Nanahumu 3
3
1Ihothapana iwaani yo ninawi iri ni attu aneeva ashikhunanaya,
Iwaani iri na attu o woothacha ni anaakha chittu, ahinottuna uhiya waathurulhacha attu!
2Nkeewani! Uruma wo nfanfyu,
vamoka ni ikitto yo magurudumu,
ni ikitto cha afarasi,
ni ikitto cho mikukuta!
3Mphingo wa attu awenlhe afarasi unookelhelhacha,
maphanga ni mavaka anoopharelhacha!
Ni attu eevakachiye khanaalhakelhia,
ni mitembo chiri chinchi chinene, mpaka attu anookwakwathuwa iruttu cha attu akhwilhe!
4Mwaatti attu o iwaani yo Uninawi nri thoko attu o ulhavalhava.
Inyuva amwalhi nnolhwaa, nhaathepiacha attu,
nhaapanga attu o veelhaponi ukhalha ipotta wo nlhatu no ulhavalhava winyu,
ni wo nlhatu no ukhwiri inyu. 5Apwiiya Nlhuku o machiri aneera wiira,
“Kinouhukumulhani mwaati attu o Uninawi!
Ikuwo chinyu kinoowelhiha mpaka vashikoni mwinyu,
kuuhiyekeni pwithipwithi,
ni attu ooneke vanoolhihiya inyu miuru.
6Kinounyalhihani
ni uveehachani.
wiira nkhalheke attu o uthiachiya waattuni.”
7Ni attu onkhaye anohalha uwoonani anouttawani eeraka wiira,
“Attu o Uninawi ahorimeelhihiya!
Apani anohalha uwunlhelhani?
Ni phi apani anohalha uhelhani nrima?”
8Chani, inyuva attu o Uninawi, mwaathepilheni attu o Utebesi, iwaani ithekiye vachereshere mwoolhoko o Unaili? Iwaani irukureriye ni mwoolhoko o Unaili, ni mwoolhoko uyo ukhalha phi ishiri aya. 9Ilhapo yo Uethiopia yaari phi machiri aya ni ilhapo yo Umisri chiichammo, ni ahokavihiya tho ni attu o Uputi ni o Ulibiya! 10Nansho ata chiicho, ahovariya ni urweehiya ulhetoni. Ni achishaana aya ahonyakathachiya ni attu aya o uchuwania ahothumihiya, ni manyaashulhupalhe aya onkhaye ahottukachiya wo mittondoro.
11Ni inyu attu o Uninawi, nnoohapalhiya ni wiivitha wiira mwaattawe amalhaponi inyu. 12Ikikhichero chinyu chiri thoko miri cho mitini chiyanre maphepu o milhipu, apukunyiyaka anomorelha mmalhakuni mwa attu! 13Mwaaweheke manyaasikari inyu, anoova thoko manyaathiyana. Ni milhako cho ilhapo inyu khinatteiya umihoolho wa amalhaponi inyu ni mooro uhopahakacha iparatata chaya. 14Nrikeke maashi ni nkhalheke chiire ukelhelhiya, ni nlhipiheke ikikhichero chinyu! Ni nkatahunyeke ittaya wo unyikalhacha, ni mweesheke chiire ntanuru no upahera matofali! 15Nansho ata wowo mooro unoupahani, ni nnowiiviya wo uphanga ni unoumalhihani thoko anashombe chinolhia aya. Munchererieke thoko anashombe, ama thoko matetenka! 16Anamaronda inyu aari enchi upwaha itottwa nansho vano ahomwariacha thoko matetenka vanovava aya. 17Manyaahoolhelhi inyu ari thoko matetenka, ni attu inyu o ipilhi ari thoko nlhoko wa anashombe, ni nlhaalha wo uririya anokhalhacha vashirini, nansho nakhumaka nchuwa anoovava, hikhalheke ntu chuwenlhe ukenlhe aya.
18Inyu amwene o Uashuru akavihi inyu ahokhwaacha, ni attu inyu o ipilhi ahokhwaacha chiicho. Ni attu inyu attawelhenlhe umiakoni, mena khaawo ntu riyoothe o waakusha ni waahokolhosha tho uwaani. 19Khaawo ntu o ulhamihani vakittu vashonyweelhe inyu, ni makhwata inyu kaheena o ulhama. Ni attu onkhaye aneewa mwaha inyu anoottapelhelha. Ukhalhawaya khaawo ntu ttawilhe ushilhilhi inyu uhinomalha.
The Bible Version in Makua @The Word for The World International and Makua Language translators. All rights reserved.