ڢَرِلَّاجِ لٜوِعٜنْ 8

لِيعٜىٰکِ هَـٰرُونَ عٜ ࢡِࢡّٜ مُمْ حَا کُوغَلْ لِمَنْکُ

(غُرْتَاکِ 29‏:1‏-37)

1جَوْمِرَاوٛ وِعِ مُوسَى‏: 2«سٜيْ عَيَحْرَ هَـٰرُونَ عٜ ࢡِࢡّٜ مُمْ حَا دَمُّغَلْ لَيْمَارُ ڢٛتِّرْدٜ؞ وَدُّ بٛو لِمْشٜ لِمَنْکُ عٜ نٜبَّمْ شٜنِرْطَمْ عٜ نغَارِ کَلْحَلْدِ کِرْسٜتٜىٰندِ نغَمْ عِتُّکِ حَکّٜىٰجِ عٜ جَوْطِ بَالِ طِطِ عٜ سِلَاوٛ بٜى تَمْسٜىٰجٜ طٜ عُڢْنَاکَ؞ 3ندٜنْ مٛوࢡْتُ جَمَعَارٜ ڢُو تٛنْ؞»

4مُوسَى وَطِ بَنَ جَوْمِرَاوٛ عُمْرِمٛ؞ ندٜ جَمَعَارٜ مٛوࢡِ، 5عٛوِعِ يِمْࢡٜ‏: «مِوَطَنْ جٛنْتَ کٛ جَوْمِرَاوٛ عُمْرِ يَمْ؞»

6مُوسَى ࢡَدِنِ هَـٰرُونَ عٜ ࢡِࢡّٜ مُمْ، يِيوِ ࢡٜ؞ 7عٛࢡٛرْنِ هَـٰرُونَ تٛغّٛورٜ عٜ عَلْکِبَّارٜ، عٛتَادِمٛ تَادٛرْغٛلْ؞ ندٜنْ عٛࢡٛرْنِمٛ طَنْشِکِيرٜ، عٛحَࢡِّ ندٜ بٜى تَادٛرْغٛلْ مَارٜ شَنْࢩَانغٛلْ؞ 8ندٜنْ عٛحَࢡِّ جِيبَ وِࢡّٜرٜ دٛوْ مَاغٜلْ، عٛنَسْتِنِ ندٜرْ مَاکَ کَاعٜ کُرْعُ بِعٜتٜىٰطٜ عُرِيمَ عٜ تُمِيمَ؞ 9عٛمٜىٰتِمٛ مٜىٰتَلٜىٰوٛلْ، عٛوَطِ ڢَوْنٜ شٜنِيطٜ طٜ کَنغّٜىٰرِ طٜلٜمْندِ حَا يٜىٰسٛ مَاغٛلْ، بَنَ جَوْمِرَاوٛ عُمْرُنٛ مٛ؞

10ندٜنْ مُوسَى حٛوعِ نٜبَّمْ شٜنِرْطَمْ، وُجِ جٛوطٛرْدٜ جَوْمِرَاوٛ عٜ کٛ وٛنِ ندٜرْ مَارٜ ڢُو؞ بَنَ نٛنْ عٛسٜنِرِ طُمْ#غُرْتَاکِ 40‏:9‏-11؞؞ 11عٛوِشِّ طَمْ سٜطَّ دٛوْ حِرْسِرْدٜ، ندٜ جٛوٜىٰطِطِ، عٛوُجِ حِرْسِرْدٜ عٜ کُوجٜ کُوغَلْ دٛوْ مَارٜ عٜ دَارٛ عٜ جٛعِّنِرْطُمْ مَاغٛ، نغَمْ سٜنُغٛ طُمْ؞ 12ندٜنْ عٛوَطِ طَمْ سٜطَّ دٛوْ حٛورٜ هَـٰرُونَ، نغَمْ سٜنُغٛ مٛ؞ 13ࢡَاوٛ مَنْ عٛࢡَدِنِ ࢡِࢡّٜ هَـٰرُونَ؞ عٛࢡٛرْنِ ࢡٜ تٛغّٛوجٜ، عٛتَادِ ࢡٜ تَادٛرْلِ، عٛحُڢْنِ ࢡٜ کُڢْنٜىٰجٜ، بَنَ جَوْمِرَاوٛ عُمْرُنٛ مٛ؞

