സങ്കീർത്തനങ്ങൾ 58

സംഗീതപ്രമാണിക്ക്; നശിപ്പിക്കരുതേ എന്ന രാഗത്തിൽ; ദാവീദിന്റെ ഒരു സ്വർണഗീതം.

1ദേവന്മാരേ, നിങ്ങൾ വാസ്തവമായി നീതി പ്രസ്താവിക്കുന്നുവോ?

മനുഷ്യപുത്രന്മാരേ, നിങ്ങൾ പരമാർഥമായി വിധിക്കുന്നുവോ?

2നിങ്ങൾ ഹൃദയത്തിൽ ദുഷ്ടത പ്രവർത്തിക്കുന്നു;

ഭൂമിയിൽ നിങ്ങളുടെ കൈകളുടെ നിഷ്ഠുരത തൂക്കിക്കൊടുക്കുന്നു.

3ദുഷ്ടന്മാർ ഗർഭംമുതൽ ഭ്രഷ്ടന്മാരായിരിക്കുന്നു;

അവർ ജനനംമുതൽ ഭോഷ്കു പറഞ്ഞു തെറ്റിനടക്കുന്നു.

4അവരുടെ വിഷം സർപ്പവിഷംപോലെ;

അവർ ചെവിയടഞ്ഞ പൊട്ടയണലിപോലെയാകുന്നു.

5എത്ര സാമർഥ്യത്തോടെ മന്ത്രം ചൊല്ലിയാലും

മന്ത്രവാദികളുടെ വാക്ക് അതു കേൾക്കയില്ല.

6ദൈവമേ, അവരുടെ വായിലെ പല്ലുകളെ തകർക്കേണമേ;

യഹോവേ, ബാലസിംഹങ്ങളുടെ അണപ്പല്ലുകളെ തകർത്തുകളയേണമേ.

7ഒഴുകിപ്പോകുന്ന വെള്ളംപോലെ അവർ ഉരുകിപ്പോകട്ടെ.

അവൻ തന്റെ അമ്പുകളെ തൊടുക്കുമ്പോൾ

അവ ഒടിഞ്ഞുപോയതുപോലെ ആകട്ടെ.

8അലിഞ്ഞു പൊയ്പോകുന്ന അച്ചുപോലെ അവർ ആകട്ടെ;

ഗർഭം അലസിപ്പോയ സ്ത്രീയുടെ പ്രജപോലെ അവർ സൂര്യനെ കാണാതിരിക്കട്ടെ.

9നിങ്ങളുടെ കലങ്ങൾക്കു മുൾതീ തട്ടും മുമ്പേ

പച്ചയും വെന്തതുമെല്ലാം ഒരുപോലെ

അവൻ ചുഴലിക്കാറ്റിനാൽ പാറ്റിക്കളയും.

10നീതിമാൻ പ്രതിക്രിയ കണ്ട് ആനന്ദിക്കും;

അവൻ തന്റെ കാലുകളെ ദുഷ്ടന്മാരുടെ രക്തത്തിൽ കഴുകും.

11ആകയാൽ: നീതിമാന് പ്രതിഫലം ഉണ്ട് നിശ്ചയം;

ഭൂമിയിൽ ന്യായം വിധിക്കുന്ന ഒരു ദൈവം ഉണ്ട് നിശ്ചയം എന്നു മനുഷ്യർ പറയും.

Currently Selected:

സങ്കീർത്തനങ്ങൾ 58: MALOVBSI

Highlight

Copy

Popular Bible Verses from
സങ്കീർത്തനങ്ങൾ 58