PANURIRANG SAKARIA Bindu 2
Bindu 2
Pangungkapon padua on taringot tu tanduk na opat i dohot tu panopa na opat i: torutoru tu musu ni Juda 1-4.
Pangungkapon patoluhon: Taringot tu baoa sitiop hotang pamalok, hinabolon ni Jerusalem 5-9.
Bagabaga taringot tu hamumulak sian habuangan, jala maringan Jahowa di bagasan Sion 10-17.
I. 1Dung i manaili ma ahu dompak ginjang, gabe huida ma opat tanduk. 2Dung i ningku ma tu suruan angkuphu mangkatai: Dia do lapatan ni angka on? Jadi didok ma tu ahu: I ma tanduk, angka naung paserak Juda, Israel dohot Jerusalem. 3Dung i dipaidahon Jahowa ma tu ahu opat halak panopa. 4Jadi ningku ma: Aha do huroha sibahenonnasida on umbahen na ro? Jadi didok ibana ma songon on: I ma tanduk, angka naung paserak Juda, pola ndang tarbahen manang ise padirgak uluna. Alai ro soluk angka nasida on laho manonggoti nasida, laho mangupokkon angka tanduk ni angka bangso parbegu, angka na paginjang tandukna dompak tano Juda laho paserakkonsa.
II. 5Dung i manaili ahu muse dompak ginjang, asa huida, jadi ida ma, sada halak na patioptiop * sada hotang pamalok di bagasan tanganna. #* Hes 40:3 6Jadi ningku ma: Naeng tudia ho laho? Dung i ninna ibana ma tu ahu: Naeng manuhati Jerusalem, naeng marnida manang sadia bohangna, jala sadia unjurna. 7Jadi ida ma, ruar ma suruan, angkuphu mangkatai hian; ruar muse sada suruan na asing manjumpangkon ibana. 8Jala didok tu ibana: Marlojong ma ho dok ma tu dolidoli on songon on: * Gabe adaran manardas ma Jerusalem dibahen hinadeak ni jolma dohot pinahan di tongatongana. #* Hes 38:11 9Ai * ahu do, ninna Jahowa, gabe parik api humaliang huta i, jala ahu gabe + hamuliaon di tongatongana. #* Sak 9:8; + Jes 60:19
III. 10Beta hamu antong! * Lintun ma hamu sian tano tungkan utara, ninna Jahowa, ai nunga hupaserak hamu tu desa na opat ni langit i, ninna Jahowa. #* Jes 48:20, 52:11 11Beta antong, ale Sion, palua dirim, ho ale na maisolat di tano Babel. 12Ai songon on do hata ni Jahowa Zebaot: Naeng marmulia ibana umbahen disuru ahu tumopot bangso parbegu, angka na martaban hamu na jolo. Ai manang ise na manjama hamu, * anak ni matana jinamana disi. #* 5Mus 32:10; Ps 17:8 13Ai ida ma, laluhononku ma tanganku tu nasida, asa gabe tabantaban nasida di halak na pinarhatobannasida nasailaon, asa tung ditanda hamu Jahowa Zebaot naung marsuru ahu. 14Marolopolop ma ho, jala marlas ni roha, ale boru Sion, ai ida ma, na ro ma ahu maringan di tongatongami, ninna Jahowa. #3Mus 26:12; Jes 12:6; Hes 37:27; Sep 3:14 15Jadi * torop angka bangso parbegu marsilohot tu Jahowa di ari na sasada i, gabe bangsongku nasida, alai maringan do ahu anggo di tongatongami, asa tung diboto ho Jahowa Zebaot naung marsuru ahu manopot ho. #* Jes 11:10, 60:3 16Jadi ainon ni Jahowa muse Juda bahen partalianna di tano na badia i, jala * ulahanna mamillit Jerusalem. #* Sak 1:17 17Hohom ma nasa sibuk maradophon Jahowa, ai nunga tarsunggul ibana sian inganan ni habadiaonna. #Hab 2:20
Batak Toba Bible Revised Edition © Indonesian Bible Society, 1998.