Doˆ-iˇ 26
26
Sahˬpaˬ Miˬyehˇ jawˇ duˬ sehˬ gʼawˆ
(Doˆ-iˇ 36.8-38)
1“Nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ aˇ baˇ aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ tseˇ dzeh yuˇ-awˇ, Ngaˇ jawˇ-eu gʼaˇ duˬ, muiˬ-eu shawˇ-eu sehˬ gʼawˆ tsoˆ-awˬ. 2Saˬ paˇ kʼoeˇ yawˬ dzeh na luꞈ, yaw mahˇ paw nyiˬ tseˇ yehꞈ caˆ, yaw jeˇ paw oeˬ caˆ byah-awˇ, aˬ yawꞈ tiˬ shehˆ tehꞈ-ehˇ ya bi pyeuꞈ meh. 3Saˬ paˇ kʼoeˇ ngaˬ dzeh-euˬ tiˬ gaˇ guꞈ tsaꞈ-awˇ, nyiˬ kahˇ tehꞈ-ehˇ guꞈ pyeuꞈ-awˬ. 4Guꞈ tsaꞈ taˬ-euˬ saˬ paˇ kʼoeˇ nyiˬ kahˇ luꞈ-euˬ gaˇ dzeˇ dzeˇ saˬ paw jaˆ-eu saˬ paˇ paˇ dzeh-euˬ mehˬ dzaˬ caw caw-ehˇ, nyoeˇ leuˬ leuˬ-eu saˬ kahˇ neh, laꞈ ma guꞈ tsoꞈ-awˬ. 5Yaw beh kahˇ-euˬ saˬ paˇ paˇ dzeh yaw beh dzeh mehˬ dzaˬ caw caw-ehˇ, laꞈ ma ngaˬ tseˇ ma guꞈ tsoꞈ-awˇ, laꞈ ma kʼoeˇ deuˬ nehˬ-ehˇ dawˇ ni, nyiˬ kahˇ tiˬ kahˇ-euˬ aˇ saˬ saˬ-euˬ saˬ paˇ paˇ dzeh-euˬ mehˬ dzaˬ caw caw-ehˇ, laꞈ ma ngaˬ tseˇ ma paˇ guꞈ tsoꞈ-awˬ. 6Saˬ paˇ paˇ dzeh guꞈ tsaꞈ taˬ-euˬ saˬ paˇ kʼoeˇ nyiˬ kahˇ tiˬ gaˇ gʼeu tawꞈ-eu gʼaˇ duˬ, shuiˇ kuˆ seuˬ ngaˬ tseˇ zeuˬ jahˇ-awˬ.
7“Sehˬ gʼawˆ-ahˇ joe kaˬ-eu gʼaˇ duˬ, ciꞈ myehꞈ caꞈ hm neh saˬ paˇ tseˇ tiꞈ dzeh zaꞈ-awˬ. 8Saˬ paˇ kʼoeˇ yawˬ dzeh na luꞈ, yaw mahˇ paw smˬ tseˇ caˆ, yaw jeˇ paw oeˬ caˆ byah-awˇ, aˬ yawꞈ tiˬ shehˆ tehꞈ-ehˇ ya bi pyeuꞈ meh. 9Saˬ paˇ kʼoeˇ deuˬ-ahˇ, ngaˬ dzeh tiˬ gaˇ, koꞈ dzeh tiˬ gaˇ lehˇ guꞈ tsaꞈ-awˇ, nyiˬ kahˇ tehꞈ-ehˇ guꞈ pyeuꞈ-awˬ. Koꞈ dzeh tiˬ dzeh-ahˇ, sehˬ gʼawˆ pyawˬ ma paw byaˆ dmˇ kʼoꞈ taˬ-awˬ. 10Saˬ paˇ paˇ dzeh kʼoeˇ deuˬ guꞈ tsoꞈ taˬ-euˬ yaw beh kahˇ-euˬ gaˇ dzeˇ dzeˇ saˬ paw jaˆ-eu saˬ paˇ paˇ dzeh-euˬ mehˬ dzaˬ caw caw-ehˇ, laꞈ ma ngaˬ tseˇ ma guꞈ tsoꞈ-awˇ, yawˬ kahˇ yawˬ-euˬ gaˇ dzeˇ dzeˇ saˬ dzeh-euˬ mehˬ dzaˬ caw caw-ehˇ kʼawꞈ, laꞈ ma ngaˬ tseˇ ma guꞈ tsoꞈ-awˬ. 11Guiˬ shuiˇ kuˆ seuˬ ngaˬ tseˇ hmˬ jahˇ-awˇ, sehˬ gʼawˆ-ahˇ joe kaˬ-eu gʼaˇ duˬ, saˬ paˇ kʼoeˇ nyiˬ kahˇ tiˬ gaˇ gʼeu tawꞈ-awˬ. 12Dzehˬ laˇ-euˬ saˬ paˇ tiˬ paˆ-ahˇ, sehˬ gʼawˆ-euˬ naˇ kʼah paw bi ga gʼeu-awˬ. 13Pyawˬ zaˬ nyiˬ pyawˬ-ahˇ, tiˬ pyawˬ-euˬ tiˬ caˆ dzehˬ laˇ taˬ-eu saˬ paˇ mehˬ dzaˬ kʼoeˇ, sehˬ gʼawˆ-euˬ pyawˬ zaˬ-ahˇ dehˬ kaˬ-eu gʼaˇ duˬ bi ga gʼeu-awˬ.
