YOIL 3
3
Butusan do Kinorohingan o Koinsanai di Bansa'
1Om boros kad Tuhan,
“Tontok nopondo do maso'ddi om posimbayanon ku nondo kawagu o Yohuda om Yorusalim.
2Timungon ngai' ku nondo o koinsanai di bansa'
om angatan ku iyolo' do hilo'd Kubong do Pomutusan.
Hilo' nondo do butusan ku iyolo'
tu' araat i' o winonsoi diyolo' dot id Israil, i tulun ku.
Pinasasad diyolo' i tulun dot Israil do hilo'd pomogunan do suwai
om pinogibahagi-hagi' diyolo' do minanganu i tana' dot Israil.
3Nundi' diyolo' do mongilo
ondung isai o kaanu di tulun di natangkap diri.
Dinagang diyolo' o tangaanak do tongokusai om tongoondu' dot id ponguripanan,
do maan do pambayar do sundal om waig dot anggur.
4Nunu daa o wonsoyon dokoyu dot id doho', oi Tirus, om Sidon, om koinsanai di watas do Pilistin? Mumbal kou daa do sumuli' doho'? Ondung sumuli' kou, om iyoho' nga' a' i' alaid do sumuli' dokoyu. 5Tinanggayan dokoyu i pirok om tamas ku, om nigitan dokoyu i dapu' ku dot angagayo o gatang do hilo'd walai'd tingolig dokoyu. 6Tinanggayan dokoyu i tulun do Yohuda om Yorusalim do mininsodu' do pomogunan diyolo' om nadagang dokoyu iyolo' dot id bansa' do Yunani. 7Baino' nondo om posoliwanon ku iyolo' do mantad hilo'd piro-piro o kinoiyonon di pinadagangan dokoyu diyolo'. Om wonsoyon ku nondo dot id dokoyu o miagal di winonsoi dokoyu dot id diyolo'. 8Pologoson ku nondo i tangaanak dokoyu do kusai om tondu' dot adagang dot id tulun do Yohuda om dagangon nondo diyolo' iyolo' dot id tulun do Siba, i pomogunan do hilo'd sodu'. Iyoho' no, i Tuhan, o minomoros diti.
9Poboroso' no o kopoilaan diti dot id koinsanai'd bansa':
‘Sodia' nod sumangod;
lohowo' ngai' no i gunsiou dokoyu;
timungo' ngai' no i soudor dokoyu om mamanau no!
10Dunsulon no i lahis do radu dokoyu do maan do gayang
om silihon do tandus i pisau di ponunutu' dokoyu.
Iri piya i tulun dot ongoluhoi nga' mositi' nod kaakun do mongoi sangod.
11Lomusai nod rumikot,
koinsanai dokoyu i bansa' dot id posorili',
om tumimung i' do hilo'd rantai,’ ka dau.
Polintuhuno' ngai' no i soudor nu do mongoi panangod diyolo', oi Tuhan.
12Om boro-boros no kawagu o Tuhan do poingkaa,
‘Mositi' nod sumodia' ngai' i bansa',
om rumikot do hilo'd kubong di roitan do Kubong do Pomutusan.
Om hilo' oku nondo, iyoho' i Tuhan, do mirikau
do momutus do koinsanai'd bansa' di posorili' di tulun ku.
13Angaraat tomod iyolo';
tataso' no iyolo' do miagal do gandum di dongmongomot;
pagao' no iyolo' do miagal di pamaga' do tua' dot anggur dot id pamagaan di noponu' no;
om gisom do kalabai om koluyung i waig dot anggur.
14Rinibuan po o tulun do hilo'd kubong di roitan do Kubong do Pomutusan.
Tu' hilo' no do rumikot i tadau'd Tuhan om a' no alaid do rumikot iri.
15Tumuong no o tadau om tulan,
om a' mogulinau i rombituon,’ ka,” ka dau.
Barakatan Indo do Kinorohingan i Tulun Dau
16Mamagarom o Tuhan do mantad hilo'd Sion, i nuluhon dau;
ongorod po i boros dau do mantad hilo'd Yorusalim;
gumogor po o tawan om tana'.
Nga' obian id Tuhan i tulun dau.
17“Om koilo kou nogindo oi Israil, dot iyoho' no o Tuhan, i Kinorohingan dokoyu.
Poingiyon oku do hilo'd Sion, i nulu-nulu ku dit olidang.
Osiliu nondo do bandar dot olidang o Yorusalim;
om a' nondo kawagu iri aala' do bansa'd suwai.
18Tontok nopondo do maso'ddi om otongkop nopo do kabun dot anggur ilo konuluhanan,
om haro ngai' nopo o tayam-tayam dot abantalan dot id pointikid-tikid do nuluhon dit ongoluhub;
om kiwaig kasai' nopondo i bawang do hilo'd Yohuda.
Om haro nondo o bawang do lumuyung do mantad hiri'd Walai'd Sasambayangan dot Agayo,
om momoyopos nondo iri di Rantai dot Akasia.
19Osiliu nondo do tana' do kowotuan o Masir,
om osiliu do pogun ot Idom,
tu' minanangod i' iyolo' di pomogunan do Yohuda
om minamatai di tulun do hilo' dit aiso' o sala'.
20-21Obian ku indo do sumuli' i tulun do nangapatai,
a' ku no olu-oluon i tulun do kisala'.
Nga' Yohuda nopondo om Yorusalim om iyonon kasai' i' do tulun do gisom dot alaid,
om iyoho' i Tuhan, nga' miyon i' do hilo'd Sion, i nuluhon ku dit olidang,” ka dau.
Currently Selected:
YOIL 3: BDK
Highlight
Share
Copy
Want to have your highlights saved across all your devices? Sign up or sign in
Hakcipta © 2007, Pertubuhan Bible Malaysia Copyright © 2007, Bible Society of Malaysia