PSALMEN Bindu 6
Bindu 6
Tangiang mangido haluaon sian parsahiton 2-8.
Pujipujian tu Debata ala naung nialusanna tangiangna 9-11.
1Ende sian si Daud.
I. 2Ale Jahowa unang uhumi ahu di bagasan rimasmu, jala unang ajari ahu di bagasan parpiar ni murukmu. #Ps 38:2; Jer 10:24 3Asi ma roham di ahu, ale Jahowa, ai mauas do huhilala; pamalum ahu, ale Jahowa, ai angka hitir do sude holiholingku. #Ps 51:10 4Rohangku di bagasan pe mansai mallobuk do, sadia leleng on Ho, ale Jahowa? #Ps 13:2-3 5Sai marpangulahi ma roham, ale Jahowa! Malua ma hosangku! Urupi ahu ala ni denggan ni basam. #Ps 119:132 6Ai anggo di hamatean ndang adong be parningotan tu Ho; jala tung ise mamuji Ho, dung ro di banua toru? #Ps 30:10, 88:11, 115:17 7Maheu do huhilala dibahen ponjot ni rohangku, ganup borngin do huhembangi lagengku, mansai maraek do nang bulusanku dibahen iluilungku. #And 1:2 8Pola do lotop matangku sian marsak ni rohangku, pola naung gabe matua, dibahen sude angka na manosak ahu. #Job 17:7; Ps 31:10, 88:10
II. 9Pasurut ma sian ahu, sude hamu angka na mangulahon na so uhum, ai nunga ditangihon Jahowa soara ni angukkon. 10Nunga ditangihon Jahowa hoingkon, dijangkon do ia tangiangkon. #Ps 34:5, 18 11Tarurak jala tarsonggot situtu do sogot sude angka musungku; hapogan do nasida laho sumurut, jala tarurak so pangkiriman. #Ps 35:4-6, 40:15
Currently Selected:
PSALMEN Bindu 6: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.