Noo-deh:⧾ 18
18
:Poror' mu 'Korli:
1:Yeh eh no :ao', :yee' :Poror' 'wluh 'o 'Atehn 'weh, 'de or mu 'o :gwlor an 'da-dih-a 'Korli 'di. 2'Do :wor or :yeh-dih: :Jueh'-yu :due' an 'da-dih-a :Akwi'la, :or 'wluh-dih:-a 'Pantor-bluhba ken. Or-: 'dekorn: or-a'a: 'nynor :Plosi'la-: on 'wluh-a 'Etole-bluhba ken, eh 'see 'o gwle. Deh no-eh, 'de on 'wluh-a 'o, eh-: 'dhu, 'Wloon-nyor⧾-a' 'keen Klordior' 'da or :se-' :Jueh'-nyor⧾-a' 'ye-a' 'bhorn 'de 'Wloon-gwlor-'. :Yeh on yi-a 'de, :yee' :Poror' mu-uh 'ye 'da. 3'De or :dhe 'o on bo dih, or 'kpa-uh bo, an dba 'taa: 'por⧾ nyor⧾-a po-dih-a :gbalie⧾. Deh no-eh, or no 'taa: 'por⧾ :dba-nyor: :ke. 4'Do Nyorsoa-a' :gwlee-we-a' klehkpeh bo, :mor on 'gbon-dih: 'de :Jueh'-nyor⧾-a' 'di :gweh-dih-sla 'zorn, :yee' :Poror' :ne :Jueh'-nyor⧾-: 'dekorn: 'Glii-nyor⧾-: an dhobo-'. Or vorn-', or 'ye-eh' no, on 'ye dhih or za-a-', dhih 'jeh-' po.
5:Yeh :Salor'-: 'dekorn: :Timehte'-: on 'wluh-a 'Masordo'nia, 'de on 'si-a dih, :yee' :Poror' 'duo: or-a' ti-a' klehkpeh-', 'de or po Nyorsoa-a' tubo-wlu⧾ 'de :Jueh'-nyor⧾ bo, :ka :Yusu' 'dhu-a Nyorsoa-a' 'taan'-yu-'. 6Jorwor: dhih :Poror' :za-a-', on :se-ih' 'worn-dih:, 'de an 'jle-dih-or. :Yeh on no :ao', :yee' or 'gbabo: or-a'a: 'tiei: or pa-a-'-: dih, eh 'ye-uh 'i :to-dih: :ka Nyorsoa :za-a an-a' deh son 'di. 'De or :wlu 'de on bo, or 'dae:, :Mor a 'ma, :yee' nyor-a' :kpa-ih' nyor 'i. A kpa-ih a-a' 'jeh 'yor-eh 'i. 'On :se-' ka 'da o. :Eh 'wluh-a dha ti :daa 'i, nyor⧾ :on :se-a :Jueh'-nyor:⧾, mo-: :korn 'de bo, 'an mu :mu. 7:Yee' :yeh :Poror' 'wluh-a 'o on bo, :yee' or mu 'de nyor-kpalu :due' an 'da-dih-a 'Tisior: 'Jehtor 'bli 'gbu 'di, :or za-a Nyorsoa :weheh'. Or-a'a: 'gbu :ne 'o :Jueh'-nyor⧾-a' 'di :gweh-dih-sla: :dao' 'bhun. 8:Yee' 'yu :due' an 'da-dih-a 'Klepor, :or :korn-a 'de 'di :gweh-dih-sla: :dao' wlu bo, or-: 'dekorn: or-a'a: 'gbu-a' klehkpeh-: on po :Gwlor :baa'-a' dhih dhih 'jeh-'. 'De nyor⧾ :dhulu' :noo' :on :ne-a 'Korli-gwlor-', :on 'worn-a Nyorsoa-a' tubo-wlu:⧾ :Poror' po-a, :yee' on po-ih' dhih 'jeh :ke, 'de on :po 'ni 'dlu.
