رٛمَعٜنْ 1

1مِنْ ݠٛلْ، مَشُّطٛ عِيسَى اَلْمَسِيحُ، مِطٛنْ وِنْدَنَ عٛنْ، عٛنٛنْ جَمَعَارٜ نُطِّنْࢡٜ وٛنْࢡٜ حَا رٛمَ‏:

اَللَّه عٜوْنِ يَمْ، وَطِ يَمْ نٜلَاطٛ مُوطُمْ، سُࢡِ يَمْ نغَمْ حَا مِوَازِنَ لِنْجِيلَ مَاکٛ؞ 2دِغَ ࢡٛويْمَ اَللَّه عِينِ لِنْجِيلَ کَعَ بٜى کُنْدُطٜ اَلنَّبِعٜنْ ندٜرْ دٜڢْتٜ شٜنِيطٜ؞ 3کَ طٛنْ وٛلْوَ دٛوْ ࢡِطّٛ مَاکٛ؞ عِيسَى اَلْمَسِيحُ عِوِ حَا دَࢩْغٛلْ لَامِيطٛ دَاوُدَ؞ 4عَمَّا ڢٛدّٜ رُوحُ شٜنِيطٛ، اَللَّه تَبِتِنِمٛ عٛ ࢡِطّٛ مَاکٛ بٜى بَاوْطٜ سَاعِ عٛعُمِّتِنِمٛ دِغَ مَايْدٜ، کَنغْکٛ وٛنِ عِيسَى اَلْمَسِيحُ جَوْمِرَاوٛ مٜىٰطٜنْ؞ 5نغَمْ بَرْکَ مَاکٛ مِنْ کٜࢡِ مٛعّٜرٜ، مِنْ لَاتِ نٜلَاࢡٜ حَا عُمَّاتٛوجٜ ڢُو نُطِّنَ لِنْجِيلَ، ࢡٜطٛوْتَنٛ اَللَّه، ࢡٜتٜدِّنَ عِنْدٜ مَاکٛ؞ 6عٛنٛنْ بٛو عٛنْ طٛنْ ندٜرْ يِمْࢡٜ ࢡٜعٜ نغَمْ اَللَّه عٜوْنِ عٛنْ، وَرْتِرِ عٛنْ يِمْࢡٜ عِيسَى اَلْمَسِيحُ؞

7مِطٛنْ حٛوڢْنَ يِطَاࢡٜ اَللَّه وٛنْࢡٜ حَا رٛمَ ڢُو، عٜوْنَاࢡٜ نغَمْ لَاتَاغٛ سٜنَاࢡٜ؞

اَللَّه، بَابِرَاوٛ مٜنْ عٜ عِيسَى اَلْمَسِيحُ، جَوْمِرَاوٛ مٜنْ ندٛکَّ عٛنْ مٛعّٜرٜ عٜ جَمْ؞

عَنِّيَ ݠٛلْ يَحُغٛ رٛمَ

8عَرَنْ، مِيٜتِّ اَللَّه عَمْ بٜى عِنْدٜ عِيسَى اَلْمَسِيحُ نغَمْ مٛوطٛنْ ڢُو، نغَمْ کٛو تٛيْ ندٜرْ دُنِيَارُ يِمْࢡٜ طٛنْ مبٛلْوَ حَالَ نُطِّنْکِ مٛنْ؞ 9ڢٛرٛيْ مِطٛنْ تٛرٛ نغَمْ مٛوطٛنْ‏: اَللَّه وٛنِ شٜىٰدٛووٛ يَمْ‏! کَنغْکٛ مِحُووَنْتَ بٜى ࢡٜرْندٜ وٛورٜ بٜى وَازِنغٛ لِنْجِيلَ ࢡِطّٛ مَاکٛ؞ 10کٛو ندٜيْ مِتٛرٛتٛ مٛ ڢُو، مِطٛنْ تٛرٛ مٛ حَا مِحٜࢡَ لَاوٛلْ يَحُغٛ حَا مٛوطٛنْ تٛ عٛمُويِ؞ 11مِيٜنْوِ عٛنْ مَسِنْ، مِيِطِ يِعُغٛ عٛنْ نغَمْ مِسٜنْدَ بٜى مٛوطٛنْ دٛکَّلْ نغَلْ رُوحُ اَللَّه حٛکِّ يَمْ نغَمْ سٜمْبِطِنغٛ عٛنْ؞ 12مِيِطِ مَا تَوٜىٰغٛ شَکَ مٛوطٛنْ نغَمْ حَا شٜمْبِطِندِرٜنْ ندٜرْ نُطِّنْکِ؞

