Imethali 19
19
1Nambaya nshikini rii ni nrima woombone,
kuliko ntu nkumbafu noolhumacha malhove o uhilhoka.
2Kinlhoka ntu ukhalha wo uhikhalha ni irusho,
ntu owaakuvia nookufia iphiro.
3Ukumbafu wa ntu nolhakalhiha ukumi awe mwanene,
vamoka ni yayo, nrima awe unoonttunalhelha Apwiiya Nlhuku.
4Mwaakhalhanaka nhakhu nnowapata manyampwana enchi,
nansho nshikini khanooria ukhalha ni mpwana awe.
5Ntu nohimiechesha chittu cho woothacha noohukumulhia,
nansho noolhumacha chittu cho woothacha khanoshemba nttwarusho.
6Attu enchi aneepepechiha wa nhoolhelhi,
ni kila ntu nothanana ukhalha mpwana awe ntu anokumiha nttuvo.
7Ntu nshikini kanottunia ni ashilhoko awe,
chani, manyaampwana anookhota chiicho!
ata yaapepechaka mena khanaapata.
8Ntu nopatta irusho neettuna anene,
norumelhelha ibusara yoyo nooshichira.
9Ntu nohimechesha chittu cho woothacha noohukumulia,
nansho nohimiacha malhove o woothacha norimeelha.
10Khinlhoka ntu nkumbafu ukhalha makhalhelho yo upuha,
mena khinlhoka ipotta waatawara ashulhupalhe.
11Ntu o ibusara khanaakuvia uthunalha,
uhiyerera uwonya phi uteelhiya wawe.
12Urushiya wa amwene uri thoko nrindimo no kharamu,
nansho urera wawe uri thoko ukhame vachulhu maathakhuru
13Mwaana nkumbafu phi nrushiho wa athumwanawe,
nthiyana nonchivelhia indewo yoyo nokhalha thoko nveevelha o ipulha.
14Inupa ni nhakhu ntunopatta wa manyanaangoro awe,
nansho nthiyana ri ni irusho nokhuma wa Apwiiya Nlhuku.
15Ntu nreeshi yoyo norupa ikhove,
nansho ntu hinottuna upanga ntheko noohuva wo ithalha.
16Ntu norumelhelha meettuchiho nookhalha ukumi,
nansho nokhota malhehero yoyo nookhwa.
17Noonvaha nshikini nookopiha Apwiiya Nlhuku,
Apwiiya Nlhuku noonlhiva wo ntheko awe wombone.
18Umwaamuke mwaamwaninyu paanepa noorukunuwa,
nansho nhoove umwaata khanorimeeha.
19Ntu naakuvia uttunalha noopatta ntwarusho,
mwaanhiyaka nkwaha mmoka nnohiyerera tho.
20Mwiiwelhelheke malhove ni urumelhelha meettuchiho,
mpatteke irusho chinoulhokani mahuku anowa.
21Nrima wa ntu nothanana upanga chittu chinchi,
nansho chinothanana awe Apwiiya Nlhuku phi chinopanga awe.
22Inothanania wa ntu phi waaminika,
nambaya ntu nshikini upwaha ntu o woothacha
23Unthimicha Apwiiya Nlhuku nowiiha ukumi,
anowiittuwa akhalhanaka kila ittu,
mena kanohuvelha ittu iriyoothe.
24Ntu nreeshi ri thoko ntu nomiayolhia,
nansho khanarina machiri o utheesha mpaka u iyanoni.
25Muntwarusheke ntu o mattepwa ni nkumbafu nowiittucha irusho,
munchachereka ntu ri ni irusho ni uyo nopatta irusho.
26Noonthurulha athumwanawe ni umwoomwolha anumwanawe,
phi mwaana o uhilhoka.
27Mwaamwanaka, mwahiyaka uvara meettuchiho aka,
unoopotera utayi ni malhove o irusho.
28Nohimiechesha malhove o woothacha noopoteriha ikekhiaye,
ni iyano ya ntu o uhilhoka noolhia uhilhoka.
29Ntwarusho nihaaya wa attu anopanga mattepwa,
ikopo chiheeshiya chiire waata mithana ya attu akumbafu.
The Bible Version in Makua @The Word for The World International and Makua Language translators. All rights reserved.