Dawˬmehˬ 32

1“Mˬ-oˇ, ngaˬ-euˬ dawˬ naˇ haˬ-awˬ.

Yaw duˬ duˬ-ehˇ naˇ haˬ duˬ-awˬ.

Miˇ-oˇ, ngaˬ-euˬ teˇ saˇ gaˬ-awˬ.

2Ngaˬ-euˬ dawˬ mehˬ uˬ yehˇ yehˇ-awˇ,

ngaˬ-euˬ dawˬ tsoˆ ceuˬ ga ga-awˬ.

Jaˆ gaˆ koeˇ taˆ yehˇ muˆ muˆ-awˇ,

sahˬ lahˬ kʼoeˇ taˆ yehˇ ma ma-awˬ.

3Sahˬpaˬ Miˬyehˇ-euˬ tsawˇ myahˇ-ahˇ,

ngaˇ ciˬ huiˬ ciˬ mahˇ nehˬ-eu ma.

Aˬ dui Miˬyehˇ huiˬ gaˇ mahˇ gaˇ,

yawꞈ-euˬ tsawˇ haˬ deuˬ guˇ gaˬ-awˬ.

4“Aˬ dui lo guˇ Sahˬpaˬ Miˬyehˇ,

yawꞈ mˇ-euˬ jeˬ tsaˬ meh byah meh.

Aˬ dui Miˬyehˇ saˇ jaˇ ziꞈ-awˇ,

tsaˬ dui, sui dui, dawˇ dui dui meh.

5Yawꞈ-euˬ mehˬ shi naw maꞈ dehꞈ-eu,

yawꞈ-ahˇ saˇ jaˇ puiˬ-euˬ miˇ neh,

yaw lehˬ yaw ca myaˬ-eu naw maꞈ,

yawꞈ-euˬ zaˬ lehˇ maˬ kuˇ geuˇ-a.

6Beh-euˬ yaw sahˇ naw maꞈ Aˬ da,

naw maꞈ tsawˇ jeuˬ-ahˇ ciˬ tuˇ-euˬ,

Sahˬpaˬ Miˬyehˇ mehˬ shi naw maꞈ,

aˬ dzawˬ aˇ gah ya gah nmˇ loˇ.

7“Aˇ hu ziˇ-ahˇ pyeuꞈ ka leꞈ-euˬ,

gaˇ kawˆ deuˬ-ahˇ naˇ haˬ haw sheˇ.

Aˬ da deuˬ neh bi ja mehˬ-awˇ,

tsawˇ mawˬ deuˬ neh bi dzawˇ duˬ sheˇ.

8Huiˬ dui mahˇ dui dui-eu Miˬyehˇ,

miˇ tsaˬ zaˬ-ahˇ miˇ kʼahˬ biˇ-awˇ,

jawˇ duˬ pehˇ tsahˇ tsaˬ tsoˆ nehˬ-awˇ,

miˬ yehˇ deuˬ neh bi dzoeˬ-euˬ meh.

9Ehˇ kʼawꞈ, Yaˬkoˆ-euˬ zaˬ deuˬ-ahˇ,

aˬ yawꞈ neh tseˇ doˆ geuꞈ-euˬ meh.

10“Jaˬ lehˇ neh bi hehˇ dzaˬ jiˇ-euˬ,

kʼaˇ shuiꞈ deh yaˇ bawˇ tsahˬ laꞈ kʼoeˇ,

yawꞈ maꞈ shaˬ luꞈ gaˇ ya mawˇ-awˇ,

yawˬ ha gʼawˇ mawˇ loꞈ-ehˇ sawˇ-awˇ,

yawꞈ maꞈ-ahˇ bo saˆ nehˬ-euˬ meh.

11Dzeˇ ma aˬ dahˇ uˬ moˆ dzeˇ zaˬ,

zaw nya ni hehˇ tehˇ-euˬ loꞈ-ehˇ,

Iˇsaˬlaˬleˇ tsawˇ haˬ deuˬ-ahˇ,

Sahˬpaˬ Miˬyehˇ hehˇ tehˇ-euˬ meh.

12Miˬ yehˇ nui gʼaˬ-ahˇ maˬ gʼoe ni,

Sahˬpaˬ Miˬyehˇ tiˬ gʼaˬ tehꞈ-ehˇ,

aˬ yawꞈ maꞈ-ahˇ sheuˬ doˆ-euˬ meh.

