Dawˬmehˬ 33
33
Iˇsaˬleˬlaˆ tsawˇ haˬ deuˬ-ahˇ Moˇseˬ dawˬ ngehˬ gʼeh nehˬ-euˬ
1Heu-aˬ, Miˬyehˇ-euˬ tsawˇ haˬ pyeuꞈ-eu Moˇseˬ maˬ shiˇ mi naˆ-ehˇ, Iˇsaˬleˬlaˆ tsawˇ haˬ deuˬ-ahˇ dawˬ ngehˬ gʼeh nehˬ-eu laꞈ kʼoeˇ biꞈ yaꞈ-euˬ guiˬ lahˬ deuˬ meh.
2Siˇnaˆ gawˬ jawˬ jawˬ ma-ahˇ neh,
Sahˬpaˬ Miˬyehˇ oe gʼeh leꞈ-awˇ,
Eˬdoˬ miˇ kʼahˬ-euˬ mˬ taˆ-ahˇ,
nahˇ ma loꞈ-ehˇ yawˬ doˆ laˇ-awˇ,
Paˬlaˬ gawˬ jawˬ uˬ du jawˇ-awˇ,
yawˬ tsawˇ-ahˇ yaw shehꞈbya-euˬ meh.
Mˬ taˆ gʼaˬ kʼehˇ aˇ heˇ aˇ muiˇ,
aˬ yawꞈ-euˬ tiˬ jawˬ jawˇ luꞈ-awˇ,
aˬ yawꞈ aꞈ laꞈ aˇ maˇ laꞈ-ahˇ,
doꞈ-eu miˬ lmˇ yuˇ luꞈ-eu meh.
3Aˬ yawꞈ-euˬ tsawˇ haˬ heu deuˬ-ahˇ,
Sahˬpaˬ Miˬyehˇ gaˬ-eu miˇ neh,
ngehˬ gʼeh dah teˬ haw piˇ-eu meh.
Aˬ kuiˇ uˬ moˆ tah uˇ leˇ-awˇ,
yawꞈ-euˬ ehˇ dawˬ aˬ dui geuꞈ ma.
4Moˇseˬ neh aˬ dui-ahˇ biꞈ-euˬ,
aˬ dui gʼaˇ duˬ poeˬ dui dui-eu,
Zahˇ dawˬ kʼoꞈ dawˬ-ahˇ caw teh ma.
5Iˇsaˬleˬlaˆ tsawˇ jeuˬ dawˬ tawˆ,
uiˬ leˇ bymˇ leˇ taˬ-euˬ kʼoeˇ taˆ,
Sahˬpaˬ Miˬyehˇ dzoeˬ dzaˬ-euˬ meh.
6Luˇbeˬ gaˇ kawˆ Moˇseˬ ehˇ-eu,
“Luˇbeˬ tsawˇ jeuˬ tsawˇ haˬ cuiˆ kʼawꞈ,
maˬ shiˇ tsehˆ ni dehꞈ gʼeh luꞈ-uˇ.”
7Yuˇdaˆ gaˇ kawˆ Moˇseˬ ehˇ-eu,
“Yuˇdaˆ tsawˇ jeuˬ-euˬ shaˇ dawˬ-ahˇ,
Sahˬpaˬ Miˬyehˇ naˇ haˬ nehˬ-awˬ.
Iˇsaˬleˬlaˆ tsawˇ jeuˬ deuˬ-ahˇ,
aˬ yawꞈ maꞈ bi gʼoꞈ gm leˇ-awˬ.
Muiˇ-eu deuˬ neh maˬ bi gʼaˬ ni,
Sahˬpaˬ Miˬyehˇ caw ba nehˬ-awˬ.”
8Leˬbiˇ gaˇ kawˆ Moˇseˬ ehˇ-eu,
“Sahˬpaˬ Miˬyehˇ nawˬ-euˬ nui noeˬ,
Leˬbiˇ tsawˇ haˬ deuˬ-ahˇ gʼoe-awˇ,
Uˇleˬ Duˇmeˬ#33.8 ‘Uˇleˬ Duˇmeˬ’ lehˇ ehˇ-eu dawˬ tsuiꞈ, Doˆ-iˇ-eu sahˬ boꞈ 28.30-ahˇ haw-awˬ. neh pah mehˬ-awˬ.
