1 KORINT Bindu 10
Bindu 10
Jorbut ni pardebataon na leban 1-13.
Parsaoran dohot Kristus do siluluan 14-22.
Unang gabe partuktuhan hita di dongan! 23-33.
I. 1Ai naeng ma tangkas botoonmuna di rohangku, ale angka dongan: Ia angka amanta najolo, saluhut do nian nilinggoman ni ombun i, jala saluhut do nasida mamostang laut i. #2Mus 13:21, 14:22 2Jadi saluhut do nasida tardidi tubagasan si Musa, di bagasan ombun i dohot di laut i. 3Jala sada do sipanganon partondion dipangan nasida saluhutna. #2Mus 16:4, 35; 5Mus 8:3 4Laos sada do siinumon partondion diinum nasida saluhutna, ai diinum nasida do sian dolok batu partondion na mangihut i (Kristus do dolok batu i). #2Mus 17:6 5Alai toropan do nasida ndang dihalomohon Debata: Ai rage do nasida di halongonan i. #4Mus 14:23, 30 6Alai gabe tudosan panjoraan ma i tu hita, asa unang tahahisaphon na roa, songon nasida na marhisap i. #4Mus 11:4, 34 7Jala unang ma sioloi debata na leban hamu, songon na deba sian nasida, suman tu na tarsurat i: “Hundul do bangso i mangan dohot minum, dung i hehe ma nasida manortor.” #2Mus 32:6 8Unang ma hita marmainan, songon na deba sian nasida na marmainan i, gabe mate satongkin duapulutolu ribu di na sadari i. #4Mus 25:1, 9 9Unang taunjuni Tuhan i, songon deba sian nasida na mangunjuni i, gabe angka ulok i mangagohon nasida. #4Mus 21:5-6 10Unang ma hamu marungutungut, songon deba nasida na marungutungut i, gabe diago pangago i nasida. #4Mus 14:2, 36; Heb 3:11, 17 11Tudutudu do i na mangonai tu nasida; lumbalumba tu hita do i, umbahen na tarsurat, ai tu hita do jumonok ajal ni angka ari. #1Ptr 4:7 12Onpe, ganup na jongjong di rohana, dimatahon ma, unang tinggang! 13Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna; Ibana na parohon pangunjunan i, laos Ibana do mambahen hapateanna, asa tartaon hamu.
II. 14Dibahen i, ale angka haholongan, maporus ma hamu pasiding parsombaon tu angka begu! #1Joh 5:21 15Tu angka parroha do hatangku. Hamu ma manimbangi na hudok. 16Siinumon pasupasu i, na tahamauliatehon, nda parsaoran ni mudar ni Kristus do i? Roti na taponggoli i, nda parsaoran ni daging ni Kristus do i? #Mat 26:27; Ul 2:42 17Ala sada do roti i, gabe sadaging do hita torop, ai saluhut do hita partohap di roti na sasada i. #Rom 12:5; 1Kor 12:27 18Bereng hamu ma Israel hian: Nda partohap di langgatan i do angka na manganhon pelean i? #3Mus 7:6, 15 19Naung arga do juhut na pinelehon manang margogo do begu; i do na hudok disi? 20Nda on do tahe: Na pinelehonnasida, ndada tu Debata dipelehon, tu begu i do. Alai ndang lomo rohangku, hamu saor tu angka begu! #3Mus 17:7; 5Mus 32:17 21Ndang tarinum hamu sian panginuman ni Tuhan i huhut sian panginuman ni angka begu! Ndang tarbahen hamu partohap di langgatan ni Tuhan i huhut di langgatan ni angka begu! #2Kor 6:15-16 22Toisanta ma Tuhan i? Tung gumogo ma hita sian Ibana?
III. 23Saluhutna jadi do, alai ndang saluhut marguna; saluhutna jadi do, alai ndang saluhut patoguhon. #1Kor 6:12 24Unang ma masiringkoti na di ibana, na di dongan i ma! #Rom 15:2; 1Kor 10:33 25Pangan hamu ma sian saluhut na ginadis di parjagalan i, unang nirisihan, ala ni panggora ni roha i! #Rom 14:2-10, 22 26Ai: “Gok di Tuhan i do tano on ro di isina!” #Ps 24:1 27Anggo dipio na so porsea (na so Kristen) hamu jala dioloi hamu laho, pangan hamu ma sian saluhut na pinatedekna tu jolomuna; unang nirisihan, ala ni panggora ni roha i! 28Alai molo tung adong na mandok tu hamu: Juhut na pinelehon do on; unang pangan hamu sian i, ala ni halak i na paboahonsa dohot ala ni panggora ni roha i! #1Kor 8:7 29Alai ndada panggora ni roha na di ho na hudok disi, na di dongan i do; ai tung hahuaon ni panggora ni roha ni halak ma ahu, naung marhaluaon i! 30Ai molo mauliate rohangku manjangkonsa, aha ma pola insahan ahu, ala ni naung huhamauliatehon i! #1Tim 4:4 31Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata! #Kol 3:17 32Unang bahen hamu partuktuhan di Jahudi, manang di halak Junani, manang di huria ni Debata pe! #Rom 14:13 33Songon ahu on: Hubuat do roha ni saluhut di na sasude, ai ndang hulului na marguna di ahu, na marguna di na torop i do, anggiat malua nasida. #1Kor 9:20-22
Currently Selected:
1 KORINT Bindu 10: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.