13“Gawˬ jawˬ yaw goˇ bi uˆ lahˇ-awˇ,

deh ga boeˬ nmˬ bi dzaˬ-euˬ meh.

Lo guˇ byaˬ uiˇ bi cuˆ dawˇ-awˇ,

lo gahˬ kʼoeˇ taˆ ka dehꞈ taˬ-euˬ

saˬ loˬ tsiˇ bi dawˇ dehˆ-euˬ meh.

14Mawˇ neˇ, ciꞈ myehꞈ, aˬ coeˇ mehˇ-awˇ,

yawˇ, ciꞈ myehꞈ, mawˇ neˇ loˆ-awˇ,

dzaˬ la gʼo cehˇ muiˬ dui dui-awˇ,

aˬ gaꞈ dzaˇ uiˇ kuiˇ dui dui-eu,

yawꞈ maꞈ dehꞈ dzaˬ-euˬ gaˇ kawˆ meh.

15“Sahˬpaˬ Miˬyehˇ-euˬ tsawˇ haˬ deuˬ,

mahˬ paˬ cu tsuˇ yawꞈ-ahˇ behˆ-awˇ,

bi dzaˬ tsuˇ-euˬ Beh-euˬ yaw sahˇ,

Miˬyehˇ-ahˇ myaˆ maˬ haw cawˬ ni,

ka kʼoꞈ-eu gʼaˬ-ahˇ byehˇ-euˬ meh.

16Miˬyehˇ nui deuˬ jawˇ paw pyawˇ-awˇ,

aˬ yawꞈ myaˆ naˆ ni mˇ-euˬ meh.

Jawꞈ dui dui-eu jeˬ mˇ mehˬ-awˇ,

aˬ yawꞈ nui ma bi pehˇ-euˬ meh.

17Aˬ poeˬ ziˇ-ahˇ maˬ gaˬ haw-ehˇ,

aˬ bawˇ ziˇ-ahˇ maˬ gʼoe haw-euˬ,

miˬ yehˇ maˬ ngeuˇ-eu nehꞈ deuˬ-ahˇ,

aˬ yawꞈ maꞈ lawˇ-euˬ shehˇ-euˬ meh.

18Yawꞈ maꞈ-ahˇ dehꞈ-eu jeˬ biꞈ-euˬ,

ka kʼoꞈ nehˬ-euˬ yaw sahˇ pyeuꞈ-eu,

Miˬyehˇ-ahˇ yawꞈ maꞈ ngehˇ-euˬ meh.

19“Sahˬpaˬ Miˬyehˇ kʼoeˇ gaˇ mawˇ ngeh,

nui ma pehˇ dui dui -eu laꞈ kʼoeˇ,

yawꞈ-euˬ aˬ buˇ aˬ li deuˬ-ahˇ,

myaˆ maˬ haw cawˬ ni byehˇ-euˬ meh.

20Kʼoeˇ naˇ, aˬ yawꞈ ngehˬ-euˬ dawˬ-aˬ,

‘Yawꞈ maꞈ-ahˇ ngehˬ maˬ paˇ gʼeh ma.

Nui ma gʼahˇ-awˇ saˇ jaˇ puiˬ-eu,

aˬ jeˬ keuˆ le nga lehˇ haw ma.

21Miˬyehˇ maˬ ngeuˇ gaˇ tahˬ shaˇ-awˇ,

ngaˬ-ahˇ myaˆ bi naˆ laꞈ-euˬ meh.

Tahˬ pahˬ aˬ ma mawˇ kawˇ tehˆ-awˇ,

ngaˇ nui ma pehˇ ni jahˇ-euˬ meh.

Tsawˇ jeuˬ nui deuˬ-ahˇ ngaˇ zmˬ-awˇ,

aˬ yawꞈ maꞈ myaˆ naˆ ni jahˇ ma.

Aˬ dzawˬ aˇ gah tsawˇ jeuˬ zmˬ-awˇ,

aˬ yawꞈ maꞈ nui ma bi pehˇ ma.

22Ngaˬ-euˬ nui pehˇ miˬ lmˇ nyehˆ-awˇ,

miˇ tsaˬ dawˬ tawˆ bi puiˆ byoˆ ma.

Miˇ tsaˬ dawˬ dah puiˆ naꞈ gʼeh-awˇ,

gawˬ jawˬ duˬ puˇ puiˆ dzaˬ tehꞈ-a.