Maˬsah lehˇ kuˇ-euˬ jawˇ duˬ-ahˇ,
yawꞈ maꞈ-ahˇ nawˇ pyehˆ tseˇ haw-awˇ,
Meˬliˇbaˬ lawˇ gawˆ lawˇ dzeˇ-ahˇ,
yawꞈ maꞈ-ahˇ nawˇ lawˬ haw-euˬ meh.
9Aˬ da aˬ ma-ahˇ naˆ maˬ tseˇ,
nawˬ-ahˇ yawꞈ maꞈ saˇ jaˇ ziꞈ-awˇ,
mehˇ nmˇ hawˇ-eu zaˬ-ahˇ maˬ tseˇ,
nawˬ-ahˇ nui ma taꞈ dzehˬ-eu meh.
Nawˬ-euˬ dawˬ ma saˇ jaˇ laꞈ kʼoeˇ,
maˬ poˆ maˬ paˇ ni ziꞈ-eu meh.
10Nawˬ-euˬ Zahˇ dawˬ kʼoꞈ dawˬ mehˬ nah,
nawˬ-euˬ zaˬ deuˬ bi caw teh ni,
yawꞈ maꞈ mehˬnehˬ tsoˆnehˬ tehꞈ-a.
Yawꞈ maꞈ nawˬ-euˬ lawˇ duˬ kʼoeˇ taˆ,
lawˇ-eu shehˇ-eu jeˬ mˇ tehꞈ-a.
11Yawꞈ maꞈ tsawˇ jeuˬ gʼaˬ kʼaˆ laˇ ni,
Sahˬpaˬ Miˬyehˇ caw ba nehˬ-awˬ.
Yawꞈ maꞈ mˇ gaˇ nui ma tsaˬ-awˇ,
muiˇ-eu deuˬ-ahˇ laˆ cawˆ nehˬ-awˇ,
maˬ tuˇ laˇ coeˇ ni kʼehˬ nehˬ-awˬ.”
12Beˬyaˬmiˬ-euˬ gaˇ kawˆ ehˇ-eu,
“Sahˬpaˬ Miˬyehˇ gaˬ-eu tsawˇ jeuˬ,
aˬ yawꞈ neh haw piˇ-euˬ tsawˇ jeuˬ,
aˬ yawꞈ maꞈ gʼahˇ ceh jawˇ-eu meh.”
13Yoˇsehˆ gaˇ kawˆ Moˇseˬ ehˇ-eu,
“Yoˇsehˆ tsawˇ jeuˬ-euˬ miˇ kʼahˬ-ahˇ,
Sahˬpaˬ Miˬyehˇ guiˬ lahˬ biꞈ-awˬ.
Kʼoeˇ taˆ uˬ yehˇ bi ga le-awˇ,
laꞈ oˆ iˇ cuꞈ bi doˆ laˇ-awˬ.
14Nahˇ tsaˇ lawꞈ awꞈ taˬ-euˬ aˇ siˬ,
aˬ yawꞈ maꞈ miˇ kʼahˬ-ahˇ byah-awˇ,
yehˇ gʼahˇ jawˇ la maˬ tsehˆ leˇ ni,
aˇ siˬ aˇ lu keuˆ le luꞈ-uˇ.
15Mˬ ga miˇ seu ngeh neh jaˆ-euˬ,
gawˬ jawˬ gawˬ duˇ kʼoeˇ deuˬ tiˬ gʼoeˬ,
aˇ siˬ aˇ lu loˆ le luꞈ-uˇ.
16Miˬ dzaˬ doꞈ-eu baw duˆ laꞈ kʼoeˇ,
dawˬ ngehˬ-euˬ Sahˬpaˬ Miˬyehˇ neh,
sehˬ-euˬ lawˇ-euˬ muiˬ-eu guiˬ lahˬ,
yawꞈ maꞈ miˇ kʼahˬ-ahˇ byah luꞈ-uˇ.
