Noo-deh:⧾ 19
19
:Poror' :ne 'de 'Ehfesor:
1:Yee' :yeh :Apor'lor :ne-a 'Korli, :yee' :Poror' :yi-dih: 'bluhbor dih, 'de tluh⧾ 'nyne-', or mu 'Ehfesor. 'Do :wor or :yeh-dih: :Yusu'-a' klei' :zi-nyor:⧾ :noo'. 2'De or dhele-uh dih, or 'dae:, Ti a po-a :Yusu'-a' dhih dhih 'jeh-', :yee' a 'ye Gban 'i :ne :Zulu 'weh :e?
'De on 'da, 'Kei o. :A 'see Gban i :ne :Zulu-a' dhih 'worn :zai'.
3:Yeh on 'da :ao', :yee' :Poror' dhele-uh-: dih, or 'da, :Yee' 'ni 'dlu :po-eh-a' :yeheh a no 'da :eh?
'De on 'da, :Jororn'-a' :neh 'o o.
4:Yeh on 'da :ao', :yee' :Poror' :wlu-' 'de on bo, or 'dae:, :Jororn' :po nyor⧾ :on 'tali:-a an-a' deh⧾-zon⧾ dih, 'de :on 'bili:-a-' dih 'de Nyorsoa bo 'ni 'dlu. 'De or zela-uh :gwluhuh' on 'ye nyor :or mu-or ken dih :yi, on 'ye or-a' dhih dhih 'jeh-' po. Nyor-a' 'jeh :dao', or-a' 'nyne :wor :Yusu'.
5:Yeh on 'worn-a deh :Poror' :za-a-', :yee' on :po-eh: 'ni 'dlu 'de :Gwlor :baa' :Yusu'-a' 'nyne 'di. 6'De :Poror' tba-uh son⧾ ken dih. 'De Gban 'i :ne :Zulu 'kpa-uh ken. :Yee' an po wlu⧾ 'doror: 'dor, :en Gban 'i :ne :Zulu 'nyi-uh-a, on 'ye-a' po, 'de an po Nyorsoa-a' wele-eh. 7Nyor⧾-a' 'jeh :dao', on 'beh-dih: on 'ye nyor⧾-kpalu⧾-a' :bhue: 'yor 'sororn' no.
8:Yee' 'do 'chuh⧾ taan 'di, 'ka-: :Poror'-a mu 'de :Jueh'-nyor⧾-a' 'di :gweh-dih-sla 'zorn. 'De or wlu-dih 'de, 'de :gwluhuh' :ku ka 'di, 'de or :ne an dhobo 'gabaa 'do Nyorsoa-a' nyor⧾ wlu 'ken :korn-eh-a' dhih bo. Or vorn-', or 'ye-eh' no, on 'ye dhih or za-a-', dhih 'jeh-' po. 9Jorwor: nyor⧾ :noo'-a' 'dlu⧾ :kmu-'. An-a' 'worn, an-a' po-ih' dhih 'jeh-'. :Yee' :Gwlor :baa'-a' :gwie:, eh-: an po yaa'e 'do nyor⧾ ybei'. Eh-: no-eh, 'de :Poror' 'wluh 'o on bo. :Yeh or :taa 'o on bo 'wluh, :yee' or kpa nyor⧾ :an zi-a 'o :Yusu' klei' 'weh, 'de :chuu: :Tila'nor wlu-dih-a 'de nyor⧾ bo 'di. 'De or wlu 'de on bo, zorn 'o zorn. 10Deh :dao', eh-: or no 'do zon⧾ 'sororn' 'di. Eh-: no-eh, 'de nyor⧾-a' klehkpeh :on :ne-a 'de 'Esea-bluhba ken, :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: 'de an-a' klehkpeh 'worn tubo-wlu:⧾ :en kor-a :Gwlor :baa' 'i.
