Doˆ-iˇ 25
25
Muiˬ-eu shawˇ-eu sehˬ gʼawˆ-ahˇ damˬ-eu jeˬ
(Doˆ-iˇ 35.4-9)
1Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 2“Ngaˬ-ahˇ tiˬ jeˬ paˬ ya damˬ nehˬ laꞈ meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Tsawˇ haˬ aˬ geu gʼaˬ maˬ kaˬ, nui ma keuˆ-eu laꞈ kʼoeˇ, tiˬ jeˬ paˬ damˬ laˇ naˇ, ha geuꞈ nehˬ-awˬ. 3Ngaˬ-ahˇ ya damˬ-eu myawˬ deuˬ-aˬ, shuiˇ, pyuˇ, guiˬ shuiˇ, 4shawˇ jehˆ ni gʼeh-eu saˬ paˇ paˇ pyuˇ, yawˇ zaˬ caꞈ hm neh zaꞈ taˬ-euˬ nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ, 5naˬ yawˬ neˇ taˬ-euˬ yawˇ aˬ buˬ-euˬ baˆ kʼoˆ, aˬkaˬshaˇ daˇ kawˬ, 6tsiˇ kʼmˬ doꞈ-eu tsiˇ, lehꞈ-eu gʼaˇ duˬ hawˇ-eu yaw saw bi saw-eu gʼaˇ duˬ tsiˇ yaw saw jeˬ, 7Piˇ ma Yaw huiˬ gʼaˬ-euˬ pehˇ kʼahˬ hawˇ-eu kʼahˬ-ahˇ dehˬ daˬ duˬ-ahˇ guꞈ tsoꞈ-eu gʼaˇ duˬ neˇ tseuˆ ni gʼeh-eu kʼaˬ lo sehˇ deuˬ hawˇ-eu, nui jeˬ kʼaˬ lo sehˇ heu deuˬ meh. 8Iˇsaˬleˬlaˆ tsawˇ haˬ deuˬ nehˬ-ehˇ ngaˇ jawˇ-eu gʼaˇ duˬ, ngaˬ-euˬ gʼaˇ duˬ muiˬ-eu shawˇ-eu sehˬ gʼawˆ tiˬ gʼawˆ aꞈ yawꞈ maꞈ ya tsoˆ meh. 9Sehˬ gʼawˆ hawˇ-eu, sehˬ gʼawˆ laꞈ kʼoeˇ bi jaˆ-eu keu ka deuˬ-ahˇ, ngaˇ nawˬ-ahˇ mehˬ nehˬ-eu loꞈ-ehˇ tsoˆ-awˬ.
Dawˬ ma saˇ jaˇ Bahˬ keuˆ
(Doˆ-iˇ 37.1-9)
10“Aˬkaˬshaˇ daˇ kʼawˬ yuˇ-awˇ, yaw mahˇ paw nyiˬ caˆ tiˬ toˇ, yaw jeˇ paw tiˬ caˆ tiˬ toˇ, yaw goˇ paw tiˬ caˆ tiˬ toˇ byah-eu bahˬ keuˆ tiˬ siˬ taꞈ-awˬ. 11Bahˬ keuˆ kʼoeˇ siˬ-euˬ laꞈ kʼoeˇ paw maˬ ehˇ, laꞈ nyiˇ paw maˬ ehˇ, maˇ jawˆ ni gʼeh-eu shuiˇ yaw-awˇ, bahˬ keuˆ jawˬ jawˬ-ehˇ, shuiˇ neh daˇ bahˇ bahˇ-awˬ. 12Shuiˇ daˇ kʼahˇ oeˬ kʼahˇ jahˇ-awˇ, bahˬ keuˆ-euˬ laꞈ coeˇ oeˬ pyawˬ-ahˇ, tiˬ paw paˆ nyiˬ kʼahˇ pyawˇ-ehˇ laꞈ naˬ tsoꞈ-awˬ. 13Aˬkaˬshaˇ daˇ kawˬ neh kʼaˆ baꞈ kawꞈ jahˇ-awˇ, shuiˇ yaw-awˬ. 14Bahˬ keuˆ-ahˇ baꞈ-eu gʼaˇ duˬ, bahˬ keuˆ kʼoeˇ paˆ maˇ paˆ tsoꞈ-eu shuiˇ laꞈ naˬ laꞈ kʼoeˇ, kʼaˆ baꞈ kawˬ cawˬ ahˇ taˬ-awˬ. 15Kʼaˆ baꞈ kawˬ kʼoeˇ tiˬ jawˇ-iˬ maˬ gʼeu lehˆ ni, kʼoeˇ loꞈ-ehˇ bi jaˆ-awˬ. 16Naw maꞈ-ahˇ ngaˇ biꞈ-eu lehˇ gʼeh-eu zahˇ dawˬ kʼoꞈ dawˬ boꞈ ahˇ taˬ-euˬ kʼaˬ lo teˇ byaꞈ kʼoeˇ nyiˬ byaꞈ-ahˇ, bahˬ keuˆ kʼoeˇ siˬ laꞈ kʼoeˇ dawˆ-ahˇ taˬ-awˬ.
