Isaiah 53
53
1 #
Rom 10.16; Jhn 12.38. Orang mayuh lalu nyaut,
“Sapa arapka utai ti udah didinga kami?
Lalu ngagai sapa TUHAN udah ngayanka kuasa Iya?
2Peneka TUHAN Empu ti ngasuh nembiak Iya
tumbuh baka kayu ti beurat ba tanah ti rangkai.
Iya ukai tinggi pangkat tauka sigat
ti tau ngasuh kitai tekait ati.
Nadai utai ti manah gaya ba iya,
ti tau ngasuh kitai tetarit ati ngagai iya.
3Kitai udah mechat sereta nulak iya.
Iya udah natka diri merinsa sereta pedis.
Nadai orang deka malik ngagai iya,
kitai enggai ibuhka iya lalu ngaga iya baka orang ke nadai guna.
4 #
Mat 8.17. “Tang iya nanggung pemedis kitai,
lalu muai penyakit kitai.
Sekumbang utai nya ti nyadi, kitai ngumbai pemerinsa iya
nya ukum ari Allah Taala.
5 #
1 Pet 2.24. Tang iya bakal ketegal dosa kitai,
lalu iya dipalu ketegal penyai kitai.
Kitai digeraika ulih ukum ti ditatka iya,
lalu ulih bakal iya, kitai digeraika.
6 #
1 Pet 2.25. Semua kitai tu baka jelu bedus ti tesat,
bela bejalai ngatika diri;
lalu TUHAN udah manggaika penyai semua kitai ba iya.
7 #
Pem 5.6. #SKR 8.32-33. “Orang balat amat kasar enggau iya, tang iya natka nya enggau ati ti baruh.
Iya nadai bejaku seleka.
Baka anak domba ti baru deka disayat,
baka bedus ti baru deka dikukur,
iya nadai bejaku seleka.
8Iya ditangkap, diukum, dibai kebukai lalu dibunuh,
lalu nadai orang deka ibuhka utai ti nyadi ba iya.
Iya dibunuh ketegal dosa kitai.
9 #
1 Pet 2.22. Iya dikuburka begulai enggau orang ke jai,
dikuburka begulai enggau orang ke kaya,
taja pen iya nadai udah ngereja penyalah
tauka bejaku bula.”
10Ku TUHAN bejaku,
“Ari peneka Aku, iya natka pemerinsa;
pemati iya nyadika genselan ti mai pengampun.
Nya alai iya deka meda peturun diri.
Iya deka panjai umur
lalu ulih iya, juluk ati Aku deka mujur.
11Lebuh iya udah natka pemerinsa, iya deka gaga ati baru.
Iya deka nemu diri enda lebu merinsa.
Nembiak Aku ke angkun tu, ke dikerinduka Aku,
deka nanggung ukum orang mayuh
lalu ketegal iya, Aku deka ngampun sida.
12 #
Mrk 15.28; Luk 22.37. Nya alai Aku deka meri iya pangkat ti tinggi,
begulai enggau orang ke tinggi pangkat sereta bekuasa.
Enggau ati ti penuh, iya nyerahka nyawa diri
lalu natka pemerinsa sama enggau orang ke jai.
Iya nanggung dosa orang mayuh,
lalu besampika orang ke bedosa.”
Currently Selected:
Isaiah 53: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
