui ma keuˆ-eu dawˬ maˬ ngeuˇ-ehˇ,
lawˇ ciꞈ zaˬ deuˬ jahˇ-eu loꞈ-ehˇ,
coˬ lah coˬ lah-ehˇ guˇ-eu meh.
Aˬ gaꞈ dzaˇ uiˇ hawˇ-eu cehˇ-ahˇ,
aˬ yawꞈ maꞈ za ni shaˇ laˇ ngeh,
lawˇ ciꞈ zaˬ deuˬ jahˇ-eu loꞈ-ehˇ,
yawˬ ha gʼawˇ mawˇ-ahˇ laˆ naˇ-eu,
ngaˬ-ahˇ puiˬ-eu tsawˇ haˬ deuˬ meh.
15Aˬ yawꞈ maꞈ-ahˇ ngaˇ ciˬ huiˬ-awˇ,
gʼaˬ kʼaˆ laˇ ni bo saˆ-euˬ kʼawꞈ,
ngaˬ-ahˇ puiˬ-eu leh jeh-eu meh.
16Baˬlaˇ miˬ yehˇ jawˇ paw cehˆ-eu
kaˆ kaˆ poˆ-euˬ laꞈ gʼahˬ loꞈ-ehˇ,
saˇ jaˇ maˬ ziꞈ-eu tsawˇ haˬ meh.
Aˬ yawꞈ maꞈ-euˬ aˬ yuiꞈ aˬ tsu,
dawˬ kʼaˆ ngehˬ myaˬ-eu baˬ da neh,
mi cehˇ kʼehˬ-ahˇ ya coˬ sehꞈ gaˇ,
Iˇjiˇtuˆ tsawˇ haˬ uiˇ tehꞈ-a.”
Currently Selected:
Hawˇseˬ 7: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
