Isaiah 37
37
Raja Minta Jaku Lalau Ari Isaiah
(2 Raja 19.1-7)
1Lebuh Raja Hesekiah ninga utai ti dipadahka sida tiga, iya lalu nyarikka gari diri, ngerasukka kain guni, lalu mansang ngagai Rumah Sembiang. 2Iya lalu ngasuh Eliakim, pemesai ke ngemataka istana, Sebna, ti nyadi kerani kot, enggau bala imam ke tuai agi umur betemu enggau Isaiah anak Amos. Sida tu mega begari ngena kain guni. 3Tu pesan ti diasuh Raja Hesekiah padahka sida ngagai Isaiah: “Sehari tu kitai merinsa. Kitai benung diukum lalu dipechat. Kitai tu baka indu ke radai deka beranak, tang kelalu lemi beranak. 4Raja besai menua Asiria udah ngirumka tuai pemesai iya ngasuh iya mechat Allah Taala ti idup. Awakka TUHAN Allah Taala nuan ninga jaku pechat nya, lalu ngukum sida ke mechat Iya. Nya alai, besampi ngagai Allah Taala ke bala kitai ti agi idup.”
5Lebuh Isaiah nerima pesan nya ari Raja Hesekiah, 6iya lalu ngirumka saut iya: “TUHAN enda ngasuh nuan nejuka orang Asiria ngemba nuan ngumbai TUHAN enda ulih ngelepaska nuan. 7TUHAN deka ngasuh raja menua Asiria nya ninga berita ngapa, ti deka ngujungka iya pulai ngagai menua iya empu, lalu TUHAN deka ngasuh orang munuh iya dia.”
Orang Asiria Ngemba Baru
(2 Raja 19.8-19)
8Lebuh pemesai orang Asiria nya ninga raja udah angkat ari Lakis, benung nyerang nengeri Libnah ti enda jauh ari Lakis, iya lalu mansang ngagai nengeri Libnah, deka betanya ngagai raja. 9Berita lalu bisi diterima bala orang Asiria ti madahka soldadu orang Ejip, diuluka Raja Tirhakah menua Etiopia, benung mansang nyerang sida. Lebuh raja menua Asiria ninga nya, iya lalu ngirumka siti surat ngagai Raja Hesekiah 10menua Judah, munyi tu: “Petara ti dikarapka nuan udah madahka nuan enda alah laban aku. Tang anang nejuka diri ditipu nya. 11Nuan udah ninga pasal utai ti dikereja raja menua Asiria ngagai semua menua ti deka dirusak iya. Kati nuan ngumbai diri ulih nyeliahka nya? 12Aki ini aku udah ngerusak nengeri Gosan, Haran, enggau Resep, lalu munuh orang Beteden ti diau di Telasar, lalu nadai siku ari bala petara sida udah ulih ngelepaska sida. 13Dini alai raja nengeri Hamat, Arpat, Sepabaim, Hena enggau Iwah diatu?”
14Raja Hesekiah nyengkau surat nya ari bala seruan nya, lalu macha. Udah nya iya lalu mansang ngagai Rumah Sembiang, ngengkahka surat nya dia di mua TUHAN, 15lalu besampi 16#P-sut 25.22. “TUHAN ti Pemadu Bekuasa, ti Allah Taala ke disembah orang Israel, ke duduk ari atas melikat cherub ti besayap, semina Nuan siku aja ti Allah Taala, ke merintah semua bansa di dunya tu. Nuan udah ngaga dunya enggau langit. 17Nya alai, TUHAN, dingaka kami lalu peda utai ti nyadi ba kami. Dingaka Senakerip mechat Nuan, Allah Taala ti idup. 18Semua kami nemu, TUHAN, mayuh raja menua Asiria udah ngerusak mayuh bengkah bansa datai ke semua menua sida nya nyau nadai agi orang nguan. 19Sida udah nunu bala petara bansa bukai nya - ti sigi ukai petara, tang semina engkeramba aja ti digaga ari kayu enggau ari batu, ulih jari mensia. 20Nya alai, TUHAN Allah Taala kami, lepaska kami ari orang Asiria, ngambika semua bansa di dunya tu nemu Nuan siku aja ti Allah Taala.”
