JOHANNES Bindu 17
Bindu 17
Tangiang ni Tuhan Jesus:
Taringot tu Ibana 1-5.
Mangondingi siseanna 6-19.
Mangondihon angka na porsea di Ibana 20-26.
I. 1I ma didok Jesus; dung i manaili ma Ibana dompak ginjang mandok: Ale Amang, nunga dapot tingkina: Parsangapi ma Anakmu, asa dipasangap Anakmi Ho! 2Songon naung nilehonmi tu Ibana huaso mangarajai nasa daging, asa dilehon hangoluan na salelenglelengna tu saluhut jolma na nilehonmi tu Ibana. #Mat 11:27 3Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna. #1Joh 5:20 4Nunga hupasangap Ho di tano on, ai nunga hupasidung ulaon na nilehonmi siulaonku. 5Nuaeng pe, parsangapi ma Ahu tu lambungmi, Amang, songon sangaphu tagan di lambungmi Ahu, andorang so adong dope hasiangan on. #Joh 1:1, 17:24; Plp 2:6
II. 6Nunga hupapatar Goarmi tu jolma angka na nilehonmi tu Ahu sian portibi on. Ho hian do nampuna nasida, jala dilehon Ho do nasida tu Ahu; diradoti nasida do hatami. #Joh 17:9 7Nunga diboto nasida, na sian Ho do saluhutna na nilehonmi tu Ahu. 8Ai nunga hupasahat tu nasida angka hata na nilehonmi tu Ahu jadi dijangkon nasida do, gabe diboto nasida situtu, Ahu borhat sian Ho, jala nunga porsea nasida, Ho do marsuru Ahu. #Joh 16:30 9Ndang apala portibi on hutangiangkon, nasida on do, angka na nilehonmi tu Ahu, ai Ho do nampuna nasida. #Joh 6:37, 44 10Jala nasa na di Ahu, na di Ho do i; jala na di Ho, na di Ahu do i, jala nunga marsangap Ahu di bagasan nasida. #Joh 16:15 11Ndang di portibi on be Ahu tu joloan on, di portibi on do anggo nasida; na ro do Ahu manopot Ho. Ale Amang na badia, ramoti ma nasida di bagasan Goarmu, angka na nilehonmi tu Ahu, asa sada nasida songon Hita! #Joh 10:30 12Saleleng rap Ahu dohot nasida, Ahu do mangaramoti nasida di bagasan Goarmu na nilehonmi tu Ahu jala hujagai; gabe ndang adong na mago sian nasida, ia so holan anak jea i, asa jumpang hata ni Surat i. #Ps 41:10, 109:8; Joh 6:39 13Alai na ro ma Ahu nuaeng manopot Ho; di portibi on dope Ahu, di na hudok songon i, asa di bagasan nasida rimpas halalas ni roha na di Ahu i. #Joh 15:11 14Nunga hulehon hatami tu nasida; dihosomi portibi on do nasida, ai ndang sian portibi on nasida, songon Ahu na so sian portibi on. #Joh 15:19 15Ndang apala hupangido, taitonmu nasida sian portibi on; alai naeng ma ramotanmu nasida maralohon na jahat i. #2Tes 3:3 16Ndang na sian portibi on nasida, songon Ahu na so sian portibi on. 17Parbadiai ma nasida di bagasan hasintongan; hatami do hasintongan i. #Joh 6:33 18Songon parsurum di Ahu tu portibi on, songon i do husuru nasida tu portibi on. #Joh 20:21 19Huparbadiai do diringku humongkop nasida, asa gabe badia nang nasida binahen ni hasintongan i. #Heb 10:10
III. 20Alai ndang holan nasida hutangiangkon, dohot do angka na naeng porsea dope di Ahu, tinogu ni hatanasida: #Joh 20:31 21Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu. #Gal 3:28 22Nunga hulehon tu nasida hasangapon na nilehonmi tu Ahu, asa sada nasida songon Hita na sada roha i. #Ul 4:32 23Ahu ma di bagasan nasida jala Ho di bagasan Ahu, asa sun denggan hasadaonnasida, gabe diboto portibi on, Ho marsuru Ahu jala holong roham di nasida songon holong ni roham di Ahu. #1Kor 6:17 24Ale Amang, naeng ma di rohangku, ia disi Ahu, disi ma dohot angka na nilehonmi tu Ahu, asa diida nasida hasangapon na di Ahu, na nilehonmi tu Ahu; ai holong do roham di Ahu, jumolo asa ojak portibi on. #Joh 12:26 25Ale Amang na bonar: So ditanda portibi on pe Ho, anggo Ahu, hutanda do Ho, jala diboto angka on, Ho do marsuru Ahu. 26Nunga hupabotohon tu nasida Goarmi, jala pabotohononku dope, asa di bagasan nasida holong ni rohami na di Ahu, jala asa Ahu di bagasan nasida.
Currently Selected:
JOHANNES Bindu 17: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.