'Siva-a'a: nyor⧾-kpalu⧾-nynuu-a' dhih
11:Yee' Nyorsoa :yi-dih: :Poror'-', 'de or no deh⧾ :kolu'⧾ nyor⧾ 'see-a 'ye :zai'. 12:Yee' :Poror'-a'a: 'paa-dih-' :po-taba⧾-: 'dekorn: 'ylii-for:⧾ or po-a :gwlii' dih-: :en 'tuh-a or-a' ku dih, me-: nyor⧾-a dbo 'de puhba-nyor⧾ bo. :Mor puhba-nyor⧾ 'tuh-ih dih, :yee' an-a' puhba-deh⧾ 'bor-', 'de 'kwla 'ye-dih-deh⧾-a 'wluh 'o nyor⧾ :noo' 'de. 13:Yee' :Jueh'-nyor⧾-a' nyor⧾ :noo', mo-: :an na deh⧾-' dih, 'de an za nyor⧾ 'kwla 'ye-dih-deh⧾ 'de. :Yee' nyor⧾-a' 'jeh :dao', :mor on :taa-eh no, :yee' :Gwlor :baa' :Yusu'-a' 'nyne, me-: an 'bhorn on 'ye no :dee', 'de an wlu 'de 'kwla 'ye-dih-deh bo, on 'da, :Mor 'kwla 'ye-dih-deh: :daa, 'wluh 'o 'yu :daa 'de, 'de :Yusu' 'Klae-a' 'nyne 'di, :or :korn-a dhih :Poror'-a za-a-'. 14:Yee' :Jueh'-yu :due' an 'da-dih-a 'Siva :or no-a Nyorsoa-a' 'slaa: :za-nyor:⧾ :klaba'⧾-a' nyor :due', or-a'a: nyor⧾-kpalu⧾-nynuu: :on :ne-a :meheh' 'sorn or 'wluh-a, mo-: 'o :an no deh :dao'.
15:Yee' :yeh an no :ao', :yee' 'kwla 'ye-dih-deh :wlu-' 'de on bo, eh 'da, 'On yubo: :Yusu' :mloror' 'weh. 'De mor 'on yubo: :Poror'-a' dhih 'weh :ke. Jorwor: deh 'i-deh-nyor:⧾ a :mor :mloror', a 'dhu-eh:-' :eh?
16:Yee' nyor-kpalu: :or 'kwla 'ye-dih-deh :ne-a 'o 'de, or 'kpa 'de on ya, 'de jorwor: or za-uh gla. 'De on :chehn 'kpanua', an 'wluh nyomor-', on ple, on 'wluh 'de 'gbu 'di. 17:Yee' :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: :on 'ti-a 'Ehfesor, :yeh on 'worn-a deh :dao', :yee' an-a' klehkpeh, on 'kpa-' :fano:. 'De an 'beh-dih :Gwlor :baa' :Yusu'-a' 'nyne 'i. 18:Yee' an-a' :dha :dhulu' :on :po-eh dhih 'jeh-', on :nyna dih 'de nyor⧾ 'nyne-', 'de an za an-a' 'jeh-a' deh⧾-zon⧾ gbor. 19:Yee' an-a' nyor⧾ :noo' :on di-a gu, on :ya 'de an-a'a: gu-chlee-deh⧾-a' klehkpeh :dha :due', 'de on po-ih 'yli 'do nyor⧾-a' klehkpeh ybei'. :Yeh on zlo-a 'chlee-deh:⧾ :dao' on po-a 'yli, :yee' en-' :dhen-dih-wlii no 'sebla-wlii-a' 'wlu-a' :kwlaa :mm'. 20:Yee' deh⧾ :daa :en mu-a 'dlu bo, en-' dhih, 'de :Gwlor :baa'-a' wlu gweh deh⧾-a' klehkpeh-a' dih 'dlu, 'de an ku, 'de on :ne 'kpih ken.
'Kpunu: 'kpun :on 'wluh-a yaa'e 'de 'Ehfesor-gwlor 'di
21:Yee' :ka deh⧾-a' klehkpeh :daa, en mu-a 'dlu bo, 'de en zi-a, :yee' :Poror' polo-eh 'do or :gwlii', or 'ye 'Masordo'nia-bluhba-: 'dekorn: :Ehki'a-bluhba-: ken :yi-dih:, 'de jorwor: or 'ye :Julu'slehn mu. :Yee' or 'da, :Mor 'on 'wluh :Julu'slehn, :yee' 'on :korn 'on 'ye 'Wloon-gwlor mu :gbor :gbor. 22:Yeh or no :ao', :yee' nyor⧾ :an 'kpa-or bo, or :za 'de on 'klu-' nyor⧾ 'sororn' an 'da-dih-a :Timehte'-: 'dekorn: :Ila'tor-: 'de or dbo-uh ybei' 'de 'Masordo'nia-bluhba ken, 'de jorwor: or-a' 'jeh 'yor-eh :sie: 'de 'Esea-bluhba ken 'do ti-kpor-bei 'di.