23“Shaˬ zahˬ duˬ gahˬ baꞈ daˆ nehˬ-awˇ,

kaˆ myaˬ dawˬ tawˆ beuˆ tsoˆ nehˬ ma.

24Mehꞈ-eu baˬ da ziˇ ya jiˇ-awˇ,

naˇ-eu baˬ da ya shiˇ tehꞈ-a.

Bawˇ tsahˬ jeˬ zaˬ pyehˬ gʼeh leꞈ-awˇ,

aˬ yawꞈ maꞈ-ahˇ bi kawꞈ sehꞈ ma.

Doꞈ kʼaˆ aˇ lawˇ pyehˬ gʼeh leꞈ-awˇ,

aˬ yawꞈ maꞈ-ahˇ bi toˆ sehꞈ ma.

25Pu ka mi cehˇ guiˇ mˇ le-awˇ,

shaˆ shiˇ nymˇ-ahˇ uˇ keuˆ le-awˇ,

zaˬ miˬ zaˬ yo deuˬ bi sehꞈ-awˇ,

tsawˇ mawˬ zaˬ nahˬ maˬ bi dzeuˇ-iˇ.

26Aˬ cawˬ maˬ paˇ noeˬ mawˇ coeˇ ni,

kʼaˬ puiˬ kʼaˬ lehˇ lehˇ byoˆ nehˬ ma.

27Ngaˬ-euˬ mawˇ do oe gʼeh leꞈ-awˇ,

aˬ yawꞈ maꞈ-ahˇ lehˬ loeˇ-euˬ kʼoeˇ,

aˬ yawꞈ maꞈ-ahˇ muiˇ-eu kʼoeˇ deuˬ

aˬ yawꞈ maꞈ neh jahˇ-euˬ te lehˇ,

kʼahˬ sehˇ maˬ bi jehˆ gaˇ keuˆ ma.’

28“Iˇsaˬleˬlaˆ dawˇ ga ga-awˇ,

noeˬ siˬ nya-eu jeˬ maˬ ahˇ-a.

29Aˬ cawˬ neh bi deuˆ gʼaˬ-euˬ kʼoeˇ,

gaˇ kawˆ maˬ tseˇ paˆ geuꞈ nya-a.

30Yawꞈ maꞈ gʼoe duˬ lo guˇ pyeuꞈ-eu

Sahˬpaˬ Miˬyehˇ neh yawꞈ maꞈ-ahˇ

maˬ byehˇ dzeh ni haw law nmˇ-aˬ,

aˬ cawˬ tsawˇ haˬ tiˬ gʼaˬ tehꞈ-ehˇ,

yawꞈ maꞈ tiˬ heˇ gʼaˬ-ahˇ teh-awˇ,

aˬ cawˬ tsawˇ haˬ nyiˬ gʼaˬ oe-euˬ,

tiˬ muiˇ gʼaˬ-ahˇ gʼaˬ leˇ nmˇ loˇ.

31Muiˇ-eu deuˬ-euˬ miˬ yehˇ kʼoeˇ deuˬ,

Iˇsaˬleˬlaˆ Miˬyehˇ naˆ ni,

baoˬ maˬ ahˇ-ehˇ gʼaˬ maˬ kʼaˆ-eu,

muiˇ-eu deuˬ siˬ duˬ taˬ-euˬ meh.

32Sawˇdoˬ hawˇ-eu Gawˇmawˇlaˆ meuˬ,

jawꞈ dui doeˇ dui dui-euˬ loꞈ-ehˇ,

muiˇ-eu kʼoeˇ deuˬ doeˇ dui dui-awˇ,

kʼaˬ dui dui-eu aˬ gaꞈ ciˇ ni,

aˇ siˬ doꞈ ahˇ gaˇ duˇ leˇ-awˇ,

33aˇ lawˇ-euˬ doꞈ shehˆ ahˇ taˬ-euˬ

aˬ gaꞈ dzaˇ uiˇ-ahˇ duˇ-eu meh.

34“Muiˇ-eu deuˬ yawꞈ maꞈ-ahˇ zuiˆ-euˬ,

Sahˬpaˬ Miˬyehˇ maˬ ngehˇ byoˆ-a.

35Aˬ yawꞈ neh laꞈ poˆ bi poˆ-awˇ,

muiˇ-eu deuˬ ya coˬ dzeh-iˇ-eu,

aˇ nah kʼoeˇ nah peh le luꞈ meh.

