لِمْلٜ 14
14
تُورْتٛلْ جَمَعَارٜ إِسْرَاءِيلَ
1جَمَعَارٜ إِسْرَاءِيلَ ڢُو وٛوکِ، وٛيِ جٜمَّارٜ مَنْ ڢُو؞ 2إِسْرَاءِيلَعٜنْ ڢُو نغُرْنغُرْتِ دٛوْ مُوسَى عٜ هَـٰرُونَ، مبِعِ: «ندِکَّنَ مِنْ مَايُغٛ حَا مِصْرَ، کٛو حَا طٛ ندٜرْ لَدّٜ ندٜعٜ! 3کٛنِ جَوْمِرَاوٛ يَحْرَتَ مِنْ حَا لٜسْدِ ندِعِ تٛ نِي مِنْ مَايْرَ بٜى کَاڢَحِ، رٜوْࢡٜ عَمِنْ عٜ ࢡِکّٛيْ عَمِنْ بٛو لَاتٛ کٜࢡَلْ کٛنُ؟ نَا ندِکَّ مِنْ لٛرٛ حَا مِصْرَ؟» 4ندٜنْ ࢡٜمبِعْمبِعْتِرِ: «عٜنْ شُࢡَ عَرْدِيطٛ، عٜنْ لٛرْتٛ حَا مِصْرَ!»
5عَمَّا مُوسَى عٜ هَـٰرُونَ شُجِدَنِ جَوْمِرَاوٛ يٜىٰسٛ جَمَعَارٜ إِسْرَاءِيلَ ڢُو؞ 6يٛسُوَ ࢡِي نُونَ عٜ کَالٜبْ ࢡِي يٜڢُنَّ، حٛرُنٛوࢡٜ لٜسْدِ غٛ، شٜىٰکِ لِمْشٜ مُوطُمْعٜنْ نغَمْ دَلِيلَ مٜتّٜىٰنغَ؞ 7ࢡٜمبِعِ جَمَعَارٜ إِسْرَاءِيلَ ڢُو: «لٜسْدِ ندِ مِنْ کٛرِ طُمْ، ندِ مبٛوندِ مَسِنْ! 8تٛ جَوْمِرَاوٛ يٜرْدَکٜ عٜنْ، عٛيَحْرَنْ عٜنْ تٛنْ، عٛحٛکَّ عٜنْ ندِ؞ لٜسْدِ ندِعِ حٜىٰوِ کٛسَمْ عٜ نجُمْرِ! 9تَنْ نِي، تَا عٛنْ تُورْتَنَ جَوْمِرَاوٛ! تَا کُلٜ بٛو عُمَّاتٛورٜ وٛنْدٜ تٛنْ نغَمْ عٜنْ نجَالٛتٛ ندٜ بٜى کٛيْطُمْ؞ ندٜ وَلَا ڢَدُّيٜ ڢَحِنْ، عَمَّا عٜنٜنْ کَمْ جَوْمِرَاوٛ طٛنْ وٛنْدِ بٜى مٜىٰطٜنْ؞ تَا کُلٜ ندٜ!» 10جَمَعَارٜ ڢُو وٛلْوِ حَالَ ڢِطُغٛ ࢡٜ بٜى کَاعٜ؞ عَمَّا ندَا، تٜدُّنغَلْ جَوْمِرَاوٛ وَنغَنِ إِسْرَاءِيلَعٜنْ ڢُو حَا لَيْمَارُ ڢٛتِّرْدٜ؞
مُوسَى تٛرَنِ إِسْرَاءِيلَعٜنْ
11جَوْمِرَاوٛ وِعِ مُوسَى: «حَا ندٜيْ يِمْࢡٜ ࢡٜعٜ تٛکّٛتٛ يَوَاغٛ يَمْ؟ بٜى عَلَامَاجِ طُوطِّ طِ مبَطْمِ شَکَ مَࢡّٜ، حَا ندٜيْ ࢡٜشَلٛتٛ حٛولَاغٛ يَمْ؟ 12مِعُکَّنَنْ ࢡٜ ࢩَوُ کَلُّنغُ ندَاࢡٛووُ، مِنَتِّنَنْ ࢡٜ! عَمَّا عَنْ، مِلَاتِنْتٜ عُمَّاتٛورٜ مَوْندٜ، سٜمْبِطْندٜ، ࢡُرَنْدٜ ندٜ مَࢡّٜ؞»
