PANURIRANG HOSEA Bindu 2
Bindu 2
Morpangulahi roha ni Debata tu nasida 1-2.
Udutna pajojorhon roha parbalihon ni Israel ro di torutoru na mangonai tu nasida alani 3-15.
Padan parasian na imbaru i 16-25.
I. 1Alai anggo bilangan ni halak Israel sogot * sobokkon horsik ni laut do godangna na so hasuhatan jala na so habilangan, jala di hajongjongan + pandohonan tu nasida: Ndang bangsongku hamu, dohonon ma sogot tu nasida: Angka anak ni Debata na mangolu i do hamu. #* 1Mus 22:17, 32:12; + Rom 9:26; 1Ptr 2:10 2Dung i marpungu ma sogot halak Juda rap dohot halak Israel, jala pabangkitonnasida ma sahalak bahen ihutannasida, jala borhat nasida sian tano i; ai timbul do ari ni si Jesreel sogot. #Jes 11:11-13; Jer 3:18, 30:9; Hes 37:22
II. 3Paboa hamu ma tu hahaanggimuna: * Bangsongku! Dohot tu ibotomuna: + Hinasianan. #* Hos 1:9; + Hos 1:6 4Sai badai hamu ma inamuna! Ai ndang ibana jolmangku, ahu pe ndang harajaanna, asa diuras bohina, paholang parmainanonna dohot pangalangkuponna sian holangkolang ni bagotna. #Jer 3:1; Hes 16:23 5Asa unang hupasalang ibana, gabe marsaemara jala hupatindang ibana, songon di ari hatutubuna, jala hubahen ibana sobokkon halongonan jala hubahen ibana songon tano hasang jala hubunu ibana sogot binahen ni uas. 6Jala ndang asianku angka anakna i, ala anak ni sibabijalang nasida. 7Ai boruboru sibabijalang do inanasida i, jala mambahen haurahon do na tumubuhon nasida, ai tung didok do: Laho ma ahu * mangihuthon puangku, angka na mangalehon tu ahu roti dohot aek dohot hapas dohot hori dohot miak dohot tuak na tonggi siinumonku. #* Jer 44:7 8Dibahen i ida ma runggaonku ma dalanmu dohot suga, jala bahenonku sada parik, asa unang be jumpangsa angka dalanna i. 9Eahanna pe angka puangna, hape ndang dapotsa nasida, jala luluanna nasida hape ndang jumpangsa. Jadi dohononna ma: Antong mulak nama ahu tu sinondukku parjolo i, ai sumonang do ahu uju i sian nuaeng. 10Alai ndang ditanda rohana, ahu hian do nasailaon mangalehon tu ibana eme dohot tuak dohot miak; jala ahu do pagodang di ibana perak dohot sere, pinaulinasida * jumadihon Baal. #* Hes 16:16 11Dibahen i ulahanku ma mambuat emengku di tingkina dohot tuakku di tingkina jala rampasonku ma hapashu dohot horingku bahen pangkuphupi ni parsaemaraonna hian nian. 12On pe, * pasalangonku ma hailaanna di adopan ni angka puangna, jala ndang adong manang ise baoa + na tuk palua ibana sian tanganku. #* Jer 13:22, 26; + Hos 5:14 13Dung i pasadionku ma sandok las ni rohana, ari rayana, poltak ni bulanna ro di ari Sabbat dohot saluhut arina marulaon godang. #Am 8:10 14Jala tarulang bahenonku hau anggurna dohot antajauna, ala na nidokna i taringot tusi: I do upangku, na nilehon ni angka puangku tu ahu; jala bahenonku do i gabe tombak, jadi suda ma angka i gagaton ni binatang di ladang. #Ps 80:13; Jes 5:5 15Jala luluhononku ma tu nasida ariari ni Baal, uju manutung daupa nasida tusi, jala dipajagar angka tintinna dohot horungkorungna laho mangihuthon tu angka puangna, alai lupa do nasida anggo di ahu, ninna Jahowa.
III. 16Dibahen i, ida ma, elaonku ma nasida jala togihononku tu * halongonan, jala dohononku ma + hata apulapul tu rohana. #* Hes 20:35; + Jes 40:2 17Lehononku ma olat ni tu ibana porlak anggurna dohot * rura Akor bahen bohal ni pangkirimon; jadi marende taripar ma nasida disi, songon + uju di angka ari ni haposoonna, songon uju di ari haruruarna sian tano Misir. #* Jos 7:24-26; + 2Mus 15:1 18Di ari na sasada i, ninna Jahowa; goaronmu ma ahu: Tuanlaengku! Jala ndang be goaronmu ahu: Baal-hu! 19Ai paholangonku ma goargoar ni angka Baal i sian pamanganna, jala ndang be taringotan ni halak angka goarnasida. 20Jala bahenonku ma di ari na sasada i padan pardengganan di nasida tu binatang di ladang dohot tu pidong angka na martongatonga langit dohot tu gulokgulok di tano on; ponggolhononku ma sior dohot podang ro di hamusuon sian tano on, asa marsonangsonang nasida maringanan hubahen. #Job 5:23; Jes 11:6; Hes 34:25 21Jadi oliongku ma ho bahen jolmangku salelenglelengna; oliongku ma ho marhitehite hatigoran dohot uhum dohot asi ni roha dohot angka habasaon ni roha. #Hes 16:8; Pgk 19:7 22Jala oliongku ma ho di ahu * marhitehite haporseaon, gabe + tandaonmu ma Jahowa. #* Ps 146:6; + Jer 31:34 23Di ari na sasada i maralus ma ahu, ninna Jahowa alusanku ma langit, jala alusan ni langit i tano on. #Sak 8:12 24Jala alusan ni tano i ma eme dohot tuak dohot miak jala alusannasida ma si Jesreel. #Hos 1:4 25Dung i saburhononku ma nasida di ahu di tano i jala asianku ma * Nai Sohinasian, jala dohononku ma tu + Lo Ami: Bangsongku do ho! Jala dohononna ma: Ale Debatangku! #* Hos 1:6; + Hos 1:9, 2:1; Rom 9:25; 1Ptr 2:10
Batak Toba Bible Revised Edition © Indonesian Bible Society, 1998.