9Glu-we-eh :due', :yee' :Poror'-a' 'yli-eh 'kpa deh 'i, 'de :Gwlor :baa' :wlu 'de or bo, or 'dae:, :An-a' :ple-' :fano. :Ka :an no-a :wlu-a' :chio'lo:, 'ka :wor :on 'ye no. :An-a' :sea:-'. 10'On :ne 'o :on bo 'weh :chio'lo:. Eh se nyor :korn :or 'ye-a 'de :on ya 'kpa, :or 'ye-a :on deh tba dha :gwlor :daa 'di. Deh no-eh, 'on 'ble nyor⧾ :dhulu' dha mor. 11:Yeh eh no :ao', :yee' :Poror' :ne 'o :gwlor :dao' 'di 'weh 'do zon :due' :gbor :tile 'di. Or torne nyor⧾ Nyorsoa-a' wlu.
12:Yee' ti 'yu :due' an 'da-dih-a 'Galior, or no-a 'Wloon-nyor⧾-a' nyor⧾ wlu 'ken :korn-nyor 'do :Ehki'a, 'do :wor :Jueh'-nyor⧾ 'kpa-dih: :dha :due', 'de on kpon :Poror', on kpa-or 'de 'koti-'. 13'De on 'da, 'Yu :daa, or-: 'bili: :a-a' nyor⧾-a' 'dlu⧾ dih, 'de on 'ye Nyorsoa :weheh' :za-eh: :eh se-a 'o :a-a'a: 'tele'-a' :gwie 'i :ne no.
14:Yeh :Poror'-a yi-a :wlu 'da, :yee' 'Galior :wlu-' 'de :Jueh'-nyor⧾ bo, or 'dae:, :Mor zabe: :daa :en :korn-a :jii-eh: a :ya-a: 'de, en 'dhu deh 'kor-dih-zabe-', 'de mor, :mor en 'dhu 'kulu-deh: :no-zabe-', :yee' 'an mu :porluh dih :kpon, 'de 'on 'ye a :dou'⧾ bo :to. 15Jorwor: :ka zabe: :daa, en 'dhu-a wlu⧾-a' dhih-' dhobo-zabe-: 'nyne-a' dhih-' dhobo-zabe-: 'dekorn: a-a' 'jeh 'yor-eh-a'a: 'tele'-a' dhih-: :yee' a-a' 'jeh 'yor-eh zi-ih. 'On :se-' zabe: :en :ne :ao', en-' zii-nyor :no i. 16:Yeh or 'da :ao', :yee' or no-uh-: dih, or za-uh 'de 'koti-'. 17:Yeh 'Galior no-uh-a dih, :yee' an-a' klehkpeh, on kpon 'yu an 'da-dih-a 'Sortehneh 'weh, :or :korn-a 'de an-a'a: 'di :gweh-dih-sla-a' wlu bo, 'de on bla-or 'do 'koti :dao' ybei'. Jorwor: deh⧾ :dao' on no-a, 'Galior :se-ih' :dou'⧾ bo :to.
:Poror' 'wluh 'Korli:, 'de or mu
18:Yee' :Poror' :ne 'o 'Klae :de-di'-boi' :dao' bo, 'do 'we :dhulu' 'di, 'de 'Korli. :Yeh or zi-a 'o 'we :dhulu', :yee' or-: :Plosi'la-: 'dekorn: :Akwi'la-: on 'kpa :gwie 'i, on 'ye 'Silia-bluhba ken mu. :Yeh on 'si-a 'Sehkia dih, :yee' :Poror' 'kploror: or-a' 'dlu 'weh. Deh no-eh, or po wlu :dhama'-' 'de Nyorsoa bo. :Yee' on 'kpa 'de 'ni ken-meheh 'di, 'de on 'kpa 'Silia :gwie 'i. 19:Yeh on 'si-a 'Ehfesor dih, :yee' 'do :wor :Plosi'la-: 'dekorn: :Akwi'la-: on 'wluh-dih: 'o :Poror' klei', 'de or mu 'de :Jueh'-nyor⧾-a' 'di :gweh-dih-sla 'zorn. Or mu :manua: :bla 'da 'de :Jueh'-nyor⧾ bo, 'do :Yusu'-a' dhih bo. 20:Yee' :yeh an bla :manua, :yee' an bale-or', or 'ye 'o on bo 'we :nee' zi. Jorwor: or :se-' 'worn. 21'De or kpa-uh wlu, or 'dae:, :Mor Nyorsoa 'worn, :yee' 'an mu de :yi. :Yeh or 'da :ao', :yee' or 'kpa 'de 'ni ken-meheh 'di, or 'wluh 'o 'Ehfesor.
