PODA SIAN RAJA SALOMO Bindu 29
Bindu 29
Hatigoran dohot hapistaran manogu tu hatuaon, alai hamagoan do anggo ujung ni haotoon dohot dosa 1-27.
1Jotjot pe hona pinsang baoa, hape tong do dipatangkang rohana, tompu do ibana ripur so ulahan bulung. #Poda 15:10 2Molo lam naek sorga halak partigor, marlas ni roha ma halak situan na torop, alai molo halak parjahat mangarajai, gondok ma roha ni halak. #Poda 11:10, 28:12 3Manang ise na * holong roha di hapistaran, palas roha ni amana; alai na mansuasaehon sinamotna do manang ise na rosu tu sibabijalang. #* Poda 10:1; Luk 15:13 4Raja pahothon gomgomanna marhite sian uhum hasintongan; alai anggo baoa sijalo sisip * mangago tanona. #* Jes 32:7 5Halak na palemeslemes pangkulingna tu donganna, manaon rambang di jolo ni patna ibana disi. 6Tarjorgong di bagasan hajahatonna sandiri do halak parjahat i, alai anggo halak partigor i marolopolop do jala marlas ni roha. 7Halak partigor maniroi parkaro ni halak na parir, alai anggo halak parjahat i ndang parduli di nasida. 8Halak pangarehe pagalakgalak bada, pola gor sada huta, alai anggo halak na pistar paombun rimas do. #Poda 11:11 9Molo maruhum halak na pistar dohot halak na oto, ia so * manggunjal martata do ibana, hape laos so marhasunan. #* Mat 11:17 10Halak sisopsop mudar mangkagigihon halak na daulat roha, alai anggo halak partigor, sai naeng nian pangolu hosana. 11Tung nasa piripirina diparuar halak na oto, alai anggo halak na pistar paombunombun rohana. #Poda 12:23, 14:33, 25:28 12Pangarajai na patangitangi hata gapgap: Saluhut parhaladona gabe parjahat sogot. 13Sai na pajumpang do halak na pogos dohot halak na paanakkon hepeng; Jahowa do patiur mata nasida be. #Poda 22:2 14Raja na mandabu uhum hasintongan tu angka na parir, pahot habangsana ro di salelenglelengna. #Poda 16:12, 20:28, 25:5 15Hotang dohot pangajaran mangalehon hapistaran, alai anggo dakdanak na pinasombu tarboan rohana, mambahen haurahon ni inana. #Poda 13:24, 17:25, 19:18, 22:15, 29:17 16Molo ganda halak parjahat, ganda dohot dosa; alai sanga do * paidaidaon ni halak partigor hariripurnasida. #* Ps 36:1-13, 37:1-40, 58:11 17Sai ajar ma anakmu, asa sonang ho bahenonna, jala lehononna angka silas ni roham. #Poda 23:13 18Molo soada panurirangon lumlam ma halak situan na torop, alai martua ma manang ise na mangaradoti patik ni Debata. 19Ndang tarajar hatoban anggo marhitehite hata sambing, ai diantusi do nian, hape ndang diihuthon. 20Molo * diida ho sada baoa na girgir mandok hatahatana, gumodang do sihirimon sogot sian halak na oto asa sian ibana. #* Poda 26:12; Pjm 5:1-2; Jak 1:19 21Manang ise na mambahen naposona marlompan, olat ni sidakdanahonna, lam naeng gabe anak ni tuan ibana di ujungna. 22Baoa parpiripiri pahehe parsalisian, jala halak parmurukmuruk do sigodang sala. #Poda 15:18, 26:21 23Roha haginjangon ni jolma pajimput ibana, alai anggo partondi na serep dapotan hamuliaon. #Poda 18:12; Mat 23:12; 1Ptr 5:5 24Manang ise na marbagi rap dohot panangko mangkagigihon dirina sambing, * dibege do nian torutoru i, hape ndang dipalumba. #* 3Mus 5:1 25Biar mida jolma mambahen jorgong, alai manang ise na marhaposan tu Jahowa gabe timbul sogot. 26Torop halak mangalului bohi ni pangarajai mambuat rohana, alai Jahowa do haroroan ni uhum na sintong tu ganup jolma. #Poda 19:6 27Marbiasbias do halak partigor mida halak pargeduk, marbiasbias huhut halak parjahat mida halak na tigor marpangalaho.
Currently Selected:
PODA SIAN RAJA SALOMO Bindu 29: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.