23'Do ti :dao' 'di :oo', 'do :wor :zaa' 'kpa-dih: 'o 'do 'Ehfesor, 'do :Gwlor :baa'-a' :gwie-a' dhih bo. 24:Yee' 'yu :due' an 'da-dih-a :Dimi'tlor, :or no-a 'sebla: :bla :koan, or-: pobo 'Atimi:-nyorsoa-a' 'sla ya, 'de or 'wla 'sebla, 'de or no 'sla :dao', or-a' 'sla⧾ :nyene' :nyene' :doru'-deh, 'de or plo-ih. 'De or-: 'dekorn: nyor⧾ :an no-dih-or :koan bo-: an 'ye-ih 'wlii: :dhulu' 'ken. 25:Yee' :Dimi'tlor 'da nyor⧾-a' klehkpeh :an no-dih-or :koan bo-: 'dekorn: nyor⧾ :noo' :an no-a :koan: :or :ne :ao' :ke-: :dha :due'. 'De or :wlu 'de on bo, or 'dae:, :A 'bli-nyor⧾-a:. :Koan: :daa :or :dhe-a dih, a yubo-eh', or-: :a 'ye-dih deh 'i, or-: :bhan-dih: :a-uh. 26A-a' 'jeh 'yor-eh kpa 'yli, a 'ye-eh', 'de mor a 'worn-eh', :ka 'yu :daa an 'da-dih-a :Poror', or :za 'o nyor⧾ :dhulu'-a' 'dlu⧾ :gwie 'i, dha 'Ehfesor-gwlor-' 'de mor eh :sie: 'o deh-beh: or 'ye 'Esea-bluhba-a' klehkpeh 'dlu gweh. Or zela-uh-: :gwluhuh', or 'da, nyorsoa⧾ :gwlor-nyor⧾-a' son⧾ no-a, en :se nyorsoa 'jeh :nor. 27Jorwor: :mor :a se deh :daa 'yli-eh bo 'dhu, :yee' eh mu :a-a'a: :koan-a' 'nyne 'kor-dih:. Eh :se :a-a'a: :koan :due' :deh. Jorwor: nyorsoa :klaba' :daa, :a ma-a, :or gweh-a 'nynor-kpao', :or :korn-a dhih 'beh-a 'i, an 'da-dih-a 'Atimi:, or-a' 'sla :daa, nyor⧾ :se-or' deh-' 'ye-: i :neheh'. Nyorsoa :daa :or :korn-a :weheh' 'Esea-nyor⧾-: 'dekorn: nyor⧾ :on :ne-a dha yao 'zorn-a' klehkpeh-: an za-a, :yee' or-a' dhih-a mu yaa'e 'kpa-:. :Yee' nyor⧾ :se-or' deh-' 'ye-: i :neheh'.
28:Yee' :yeh nyor⧾ :dhulu' :daa, on 'worn-a deh or :za-a-', :yee' on 'kpa-' 'chehn 'gabaa, 'de an po 'geh⧾, an no, 'Atimi: :or no-a 'Ehfesor-nyor⧾-a' nyorsoa, or-a' dhih 'beh-: 'i. 29:Yeh an no :ao', 'de an po-a 'geh⧾, :yee' eh :se 'o :gwle, gwlor-a' klehkpeh gbua: 'i. 'De on kpon nyor⧾ 'sororn' :on :ne :Poror' 'wluh-a 'Masordo'nia, an 'da-dih-a 'Geyeh-: 'dekorn: 'Alita'kor-:. 'De on 'dhobo:, on 'kla-uh-: dih, 'de on kpa-uh 'o :dha an 'gbon-dih-a. 30:Yee' :yeh on no :ao', :yee' :Poror'-a 'bhorn or 'ye :gwlor-nyor:⧾ :dhulu' :dao' ybei' mu, or 'ye :wlu. Jorwor: :Yusu'-a' klei' :zi-nyor⧾ :se-eh' 'worn-dih:. 31'De mor :Poror' 'bei' :noo' :on no-a 'bluhba-a' 'for :dao', or-a' 'kwi⧾ :klaba'⧾, mo-: dbo-or tubo-wlu⧾ bo, on bale-or, or :ne 'de :dha on kpa-a nyor⧾ :dao' bo mu. 32:Yeh eh :forn-dih:-a 'o dih, :yee' nyor⧾ :on 'kpa-a :dha :due' 'do :dha nyor⧾-a 'gbon-dih-a, an po :dhlumeh'. Deh an za-a-', an-a' 'worn-eh dih, an-a' wlu se :due' :ne. 'De mor deh :korn-a dhih an-a' :dha :dhulu' yi-a 'o, on se-eh yubo: :sloror'. 33:Yeh on no :ao', :yee' :Jueh'-nyor⧾ 'tun-dih: 'yu :due' dih, an 'da-dih-a 'Ehleza'na, 'de or mu 'o :gwlor-nyor:⧾ :dhulu' :dao' ybei'. 'De nyor⧾ :noo' 'dhu-or wlu worn, deh or 'ye-a' :za. :Yee' :yeh or mu-a 'o, :yee' or 'ga-dih-uh :kola 'i, on 'ye :zleh :po-eh 'bor, 'de jorwor: or 'ye dhih :dao' on po-a 'o or-a' 'cheh 'dlu, or 'ye-ih 'o on ken :za. 34Jorwor: :yeh on yubo-eh 'i, :ka or 'dhu-a :Jueh'-yu-', :yee' an-a' klehkpeh :po-dih: 'geh⧾ :dha :due', 'de an no, 'Atimi: :or no-a 'Ehfesor:-nyorsoa, or-a' dhih 'beh-: 'i. Deh :daa, eh-: on no :noo: 'do 'yluh-buh⧾ 'sororn' 'di.