13دٜىٰرْطِرَاࢡٜ عَمْ، عَنْدٜ مِوَطِ عَنِّيَ ندٜ طُوطُّمْ يَحُغٛ حَا مٛوطٛنْ عَمَّا حَا جٛنْتَ مِحٜࢡَايْ يَحُغٛ تَوٛنْ؞ مِطٛنْ يٜلٛ نِي کُوغَلْ عَمْ وَطَ نَڢُودَ شَکَ مٛوطٛنْ بٛو، بَنَ کٛ لَاتِ حَا عُمَّاتٛوجٜ غٛطّٜ ندٜرْ دُنِيَارُ#کُوطٜ نٜلَاࢡٜ 19‏:21؞؞ 14دٛولٜ مِسُکْلَنٛ يِمْࢡٜ کٛو ࢡٜيٜ‏: ڢٜرْࢡٜ عٜ ࢡٜنْ ݠٜرَايْ، جَنغُࢡٜ عٜ ࢡٜنجَنغَايْ؞ 15نغَمْ مَاجُمْ مِيٜلِ وَازِنغٛ عٛنْ لِنْجِيلَ، عٛنٛنْ وٛنْࢡٜ حَا رٛمَ بٛو؞

بَاوْطٜ لِنْجِيلَ

16مِسٜمْتَايْ وَازِنغٛ لِنْجِيلَ نغَمْ طُمْ بَاوْطٜ اَللَّه‏: کَ وَاوِ حِسْنُغٛ نُطِّنْࢡٜ کَ ڢُو، عَرَنْ يَحُودُعٜنْ، ندٜنْ يِمْࢡٜ عُمَّاتٛوجٜ غٛطّٜ بٛو#مَرْکُسْ 8‏:38؞؞ 17بٜى لِنْجِيلَ کَعَ، اَللَّه طٛنْ وَنغِنَنَ يِمْࢡٜ ڢُو نٛ ࢡٜلَاتٛرْتٛ عَدِلِعٜنْ يٜىٰسٛ مُوطُمْ؞ طُمْ لَاتٛتٛ بٜى نُطِّنْکِ تَنْ، دِغَ ڢُطَّمْ حَا تِمّٛودٜ؞ بَنَ کٛ وِنْدَ‏: «عَدِلِيجٛ يٜىٰطِرَنْ بٜى نُطِّنْکِ#عِبْرَنِنغْکٜعٜنْ 2‏:4؞؞»

عَيْبٜ يِمْࢡٜ ڢُو

18نغَمْ تِکّٜرٜ اَللَّه وَنغِ دِغَ عَسَمَ دٛوْ غٜدَّلْ يِمْࢡٜ عٜ سٛويْندٜ عَدِلَاکُ مَࢡّٜ، بٜى مَارٜ ࢡٜکَطِ يِمْࢡٜ عَنْدُغٛ غٛونغَ؞ 19کٛ غٛطّٛ وَاوِ عَنْدُغٛ دٛوْ اَللَّه، طُمْ وَنغَنِ ࢡٜ، نغَمْ اَللَّه بٜى حٛورٜ مُمْ وَنغِنَنِ ࢡٜ طُمْ؞ 20نغَمْ کٛو ندٜ نٜطّٛ وَاوَتَا يِعُغٛ اَللَّه، عٛعَنْدِ بٜى لَاࢡْطُمْ کَࢩُمْ وٛنِ اَللَّه ڢَکَتْ، عٛعَنْدِ بٛو بَاوْطٜ مَاکٛ تِمَّتَا، نغَمْ طُمْ وَنغِ ندٜرْ تَغْدِ ڢُو، دِغَ اَللَّه تَغِ دُنِيَارُ؞ نغَمْ مَاجُمْ ࢡٜنغَلَا حُجَّ سَمْ؞ 21نغَمْ ࢡٜعَنْدِ اَللَّه، عَمَّا ࢡٜتٜدِّنَايْ مٛ بَنَ نٛ حَانْدَنِ مٛ، ࢡٜنغٜتَّايْ مٛ بٛو؞ نغَمْ مَاجُمْ نُمٛوجِ مَࢡّٜ ندَايِ غٛونغَ، ڢَامُ وُرْتِ حَکِّيلٛوجِ مَࢡّٜ، ࢩِࢡْرٜ نَسْتِ#عٜڢٜسُعٜنْ 4‏:17‏-18؞؞ 22ࢡٜتَمِّ ࢡٜنغٛودِ حِکْمَ، عَمَّا ࢡٜ ڢَاتَاࢡٜ؞ 23ࢡٜعَشِّ اَللَّه تٜدُّطٛ، دُومِيطٛ، ࢡٜطَکّٛتِرِ بٜى سُورَاجِ نٜطّٛ مَايَنْطٛ عٜ شٛلِّ عٜ دَبَّاجِ عٜ لَدٛوجِ#تٛوکْتَاکِ تَوْرٜىٰتَ 4‏:16‏-18؞؞

