لِمْلٜ 15
15
عُمْرٛوجٜ دٛوْ کِرْسٜتٜىٰطِ عٜ دٛکّٜ
1جَوْمِرَاوٛ وِعِ مُوسَى، 2عٛعُمْرَ إِسْرَاءِيلَعٜنْ نِعِ: «تٛ عٛنْ نَسْتِ لٜسْدِ ندِ مِحٛکِّ عٛنْ حَا عٛنْ نجٛوطٛ تٛنْ، مبَطٜ طُعُمْ: 3لِيعَنٜ جَوْمِرَاوٛ نغَارِ کَلْحَلْدِ مَلَّ ندَمّٛووَ غُلٜتٜىٰطُمْ مَلَّ کِرْسٜتٜىٰطُمْ نغَمْ حٜبِّنْغٛ تٛغَيٜىٰرٜ مَلَّ شَاحُوجِ مَلَّ دَلِيلَ جُولْطٜ مٛنْ حَا عُورٜىٰنغٛلْ بٜلْنغٛلْ مَنْ ڢٛتَّنَ مٛ؞ 4کٛو مٛيْ يِطِ لِيعَنغٛ مٛ دٛکَّلْ بَنَ نٛنْ، سٜيْ ࢡٜسْدَ دٛکَّلْ ࢩَامْدُ، کُرٛورِ کِلٛ تَتِ نجِيࢡَاندِ بٜى نٜبَّمْ لِيتِرْ غٛوتٜلْ، 5نٛنْ بٛو دٛکَّلْ عِنَبٛوجَمْ دُڢٜتٜىٰنغَلْ لِيتِرْ غٛوتٜلْ، حَوْتَادٜ بٜى جَوْغٜلْ غُلٜتٜىٰنغٜلْ مَلَّ کِرْسٜتٜىٰنغٜلْ ڢُو؞ 6کٛو مٛيْ لِيعٛتٛ نجَوْدِرِ مبَالُ، ࢡٜسْدَ دٛکَّلْ ࢩَامْدُ، کُرٛورِ کِلٛ جٛوٜىٰغٛ نجِيࢡَاندِ بٜى نٜبَّمْ لِيتِرْ بٜى رٜىٰتِتَ، 7نٛنْ بٛو دٛکَّلْ عِنَبٛوجَمْ دُڢٜتٜىٰنغَلْ لِيتِرْ بٜى رٜىٰتِتَ حَا عُورٜىٰنغٛلْ بٜلْنغٛلْ مَنْ ڢٛتَّنَ جَوْمِرَاوٛ؞ 8کٛو مٛيْ لِيعَنْتٛ جَوْمِرَاوٛ نغَارِ کَلْحَلْدِ نغُلٜتٜىٰندِ مَلَّ کِرْسٜتٜىٰندِ نغَمْ کٜبِّنْکِ تٛغَيٜىٰرٜ مَلَّ نغَمْ کَوْتَلْ يِمْࢡٜ بٜى اَللَّه، 9سٜيْ ࢡٜسْدَ دٛکَّلْ ࢩَامْدُ، کُرٛورِ طِغُّندِ کِلٛ جٛوٜىٰنَيِ جِيࢡَاندِ بٜى نٜبَّمْ لِيتِرْ طِطِ، 10نٛنْ بٛو دٛکَّلْ عِنَبٛوجَمْ دُڢٜتٜىٰنغَلْ لِيتِرْ طِطِ حَا عُورٜىٰنغٛلْ بٜلْنغٛلْ مَنْ ڢٛتَّنَ جَوْمِرَاوٛ؞
11«بَنَ نٛنْ کُووْرٛتٛنْ کَلَ نغَارِ، کَلَ نجَوْدِرِ مبَالُ، کَلَ مبَالُ عٜ کَلَ مبٜىٰوَ ڢُو؞ 12مبَطٜ طُمْ ڢٛدّٜ لِمْغَلْ دَبَّاجِ طِ لِيعٛتٛوطٛنْ ڢُو؞ 13عِسْرَعِيلَاجٛ ڢُو تٛکّٛ ڢَرِلَّاجِ طِعِ تٛ عٛيِطِ لِيعَاغٛ غُلٜتٜىٰطُمْ حَا عُورٜىٰنغٛلْ مَنْ ڢٛتَّنَ جَوْمِرَاوٛ؞ 14ندٜرْ غِدٜ مٛنْ ڢُو، تٛ کٛطٛ جٛوطِيطٛ شَکَ مٛوطٛنْ مَلَّ ݠَࢡُّطٛ شَکَ مٛنْ يِطِ لِيعَنغٛ جَوْمِرَاوٛ نغُلٜتٜىٰنغَ نغَمْ حَا عُورٜىٰنغٛلْ مَنْ بٜلْنغٛلْ ڢٛتَّنَ مٛ، سٜيْ عٛوَطَ بَنَ نٛ مبَطٛتٛنْ؞ 15ڢَرِلَّ کَعَ طٛنْ نغَمْ مٛوطٛنْ عٜ نغَمْ حٛطْࢡٜ وٛنْࢡٜ شَکَ مٛوطٛنْ؞ طُمْ ڢَرِلَّ ندُومِيکَ نغَمْ غِدٜ مٛنْ ڢُو: کَ لَاتٛ نغَمْ مٛوطٛنْ عٜ نغَمْ حٛطْࢡٜ مٛنْ يٜىٰسٛ جَوْمِرَاوٛ؞ 16عُمْرٛورٜ وٛورٜ عٜ کِيتَ نغٛوتَ طٛنْ نغَمْ مٛوطٛنْ عٜ نغَمْ حٛطْࢡٜ وٛنْࢡٜ شَکَ مٛوطٛنْ؞»
17جَوْمِرَاوٛ وِعِ مُوسَى، 18عٛعُمْرَ إِسْرَاءِيلَعٜنْ نِعِ: «تٛ عٛنْ نَسْتِ لٜسْدِ ندِ جَوْمِرَاوٛ طٛنْ يَحْرَ عٛنْ تٛنْ، 19تٛ عٛنْ طٛنْ ࢩَامَ ࢩَامْدُ لٜسْدِ مَنْ، عِتَّنٜ جَوْمِرَاوٛ غٜطَلْ مُوطُمْ؞ 20عِتَّنٜ مٛ تَمْسٜىٰرٜ وٛورٜ حَا تَمْسٜىٰجٜ مٛنْ عَارْتُطٜ، عِتّٜ طُمْ بَنَ نٛ عِتِّرْتٛنْ حَا دٜمٜتِرْلٜ مٛنْ؞ 21عِتَّنٜ جَوْمِرَاوٛ غٜطَلْ مَاکٛ حَا کُرٛورِ مٛنْ عَارْتُندِ؞ عُمْرٛورٜ ندٜعٜ طٛنْ نغَمْ غِدٜ مٛنْ ڢُو؞
22-23«تٛ عٛنْ مبَطِ حَکّٜ بِلَا عَنِّيَ، عٛنْ طٛوْتَنَاکِ عُمْرٛوجٜ عٜ کٛ جَوْمِرَاوٛ عَنْدِنِ مُوسَى ڢُو، دِغَ ࢩَلَادٜ طُمْ عُمْرَ عٜ کٛ عُمْرَنَ غِدٜ مٛنْ ڢُو، 24تٛ بٛوڢٛلْ مَنْ لَاتَکٜ نغَمْ جَمَعَارٜ وَطِ حَکّٜ بِلَا عَنِّيَ، سٜيْ جَمَعَارٜ ڢُو لِيعٛ نغَارِ کَلْحَلْدِ نغُلٜتٜىٰندِ، حَا عُورٜىٰنغٛلْ مَنْ بٜلْنغٛلْ ڢٛتَّنَ جَوْمِرَاوٛ؞ ࢡٜࢡٜسْدَ دٛکَّلْ ࢩَامْدُ عٜ دٛکَّلْ دُڢٜتٜىٰنغَلْ بَنَ کٛ حَانِ، نٛنْ بٛو نجَوْدِرِ مبٜىٰوَ کِرْسٜتٜىٰندِ نغَمْ عِتُّکِ حَکّٜىٰجِ؞ 25لِمَنْجٛ حٜࢡْنَنَ يِمْࢡٜ عُمَّاتٛورٜ إِسْرَاءِيلَ ڢُو يَاڢُيٜ؞ ࢡٜکٜࢡَنْ يَاڢُيٜ نغَمْ ࢡٜمبَطَايْ حَکّٜ مَنْ بٜى عَنِّيَ، ࢡٜلِيعَنِ جَوْمِرَاوٛ نغُلٜتٜىٰنغَ مَࢡّٜ عٜ کِرْسٜتٜىٰنغَ نغَمْ عِتُّکِ حَکّٜىٰجِ مَࢡّٜ بٛو؞ 26عُمَّاتٛورٜ إِسْرَاءِيلَ عٜ حٛطْࢡٜ وٛنْࢡٜ شَکَ مَࢡّٜ ڢُو کٜࢡَنْ يَاڢُيٜ، نغَمْ عُمَّاتٛورٜ ڢُو وَطْنٛ بٛوڢٛلْ مَنْ؞