17“Yaw mahˇ paw nyiˬ caˆ tiˬ toˇ byah-awˇ, yaw jeˇ paw tiˬ caˆ tiˬ toˇ byah-eu bahˬ keuˆ kʼawˬ pymˬ tiˬ hmˬ, maˇ jawˆ ni gʼeh-eu shuiˇ neh jahˇ-awˬ. 18Shuiˇ yuˇ-awˇ, Jeˬluˇbeˬ#25.18 ‘Jeˬluˇbeˬ’ lehˇ ehˇ-eu dawˬ tsuiꞈ, Aˇ dahˬ beh-eu sahˬ boꞈ 3:24-ahˇ haw-awˬ. mawˇ kawˇ nyiˬ hmˬ jahˇ-awˬ. 19Bahˬ keuˆ kʼawˬ pymˬ-euˬ tiˬ paw dzeˇ dzaˬ-ahˇ tiˬ hmˬ jahˇ tsoꞈ-awˬ. 20Jeˬluˇbeˬ aˇ baˇ kʼoeˇ nyiˬ hmˬ, tiˬ hmˬ tiˇ hmˬ mehˬ shi bi pyawˇ-awˇ, aˬ dahˇ cawˬ ja-awˇ, bahˬ keuˆ kʼawˬ pymˬ-ahˇ bi dehˬ kaˬ taˬ-awˬ. 21Kʼaˬ lo teˇ byaꞈ kʼoeˇ nyiˬ byaꞈ bahˬ keuˆ laꞈ kʼoeˇ dawˆ ahˇ-awˇ, kʼawˬ pymˬ pymˬ tehˬ-awˬ. 22Nawˬ-ahˇ ngaˇ kʼoeˇ gaˇ tahˬ puˬ-awˇ, Iˇsaˬleˬlaˆ tsawˇ haˬ gʼaˇ duˬ zahˇ dawˬ kʼoꞈ dawˬ dawˬ tawˆ luꞈ, bahˬ keuˆ kʼawˬ pymˬ kʼoeˇ taˆ, Jeˬluˇbeˬ mawˇ kawˇ nyiˬ hmˬ yaw kaˬ-ahˇ, nawˬ-ahˇ ngaˇ biꞈ ma.
Miˬyehˇ-ahˇ lawˇ nehˬ-euˬ kaˬ muˇ taˬ duˬ hawˬ jeh
(Doˆ-iˇ 37.10-16)
23“Yaw mahˇ paw nyiˬ caˆ, yaw jeˇ paw tiˬ caˆ, yaw goˇ paw tiˬ caˆ tiˬ toˇ byah-eu hawˬ jeh tiˬ jeh, aˬ kaˬ shaˇ daˇ kawˬ neh jahˇ-awˬ. 24Hawˬ jeh kʼoeˇ jeh-ahˇ maˇ jawˆ ni gʼeh-eu shuiˇ yaw-awˇ, hawˬ jeh jawˬ jawˬ-ehˇ, shuiˇ neh daˇ bahˇ jahˇ baw-awˬ. 25Hawˬ jeh-euˬ mehˬ dzaˬ caw caw-ehˇ laꞈ zaˬ tiˬ daˬ byah ni daˇ bahˇ jahˇ baw-awˇ, daˇ bahˇ kʼoeˇ jawˬ jawˬ-ehˇ, shuiˇ daˇ bahˇ paˇ bahˇ-awˬ. 26Shuiˇ daˇ kʼahˇ oeˬ hmˬ jahˇ-awˇ, hawˬ jeh-euˬ laꞈ coeˇ oeˬ pyawˬ-ahˇ tsoꞈ-eu aˬ kuiˇ oeˬ kʼahˬ-ahˇ tsoꞈ-awˬ. 27Kʼaˆ baꞈ kawˬ cawˬ ahˇ duˬ pyeuꞈ-eu shuiˇ daˇ kʼahˇ kʼoeˇ oeˬ kʼahˇ-ahˇ, hawˬ jeh mehˬ dzaˬ-ahˇ jaˆ-eu shuiˇ daˇ bahˇ dawˬ peh tehˬ ni bi tsoꞈ-awˬ. 28Aˬkaˬshaˇ daˇ kawˬ neh kʼaˆ baꞈ kawꞈ jahˇ-awˇ, shuiˇ yaw-awˬ. 29Aˬ gaꞈ dzaˇ uiˇ lawˇ ngeh zmˬ-eu gʼaˇ duˬ, hawˬ gʼawˆ, kʼmˬ maˬ, ciˬ cuˇ hawˇ-eu, naˬ bo deuˬ jahˇ taˬ-awˬ. Kʼoeˇ deuˬ dawˬ tawˆ luˬ-ahˇ kʼawꞈ, maˇ jawˆ ni gʼeh-eu shuiˇ neh tehꞈ-ehˇ jahˇ-awˬ. 30Hawˬ jeh kʼoeˇ jeh-ahˇ dawˬ ma saˇ jaˇ bahˬ keuˆ dawˬ peh bi jaˆ-awˇ, hawˬ jeh kʼoeˇ taˆ, ngaˬ-ahˇ lawˇ nehˬ-eu muiˬ-eu shawˇ-eu kaˬ muˇ deuˬ maˬ tsehˆ leˇ ni bi jaˆ-awˬ.