24نغَمْ مَاجُمْ اَللَّه يٛوڢِ ࢡٜ ࢡٜ تٛکّٛ سُونٛوجِ ࢡٜرْطٜ مَࢡّٜ، ࢡٜشٛࢡْنِنْدِرَ ࢡَلِّ مَࢡّٜ بٜى کُوطٜ شٜمْتِنِيطٜ؞ 25ࢡٜنغَيْلِتِ غٛونغَ اَللَّه بٜى ڢٜوْرٜ، ࢡٜشُجِدَنِ عٜ ࢡٜندٜوِ تَغْلٜ، ࢡٜعَشِّ تَغْطٛ مٛ حَانْدِ يٜتّٜىٰغٛ حَا ڢٛرٛيْ؞ عَامِينَ‏!

26نغَمْ مَاجُمْ اَللَّه يٛوڢِ ࢡٜ حَا سُونٛوجِ شٜمْتِنِيطِ؞ رٜوْࢡٜ مَࢡّٜ شَنْجِ بَالْدَلْ ڢٛدّٜ طَبِيَ، مبَطِ کٛ لُوتِ طَبِيَ؞ 27بَنَ نٛنْ وٛرْࢡٜ بٛو عَشِّ وَالْدُغٛ بٜى رٜوْࢡٜ، طٛنْ مبَالْدَ بٜى وٛرْࢡٜ، طٛنْ کُووِنْدِرَ شٜمْتِنِيطُمْ؞ بَنَ نِي ࢡٜکٜࢡَنِ کٛعٜ مَࢡّٜ نغٜىٰنَارِ دَلِيلَ مَجّٜرٜ مَࢡّٜ؞

28ندٜ ࢡٜشَلِ عَنْدِتِتْغٛ اَللَّه، اَللَّه يٛوڢِ ࢡٜ ࢡٜ تٛکّٛ حَکِّيلٛوجِ مَࢡّٜ ݠَاتَاطِ، ࢡٜمبَطَ کٛ ڢٛتَّايْ؞ 29ࢡٜطٛنْ کٜىٰوِ سٛويْندٜ عَدِلَاکُ عٜ حَلّٜىٰندٜ عٜ سُونٛ عٜ نغَࢩَاندِ عٜ کَاجَلْ؞ ࢡٜ مبَرٛوࢡٜ کٛعٜ، جٛکِّرٛوࢡٜ، وَطٛوࢡٜ رِکِشِ عٜ تُڢْلٜ؞ 30ࢡٜطٛنْ کَلِّنَ وٛطْࢡٜ، ࢡٜطٛنْ نغَࢩَ اَللَّه، ࢡٜ تٛوࢩٛوࢡٜ، مَوْنِتِتّٛوࢡٜ، جُرٛتٛوࢡٜ مٜىٰرٜ؞ تُمْ ࢡٜطٛنْ تٜڢَ لَابِ کٜسِ نغَمْ حَا ࢡٜمبَطَ کُوطٜ کَلُّطٜ؞ ࢡٜطٛوْتَنْتَاکٛ سَارٛعٜنْ مَࢡّٜ؞ 31ࢡٜ ڢَاتَاࢡٜ، ࢡٜکٜبِّنْتَا کُنَيٜىٰجٜ مَࢡّٜ، ࢡٜنغَلَا يِيدٜ کٛو عٜنْطَمْ؞ 32ࢡٜعَنْدِ ڢَکَتْ تَوْرٜىٰتَ اَللَّه حِيتِ وَطَنْࢡٜ عِرِنْ کُوطٜ طٜعٜ کِيتَ مبَرٜىٰغٛ؞ بٜى مَنْ ڢُو ࢡٜطٛنْ تٛکّٛ وَطْغٛ طٜ؞ کٛ تُلِّتِ بٛو، ࢡٜطٛنْ نغٜرْدٛ وَطَنْࢡٜ طٜ ڢُو؞

Currently Selected:

رٛمَعٜنْ 1: داَ

Highlight

Copy