PANURIRANG JOEL Bindu 2
Bindu 2
Nunga lam jonok ari uhum godang i 1-11.
Tingting mandokkon paubahon roha 12-17.
Jadi marpangulahi ma roha ni Jahowa mida bangsona 18-27.
I. 1Palu hamu ma sarune di Sion, jala marsurak ma hamu di atas dolok habadiaonki! Angka hitir ma sude isi ni tano on, ai na ro ne ma * ari ni Jahowa, tung jonok na ma. #* Joel 1:15; Sep 1:14 2* Ari haholomon do i jala hagolapon, ari ombun na marhobot dohot ombun manorop; songon sibalik hunik manogotna i mangerbang songgop tu angka dolok, songon i ma ro ** sada bangso na timbul jala na tang, + ndang dung adong sisongon i sian na robi, tu joloan on pe ndang adong be jumpang songon i pola marsundutsundut. #* Am 5:18; ** Joel 1:6; + 2Mus 10:14 3* Api na manganhon di jolona, jala di pudina marjillamjillam; songon porlak Eden tano on di jolona alai anggo di pudina halongonan na hasang do, jala ndang adong na malua nanggo sada sian ibana. #* Joel 1:19 4Songon rumang ni angka hoda rumangna, jala songon halak parsihundul parinjakna. #Pgk 9:9 5Songon pardorom ni angka hureta di punsu ni angka dolok paringkatnasida, songon soara ni jilam ni api na manganhon durame, songon bangso na tang na gopas marsinjata tu hamusuon. 6Marsahit rian angka bangso maradophon ibana, marlangan be sude bohi ni jolma. #Nah 2:11 7Martahop nasida songon ulubalang na begu, songon halak parmusu dijangkiti nasida parik, jala masitondong dalanna be nasida, jala ndang mamedu nasida sian dalannasida i. 8Jala ndang masisosahan nasida, masitondong dalanna be nasida, marragean do nasida marhitehite hujur palait, laos so mansohot do marporang. 9Di bagasan huta nasida marmeang muli, marinjak di atas parik, angka bagas do dipanaek, bongot sian pandiloan songon panangko. 10Angka hitir do tano on maradophon nasida, humuntal angka langit, * mangkolom do mata ni ari dohot bulan, pola dohot angka bintang maniopi sondangna. #* Jes 13:10; Joel 3:4 11Jala dipangiar Jahowa do suarana manguluhon paranganna, ai tung * na torop situtu do paranganna; tung na gogo do ibana pasaut hatana i; tung + na bolon do ari ni Jahowa, jala na songkal sahali, tung ise ma manahan disi? #* Joel 2:25; + Jes 30:7
II. 12Alai nuaeng pe, ninna Jahowa: Sai * mulak ma hamu tu ahu sian nasa rohamuna mardongan parpuasaon, partangison dohot angguhangguk. #* Jer 4:1; Hes 33:14 13Jala rohamuna ma ribahi hamu, unang asal ulosmuna, sai mulak ma hamu tu Jahowa, Debatamuna i! Ai * pardengganbasa jala parasi roha do ibana, lambas do ibana tarrimas jala parasi roha godang, jala tibu marpangulahi rohana mida hamagoan i. #* 2Mus 34:6; Ps 51:19; Jona 4:2 14Ise umbotosa, * anggiat tung mulak ibana jala marpangulahi rohana, jala ditadingkon pasupasu sada sian pudina bahen pelean sipanganon dohot siinumon di Jahowa, Debatamuna i. #* 2Sam 12:22; Jona 3:9 15Palu hamu ma sarune di Sion! Parbadiai hamu ma sada parpuasaon, tingtingkon hamu ma ari raya sada! #Joel 1:14 16Paluhut hamu ma bangso i, parbadiai hamu ma luhutan i! Paluhut hamu ma angka sintua, papungu hamu ma angka dakdanak ro di angka posoposo na onsop manusu! Ruar ma pangoli sian bilutna dohot oroan i sian bilutna. 17Ingkon tumatangis ma di holangkolang ni emper dohot langgatan malim, angka parhalado ni Jahowa, dohononnasida ma: Sai marpangulahi ma roham, ale Jahowa, mida bangsom, jala unang pasahat bangso na niainmu gabe sialingon, gabe pambuatan hulingkulingan ni angka parbegu! Boasa ma tung mehet di tongatonga ni angka bangso; * didia do nuaeng Debatanasida i? #* Ps 42:11, 79:10, 115:2; Mik 7:10
III. 18Jadi mangiburu ma Jahowa humongkop tanona, jala marpangulahi rohana mida bangsona. 19Dung i ninna Jahowa ma mangalusi bangsona: Ida ma, tongosonku ma tu hamu eme dohot anggur dohot miak, asa butong hamu sian i; jala ndang be bahenonku hamu * marhaurahon di tongatonga ni angka bangso. #* Joel 2:26-27 20Jala * paholangonku do sian hamu sipangago i, jala onjaronku ibana tu tano na hasang dohot na tarulang; angka parjolona tu laut na tungkan habinsaran, jala angka na parpudi tu laut na tungkan hasundutan. Jadi manaek ma angirna, manaek dohot busukna, ala tenga pambahenna. #* Joel 1:4, 6 21Unang ma mabiar ho, ale tano, marolopolop ma ho jala marlas ni roha, ai timbul do pambahen ni Jahowa! 22Unang mabiar hamu, ale pinahan di ladang, ai martumbur muse angka jampalan di halongonan, jala marparbue angka hau i, lehonon ni hau antajau dohot anggur muse gogonasida. 23Antong marolopolop jala marlas ni roha ma hamu, ale angka anak ni Sion mida Jahowa, Debatamuna i! Ai ibana mangalehon tu hamu udan panaburon bahen pamintorion, jala * dipatuat tu hamu udan tipotipo, udan panaburon dohot udan gotilon patumonaan. #* 5Mus 11:14; Jer 5:24 24Jadi tambun ma eme di angka pardegean, jala binsat angka pangilangan sian anggur dohot miak. 25Jadi marsingkat ma tu hamu bahenonku angka taon panggagatan ni antatadu, * sihapor, tamponok dohot gulomit, paranganku na godang, angka na hupaborhat i dompak hamu. #* Joel 1:4 26Dung i datdatanmuna ma mangan jala butong, jala pujionmuna ma * goar ni Jahowa, Debatamuna i, na mambahen hamu marhasurungan, jala ndang be tarurak bangsongku salelenglelengna. #* 5Mus 8:10 27Tandaonmuna ma disi, paboa ahu di tongatonga ni Israel, jala ahu Jahowa, Debatamuna i, jala ndang adong dungkon ni ahu; jala ndang be tarurak bangsongku ro di salelenglelengna.
Batak Toba Bible Revised Edition © Indonesian Bible Society, 1998.