PANURIRANG HOSEA Bindu 14
Bindu 14
Tingting mandokkon paubahon roha 1-4.
Bagabaga asi ni roha tu angka na unduk marroha 5-10.
I. 1Ingkon tarjepol Samaria sogot, ala manggunturi dompak Debatana. Marragean ma nasida bahenon ni podang, * rosahanna do posoposonasida, jala lapaanna do angka boruboru na marhangoluan. #* 2Raj 15:16 2Sai * mulak ma ho, ale Israel, tu Jahowa, Debatam! Ala naung tarrobung ho di bagasan hajahatonmu. #* Hes 18:32; Hos 12:7; Sak 1:4 3Angka hata i ma parateatehon hamu, laho mulak tu Jahowa, dok hamu ma tu ibana: Sai marpamuati ma roham mida hajahatonnami sudena! Sai jalo ma na denggan on asa * hugararhon hami angka jonggi ni bibirnami bahen pelean tu ho. #* Ps 116:14; Jes 57:19; Heb 13:15 4Ndang be anggo Assur manolongi hami, ndang be marsihundul di hoda hami! Ndang be dohononnami tu jadijadian ni tangannami: Ale debatanami! Marhitehite ho nama jumpangan asi ni roha anak na sopot so marama.
II. 5Pamalumonku ma panundalionnasida, girgir ma ahu mangkaholongi nasida, ai nunga mombun rimashu maradophon nasida. 6Sobokkon nambur ma ahu di Israel, marbunga ma nasida songon bunga pansur, jala manjarar angka uratna, songon Libanon. 7Marjurampak ma angka tumburna, jala * songon hau jetun hamuliaonna, jala + uapna songon Libanon! #* Ps 52:10; + Ende 4:11 8Ulahon ni halak angka na maringan di parlinggomanna ma pangoluhon eme, jala marbunga nasida songon hau anggur baritana pe songon anggur ni Libanon. 9Ale Epraim, tung tudihangku dope angka ganaganaan? Ahu do mangalusi dohot manatap ho; ahu do songon hariara na rugun, ahu do haroroan ni parbuem. 10Ise do na pistar asa diparateatehon saluhutna i? Ise do na marroha, asa tandaonna i? Ai tigor do angka dalan ni Jahowa, jala halak partigor mardalani disi; alai anggo halak parjahat tarsulandit do disi. #Ps 25:10, 107:43; Poda 10:29; Dan 12:10; 2Kor 2:16
Batak Toba Bible Revised Edition © Indonesian Bible Society, 1998.