Imethali 20
20
1Idivai inowiiha ncheche ni uhapalhia unoothathusha indewo,
ntu riyoothe nottuna khaarina irusho.
2Urushiya wa amwene uri thoko nrindimo no kharamu,
ntu noonthunalhilha noopoteriha ukumi awe.
3Phi mwaha o nthimicho ntu ushemba indewo,
nansho attu akumbafu phi nottuna waatakana.
4Ntu o ureeshi khanottuna ulhima,
Paahi ikatema yo ukhungura choolhia khanopatta ittu.
5Moopuwelho a ntu chihovithiya thoko wiisha wo maashi,
nansho ntu o irusho nochuwelha utumia.
6Attu enchi anowiifunelha ukhalha oombone,
nansho ntu o waminika o ikekheene apani umpatta?
7Ntu o ikekhiaye atawara rata,
achishaana aya anaahiya anoovahiya ibarakha.
8Amwene oreera akhalha vahicheni ni uhukumulha,
anoovera uhilhoka wonkhaye wo miitho awe.
9Phi mpani anooria uhimia, “kiheettukuria nrima aka,
Mii orera nrima akiwonye?”
10Maphimelha o uhilhoka ni yo woothacha,
chonkhaye phi nrusho wa Apwiiya Nlhuku.
11Ata mwaana noochuwania wo mitheko chawe mwanene,
thoko irusho chawe chiri choombone ni ikekhiaye.
12Maaru aneewa ni miitho anoweha,
yonkhaye meelhi ayo opiilhee Apwiiya Nlhuku.
13Nhirupe ikatema yo ilhimwe uhiwe mwaakhalha nshikini,
mpangeke ntheko ni inyu nnokhalha ni cholhia chinchi.
14“Ntu nottuma neera,” khinlhoka,
yamalheke noothama uno athiaka wo uttuma wo nchurukhu vakani.
15Chihaawo idhahabu ni malhuku menchi o nhakhu mwinchi,
nansho irusho cho urera chinene phi malhove o irusho.
16Ntu alhupelheke umihoolho winyu umweeshera idhamana nlheto,
nkusheke ikuwo chawe,
mumpangeke akhalhe wo umweeshera idhamana nlheto.
17Yoolhia inopattikana wa attu o uhilhoka inokhalha yoombone chinene,
nansho kaanyuma aya inokhalha thoko nhaava mu iyanoni.
18Chittu choombone chinopangiya wo wuulhumana vamoka.
mwathananaka urwaa ukhotoni muupuwelheke thoko.
19Malhove o waapa anoupangani nhaaminike,
wo chiichammo etu munshembe ntu o wuulhumacha pufia.
20Ntu noonlhapa athumwanawe ama anumwanawe,
ukumi awe unotipihiya thoko ikhandiri vaapiphini totoro.
21Nhakhu upatikaneelhe wo wakhuvia mpacho.
khunokalha ni ibarakha umalhelha wawe.
22Nhiire wiira, “kinoulhivani wo nlhattu no uhilhoka kipangelhiye aka.”
munkhulhuvelheke Apwiiya Nlhuku ni uyo noukavihani.
23Maphimelho yo woothacha phi nrusho wa Apwiiya Nlhuku,
ni maphimelho cho uhilhoka khachiinreera.
24Meetelho a ntu anohoolhelhiya ni Apwiiya Nlhuku,
anooria chani ntu uchuwelha iphiro awe mwanene?
25Phi nriankho ntu unlhupelha Nlhuku wo waakuvia,
ni kaanyuma aya wuupuwelha tho ishaani chawe.
26Amwene ri ni irusho nowathamiha attu o uhilhoka,
ni waattwarusha wo uhikhalha ni ikiriri.
27Iphumu yoombone wa ntu phi nthuko wa Apwiiya Nlhuku,
nowehaweha iphumu awe chinene.
28Uttuna ni uwaminika unokhalha ikhikichero wa amwene,
utawara wawe unolhipihiya wo ikekhiaye.
29Nthimicho wa ashimirawo phi machiri awe,
urera wa ashulhupalhe phi ipwii chawe.
30Waata ni ukumiha makhwata phi nrete o ukumiha uwonya,
ikopo chinohapiha ukumi urii nhina chinene.
The Bible Version in Makua @The Word for The World International and Makua Language translators. All rights reserved.