36Yawꞈ-euˬ tsawˇ haˬ gʼaˬ juˬ-iˇ ngeh,

Sahˬpaˬ Miˬyehˇ ka kʼoꞈ tehꞈ-a.

Yawꞈ-ahˇ saˇ jaˇ ziꞈ luꞈ-eu deuˬ,

caw ba nehˬ-eu gʼaˬ maˬ jawˇ ngeh,

aˬ yawꞈ gʼawˬ shaˬ gaˬ nehˬ tehꞈ-a.

37Kʼoeˇ ngeh yawꞈ-euˬ tsawˇ haˬ deuˬ-ahˇ,

‘Naw maꞈ gʼoe-euˬ miˬ yehˇ kʼoeˇ deuˬ,

aˬ geu paw iˇ byoˆ jiˇ taˬ’ lehˇ,

Sahˬpaˬ Miˬyehˇ naˇ haˬ tehꞈ-a.

38‘Muiˬ-eu lawˇ dzaˇ tsiˇ byuˬ lawˇ-awˇ,

aˬ gaꞈ dzaˇ uiˇ lawˇ nehˬ-euˬ-aˬ,

nymˬ-mˇ cehˆ coeˬ bi coeˬ leꞈ-awˇ,

naw maꞈ-ahˇ bi ka kʼoꞈ-awˬ tawˇ.

39“‘Ngaˇ tiˬ gʼaˬ tehꞈ-ehˇ Miˬyehˇ ma.

Nui deuˬ-aˬ miˬ yehˇ maˬ ngeuˇ-a.

Toeˬ dehꞈ toeˬ shiˇ ngaˇ pyeuꞈ-eu ma.

Laˆ naˇ-awˇ laˆ taˬ-eu ngaˇ ma.

Ngaˬ-euˬ nui loˆ ngaˇ dzoeˬ luꞈ gaˇ,

laˆ tsoeˬ peuˬ-eu gʼaˬ maˬ jawˇ-a.

40Ngaˇ dehꞈ luꞈ-eu Miˬyehˇ pyeuꞈ-eu,

yaw duˬ yaw ciˇ baw-eu loꞈ-ehˇ,

mˬ paw aˬ laꞈ cawˬ ja taˬ-awˇ,

heu loꞈ-ehˇ saˇ jaˇ dzaˬ-eu ma.

41Ngaˬ-euˬ mi cehˇ ngaˇ siˬ taˆ-awˇ,

yaw tsaˬ yaw dawˇ jeˬ mˇ byah ma.

Muiˇ-eu deuˬ-ahˇ laꞈ poˆ poˆ-awˇ,

ngaˬ-ahˇ bye gaˇ ngaˇ kʼehˬ nehˬ ma.

42Ngaˬ-euˬ kaˆ myaˬ shiˬ dawˇ yehꞈ-awˇ,

ngaˬ-euˬ mi cehˇ shaˬ jiˇ dzaˬ-ehˇ,

ngaˬ-ahˇ guiˇ kʼaˇ deuˆ laˇ-eu deuˬ,

tiˬ gʼaˬ-iˬ maˬ bi dzeuˇ-iˇ ma.

Deuˆ tahˬ-awˇ nyehꞈ mi-euˬ deuˬ kʼawꞈ,

dawˬ tawˆ luꞈ ya shiˇ jiˇ tehꞈ-a.’

43“Miˇ kʼahˬ tsawˇ jeuˬ dawˬ tawˆ luꞈ-oˇ,

Sahˬpaˬ Miˬyehˇ-euˬ tsawˇ haˬ-ahˇ,

naw maꞈ ya ja ceuˬ gaˇ keuˆ meh.

Aˬ yawꞈ maꞈ-ahˇ sehꞈ-eu deuˬ-ahˇ,

aˬ yawꞈ kʼehˬ nehˬ kʼaˆ nehˬ tehꞈ-a.

Muiˇ-eu deuˬ-ahˇ laꞈ poˆ poˆ-awˇ,

aˬ yawꞈ-euˬ tsawˇ haˬ deuˬ-ahˇ-aˬ,

aˬ yawꞈ iˬ baˇ pyehˬ nehˬ tehꞈ-a.”

44Iˇsaˬleˬlaˆ tsawˇ haˬ deuˬ ya gaˬ ni, Moˇseˬ hawˇ-eu Nuˬ-eu aˬ li Yawˇshuˆ aˬ nyaꞈ caˇ dawˬ heu bymˇ caˇ-euˬ meh.