22:Yeh or 'si-a 'Sehsali'a dih, :yee' or chehn 'o-: :dhie', or mu :Julu'slehn. Or mu 'chore-nyor:⧾ :ne-a 'de ken :yeh-dih: 'da, 'de jorwor: or mu 'Antior :mu. 23:Yee' :yeh or zi-a 'o 'we-kpor-bei 'do 'Antior, :yee' or 'wluh 'o 'weh, or no 'wluh :dha :noror', mu :dha :noror', 'de or gweh :Gale'tia-bluhba-: 'dekorn: 'Fleya-bluhba-: en-' klehkpeh 'dlu, 'de or po 'de :Yusu'-a' klei' :zi-nyor⧾-a' klehkpeh-a' 'kpih.
:Apor'lor po Nyorsoa-a' tubo-wlu:⧾
24:Yee' 'do ti-a' 'jeh :dao' bo, :yee' :Jueh'-yu :due' an 'da-dih-a :Apor'lor, :or 'wluh-dih:-a 'do 'Ehlezan'dla-gwlor 'di, or-: mu 'Ehfesor. Or no nyor :or yubo:-a :wlu-a' deh 'jeh neh, 'de :or yubo:-a Nyorsoa-a' 'chlee-deh, or gweh-eh 'zorn deh 'jeh. 25Nyor⧾ :torne-or :ka or 'ye-a :Gwlor :baa'-a' 'de :na-eh no 'weh :zai'. 'De or :ne neh ken, or :wlu 'de nyor⧾ bo, or torne-uh :Yusu'-a' dhih, 'de 'yi 'sleh ka 'di. Jorwor: :Jororn'-a' nyor⧾ 'ni 'dlu :po-tubo-wlu⧾ :due', me-: or yubo:. 26:Yee' or :za :fano :gwlii', 'de or 'kpa :wlu-a' ken 'de :Jueh'-nyor⧾-a' 'di :gweh-dih-sla 'zorn, 'de :gwluhuh' :ku ka 'di. :Yee' :yeh :Plosi'la-: 'dekorn: :Akwi'la-: on 'ye-a :ka or no-a :wlu-a', :yee' on kpa-or 'gbu bo, 'de on zela: Nyorsoa-deh ken dih 'de or bo, deh 'jeh, :eh :zi 'o :zai' neh-'. 27:Yee' :Apor'lor 'bhorn :Ehki'a-bluhba ken :mu-eh:. :Yeh 'Klae :de-di'-boi' :on :ne-a 'Ehfesor, on 'worn-ih'-a, :yee' an po 'de or-a' 'kpih, or 'ye mu, 'de on 'chle :Yusu'-a' klei' :zi-nyor:⧾ :on :ne-a 'de :Ehki'a bo, on 'ye-or dih kpon :glii:. :Yeh or 'si-a 'o dih, :yee' eh no-' :za-dih-eh: :klaba' 'do nyor⧾ Nyorsoa-a' mla no-eh, 'de :on 'dhu-a :Yusu'-a' dhih 'jeh-' :po-nyor⧾-' bo. 28:Ka or no-a an-a' :za-dih-eh, eh-: 'dhu, dhobo-eh: or :ne :Jueh'-nyor⧾ dhobo:-a dih 'gabaa, 'do :gwlor :gwea, or za-eh-: gbor 'de Nyorsoa-a' 'chlee-deh 'di, :ka :Yusu' 'dhu-a Nyorsoa-a' 'taan'-yu-'.
Currently Selected:
Noo-deh:⧾ 18: TCHKR
Highlight
Copy
Compare
Share
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
