YouVersion Logo
Search Icon

यूहन्‍ना 1

1
वचन तङ ख्‍वब ङ्वजे रूप्ने
1संसार सुरु क्‍यूर यली खूम्‍ने वचन ख्‍य, वचन परमेश्‍वरप्रे ख्‍य, मेस्‍ये वचन ब परमेश्‍वर ख्‍य। 2ङू संसार सुरु क्‍यूर यली खूम परमेश्‍वरप्रे ख्‍य। ङू सुरुमेस्‍येने परमेश्‍वरप्रे ख्‍य।
3वचनदेने परमेश्‍वरदे साप्‍ता थोक‍ने बन्‍दीदे। साप्‍ता थोकने ङूदे बन्‍दीदे। 4ङूप्रे जीया ख्‍य, मेस्‍ये हम्‍ब जीया मीयूजे लागि ओथ्याङ् ख्‍य। 5हम्‍ब ओथ्याङ् मून्दूङ्ने चेम्‍कीतीय। मून्‍तूङ्दे कलङ्बेये ‍ओथ्याङ्ने ट्‍या अङ्‍खू।
6 # मत्ती 3:1; मर्कूस 1:4; लूका 3:1,2 परमेश्‍वरदे कूल्‍बेब मीत्‍या ख्‍य, ङूजे मीन् यूहन्‍ना ख्‍य। 7ङू गवाही क्‍यूरने रदे। मीयू क्‍वादेने ओथ्याङ्जे पोने विश्‍वास चे खूस्‍य यदेबे परमेश्‍वरदे ङूने कूल्‍बेख्‍य। 8ङू रङ्से ब हम्‍ब ओथ्याङ् ते ख्‍य, तर हम्‍ब ओथ्याङ्जे गवाही पीनने रदे।
9मीयू क्‍वानेने ज्ञान पीनब तम्दम्जे ओथ्याङ् संसारने रेन ख्‍य। 10ङू संसारने ख्‍य। संसार ङूदेने बन्‍दीदे, होरनेयली संसारजे मीयूदे ङूने अन्‍स्‍ये। 11रङ्से मीयू ट्‌याने ङू रदे, तर हम्‍ब मीयूदे ङूने ग्रहण अन्ची। 12तर सू-सूदे ङूने ग्रहण चीत्दे मेस्ये ङूजे मीन्‍ने विश्‍वास चीत्‍दे, थमयूने ङूदे परमेश्‍वरजे छगूम्-पूर्‌गूम् क्‍यूरब हक पीन्‍दे। 13थमयू कादे, ङ्वजे इच्छादे, मेस्‍ये कोइ मीजे इच्छादे दी तर परमेश्‍वरदे जन्मीदेब क्यूक्क्य।
14वचन ङ्व क्‍यूत्‍देबे रदे, मेस्‍ये अनुग्रह मेस्‍ये तम्दम्‍दे फ्यादेबे ङीनजे अन्द्रने बास टूङ्दे। ङीनदे ङूजे महिमा तङ्दे, हम्‍ब महिमा प ट्‌यादे रब तीत्‍या चजेप्र ख्‍य।
15यूहन्‍नादे के केन् योन्‍देबे ङूजे बारेने गवाही पीन्देबे यदे, “ङैजे ङ्येदे रब ङ यली थेप् केन् ख्यङ्, चेनेयलो ङू ङ प्रेयली खूम्‍ने ख्‍य। ङैदे यब अम्‍ब पो ङूजे बारेने ख्यङ्। 16ङूजे मोक्‍तो अनुग्रहदे ङीन क्वादेने सोरो कूम अनुग्रह प्रेन्‍न ख्यङ्। 17चेनेयलो परमेश्‍वरदे नियम मोशाने पीन्‍देबे ङीनदे प्रेत्‍दे, तर अनुग्रह मेस्‍ये सत्यब येशू ख्रीष्‍टने क्‍यूत्‍देबे पीन्‍दे। 18परमेश्‍वरने कलङ्बे सूदेये अन्‍तङ्। पप्रे ख्‍यब तीत्‍यात्‍या चदे पने तम्‍मे ख्यङ्।
बप्‍तिस्मा पीनब यूहन्‍नाजे गवाही
मत्ती ३:१-१२; मर्कूस १:१-८; लूका ३:१-१८
19कन्‍छ्वाब यरूशलेमजे यहूदीयूदे पूस्‍र्‌या मेस्ये लेवीयू ङू ट्‌याने “यूहन्‍ना यब सू टोङ्?’ यदेबे ल्‍वेने कूल्‍बीदे, हन्‍छ्वाब यूहन्‍नादे पीनब गवाही येर ख्‍य। 20ङूदे गाला-गाला अङ्‍क्यूल्‍लाबे ठडोने जवाफ पीन्‍दे, “ङ ख्रीष्‍ट दी।”
21 # मलाकी 4:5; व्यवस्था 18:15,18 थमयूदे लोत्‍दे, “होरेयलो न सू स्व? न एलिया औ?”
