1 TIMOTEUS Bindu 3
Bindu 3
Taringot tu tohonan sintua dohot parhobas 1-13.
Pamusatan ni barita na uli 14-16.
I. 1Hata haposan do on: Ulaon na denggan do pinangido ni na mangalului hasintuaon. #Ul 20:28 2Dibahen i, unang ma adong dapot sisurahan di sintua: Harajaan ni sada boruboru ma ibana, marpangontik, marroha, marhapantunon, na las roha martamue, na malo mangajari. #Tit 1:6-7 3Unang ma sisobur tuak, unang pangalinsingi; alai na lambok, pardame jala si impolan di perak. 4Na malo mangarajai donganna sabagas, paranakkon sioloi ajar mardongan sandok hahormaton. #1Sam 2:12 5Ai molo so diboto mangarajai isi ni bagasna, tung songon dia ma paturetureonna huria ni Debata? 6Unang ma halak na imbaru masuk, unang gabe ginjang rohana; jala madabu maon tubagasan uhum ni sibolis i. 7Ingkon denggan do baritana di halak na di balian, asa unang ibana madabu tubagasan panginsahion dohot sambil ni sibolis i. #1Kor 5:12-13; 1Tim 5:10 8Songon i do nang angka parhobas: Ingkon na toman do, unang mardua hata, unang sisobur tuak, unang parpangomo sian dalan na so tama; #Ul 6:3; Plp 1:1 9angka na umpeop hahomion ni haporseaon i di bagasan roha na ias. 10Alai siunjunan jumolo nang nasida; dung pe i, asa jaloonnasida ulaon i, anggo so hasurahan. 11Songon i ma angka parompuan: Toman, unang sihatahatai donganna; parpangontik, haposan di saluhut. #Tit 2:3 12Ia parhobas i, ingkon harajaan ni sada boruboru, angka na umboto manguluhon anakkonna dohot bagasna be. #1Tim 3:2 13Ai ia dung ture parhobasonnasida, naek situtu ma nasida, jala marhiras ni roha godang marhaporseaon di Kristus Jesus.
II. 14Husurathon angka i tu ho, huhut mangkirim, tibu ahu ro manopot ho. 15Alai molo tung gumele ahu, naeng botoonmu, na patut parangehononmu di bagas ni Debata, i ma huria ni Debata na mangolu i! #Eps 2:19-22; 2Tim 2:20 16Tiang jala tungkol ni hasintongan i jala tandap balga ni hahomion ni hadaulaton i: Nunga gabe patar Ibana mardaging, dipintori di bagasan Tondi, tarida di angka surusuruan, binaritahon tu angka parbegu, hinaporseaan di portibi on jala tarhinsat di bagasan hasangapon! #Mrk 16:19; Joh 1:14, 16:10; Rom 1:4
Currently Selected:
1 TIMOTEUS Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.