Moˇseˬ mehˬ-eu tsoˆ-eu aˇ saˬ saˬ-eu poˆ

45Miˬyehˇ mehˬ-euˬ tsoˆ-euˬ dawˬ deuˬ Iˇsaˬleˬlaˆ tsawˇ haˬ deuˬ-ahˇ Moˇseˬ biꞈ gʼaˬ ngeh, 46aˬ yawꞈ ehˇ-eu, “Iˬ nah ngaˇ naw maꞈ-ahˇ biꞈ gʼaˬ-eu zahˇ dawˬ kʼoꞈ dawˬ heu deuˬ-ahˇ maˬ ngehˇ ni caw teh-awˬ. Naw maꞈ-euˬ zaˬ deuˬ kʼawꞈ, Sahˬpaˬ Miˬyehˇ neh mehˬ nehˬ tsoˆ nehˬ-eu dawˬ deuˬ-ahˇ saˇ jaˇ ziꞈ-awˇ naˇ haˬ geuꞈ nya ni mehˬ poˆ nehˬ-awˬ. 47Mehˬ-eu tsoˆ-eu dawˬ heu deuˬ-aˬ, gaˇ dahˇ maˬ tsoeˬ-eu dawˬ deuˬ maˬ ngeuˇ-a. Heu-aˬ, naw maꞈ-euˬ dehꞈ jeˬ dehꞈ kawˆ meh. Heu deuˬ-ahˇ naˇ haˬ geuꞈ naˇ, naw maꞈ jawˇ leˇ-eu lehˇ gʼeh-eu Yawˇdaˬ lawˇ baˬ nui baˬ paw jaˆ-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ gʼawˬ myahˇ ni ya dehꞈ ya jawˇ tehꞈ-a.”

48Kʼoeˇ ngeh nah aˬ yawꞈ nah-ahˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 49“Yeˬliˇkoˇ meuˬ-euˬ tiˬ dawˇ heu baˬ-ahˇ jaˆ-eu Mawˇbaˆ miˇ kʼahˬ Aˬbaˬleˬ gawˬ jawˬ jaˆ gaˇ le-awˬ. Neˬboˬ gawˬ jawˬ-ahˇ daˆ leˇ-awˇ, Iˇsaˬleˬlaˆ tsawˇ haˬ deuˬ-ahˇ ngaˇ biꞈ-eu lehˇ gʼeh-eu Kaˬnaˬ miˇ kʼahˬ-ahˇ haw gʼeh-awˬ. 50Hawˇlaˆ gawˬ jawˬ kʼoeˇ taˆ nawˬ-euˬ aˇ doˆ Aˬloˬ ziˇ jiˇ-euˬ loꞈ-ehˇ, gawˬ jawˬ kʼoeˇ jawˬ kʼoeˇ taˆ nawˇ ziˇ ya jiˇ leˇ tehꞈ-a. 51Aˬ jeˬ miˇ neh ehˇ naˇ, naw nyaꞈ nyiˬ mehˇ nmˇ luꞈ, Iˇsaˬleˬlaˆ tsawˇ haˬ deuˬ mehˬ shi ngaˬ-ahˇ saˇ jaˇ maˬ ziꞈ-aˬ. Ziˇnaˆ bawˇ tsahˬ bawˇ dahˇ-ahˇ jaˆ-eu Kaˬdeˬshaˇ meuˬ gaˇ dzeˇ Meˬliˇbaˬ lawˇ gawˆ dawˬ peh, Iˇsaˬleˬlaˆ tsawˇ haˬ deuˬ mehˬ shi naw nyaꞈ ngaˬ-ahˇ yaw zeu maˬ baw-eu jeˬ mˇ-euˬ meh. 52Miˇ kʼahˬ kʼoeˇ kʼahˬ-ahˇ gaˇ mahˇ kaˬ gaˇ neh nawˇ ya haw mawˇ tehꞈ-a. Ehˇ kʼawꞈ, Iˇsaˬleˬlaˆ tsawˇ haˬ deuˬ-ahˇ ngaˬ neh biꞈ-euˬ miˇ kʼahˬ laꞈ kʼoeˇ nawˇ maˬ ya le uˇ-a.”

Currently Selected:

Dawˬmehˬ 32: AHK

Highlight

Copy

Compare