13عَمَّا مُوسَى وِعِ جَوْمِرَاوٛ: «مِصْرَعٜنْ نَنِ نٛ عَوُرْتِنِرِ عُمَّاتٛورٜ ندٜعٜ شَکَ مَࢡّٜ بٜى بَاوْطٜ مَ، 14ࢡٜنغٜشِّ طُمْ جٛوطِيࢡٜ لٜسْدِ ندِعِ؞ ࢡٜنَنِ، عَنْ، يَا جَوْمِرَاوٛ، عَطٛنْ شَکَ عُمَّاتٛورٜ ندٜعٜ، عَوَنغَنِ ندٜ بٜى بَنغُطُمْ، رُولْدٜرٜ مَاطَ طٛنْ دٛوْ مَارٜ نغَمْ ڢَدُّغٛ ندٜ، بٜى نَانغٜ عَعَرْدِ ندٜ بٜى رُولْدٜرٜ نَنْدُندٜ بٜى دَنغْرَنغَلْ عٜ بٜى جٜمَّ بٛو بٜى يِيتٜ نَنْدُنغٜ دَنغْرَنغَلْ؞ 15تٛ عَمبَرِ عُمَّاتٛورٜ ندٜعٜ ڢُو جٛنْتَ، عُمَّاتٛوجٜ نَنْطٜ حَالَ کُوطٜ مَاطَ مبِعَنْ: 16جَوْمِرَاوٛ حُنِ عٛحٛکَّنْ عُمَّاتٛورٜ ندٜعٜ لٜسْدِ ندِعِ، عَمَّا عٛوَاوَايْ نَسْتِنْغٛ ندٜ ندٜرْ مَارِ، عٛمبَرِ ندٜ ندٜرْ لَدّٜ! 17مِطٛنْ تٛرٛ مَ، يَا جَوْمِرَاوٛ، وَنغِنَنْ مِنْ بَاوْطٜ مَ، نغَمْ عَوِعِ: 18مِنْ جَوْمِرَاوٛ، مِتِکَّتَا لَوْ، مبٛوطٜىٰنغَ عَمْ طُوطِ، مِمُࢩَنَنْ تُورْتٛلْ، مِيَاڢٛتٛ تُورْتٛلْ عٜ حَکّٜ؞ عَمَّا مِلَارَتَا عَيْبُطٛ بَنَ لَاࢡْطٛ سَمْ؞ مِحِيتٛتٛ عَيْبٜ بَابِرَاࢡٜ حَا ࢡِࢡّٜ عٜ تَانِرَاࢡٜ حَا يِدٜرٜ تَتَࢡْرٜ عٜ نَيَࢡْرٜ؞ 19مِطٛنْ تٛرٛ مَ، يَاڢَ عَيْبٜ عُمَّاتٛورٜ ندٜعٜ ڢٛدّٜ مبٛوطٜىٰنغَ مَ طُوطْنغَ، بَنَ نٛ عَيَاڢٛرِ ندٜ دِغَ ندٜ طٛنّٛ حَا مِصْرَ حَا وَرْغٛ حَنْدٜ#تٛوکْتَاکِ تَوْرٜىٰتَ 9:25-29؞؞»
20جَوْمِرَاوٛ جَابِ: «مِيَاڢَکٜ ندٜ ڢٛدّٜ وٛلْدٜ مَاطَ؞ 21عَمَّا ڢَکَتْ بَنَ مِ غٜىٰتٛ، بَنَ تٜدُّنغَلْ عَمْ طٛنْ حٜبِّنَ دُنِيَارُ بٛو، 22-23عُمَّاتٛورٜ ندٜعٜ ڢُو نَسْتَتَا لٜسْدِ مَنْ؞ نغَمْ ندٜ يِعِ تٜدُّنغَلْ عَمْ عٜ عَلَامَاجِ طِ مبَنغِنْمِ ندٜرْ لٜسْدِ مِصْرَ عٜ ندٜرْ لَدّٜ بٛو، عَمَّا ندٜ ڢٛونْدِ يَمْ بَنَ نِي ندٜ سَݠّٛ جٛنْتَ، ندٜ نَنَنَايْ يَمْ؞ نغَمْ مَاجُمْ ندٜ يِعَتَا لٜسْدِ ندِ کُنَنِيمِ کَاکِرَاࢡٜ مَارٜ؞ يَوِيࢡٜ يَمْ ڢُو بٛو نغِعَتَا ندِ سَمْ؞ 24عَمَّا جَغِّيطٛ عَمْ کَالٜبْ مَرْطٛ رُوحُ ڢٜىٰرٜ، کَنغْکٛ عٛتٛکِّ يَمْ بٜى ࢡٜرْندٜ وٛورٜ؞ نغَمْ مَاجُمْ مِيَحْرَنْ مٛ ندٜرْ لٜسْدِ ندِ عٛحٛرِ، دَࢩْغٛلْ مَاکٛ مَرَنْ ندِ؞ 25عَمَلٜکِعٜنْ عٜ کَنَانِعٜنْ طٛنْ نجٛوطِ ندٜرْ وَادِوٛلْ؞ عٛنٛنْ کَمْ، لٛرْتٜ جَنغٛ حَا لَدّٜ غَلْ وَکٜىٰرٜ مَايٛ مَالِيَ؞»
جَوْمِرَاوٛ حِيتِ إِسْرَاءِيلَعٜنْ
26جَوْمِرَاوٛ وِعِ مُوسَى عٜ هَـٰرُونَ: 27«حَا ندٜيْ عُمَّاتٛورٜ حَلُّندٜ ندٜعٜ تٛکّٛتٛ نغُرْنغُرْتُغٛ دٛوْ عَمْ؟ مِنَنِ إِسْرَاءِيلَعٜنْ نغُرْنغُرْتِرِ دٛوْ عَمْ؞ 28وِعْ ࢡٜ: ندَا نِي جَوْمِرَاوٛ وِعِ: ڢَکَتْ بَنَ مِ غٜىٰتٛ، مِوَطَنَنْ عٛنْ ڢٛدّٜ بٛلّٜ طٜ عٛنْ مبٛلْوِ يٜىٰسٛ عَمْ؞ 29عٛنْ مَايَنْ، ࢡَلِّ مٛنْ مبَالٛتٛ ندٜرْ لَدّٜ ندٜعٜ! لِمَاࢡٜ مٛنْ ڢُو، مٛ دُوࢡِ نٛوغَسْ عٜ کٛ ࢡُرِ، نغُرْنغُرْتٛوࢡٜ دٛوْ عَمْ 30نَسْتَتَا لٜسْدِ ندِ مِحُنِنٛ جٛعِّنْغٛ عٛنْ تٛنْ، سٛنَا کَالٜبْ ࢡِي يٜڢُنَّ عٜ يٛسُوَ ࢡِي نُونَ! 31عٛنْ مبِعِ، کٛنّٜعٜنْ نجَࢡْتَنْ ࢡِکّٛيْ مٛنْ؞ ڢَکَتْ مِيَحْرَنْ کٛيْ ندٜرْ لٜسْدِ ندِ عٛنْ نجَوِ، کٛيْ عَنْدَنْ ندِ؞ 32عَمَّا عٛنٛنْ، عٛنْ مبَالٛتٛ ندٜرْ لَدّٜ ندٜعٜ! 33ࢡِکّٛيْ مٛنْ لَاتٛتٛ وَيْنَاࢡٜ ندٜرْ لَدّٜ دُوࢡِ شَݠَّنْطٜ نَيِ، ࢡٜنجَرَنْ بٛنٜ دَلِيلَ زُنُوبَاجِ مٛنْ حَا تٛ عٛنْ ڢُو عٛنْ مبَالَکٜ ندٜرْ لَدّٜ؞ 34عٛنْ کٛرِ لٜسْدِ ندِعِ ࢩَلْطٜ شَݠَّنْطٜ نَيِ؞ عٛنْ ندٛونْدٛتٛ کِيتَ عَيْبٜىٰجِ مٛنْ دُوࢡِ شَݠَّنْطٜ نَيِ، وَاتٛ ندُوࢡُ نغٛوتُ نغَمْ ࢩَلَادٜ وٛورٜ؞ ندٜنْ عٛنْ عَنْدَنْ کٛ وَطَتَ تٛ مِوَيْلِتَکٜ، مِعَشِّ عٛنْ؞ 35مِنْ جَوْمِرَاوٛ وِعِ طُمْ، بَنَ نٛنْ مِوَطَنْتَ جَمَعَارٜ حَلُّندٜ ندٜعٜ، نغَمْ ندٜ حَوْتِ نغَمْ حٛنُغٛ يَمْ؞ يِمْࢡٜ مَارٜ مَايَنْ، ࢡٜنَتَّنْ حَا طٛ ندٜرْ لَدّٜ؞»
