PANURIRANG HOSEA Bindu 1
Bindu 1
Habobolong ni Israel ala roha panundalionna, pinatudos ni parjolmaon ni si Hosea di boruboru parmainan ro di tubuna i 1-9.
1On ma hata ni Jahowa na ro tu si Hosea, anak ni si Beeri di angka ari ni * si Usia, si Jotam, si Ahas dohot si Hiskia, angka raja di Juda; dohot di angka ari ni + si Jerobeam, anak ni si Joas, raja di Israel. #* Jes 1:1; + 2Raj 14:23; Am 1:1 2Mula ni hata ni Jahowa marhitehite si Hosea: ninna Jahowa ma tu si Hosea: Laho ma ho, buat ma sada * boruboru sibabijalang dohot angka tubu ni sibabijalang! Ai sai didatdati + isi ni tano i do marmainan, marbalik sian Jahowa. #* Hos 3:1; + Jer 3:1; Hes 23:3 3Jadi laho ma ibana, jala dibuat ma si Gomer, boru ni si Diblaim, gabegabean ma nasida jala ditubuhon di ibana sada anak. 4Dung i didok Jahowa ma tu ibana: Jou ma goarna si Jesreel; ai otik nari marlulu ma ahu di angka utang mudar ni si Jesreel tu * pinompar ni si Jehu, jala ahu pasiaphon harajaon ni pinompar ni Israel. #* 2Raj 10:30, 15:12 5Jadi di ari na sasada i ponggolhononku ma sior ni Israel di rura Jesreel. 6Dung i gabegabean muse ma boruboru i, jala ditubuhon sada boru. Dung i didok Jahowa ma tu ibana: Jou ma goarna Nai Sohinasian; * ai ndang be marpangulahi rohangku tu pinompar ni Israel, manang marpamuati rohangku tu nasida. #* Hos 2:3, 25 7Alai marpangulahi ma rohangku anggo tu pinompar ni Juda jala * paluaonku nasida marhitehite Jahowa, Debatanasida i; alai ndang paluaonku marhitehite sior manang podang manang hamusuon, manang hoda manang jolma parsihundul pe. #* 2Raj 19:34 8Jadi dung sirang susu Nai Sohinasian, gabegabean muse ma boruboru i, jala ditubuhon sada anak. 9Jadi ninna Jahowa ma: Jou ma goarna Lo Ami, ai ndang * bangsongku hamu, jala ndang hamu nampuna ahu. #* Hos 2:3, 25
Batak Toba Bible Revised Edition © Indonesian Bible Society, 1998.