14ندٜنْ مُوسَى وَدِّ نغَارِ کَلْحَلْدِ کِرْسٜتٜىٰندِ نغَمْ عِتُّکِ حَکّٜىٰجِ؞ هَـٰرُونَ عٜ ࢡِࢡّٜ مُمْ نجٛوِ جُوطٜ مُوطُمْعٜنْ دٛوْ حٛورٜ مَارِ؞ 15مُوسَى حِرْسِ ندِ، حٛوعِ ࢨِيࢨَمْ مَارِ سٜطَّ، وُجِ طَمْ بٜى حٛوندُ مُمْ حَا لُوٜ حِرْسِرْدٜ، نغَمْ سٜنُغٛ ندٜ؞ عٛرُڢِ ࢨِيࢨَمْ لُتُّطَمْ حَا لٜسْ حِرْسِرْدٜ؞ بَنَ نٛنْ عٛلَࢡِّنِرِ ندٜ، عٛسٜنِ ندٜ؞ 16مُوسَى حٛوعِ ࢡٜلّٜرٜ سُدُّندٜ کُوجٜ رٜىٰدُ عٜ ࢡٜلّٜرٜ دٛوْ حٜنغْرٜ عٜ ࢡٛوࢨٜ بٜى ࢡٜلّٜرٜ وٛنْدٜ دٛوْ مَاجٜ عٜ وُلِ طُمْ ڢُو دٛوْ حِرْسِرْدٜ؞ 17عٛحٛوعِ لُتُّطُمْ نغَارِ، لَرَلْ مَارِ عٜ کُسٜلْ مَارِ عٜ شٛووٛووٜ مَارِ، عٛوُلِ طُمْ يَاسِ سَنغٜىٰرٜ، بَنَ جَوْمِرَاوٛ عُمْرُنٛ مٛ؞

18ندٜنْ مُوسَى وَدِّ نجَوْدِرِ مبَالُ نغُلٜتٜىٰندِ؞ هَـٰرُونَ عٜ ࢡِࢡّٜ مُمْ نجٛوِ جُوطٜ مُوطُمْعٜنْ دٛوْ حٛورٜ مَارِ؞ 19مُوسَى حِرْسِ ندِ، وِشِّ ࢨِيࢨَمْ مَارِ حَا بَکٜىٰجٜ حِرْسِرْدٜ مَنْ نَيِ ڢُو؞ 20‏-21عٛتَعِ ندِ ڢٛدّٜ غٜࢡٜ مَارِ، عٛلٛوتِ تٜتٜکِ مَارِ عٜ کٛلْشٜ مَارِ، عٛوُلِ حٛورٜ عٜ ࢡٜلّٜرٜ عٜ غٜࢡٜ مَارِ ڢُو دٛوْ حِرْسِرْدٜ، بَنَ جَوْمِرَاوٛ عُمْرُنٛ مٛ؞ طُمْ نغُلَانغَ نغَمْ جَوْمِرَاوٛ نغَ يِيتٜ ࢩَامِ طُمْ، عُورٜىٰنغٛلْ مَنْ ڢٛتَّنِمٛ؞

22ندٜنْ مُوسَى وَدِّ نجَوْدِرِ مبَالُ طِطَوْرِ، وَاتٛ نجَوْدِرِ نغَمْ کَلْڢِتِنْکِ کُوغَلْ؞ هَـٰرُونَ عٜ ࢡِࢡّٜ مُمْ نجٛوِ جُوطٜ مُوطُمْعٜنْ دٛوْ حٛورٜ مَارِ؞ 23مُوسَى حِرْسِ ندِ، حٛوعِ ࢨِيࢨَمْ مَارِ سٜطَّ، وَطِ طَمْ حَا دٜبْلٜکٜىٰرٜ نٛڢْرُ هَـٰرُونَ ࢩَامْرُ عٜ حٛوندُ وٛرْدُ جُنغٛ مَاکٛ ࢩَامٛ عٜ ندُ کٛسْنغَلْ مَاکٛ ࢩَامَلْ؞ 24ندٜنْ عٛࢡَدِنِ ࢡِࢡّٜ هَـٰرُونَ، عٛوَطِ ࢨِيࢨَمْ سٜطَّ حَا دٜبْلٜکٜىٰجٜ نٛݠِّ مَࢡّٜ ࢩَامِ عٜ کٛولِ غٛرْطِ جُوطٜ مَࢡّٜ ࢩَامٜ عٜ طِ کٛسْطٜ مَࢡّٜ ࢩَامٜ؞ ندٜنْ عٛوِشِّ ࢨِيࢨَمْ لُتُّطَمْ حَا بَکٜىٰجٜ حِرْسِرْدٜ مَنْ نَيِ ڢُو؞ 25مُوسَى حٛوعِ ࢡٜلّٜرٜ نجَوْدِرِ عٜ وِشّٛ عٜ ࢡٜلّٜرٜ سُدُّندٜ کُوجٜ رٜىٰدُ عٜ ࢡٜلّٜرٜ دٛوْ حٜنغْرٜ عٜ ࢡٛوࢨٜ بٜى ࢡٜلّٜرٜ وٛنْدٜ دٛوْ مَاجٜ، نٛنْ بٛو دَنغٛ مَارِ ࢩَامٛ؞ 26عٛحٛوعِ بٛو دِغَ سِلَاوٛ تَمْسٜىٰجٜ طٜ عُڢْنَاکَ، جٛعِّنَاطٜ يٜىٰسٛ جَوْمِرَاوٛ، تَمْسٜىٰرٜ ندٜ عُڢْنَاکَ وٛورٜ عٜ تَمْسٜىٰرٜ جِيࢡَاندٜ بٜى نٜبَّمْ وٛورٜ عٜ تَمْسٜىٰرٜ وٜتّٜرٜ وٛورٜ، عٛجٛعِّنِ طٜ دٛوْ ࢡٜلّٜرٜ عٜ دَنغٛ مَنْ؞ 27عٛحٛکِّ طُمْ ڢُو حَا جُوطٜ هَـٰرُونَ عٜ ࢡِࢡّٜ مُمْ، ࢡٜࢡَنغْتَ دٛکّٜ طٜعٜ، ࢡٜلِيعٛ طٜ يٜىٰسٛ جَوْمِرَاوٛ؞ 28ندٜنْ مُوسَى حٛوعِ طُمْ ڢَحِنْ، وُلِ طُمْ دٛوْ حِرْسِرْدٜ، حَا دٛوْ نغُلَانغَ غٛ؞ کَنْجُمْ وٛنِ کِرْسَانغَ نغَمْ کَلْڢِتِنْکِ کُوغَلْ؞ طُمْ نغُلَانغَ نغَمْ جَوْمِرَاوٛ، عُورٜىٰنغٛلْ مَاغَ بٜلْنغٛلْ ڢٛتَّنِمٛ؞ 29ندٜنْ مُوسَى حٛوعِ بِيوٛلْ نجَوْدِرِ، ࢡَنغْتِ نغٛلْ، لِيعِ نغٛلْ يٜىٰسٛ جَوْمِرَاوٛ؞ نغٛلْ لَاتِ غٜطَلْ مُوسَى حَا نجَوْدِرِ کَلْڢِتِنْکِ کُوغَلْ؞ مُوسَى وَطِ کٛو طُمٜ ڢُو بَنَ جَوْمِرَاوٛ عُمْرُنٛ مٛ؞