14“Sehˬ gʼawˆ-ahˇ dehˬ kaˬ-eu gʼaˇ duˬ, naˬ yawˬ neˇ taˬ-euˬ yawˇ baˆ kʼoˆ hawˇ-eu, kʼoeˇ taˆ tiˬ tiˆ paˇ dehˬ kaˬ-eu gʼaˇ duˬ, shawˇ jehˆ ni gʼeh-eu shaˬ kʼoˆ guꞈ-awˬ.
15“Sehˬ gʼawˆ-ahˇ, cawˬ tuˇ jeˬ-ehˇ kaˇ pyawˇ taw-eu gʼaˇ duˬ, aˬ kaˬ shaˇ daˇ kawˬ neh teˇ byaꞈ taꞈ-awˬ. 16Taꞈ taˬ-euˬ daˇ kawˬ teˇ byaꞈ aˬ yawꞈ byaꞈ yawˬ yaw mahˇ paw tseˇ caˆ, yaw jeˇ paw tiˬ caˆ tiˬ toˇ bi byah-awˬ. 17Teˇ byaꞈ kʼoeˇ tiˬ byaꞈ tiˇ byaꞈ tiˬ gaˇ taw tsaꞈ nya-eu gʼaˇ duˬ, aˬ kuiˇ nyiˬ kahˬ jahˇ tsoꞈ-awˬ. Teˇ byaꞈ dawˬ tawˆ luꞈ kʼoeˇ loꞈ-ehˇ aˬ kuiˇ ya bi tsoꞈ meh. 18Sehˬ gʼawˆ laꞈ oˆ paw pyawˬ-ahˇ taw-eu gʼaˇ duˬ, teˇ byaꞈ nyiˬ tseˇ byaꞈ lehˬ hmˬ-awˬ. 19Teˇ byaꞈ aˬ yawꞈ byaꞈ yawꞈ-euˬ aˬ kuiˇ cawˬ ahˇ-eu gʼaˇ duˬ, kaˇ pyawˇ dawˬ pehˬ-ahˇ pyuˇ laꞈ duꞈ nyiˬ hmˬ ya jahˇ tsoꞈ meh. 20Sehˬ gʼawˆ laꞈ taˆ paw pyawˬ-ahˇ taw-eu gʼaˇ duˬ, teˇ byaꞈ nyiˬ tseˇ byaꞈ lehˬ hmˬ-awˬ. 21Teˇ byaꞈ aˬ yawꞈ byaꞈ yawꞈ aˬ kuiˇ cawˬ ahˇ-eu gʼaˇ duˬ, kaˇ pyawˇ dawˬ pehˬ-ahˇ pyuˇ laꞈ duꞈ nyiˬ duꞈ jahˇ tsoꞈ-awˇ, pyuˇ laꞈ duꞈ dawˬ tawˆ luꞈ, oeˬ tseˇ kʼahˇ ya jahˇ tsoꞈ meh. 22Nahˇ ma ga kʼehˬ paw pyawˇ-eu sehˬ gʼawˆ-euˬ naˇ kʼah paw dzeˇ pyawˬ-ahˇ taw-eu gʼaˇ duˬ, teˇ byaꞈ koꞈ byaꞈ lehˬ hmˬ-awˬ. 23Laꞈ coeˇ nyiˬ pyawˬ-ahˇ taw-eu gʼaˇ duˬ, teˇ byaꞈ nyiˬ byaꞈ lehˬ hmˬ-awˬ. 24Laꞈ coeˇ-ahˇ taw-eu teˇ byaꞈ kʼoeˇ-aˬ, dawˬ pehˬ-ahˇ neh uˬ duˬ-ahˇ doˆ ni, tiˬ byaꞈ tiˇ byaꞈ ya bi tsoꞈ tawꞈ meh. Laꞈ coeˇ-ahˇ taw-eu teˇ byaꞈ kʼoeˇ nyiˬ byaꞈ-ahˇ, kʼoeˇ loꞈ-ehˇ taw-awˬ. 25Kʼoeˇ loꞈ-ehˇ, teˇ byaꞈ yehꞈ byaꞈ hawˇ-eu pyuˇ daˇ kʼahˇ tseˇ koꞈ kʼahˇ ya bi jaˆ meh. Teˇ byaꞈ tiˬ byaꞈ gʼaˇ duˬ, pyuˇ laꞈ duꞈ nyiˬ duꞈ meh.
26“Aˬkaˬshaˇ daˇ kawˬ neh, laꞈ law tseˇ ngaˬ kahˬ pyaꞈ-awˬ. Ngaˬ kahˬ-aˬ, sehˬ gʼawˆ laꞈ oˆ paw pyawˬ-ahˇ teˇ byaꞈ kaˇ pyawˇ taw-eu gʼaˇ duˬ meh. 27Ngaˬ kahˬ-aˬ, sehˬ gʼawˆ laꞈ taˆ paw pyawˬ-ahˇ teˇ byaꞈ kaˇ pyawˇ taw-eu gʼaˇ duˬ pyeuꞈ-awˇ, ngaˬ kahˬ-aˬ, sehˬ gʼawˆ naˇ kʼah paw, nahˇ ma ga kʼehˬ paw dzeˇ pyawˬ-ahˇ kaˇ pyawˇ taw-eu gʼaˇ duˬ meh. 28Gʼahˇ ceh tsaˬ-eu laꞈ yoꞈ kʼoeˇ kahˬ-aˬ, sehˬ gʼawˆ kʼoeˇ dzeˇ heu dzeˇ miˇ ni ya bi mahˇ meh. 29Daˇ kawˬ teˇ byaꞈ kʼoeˇ deuˬ-ahˇ shuiˇ yaw-awˇ, laꞈ yoꞈ tsoꞈ nya ni, shuiˇ daˇ kʼahˇ ya jahˇ tsoꞈ meh. Laꞈ yoꞈ kʼoeˇ deuˬ-ahˇ kʼawꞈ shuiˇ ya yaw meh. 30Gawˬ jawˬ kʼoeˇ taˆ, ngaˬ neh nawˬ-ahˇ mehˬ nehˬ-euˬ loꞈ-ehˇ, sehˬ gʼawˆ tsoˆ-awˬ.
31“Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ#26.31 ‘Jeˬluˇbeˬ’ lehˇ ehˇ-eu dawˬ tsuiꞈ, Aˇ dahˬ beh-eu sahˬ boꞈ 3.24-ahˇ haw-awˬ. aˇ baˇ aˇ boꞈ boꞈ taˬ-eu saˬ paˇ yuˇ-awˇ, lawˆ kaˬ taw paˆ-eu saˬ paˇ paˇ ma ya jahˇ meh. 32Saˬ paˇ paˇ ma kʼoeˇ hmˬ-ahˇ shuiˇ kuˆ seuˬ tsoꞈ-awˇ, pyuˇ zeuˇ dahˇ oeˬ dahˇ kʼoeˇ taˆ ka tuˇ taˬ-euˬ, shuiˇ yaw taˬ-euˬ aˬkaˬshaˇ kʼawˇ zeuˇ oeˬ zeuˇ kʼoeˇ taˆ sheu taw taˬ-awˬ. 33Saˬ paˇ paˇ ma kʼoeˇ hmˬ-ahˇ, sehˬ gʼawˆ nymˇ mˬ-ahˇ yaw cehˆ yaw cehˆ-ehˇ jaˆ-eu kuˆ seuˬ-ahˇ bi ceuˬ-awˇ, kʼaˬ lo teˇ byaꞈ nyiˬ byaꞈ ahˇ-eu dawˬ ma saˇ jaˇ bahˬ keuˆ kʼoeˇ siˬ-ahˇ, lawˆ kaˬ taw taˬ-euˬ saˬ paˇ paˇ ma-euˬ naˇ kʼah paw ya bi jaˆ meh. Saˬ paˇ paˇ ma kʼoeˇ hmˬ-aˬ, muiˬ-eu shawˇ-eu jawˇ duˬ hawˇ-eu Muiˬ dui Shawˇ dui dui-eu jawˇ duˬ yaw kaˬ-ahˇ, aˇ kaˬ taw paˆ taˬ-euˬ meh. 34Dawˬ ma saˇ jaˇ bahˬ keuˆ-ahˇ kʼmˬ pymˬ pymˬ tehˬ taˬ-awˬ. 35Muiˬ dui shawˇ dui dui-eu jawˇ duˬ-euˬ laꞈ nyiˇ paw dzeˇ, laꞈ taˆ paw pyawˬ-ahˇ hawˬ jeh maˬ ehˇ, laꞈ oˆ paw pyawˬ-ahˇ tsiˇ kʼmˬ doꞈ taˬ duˬ maˬ ehˇ, kʼoeˇ paw heu paw-ehˇ bi jaˆ-awˬ.
36“Nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ neh zaꞈ-awˇ, aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ paˇ ma yuˇ-awˇ, sehˬ gʼawˆ gʼoˆ kʼehˬ-ahˇ sheu taw taˬ-awˬ. 37Saˬ paˇ paˇ ma kʼoeˇ sheu taw-eu gʼaˇ duˬ, aˬ kaˬ shaˇ daˇ kawˬ neh kʼawˇ zeuˇ ngaˬ zeuˇ jahˇ-awˇ, shuiˇ yaw-awˇ, shuiˇ kuˆ seuˬ jahˇ tsoꞈ-awˬ. Kʼawˇ zeuˇ kʼoeˇ deuˬ ka tuˇ-eu gʼaˇ duˬ, guiˬ shuiˇ zeuˇ dahˇ ngaˬ hmˬ jahˇ-awˬ.
Currently Selected:
Doˆ-iˇ 26: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