यूहन्‍नादे यदे, “अँह, ङ दी।”
थमयूदे लोत्‍दे, “च न अगमवक्ता औ? “दी!” यूहन्‍नादे जवाफ पीन्‍दे,
22थमयूदे यदे, “न सू ख्यङ्, य! ङीने कूल्‍बेब ट्‌याने ङीदे जवाफ कूब पर्‌दीय। न रङ्सेने सू यीय?”
23 # यशैया 40:3 यूहन्‍नादे यदे, “यशैया अगमवक्तादे यप्रने ङ ‘परमप्रभुजे लम् तयार ची’ यदेबे मी अन्‍टोङब चनमन नेने पारा प्‍वेब मीत्‍याजे आवाज ख्यङ्।”
24थमयूने फरिसीयूदे कूल्‍बे ख्‍य। 25होर्‌दे थमयूदे ङूने लोत्‍दे, “न ख्रीष्‍टये दी, एलियाये दी, हम्‍ब अगमवक्ताये दी यलो, चैने बप्‍तिस्मा पीन्?”
26यूहन्‍नादे थमयूने जवाफ पीन्‍दे, “ङैदे ब क्‍यूदे बप्‍तिस्मा पीन्‍क्‍य, तर नमयूजे अन्द्रने अन्‍स्‍येब मीत्‍या ख्यङ्, 27ङैजे ङ्येदे रस्‍ये ख्‍यब ङू ख्यङ्।
ङ ङूजे पूँङ्‍गीजे तून फाब लायकजे त्‍वो।
28अम्‍ब पो यर्दन होङ्जे तीप्‍ल्‍या बेथानियने क्‍यूर ख्‍य, हैयाने यूहन्‍नादे बप्‍तिस्मा पीन्‍न ख्‍य।
परमेश्‍वरजे थुमा येशू
29नैदेरेदे यूहन्‍नादे रङ्सेतेले येशू रेनब तङ्देबे यदे, ‘ले, संसारजे पाप लङ्‍केब परमेश्‍वरजे थुमा! 30ङूजे बारेने ङैदे य ख्‍य, ‘ङैजे ङ्येदे मीत्‍या रीय, ङू ङ यली सोरो केन् ख्यङ्, चेनेयलो ङू ङ जन्मीदेयली खूम्-‍मेस्‍येने ख्‍य।’ 31ङ रङ्सेदेने ङू अन्‍स्ये ख्‍य, तर ङूने इस्राएलजे मीयूदे स्‍येस्‍य यदेबे ङैदे क्‍यूजे बप्‍तिस्मा पीने पीने रदे।”
32यूहन्‍नादे येरे यदेबे गवाही पीन्‍दे, “ङैदे पवित्र आत्मा धोङ्‍रप्र स्वर्गदे मो रदेबे ङूफ्‍याने टूङ्‍रब तङ्दे। 33ङैदे ङूने अन्‍स्‍ये ख्‍य, तर सूदे ङैने क्‍यूजे बप्‍तिस्मा पीन् यदेबे कूल्‍बे ख्‍य, ङूदे ङैने यदे, ‘सूफ्‍याने नदे पवित्र आत्मा रेनब मेस्‍ये टूङ्‍रब तङ्क्य, पवित्र आत्मादे बप्‍तिस्मा पीनब ङूने क्‍यूक्‍क्‍य।’ 34ङैदे तङ्दे, मेस्‍ये गवाही पीन ख्यङ्, ङू परमेश्‍वरजे च ख्यङ्।”
येशूजे पात्‍ता खूम्‍जे स्यूस्स्यायू
35फेरि नैदेरेदे यूहन्‍ना रङ्सेजे स्यूस्स्या ङ्हीप्रे मेर्‌न ख्‍य। 36ङूदे येशू प्रेनब तङ्देबे यदे, “ले, परमेश्‍वरजे थुमा!”