Pesan Isaiah Ngagai Raja Hesekiah
(2 Raja 19.20-37)
21Udah nya Isaiah ngirumka pesan ngagai Raja Hesekiah, madahka saut TUHAN ngagai sampi iya. 22Ku TUHAN, “Nengeri Jerusalem ketawaka nuan, Senakerip, lalu ngeleseka nuan. 23Dalam penemu nuan, sapa ti udah dipechat sereta dikeleseka nuan? Nuan udah enda bebasaka Aku, Allah Taala ke disembah orang Israel ti kudus. 24Nuan udah ngasuh bala seruan nuan temegah bejaku ngagai Aku, madahka nuan udah ngalahka bukit ti pemadu tinggi di Lebanon ngena semua kerita perang nuan. Nuan udah temegah madahka diri udah nebang kayu sidar ti pemadu tinggi, enggau kayu saipris ti pemadu manah, lalu udah datai ba endur ti pemadu jauh dalam utan. 25Nuan udah temegah madahka diri udah numbak telaga lalu ngirup ai di menua orang, lalu kaki bala soldadu nuan udah ngelunjak Sungai Nile datai ke sungai nya rangkai.
26“Kati nuan nadai kala ninga Aku endang lama udah merambu semua utai tu? Diatu Aku udah bejalaika pelan nya. Aku udah meri ngagai nuan kuasa kena nuan ngeruntuhka nengeri ti bekuta lalu ngaga sida nyadi tugung batu. 27Orang ke diau dia endang nadai daya agi. Sida takut sereta temati-kutu. Sida baka rumput ti ba padang, tauka baka rumput ti tumbuh ba perabung rumah, ti dipuputka ribut ti angat ari timur.
28“Tang Aku nemu semua utai pasal nuan, utai ti dikereja nuan, enggau tunga pejalai nuan. Aku nemu pemalat nuan ringat ngagai Aku. 29Aku udah nerima berita pasal pemalat nuan ringat, enggau pasal penyumbung nuan, nya alai diatu Aku deka ngaitka ginti ba idung nuan, enggau repik besi ba nyawa nuan, lalu mai nuan pulai nengah jalai ti ditengah nuan mansang.”
30Udah nya Isaiah lalu bejaku enggau Raja Hesekiah, “Tu tanda utai ti deka nyadi. Taun tu, enggau taun baru tu ila, kita semina deka makai gandum ti tumbuh-diri, tang dalam taun ti nangkanka nya, kita ulih nanam gandum, lalu ngetau iya, enggau nanam anggur, lalu makai buah iya. 31Sida ke agi idup di menua Judah deka diau lantang senang baka utai ti ditanam, ti ngunjamka urat ke dalam tanah, lalu bebuah. 32Orang agi bisi idup di Jerusalem enggau ba Bukit Sion, laban TUHAN ti Pemadu Bekuasa udah mutuska runding deka ngasuh utai nya nyadi.
33“Tu utai ti udah disebut TUHAN pasal raja menua Asiria: ‘Iya enda ulih tama ngagai nengeri tu, tauka nimbakka laja ngelaban nengeri tu. Nadai siku soldadu ke mai terabai, deka datai semak nengeri tu. Lalu nadai kuta tanah deka digaga kena ngelulung nengeri tu. 34Iya deka pulai nengah jalai ti ditengah iya mansang, tang iya enda ulih tama ngagai nengeri tu. Aku ti TUHAN, udah bejaku. 35Aku deka nyaga nengeri tu, ketegal nama Aku, enggau ketegal semaya ti udah digaga Aku ngagai nembiak Aku David.’ ”
36Siku melikat TUHAN mansang ngagai kem orang Asiria, lalu munuh 185,000 bala soldadu sida. Tumu pagi hari siti, semua sida nyau betegaring mati! 37Udah nya Senakerip raja menua Asiria nyurutka diri, lalu pulai ngagai Nineweh. 38Nyadi sekali, lebuh iya benung besembiang dalam rumah sembiang petara iya ke benama Nisrok, dua iku anak iya, Adramelek seduai Sareser, munuh iya ngena pedang seduai iya empu, lalu ngerarika diri ngagai menua Ararat. Siku ari anak lelaki iya ti bukai, ke benama Esar-hadon, lalu nganti iya nyadi raja.
Currently Selected:
Isaiah 37: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