36ندٜ وٛرْࢡٜ ࢡٜ مُوسَى نٜلْنٛ حٛرُغٛ لٜسْدِ غٛ نغَرْتِ، کَلِّنِ لٜسْدِ مَنْ، ࢡٜعُمِّنِ ࢡٜرْندٜ عُمَّاتٛورٜ ڢُو حَا ندٜ نغُرْنغُرْتِ دٛوْ مَاکٛ؞ 37وٛرْࢡٜ حَلِّنْࢡٜ لٜسْدِ مَايْرِ بٜى مَسِيبٛ يٜىٰسٛ جَوْمِرَاوٛ، 38سٜيْ يٛسُوَ ࢡِي نُونَ عٜ کَالٜبْ ࢡِي يٜڢُنَّ تَنْ لُتِّ بٜى يٛنغْکِ شَکَ يَحْنٛوࢡٜ حٛرٛيْغٛ لٜسْدِ؞
کٛنّٜعٜنْ نجَالِ إِسْرَاءِيلَ
(تٛوکْتَاکِ تَوْرٜىٰتَ 1:41-46)
39مُوسَى يٜشِّ إِسْرَاءِيلَعٜنْ ڢُو بٛلّٜ طٜعٜ؞ ندٜنْ ࢡٜمبٛيِ مَسِنْ؞ 40جَنغٛ مَنْ ࢡٜندَوِ شُبْ، ࢡٜمبَعِّ يٜىٰرٜىٰرٜ حٛوسٜىٰرٜ، ندٜنْ ࢡٜطٛنْ مبِعَ: «غٛونغَ مِنْ مبَطِ حَکّٜ؞ مِنْ نجَحَنْ حَا نٛکُّورٜ ندٜ جَوْمِرَاوٛ يٜشِّ مِنْ؞» 41عَمَّا مُوسَى وِعِ: «کٛنِ عٛنْ طٛوْتَنْتَاکٛ عُمْرٛورٜ جَوْمِرَاوٛ جٛنْتَ؟ عٛنْ کُمْتَتَا؞ 42جَوْمِرَاوٛ وٛنْدَتَا بٜى مٛوطٛنْ؞ تَا نجٜحٜ، نغَمْ تَا کٛنّٜعٜنْ مٛنْ نجَالٛ عٛنْ؞ 43عَمَلٜکِعٜنْ عٜ کَنَانِعٜنْ بٛو طٛنْ يٜىٰسٛ مٛوطٛنْ تٛنْ! عٛنْ مَايْرَنْ بٜى کَاڢَحِ نغَمْ عٛنْ عَشِّ تٛکَّاغٛ جَوْمِرَاوٛ، کَنغْکٛ بٛو عٛوٛنْدَتَا بٜى مٛوطٛنْ!» 44بٜى نٛنْ ڢُو ࢡٜشَاتِنِ کٛعٜ مَࢡّٜ، ࢡٜمبَعِّ يٜىٰرٜىٰرٜ حٛوسٜىٰرٜ؞ عَمَّا سُنْدُکْرُ عَلْکَوَلْ جَوْمِرَاوٛ عٜ مُوسَى نغُرْتَاکِ سَنغٜىٰرٜ؞ 45عَمَلٜکِعٜنْ عٜ کَنَانِعٜنْ جٛوطِيࢡٜ دٛوْ حٛوسٜىٰرٜ مَنْ نجِݠِّ، نجَالِ ࢡٜ، نجَاࢡِ ࢡٜ حَا يٛتِّ حٛرْمَ؞
Currently Selected:
لِمْلٜ 14: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