27«تٛ طُمْ غٛطّٛ غٛوتٛ وَطِ حَکّٜ بِلَا عَنِّيَ، سٜيْ عٛلِيعٛ مبٜىٰوَ نغَ ندُوࢡُ، کِرْسٜتٜىٰنغَ نغَمْ عِتُّکِ حَکّٜ؞ 28لِمَنْجٛ حٜࢡْنَ مٛ يَاڢُيٜ حَا جَوْمِرَاوٛ نغَمْ دَلِيلَ حَکّٜ مَاکٛ بِلَا عَنِّيَ؞ 29عُمْرٛورٜ ندٜعٜ لَارَنِ بَطّٛ عَيْبٜ بِلَا عَنِّيَ، ندٜ طٛنْ نغَمْ إِسْرَاءِيلَعٜنْ، ࢡِࢡّٜ لٜسْدِ عٜ نغَمْ حٛطْࢡٜ وٛنْࢡٜ شَکَ مَࢡّٜ؞
30«عَمَّا تٛ غٛطّٛ وَطِ حَکّٜ بٜى عَنِّيَ، کٛو عٛ ࢡِي لٜسْدِ کٛو عٛ کٛطٛ، ندٜنْ کَمْ عٛحُطِ جَوْمِرَاوٛ؞ عٛ غُرْتِنْتٜىٰطٛ دِغَ عُمَّاتٛورٜ مَاکٛ، 31نغَمْ عٛيَوِ وٛلْدٜ جَوْمِرَاوٛ، عٛلُوتِ عُمْرٛوجٜ مَاکٛ؞ ڢَکَتْ عٛ غُرْتِنْتٜىٰطٛ، عَيْبٜ غُرْتِنْکِ مَاکٛ دٛعّٛتٛ دٛوْ حٛورٜ مَاکٛ؞»
تٛ غٛطّٛ لُوتِ عُمْرٛورٜ ࢩَنْدٜ سِوْتٛرْدٜ
32يَاکٜ إِسْرَاءِيلَعٜنْ طٛنّٛ ندٜرْ لَدّٜ، ࢡٜتَوِ غٛطّٛ طٛنْ تٜىٰنَ لٜطّٜ ࢩَنْدٜ سِوْتٛرْدٜ؞ 33تَوْࢡٜ مٛ نغَدِّمٛ يٜىٰسٛ مُوسَى عٜ هَـٰرُونَ عٜ عُمَّاتٛورٜ ڢُو؞ 34ࢡٜعَيْنِمٛ بٛوطُّمْ، نغَمْ ࢡٜعَنْدَا نٛ کِيتَ مَاکٛ وَارٛتٛ؞ 35ندٜنْ جَوْمِرَاوٛ وِعِ مُوسَى: «غٛطّٛ عٛو عٛ مبَرٜتٜىٰطٛ! جَمَعَارٜ ڢُو ڢِطَ مٛ بٜى کَاعٜ حَا يَاسِ سَنغٜىٰرٜ؞» 36عُمَّاتٛورٜ وُرْتِنِمٛ سَنغٜىٰرٜ، ڢِطِمٛ بٜى کَاعٜ حَا عٛمَايِ، بَنَ جَوْمِرَاوٛ عُمْرُنٛ مُوسَى؞
تُوتُوجِ سٜىٰدَمْکُ
37جَوْمِرَاوٛ وِعِ مُوسَى: 38«عُمْرُ إِسْرَاءِيلَعٜنْ، ࢡٜمبَطَ تُوتُوجِ حَا غَوَرْلٜ لِمْشٜ مَࢡّٜ عٜ ࢡٛغّٜلْ شَرْوِنَانغٜلْ حَا تُوتُورُ کٛو ندُيٜ؞ 39تُوتُوجِ مَنْ لَاتَنْتٛ عٛنْ شِڢْتِنٛرْکِ؞ کٛو ندٜيْ عٛنْ ندَارِ طِ، عٛنْ شِڢْتٛرَنْ عُمْرٛوجٜ عَمْ، عٛنْ طٛوْتَنٛ طٜ، نغَمْ تَا عٛنْ تٛکّٛ عٜسْتٛوجِ ࢡٜرْطٜ مٛنْ عٜ غِتٜ مٛنْ نَسْتِنَنْطِ عٛنْ ندٜرْ سٛويْندٜ عَدِلَاکُ؞ 40بَنَ نٛنْ عٛنْ نُمْتِرْتَ عُمْرٛوجٜ عَمْ، عٛنْ طٛوْتَنٛ طٜ، عٛنْ لَاتٛ سٜنَاࢡٜ نغَمْ عَمْ؞ 41مِنْ وٛنِ اَللَّه جَوْمِرَاوٛ مٛنْ، مِوُرْتِنِ عٛنْ لٜسْدِ مِصْرَ نغَمْ مِلَاتٛ اَللَّه مٛنْ؞ مِنْ وٛنِ جَوْمِرَاوٛ اَللَّه مٛنْ؞»
Currently Selected:
لِمْلٜ 15: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