Mehˇ nmˇ dawˬ tawˆ luꞈ-euˬ kʼoeˇ taˆ,
aˬ yawꞈ aˬ yuiꞈ geuꞈ-euˬ miˇ neh,
Yoˇsehˆ tsawˇ jeuˬ heu jeuˬ kʼoeˇ taˆ,
guiˬ lahˬ kʼoeˇ deuˬ keuˆ le luꞈ-uˇ.
17Yoˇsehˆ mawˇ neˇ-euˬ gʼaˬ tsoꞈ-awˇ,
nehꞈ nyoˬ uˬ coeˇ tsoꞈ gaˇ duˇ meh.
Aˬ yawꞈ-euˬ uˬ coeˇ kʼoeˇ deuˬ-aˬ,
Maˬnaˇseˬ-euˬ tiˬ heˇ hawˇ-eu,
Eˇpaˬleˬ-euˬ tiˬ muiˇ coeˇ meh.
Miˇ kʼahˬ tsawˇ jeuˬ dawˬ tawˆ luꞈ-ahˇ,
uˬ coeˇ kʼoeˇ neh aˬ yawꞈ tahˬ-awˇ,
mˬ dzeˇ miˇ dzeˇ teh dzeh-eu meh.”
18Zeˬbuˬluˬ hawˇ-eu Iˇsaˬkaˬ,
heu nyiˬ jeuˬ-euˬ gaˇ kawˆ ehˇ-eu,
“Laˆ shaˆ kʼoeˇ taˆ jeˬ gaꞈ gaꞈ-eu,
Zeˬbuˬluˬ dehꞈ dzaˬ laˇ luꞈ-uˇ.
Iˇsaˬkaˬ-euˬ nymˇ jiˇ laꞈ kʼoeˇ,
pyuˇ shuiˇ myawˬ gahˬ byah laˇ luꞈ-uˇ.
19Aˬ nyaꞈ nmˇ-euˬ gawˬ jawˬ kʼoeˇ taˆ,
aˬ cawˬ tsawˇ jeuˬ deuˬ kuˇ daˆ-awˇ,
yaw tsaˬ yaw dawˇ jeˬ lawˇ luꞈ-uˇ.
Iˬ ma laˆ shaˆ gʼahˇ ceh hawˇ-eu,
laˆ shaˆ lawˇ dzeˇ kʼaˇ shuiꞈ deh-ahˇ,
yawꞈ maꞈ pyuˇ shuiˇ poˆ za-euˬ meh.”
20Gaˆ-euˬ gaˇ kawˆ Moˇseˬ ehˇ-eu,
“Yawꞈ maꞈ miˇ kʼahˬ bi jeˇ laˇ ni,
Miˬyehˇ mˇ-euˬ gaˇ ja ceuˬ-awˬ.
Aˬ laꞈ kawꞈ tsehˆ dzeh nehˬ-eu lehˇ,
uˬ duˬ gʼeu yawˆ dzeh nehˬ-eu lehˇ,
aˇ laˬ jaˬ shiˇ loꞈ-eu loꞈ-ehˇ,
Gaˆ tsawˇ haˬ deuˬ loꞈ luꞈ-eu meh.
21Aˬ yuiꞈ-euˬ gʼaˇ duˬ bi jaˆ-euˬ,
muiˬ dui dui-eu miˇ kʼahˬ pehˇ tsahˇ,
aˬ yawꞈ gʼaˇ duˬ tsaˬ geuꞈ-euˬ meh.
Iˇsaˬleˬlaˆ aˬ yuiꞈ aˬ tsu,
uiˬ le jiˇ-awˇ baꞈ dzah dzah ngeh,
Sahˬpaˬ Miˬyehˇ-euˬ Zahˇ dawˬ-ahˇ,
aˬ yawꞈ maꞈ naˇ haˬ geuꞈ-euˬ meh.”
22Daˬ-euˬ gaˇ kawˆ Moˇseˬ ehˇ-eu,
“Daˬ-aˬ aˇ laˬ jaˬ shiˇ zaˬ meh.
Baˬshaˬ-ahˇ tsawˬ doˆ laꞈ-euˬ meh.”