Tsiˇ kʼmˬ doꞈ taˬ duˬ
(Doˆ-iˇ 37.17-24)
31“Maˇ jawˆ ni gʼeh-eu shuiˇ neh, tsiˇ kʼmˬ doꞈ taˬ duˬ tiˬ hmˬ jahˇ-awˇ, dawˬ pehˬ hawˇ-eu gʼawˇ pah kʼawˇ zeuˇ-ahˇ, shuiˇ neh tehˆ-awˇ jahˇ-awˬ. Aˇ cuˬ aˇ yehˆ yehˆ luꞈ-eu aˇ yehˆ aˇ baˇ deuˬ kʼawꞈ, tiˬ poˆ tehꞈ-ehˇ kʼoeˇ gaˇ jahˇ tsoꞈ-awˬ. 32Uˬ laꞈ koꞈ laꞈ jahˇ tsoꞈ-awˇ, tiˬ paw paˆ smˇ laꞈ bi tsoꞈ-awˬ. 33Uˬ laꞈ kʼoeˇ koꞈ laꞈ aˬ yawꞈ laꞈ yawꞈ-ahˇ, aˇ cuˬ aˇ yehˆ yehˆ luꞈ-eu aˬ laˬ moˬ#25.33 ‘Aˬlaˬmoˬ aˇ yehˆ’-aˬ, du pyuˇ aˇ yehˆ-ahˇ duˇ-eu aˇ yehˆ tiˬ jeˬ meh. aˇ yehˆ-ahˇ duˇ-eu aˇ yehˆ aˇ baˇ smˬ baˇ bi tsoꞈ-awˬ. 34Gʼawˇ pah kʼawˇ zeuˇ-ahˇ, aˇ cuˬ aˇ yehˆ yehˆ luꞈ-eu aˬ laˬ moˬ aˇ yehˆ-ahˇ duˇ-eu aˇ yehˆ aˇ baˇ oeˬ baˇ bi tsoꞈ-awˬ. 35Uˬ laꞈ kʼoeˇ smˬ gu, aˬ yawꞈ gu yawꞈ-euˬ dawˬ pehˬ-ahˇ, aˇ yehˆ aˇ cuˬ tiˬ hmˬ jahˇ tsoꞈ-awˬ. 36Aˇ yehˆ aˇ cuˬ kʼoeˇ deuˬ maˬ ehˇ, uˬ laꞈ kʼoeˇ deuˬ maˬ ehˇ, tsiˇ kʼmˬ doꞈ taˬ duˬ nehˬ-ehˇ aˬ yawꞈ tiˬ gaˇ tsoꞈ tawꞈ ni, maˇ jawˆ ni gʼeh-eu shuiˇ neh ya tehˆ meh. 37Tsiˇ kʼmˬ doꞈ taˬ duˬ kʼoeˇ taˆ doꞈ taˬ-eu gʼaˇ duˬ, tsiˇ kʼmˬ shiꞈ kʼmˬ jahˇ-awˇ, yaw shehꞈ bi bya-eu gʼaˇ duˬ, tsiˇ kʼmˬ kʼoeˇ deuˬ doꞈ-awˇ, kʼoeˇ gaˇ ciˬ daˆ taˬ-awˬ. 38Ciˆ nyawˆ hawˇ-eu, tsiˇ diꞈ deh kʼaˇ duˬ kʼmˬ maˬ-ahˇ kʼawꞈ, maˇ jawˆ ni gʼeh-eu shuiˇ neh jahˇ-awˬ. 39Tsiˇ kʼmˬ doꞈ taˬ duˬ hawˇ-eu keu ka heu deuˬ jahˇ-eu gʼaˇ duˬ, maˇ jawˆ ni gʼeh-eu shuiˇ nyiˬ tseˇ tiꞈ jawꞈ-i#25.39 Nyiˬ tseˇ tiꞈ jawꞈ-i-aˬ, smˬ tseˇ ngaˬ ciˇ loˇ-ahˇ di-eu meh. bi jiˇ leˇ-awˬ. 40Heu deuˬ dawˬ tawˆ luꞈ-ahˇ, ngaˬ neh nawˬ-ahˇ gawˬ jawˬ kʼoeˇ taˆ kʼaˇ mehˬ nehˬ-euˬ loꞈ-ehˇ, maˬ bi beu-iˇ ni jahˇ-awˬ.
Currently Selected:
Doˆ-iˇ 25: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