35:Yeh an no :ao', :yee' 'yu :or no-a gwlor-a' deh 'chle-nyor, or-: no-eh, 'de on 'bor 'geh⧾ :po-eh, 'de or :wlu 'de on bo, or 'dae:. :A 'bli-nyor⧾-a:. :A-a' klehkpeh, :a yubo-eh' :ka nyor⧾-a' klehkpeh :on :ne-a dha 'Ehfesor-gwlor: :daa 'di, on yubo-eh :ka 'Atimi:-nyorsoa :or :korn-a dhih 'beh-a 'i, 'de eh 'dhu-a :a mor-' :or 'dhu-a or-a' 'sla :daa-: 'dekorn: sobu' :on kele:-a 'de yai', :on :nyna-a 'o or 'gor bo dih-: 'yli-eh bo. 36:Yee' eh-a' dhih, :ka nyor se-a deh :daa, eh-a' dhih-' dhobo-eh 'beh-dih:, :yee' a :korn a 'ye 'geh⧾ :po-eh 'bor, 'de a :ne-' deh no, eh :ne-eh' no, 'de a :ne-' :porluh bla 'de ybei'. 37Keen' :mloror' a :ya 'de nyor⧾ :daa 'weh :mloror' :kpeheh:. Jorwor: on :se-' deh 'yli, 'de :a-a'a: nyorsoa⧾-a' 'sla⧾ 'zorn. 'De mor on :se-' :a-a'a: 'Atimi: nyorsoa, :or gweh-a 'nynor-kpao', 'bhun dih :wlu-dih:. 38:Mor eh 'dhu :Dimi'tlor-: 'dekorn: or-a' 'bei' :koan: :no-nyor⧾-: 'de nyor 'ye-uh' deh-' no, 'de on 'ye-or 'koti-' :po-eh 'bhorn, :yee' 'koti-gbu kan-dih: 'i 'weh 'do ti-a' klehkpeh bo. 'Do :wor zabe: :zi-nyor⧾ :ne, on 'ye-or 'de kpa. :Mor on 'ble zabe on 'ye 'o or 'dlu po, on 'ye-ih' 'o po. 39:Mor eh 'dhu deh 'sluh-a' dhih-' a 'bhorn a 'ye 'de :ya, :yee' 'nyi a kpa-eh 'o :gwlor :korn-nyor⧾ ybei', :ka :a-a'a: 'tele' no-a mu-a', on 'ye-ih zi. 40:Kana :naa deh :daa :eh mu-a 'dlu bo 'zean', 'Wloon-nyor⧾ 'beh-dih: on 'ye :ao' :a :mor 'o :or :za 'kpunu: 'kpun yaa'e. 'De mor nyor :or 'ye-a dih :nyna 'noror :a 'klu-', :or 'ye-a :dhlumeh' :dhulu' :daa :eh 'wluh-a yaa'e, eh-a' dhih bo dih zela:, 'de en :sor kpon :a-uh, or se :ne. Deh no-eh, deh se 'de dhih :daa 'di :ne. 41:Yeh or gweh-a deh :daa, eh-a' :za-a' 'i, :yee' or zela: :gwlor-nyor⧾-a' klehkpeh :gwluhuh', on 'ye 'gbu⧾ bo dih mu.
Currently Selected:
Noo-deh:⧾ 19: TCHKR
Highlight
Copy
Compare
Share
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