23Naˬtaˬliˇ-euˬ gaˇ kawˆ ehˇ-eu,
“Sahˬpaˬ Miˬyehˇ haw cawˬ-eu jeˬ,
muiˬ dui dui-eu guiˬ lahˬ yaw dzahˇ,
Naˬtaˬliˇ kʼoeˇ taˆ byah kʼaˇ meh.
Aˬ yawꞈ maꞈ miˇ kʼahˬ laꞈ oˆ dzaˬ,
Gaˬliˬlehˇ lah-ahˇ keuˆ ni meh.”
24Aˬsaˬ gaˇ kawˆ Moˇseˬ ehˇ-eu,
“Iˇsaˬleˬlaˆ tsawˇ jeuˬ laꞈ kʼoeˇ,
Aˬshaˬ guiˬ lahˬ za dzehˬ-euˬ meh.
Mehˇ nmˇ mehˬ shi myaˆ pyawˬ jaˆ-awˇ,
yawꞈ-euˬ miˇ kʼahˬ saˬ loˬ loˬ yaˇ,
baw dui za dui dui le luꞈ-uˇ.
25Aˬ yawꞈ-euˬ meuˬ deuˬ-euˬ lahˇ kʼehˬ,
shmˇ laˇ gʼoˆ ziꞈ dah ni piˬ-awˇ,
guˆ kʼaˇ maˬ za ni jawˇ luꞈ-uˇ.”
26Iˇsaˬleˬlaˆ tsawˇ haˬ deuˬ-oˇ,
mˬ taˆ mˬ dmˇ mahˬ dziˬ dziˬ-awˇ,
caw ba-eu lehˇ ga keuˆ le-eu,
naw maꞈ-euˬ Miˬyehˇ-ahˇ duˇ-eu,
Miˬyehˇ nui gʼaˬ aˬ gaˇ jawˇ ta.
27Miˬyehˇ naw maꞈ-ahˇ aˬ myah luꞈ,
ceh piˇ loꞈ piˇ bo saˆ luꞈ meh.
Yawꞈ-euˬ yaˇ ziˇ ziꞈ-eu aˬ laꞈ,
naw maꞈ-ahˇ caw ba luꞈ-eu meh.
Naw maꞈ le-eu gaˇ ma mehˬ shi,
muiˇ-eu deuˬ-ahˇ teh dzeh jiˇ-awˇ,
dawˬ tawˆ luꞈ-ahˇ laˆ cawˆ-awˬ lehˇ,
naw maꞈ-ahˇ aˬ yawꞈ ehˇ-eu meh.
28Kʼoeˇ miˇ neh, Yaˬkoˆ-euˬ zaˬ deuˬ,
dzaˬ la gʼo cehˇ aˬ gaꞈ dzaˇ uiˇ,
dzaˬ ngeh maˬ jiˇ dawˇ ngeh maˬ shuꞈ,
uˬ yehˇ loꞈ-ehˇ ceuˬ ga muiˬ-eu,
miˇ kʼahˬ-ahˇ naw maꞈ ya jawˇ-awˇ,
nui saˇ oꞈ-eu laꞈ kʼoeˇ dehꞈ-awˬ.
29Iˇsaˬleˬlaˆ tsawˇ haˬ deuˬ-oˇ,
Sahˬpaˬ Miˬyehˇ neh ka kʼoꞈ-euˬ,
naw maꞈ loꞈ-ehˇ gʼeh-eu tsawˇ jeuˬ,
miˇ tsaˬ kʼoeˇ taˆ aˬ gaˇ jawˇ ta.
Naw maꞈ-ahˇ ceh piˇ loꞈ piˇ-awˇ,
aˬ cawˬ-ahˇ bi gʼaˬ leˇ-eu lehˇ,
Sahˬpaˬ Miˬyehˇ aˬ yawꞈ mawˇ do,
naw maꞈ-euˬ dehˬ daˬ duˬ pyeuꞈ-awˇ,
naw maꞈ-euˬ mi cehˇ pyeuꞈ-eu meh.
Muiˇ-eu deuˬ naw maꞈ-euˬ mehˬ shi,
gʼawˬ shaˬ gaˬ ni tahˬ shaˇ laˇ gaˇ,
naw maꞈ tsawˬ nawˬ ya nawˬ tehꞈ-a.
Currently Selected:
Dawˬmehˬ 33: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