37ङूदे यब अम्‍ब पो तदेबे हम्‍ब स्यूस्स्या ङ्ही येशूजे ङ्ये-ङ्ये गीलीदे।
38येशूदे ङ्यलम् ल्‍वादेबे लेत्‍दे, मेस्‍ये थमयू ङ्‍ये-ङ्‍ये रेनब तङ्देबे थमयूने लोत्दे, “नमयू च मेल?’’ थमयूदे ङूने यदे, “रब्‍बी (अम्‍बजे अर्थ: गुरुज्‍यू), न केने टूङ ख्‍य?”
39ङूदे थमयूने यदे, “ख, मेस्‍ये नमयूदे तङ्दे।” थमयू गीलीदे, होर्‌दे ङू टूङब ने तङ्दे। हम्‍ब दिन थमयू ङूप्रेने टूङ्दे चेनेयलो हन्‍छ्वाब घडीने स्यी तप्ये ख्‍य।
40यूहन्‍नादे यब पो तदेबे येशूजे ङ्ये-ङ्ये गीलेब हम्‍ब मी ङ्ही नङ्ने त्‍याब सिमोन पत्रुसजे च्‍योन् अन्द्रियास ख्‍य। 41अन्द्रियासदे खूम रङ्से अत सिमोनने तूदे, मेस्‍ये यदे, “ङीदे मसीहने तूदे।” (‘मसीह’ जे अर्थ ‘ख्रीष्‍ट’ ख्यङ्।) 42ङूदे सिमोनने येशू ट्‌याने रेत्‍दे।
येशूदे ङूने लेत्‍दे मेस्‍ये यदे, “न योआनेसजे च सिमोन औ, न केफास (या पत्रुस अम्‍बजे अर्थ: पोलोम्।) यीय।”
फिलिप मेस्ये नथानेल
43नैदेरेदे ङूदे गालीलने प्रब पक्‍क चीत्‍दे। ङूदे फिलिपने तूदेबे यदे, “ङैजे ङ्ये-ङ्ये ख।”
44अन्द्रियास मेस्ये पत्रुस फिलिपये बेथसेदा सहरजेने ख्‍य। 45फिलिपदे नथानेलने तूदेबे यदे, “मोशाजे नियम‍ने मेस्‍ये अगमवक्तायूदे सूजे बारेने लिख्दीये ख्‍य, हम्‍ब योसेफजे च, नासरतजे येशूने ङीदे त्‍व ख्यङ्।”
46नथानेलदे ङूने यदे, “नासरतदे ज्‍य से योङ्‍र खूइया?”
फिलिपदे ङूने जवाफ पीन्‍दे, “रदेबे लेख्‍ख।”
47येशूदे नथानेल रङ्से ट्‍याने रेनब तङ्देबे ङूजे बारेने यदे, “पक्‍क इस्राएलजे मीत्‍या ख्यङ्, ङूजे सेम्‍ने छलकपट त्‍वो।”
48नथानेलदे लोत्‍दे, “नदे ङैने केर्‌बे स्‍येदे?”
येशूदे ङूने जवाफ पीन्‍दे, “फिलिपदे नने क्‍वयली खूम्‍ने ङैदे न अञ्‍जीर तोङ्बोजे नङ्ने तङ ख्‍य।”
49नथानेलदे ङूने लोत्‍दे, “गुरु, न परमेश्‍वरजे च ख्यङ्! न इस्राएलजे मूरुम् ख्यङ्।”
50येशूदे ङूने जवाफ पीन्‍दे, “ङैदे नने अञ्जीर तोङ्बोजे नङ्ने तङ्दे यबने न विश्‍वास चे औ? नदे अम्‍ब यली थेप् केन् सेयू तङ्क्य।” 51#उत्‍पत्ति 28:12होर्‌दे ङूने यदे, “तम्दम्‍ने, ङ नने यीय, नमयूदे स्वर्ग पूक्‍‍येब मेस्‍ये परमेश्‍वरजे दूतयूने मीजे च ट्‌याने रेनब मेस्‍ये प्रेनब तङ्क्य।”

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy