JOHANNES Bindu 16
Bindu 16
Dilumbahon Tuhan Jesus haroro ni pangaleleon 1-7.
Ulaon ni Tondi Parbadia di portibi on 8-15.
Pangapoi ni Tuhan Jesus di siseanna 16-33.
I. 1Asa unang targasip hamu, umbahen na huhatahon angka hata ondeng tu hamu. #Joh 14:29 2Pabalionnasida do hamu sian huria. Na ro ma tingkina, gabe songon na mamele Debata do na mamusa hamu, anggo di rohana. #Mat 10:17, 24:9 3Songon i do bahenonnasida, ala so ditanda nasida nang Ama i, nang Ahu. #Joh 15:21 4Alai hupaboa i hian tu hamu, asa diingot hamu di hasosonggopna i, naung huhatahon i tu hamu. Ai ndada sian mulana hupaboa i tu hamu, ala na rap dope hita. 5Alai na laho ma Ahu nuaeng manopot na marsuru Ahu, jala ndang adong manang ise hamu manungkun Ahu: Na laho tudia do Ho? #Joh 7:33 6Lam dokdok tahe rohamuna, ala hudok songon i tu hamu. 7Alai na mandok na tutu do Ahu tu hamu: Ulimuna do i, ia laho Ahu. Ai aut so laho Ahu, ndang na ro Pangondian i manopot hamu. Alai anggo laho Ahu, suruonku do Ibana tu hamu. #Joh 14:16, 26
II. 8Anggo dung ro Ibana, ajaranna do portibi on taringot tu dosa dohot taringot tu hapintoron dohot taringot tu uhum. #1Kor 14:24 9Anggo taringot tu dosa, i ma na so porsea nasida di Ahu. #Joh 3:18 10Anggo taringot tu hapintoron, i ma na laho Ahu manopot Damang, jadi ndang be idaonmuna Ahu. #Ul 5:31; Rom 4:25 11Anggo taringot tu uhum, i ma naung hona uhum induk ni portibi on. #Joh 12:31, 14:30 12Godang dope nian sidohononku tu hamu; alai ndang tarboan hamu dope i nuaeng. #1Kor 3:1 13Alai dung ro Tondi hasintongan na nidok ondeng, togihonon ni I do hamu tubagasan nasa hasintongan: Ai ndang adong sihatahononna sian sandirianna; na binegena, i do hatahononna baritahononna do tu hamu, na naeng masa dope. #Joh 14:26; 1Joh 2:27 14Pasangaponna do Ahu, ai jaloonna do na di Ahu, laho mamaritahonsa tu hamu. 15Saluhut na di Ama i, di Ahu do i, umbahen na hudok: Jaloonna do na di Ahu, laho mamaritahonsa tu hamu. #Joh 17:10
III. 16Satongkin nari nama, ndang idaonmuna be Ahu, dung i satongkin nari muse, idaonmuna ma Ahu. #Joh 14:19 17Gabe masipandohan ma angka siseanna i: Dia do astuan ni na nidokna i tu hita satongkin nari nama, ndang idaonmuna be Ahu; dung i: Satongkin nari muse idaonmuna ma Ahu? 18Jadi didok nasida ma: Dia do astuan ni hata: “Satongkin nari”? Ndang taboto lapatanna. 19Mamoto ma Jesus, na naeng ro nasida manungkun Ibana, gabe didok ma tu nasida: Na masisungkunan do hamu taringot tu na hudok: Satongkin nari nama, ndang idaonmu be Ahu, dung i: Satongkin nari muse, idaonmuna ma Ahu? 20Na tutu situtu do na hudok on tu hamu: Na tumatangis ma hamu jala mangandungi, alai las ma roha ni portibi on; marsak do anggo rohamuna, alai muba ma arsak ni rohamuna gabe las ni roha. 21Dokdok do roha ni boruboru laho manubuhon posoposona, ai naung songgop hasasangana. Alai dung tubu posoposo i, ndang be diingot na porsuk i, dibahen halalas ni rohana, ala naung tubu jolma i tu hasiangan on. #Jes 26:17 22Di hamu pe nuaeng dok ni roha; alai idaonku do hamu muse, gabe las ma rohamuna disi, jala ndang buaton sian hamu halalas ni rohamuna i. 23Ndang sungkunonmuna be Ahu di na sadari i. Na tutu situtu do na hudok on tu hamu: Nasa sipangidoonmuna tu Ama i, sai na lehononna do marhitehite Goarhu. #Mrk 11:24; Joh 14:13-14 24Rasirasa nuaeng ndang dope mangido hamu marhitehite Goarhu. Pangido hamu ma, asa manjalo hamu, asa gok halalas ni rohamuna! #Joh 15:11 25Na marumpama do Ahu nasailaon mangkatai dohot hamu; alai ndang marumpama be Ahu di tingki na ro i, ai disi ma patar baritahononku tu hamu taringot tu Ama i. 26Di na sadari i ma hamu mangido marhitehite Goarhu, jala ndang pola Ahu mangondihon hamu tu Ama i. 27Ai Ama i sandiri mangkaholongi hamu, ala naung holong rohamuna di Ahu, jala ala naung porsea hamu, Ahu borhat sian Debata. #Joh 14:21 28Na borhat sian Ama i do Ahu ro tu portibi on; na manadingkon nama Ahu muse di portibi on, laho manopot Ama i. 29Gabe didok angka siseanna i ma: Nuaeng pe, asa patar hatam; ndang songon umpama be na nidokmi. #Joh 16:25 30Huboto hami do nuaeng, saluhutna do diboto Ho, ndengkon adong na manungkun Ho. Dibahen i ma umbahen na porsea hami, naung borhat sian Debata do Ho. 31Jala dialusi Jesus ma nasida: Porsea ma hamu nuaeng? 32Na ro ma tingkina, jala nunga ro i nuaeng, jadi marserak ma hamu, ganup masitondong dalanna, tadingkononmuna ma Ahu punjung; alai ndang punjung Ahu tahe, ai Ama i do donganku. #Sak 13:7; Mat 26:31; Joh 8:29 33Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on. #Joh 14:27; Rom 5:1; 1Joh 5:4
Currently Selected:
JOHANNES Bindu 16: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.