PILEMON Bindu 1
Bindu 1
Tabi ni apostel i 1-3.
Las ni rohana mida haporseaon ni si Pilemon 4-7.
Pangondihonna di si Onesimus 8-20.
Hata parujungan 21-25.
I. 1Ahu surat ni si Paulus, na tarihot ala ni Kristus Jesus, nang Timoteus, dongan i, mandapothon si Pilemon na hinaholongan, dongannami saulaon, #Eps 3:1 2laos mandapothon si Appia, ibotonami, dohot si Arkippus, dongannami marungkil, ro di huria na marluhut di bagasmu: #Kol 4:17 3Asi ni roha ma di hamu dohot dame sian Debata Amanta dohot sian Tuhan Jesus Kristus! #Rom 1:7
II. 4Na mandok mauliate do ahu tu Debatangku tongtong, marningot ho di angka tangiangku. #Rom 1:8; Eps 1:15-16 5Ai hubege do holong ni roham dohot haporseaonmu di Tuhan Jesus dohot maradophon saluhut angka na badia. #Kol 1:4, 9 6Anggiat ma marpangkorhon hasaoron ni haporseaonmi, laho mananda nasa na denggan na di bagasan hamu, maradophon Kristus i. #Plp 1:9-10 7Ai godang do di ahu halalas ni roha nang apulapul, dibahen holong ni roham, ai dipasabam ho do ateate ni angka na badia i, ale anggia. #2Kor 7:4
III. 8Onpe, godang do nian hiras ni rohangku di bagasan Kristus, mangarodihon na tama tu ho. 9Alai ala ni holong ni roha i, tagonan ma ahu mangelehelek. Nunga songon i ahu, Paulus, naung matua, jala tarihot nuaeng ala ni Kristus Jesus. 10Asa huelehelek ma ho; ala ni anakkonku, si Onesimus, na hutubuhon, di na tarihot on ahu. #1Kor 4:15; Gal 4:19; Kol 4:9 11Na so marguna do ibana najolo di ho; alai nuaeng marguna situtu do di ho, nang di ahu. 12Na husuru do ibana mulak tu ho; doshon rohangku do ibana huetong. 13Naeng do nian tioponku ibana, asa singkatmu ibana patureturehon ahu, di na tarrante on ahu ala ni barita na uli i. #Plp 2:30 14Alai ndang olo ahu mambahen agia aha, anggo so sian pamotoanmu, asa unang songon na so tarjua denggan basamu, naeng ma sian lomo ni roham. #2Kor 9:7 15Atik i alana, umbahen na sirang ibana sangombas sian ho, asa gabe salelengna ibana di ho! 16Ndada be naposom ibana, tung lobi sian naposo, songon dongan na hinaholongan; lumobi di ahu, lam beha ma di ho: Mangihuthon ruhut tano on, tole di bagasan Tuhan i. #1Tim 6:2 17Asa molo dietong ho ahu donganmu, jangkon ma ibana songon ahu! 18Alai molo tung adong salana manang utangna di ho, tu ahu ma i rajumi! 19Ahu, Paulus, manurathonsa dohot tanganku, paboa ahu sigarar i; unang jolo hudok tu ho, na marutang diri do ho tu ahu. 20Olo tutu, anggia, naeng maruntung ahu sian ho di bagasan Tuhan i; pasabam ma ateatengku di bagasan Kristus i! #Plm 1:7
IV. 21Ala pos rohangku, oloanmu ahu, umbahen na manurat ahu tu ho; ai huboto, patupaonmu do lumobi sian na hudok i. 22Pature huhut inganan di ahu, ai dihirim rohangku, lehononna do ahu mulak tu hamu, dibahen angka tangiangmuna. #Plp 1:25, 2:24 23Manongos tabi tu ho: Si Epapras, donganku tarhurung di bagasan Kristus Jesus. #Kol 1:7, 4:12 24Songon i: Si Markus, Aristarkus, Demas, Lukas, angka donganku saulaon. #Ul 12:12, 27:2; Kol 4:10, 14; 2Tim 4:10 25Didongani asi ni roha ni Tuhan Jesus Kristus ma tondimuna! #Plp 4:23
Currently Selected:
PILEMON Bindu 1: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.