TITUS Bindu 3
Bindu 3
Parange na ture mangula tohonan parhuriaon 1-2.
Haluaon na pinature ni Debata di hita 3-11.
Hata parujungan 12-15.
I. 1Paingot ma nasida, asa marroha na unduk mangoloi panggomgomi na mangarajai, huhut ringgas tu nasa ulaon na denggan. #1Ptr 2:13 2Unang ma siinsahi dongan, manang na tongkar; naeng ma parroha na lambok, parroha panganju di saluhut halak. #Plp 4:5
II. 3Ai dohot do hita najolo angka na oto, na tois, na lilu, pinarhatoban ni ragam ni hisaphisap dohot sangkapsangkap, taulahon do hajahaton dohot latelate; angka hagigian do hita jala masihosoman. #1Kor 6:11; Eps 2:2, 5:8 4Alai disi ma tarida habasaon dohot habasaron ni Debata, Sipalua hita: #Tit 2:11 5Ndada ala ni ulaonta hatigoran, umbahen na dipalua Ibana hita; tung sian asi ni rohana do, marhitehite pandidion pangulahion tubu dohot marhitehite Tondi Parbadia na paimbaruhon i, #Joh 3:5; Eps 2:8-9, 5:26 6naung niusehonna i tu hita buas marhitehite Jesus Kristus, Sipalua hita, #Joel 3:1 7asa gabe tigor hita, binahen ni asi ni rohana, jala sitean hangoluan salelenglelengna, mangihuthon pangkirimon i. 8Haposan do hata i, jala naeng ma gomos hatindangkononmu i dipangido rohangku, asa nasida, naung gabe porsea di Debata, mangkapadothon angka ulaon na denggan. I ma na uli jala hasea di jolma. #Tit 3:14 9Alai pasiding ma angka sualsual haotoon i dohot hata sundutsundut ro di parsalisian dohot parbadaon siala Patik i, ai ndang marniula i jala magopo. #1Tim 4:7 10Pasiding ma halak parpoda haliluon, dung jolo dipaingot ho ibana sahali manang dua hali; #Mat 18:15-16; 2Joh 1:10 11ai diboto ho do, naung marbalik situtu sisongon i jala diulahon dosa, atik pe naung ditorui rohana ibana. #1Tim 6:4-5
III. 12Ia dung husuru si Artemas dohot Tikikus tu ho, pahatop ma ro mandapothon ahu tu Nikopolis, ai disi do ahu naeng mian di taon ngali. #2Tim 4:12 13Haringkothon ma paborhathon si Jenas, siboto patik i, dohot Apollos; unang hurangan nasida di agia aha! #Ul 18:24; 1Kor 3:5-6 14Naeng ma diguruhon angka donganta, mangkapadothon angka ulaon na denggan, sumarihon na ringkot pangkeon; unang so marparbue nasida! #Mat 7:19; Eps 4:28; Tit 2:14 15Na manongos tabi tu ho saluhut donganku. Pasahat ma tabinami tu angka na marholong ni roha di hami, di bagasan haporseaon. Didongani asi ni roha i ma hamu saluhutna!
Currently Selected:
TITUS Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.