JOB Bindu 16
Bindu 16
Sulam ni si Job parjolo:
Disarita si Job angka alealena ala so marpangkaehe hatanasida 1-5.
Diandungkon pardangolanna 6-17.
Ndang marpipot ibana didok 18-22.
I. 1Dung i ninna si Job ma mangalusi: 2Nunga godang pangkataion sisongon i hubege, angka pangapul sipaganda hinamago do hamu sude. #Job 13:4, 15:11 3Sadihari pe marujung angka hobar angin? Aha ulaning pasugal roham umbahen sai datdatanmu maralus? #Job 15:2 4Ahu pe, tarbahen ahu do marhatahata songon hamu, tung sura ditaon hamu songon na hutaon on; sai datdatanku mangalage hatahata mangalo hamu, jala * paseolseolonku ulungku mida hamu. #* 2Raj 19:21; Ps 22:8 5Tongon tahe papironhu ma tondimuna marhitehite hata ni pamanganku, jala apulapul ni bibirhu pasohothon parniahapanmuna.
II. 6Molo marhata i ahu, ndang tagamon mansohot parniahapanku; molo hohom ahu, ndang tagamon tu oruna. 7Tutu anggo nuaeng, nunga suda gogongku dibahen Ibana, nunga tung ripur angka isi ni bagashu dibahen Ho. #Hos 6:1; Am 1:11 8Nunga tung disoro Ho ahu, gabe sitindangi do i dompak ahu, jala nunga hehe niangku mangalo ahu, jala mangalualuhon ahu adop bohi be. #Job 10:17; Jer 51:34 9Rimasna marsurage dohot mangalo ahu, * patungoripon Ibana dompak ahu, alongku patajom pamerengna dompak ahu. #Job 13:24; * Ps 35:16, 112:10 10Dipangangang * nasida pamanganna be dompak ahu, dipastapi nasida hurumhu marhite sian hata reherehe, + marsitampak nasida mangalo ahu. #* Ps 22:8; And 3:46; + Mik 5:1 11Nunga dipasahat Debata ahu tu halak pargeduk, jala nunga ditinggangkon ahu tu bagasan tangan ni halak parjahat. 12Marsonangsonang ahu nian, gabe Ibana manggopui ahu, disoro do tangkuhukku jala digosagosa ahu, jala dipajongjong ahu bahen * panonjolanna. #* And 3:12 13Marngeos angka sumbiana humaliang ahu, dibola Ibana piangku so moralangalang, jala diusehon pogungku tu tano. #Job 6:4 14Mardapotdapot angka bugangku dibahen, didorong do ahu songon pandorong ni ulubalang na begu. 15Nunga hualithon * abit takki tu hulingkuling ni dagingku, jala nunga huguluhon ulungku tu bagasan orbuk. #Job 30:19; * 1Mus 37:34; 1Raj 21:27 16Marbosol do bohingku binahen ni partangison, jala ampe tu langkop ni matangku linggoman ni hamatean. #Job 15:12 17Atik pe so adong lohot * pangarupaon di tanganku, jala tongtong pita tangiangku. #* 1Kron 12:17
III. 18Sai unang ma dionsop tano i mudarhu, jala unang jumpangan pangulonan angguhanggukki. #1Mus 4:10; Ps 116:15 19Gari nuaeng, ida ma, di bagasan surgo i do Sitindangingku, jala Pangondianku do di * angka banua ginjang. #* Jes 33:5 20Manginsahi pe angka alealengku mida ahu, dumarede do iluilu ni matangku marpangatauan tu Debata. #And 3:14 21Asa ditolai mangondihon baoa i moradophon Debata, jala dipintori anak ni jolma maralohon alealena. 22Ai otik na ma bilangan ni angka taonhu, jonok na ma ajalhu, bolusonku ma * dalan na so haulahan do. #* Job 10:21
Currently Selected:
JOB Bindu 16: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.