30ࢡَاوٛ مَنْ مُوسَى حٛوعِ نٜبَّمْ شٜنِرْطَمْ عٜ ࢨِيࢨَمْ نغٛنْطَمْ دٛوْ حِرْسِرْدٜ؞ عٛوِشِّ طَمْ دٛوْ هَـٰرُونَ عٜ لِمْشٜ مُمْ، نٛنْ بٛو دٛوْ ࢡِࢡّٜ هَـٰرُونَ عٜ لِمْشٜ مُوطُمْعٜنْ؞ بَنَ نٛنْ عٛسٜنِرِ ࢡٜ، کَمْࢡٜ عٜ لِمْشٜ مَࢡّٜ؞

31مُوسَى وِعِ هَـٰرُونَ عٜ ࢡِࢡّٜ مُمْ‏: «ندٜڢٜ کُسٜلْ نغٜعٜلْ حَا دَمُّغَلْ لَيْمَارُ ڢٛتِّرْدٜ؞ ࢩَامٜ نغٜلْ تٛنْ حَوْتَادٜ بٜى تَمْسٜىٰجٜ غٛنْطٜ ندٜرْ سِلَاوٛ دٛکّٜ نغَمْ کَلْڢِتِنْکِ کُوغَلْ مٛنْ، بَنَ عُمْرُمِ عٛنْ؞ 32لُتُّطُمْ کُسٜلْ عٜ تَمْسٜىٰجٜ، نغُلٜ طُمْ بٜى يِيتٜ؞ 33تَا شٛتّٜ حَا دَمُّغَلْ لَيْمَارُ ڢٛتِّرْدٜ ࢩَلْطٜ جٛوٜىٰطِطِ، سٜيْ تٛ ࢩَلْطٜ کَلْڢِتِنْکِ کُوغَلْ مٛنْ تِمِّ؞ نغَمْ سٜيْ کَلْڢِتِنْکِ کُوغَلْ مٛنْ وَطَ ࢩَلْطٜ جٛوٜىٰطِطِ؞ 34جَوْمِرَاوٛ عُمْرِ عٜنْ وَطُغٛ کٛ عٜنْ مبَطِ حَنْدٜ، نغَمْ عِتُّکِ حَکّٜىٰجِ مٛنْ؞ 35نجٛوطٜ تٛنْ حَا دَمُّغَلْ لَيْمَارُ ڢٛتِّرْدٜ ࢩَلْطٜ جٛوٜىٰطِطِ، جٜمَّ بٜى نَانغٜ ڢُو؞ نجَغَّنٜ جَوْمِرَاوٛ، نغَمْ تَا عٛنْ مَايَ؞ بَنَ نٛنْ جَوْمِرَاوٛ عُمْرِ يَمْ؞» 36هَـٰرُونَ عٜ ࢡِࢡّٜ مُمْ مبَطِ کٛو طُمٜ کٛ جَوْمِرَاوٛ عُمْرِ بٜى حُنْدُکٛ مُوسَى؞

Currently Selected:

ڢَرِلَّاجِ لٜوِعٜنْ 8: داَ

Highlight

Copy