Nanahumu 2
2
Uwulhuwa wo iwaani yo Uninawi
1Amalhaponi anoowa waakelhelha mwaatti attu o Uninawi!
Nvarelheke rata ikikhichero chinyu.
Ni mweesheke attu o weemelhelha mphironi!
Ni nkhalheke chiire!
Ni nthothokaniheke mphingo inyu wonkhaye unooria waatakana ikhoto!
2Apwiiya Nlhuku anonhokolhoshera Nayakhobo ureera waya,
ni waavaha tho attu o Uisraeli nthimicho aya,
inakhalhaka amalhaponi aakelhenlhe ayo khayaahiyenre ittu iriyoothe,
ni ahotupulhacha mpaka miri cho mizabibu chaya.
3Ichikopa cho mphingo aya chihokhwiilhacha,
ni manyaasikari aya awaranche ikuwo cho ukhwiilha kechuu.
Ni mikikuta chaya chinoomwalhia thoko mithuko cho mooro!
Ni eeshiye chiireru wiira akelhelhache!
Ni mirima cha afarasi aya chinaaruma ukelhelha.
4Mikukuta chinopurulhiya ni afarasi chinoottawa chinene mmawani,
arwaaka uwo ni uwo mpaka mmapuwani.
Ni anomwalhia thoko mooro
chaakuviaka thoko umeme.
5Vano anowiihana mphingo aya,
nansho ata inakhalhaka chiicho anookwakwathuwacha mmaphironi.
Attawelhelhaka ushirini,
wiira eeshe chiireru ichikopa chaya.
6Milhako cho utiyelhelha miolhoko chihohulhiya,
ni inupa yo uhano ihowulhuwa.
7Iwaani yo Uninawi ihaanlhe mathalharu,
ukhalhawaya attu aya ahovariya,
ni manyaathiyana aya anowiichunlhelhacha thoko machiya,
ni wichaatakacha vakhakaachani.
8Iwaani yo Uninawi iri thoko nttiya niphomweelhe,
attu aya anoottawacha pufia!
Ni uno neewaniaka nlhove niiraka wiira, “Mweemelhe! Mweemelhe!”
Nansho khaawo ntu nohokolhia utulhi.
9Nthurulheke nchurukhu!
Nthurulheke ni idhahabu!
Ukhalhawaya iwaani ihaana kila ittu yo nhakhu mwinchi!
10Attu o Uninawi ahorimeelhihiya ni uphomolhiya iwaani aya!
Attu ahokhwaacha nrima,
ni makutha aya kharina machiri,
ni miitho aya ari kechuu.
11Niri vayi nikukhu no kharamu nno,
vakittu vaalhihera aya achishaana aya vawo,
vakittu vaarwa aya akharamu nlhopwana ni nthiyana wo uhoova ittu iriyoothe?
12Akharamu ashilhopwana aheeva ashinama enchi
wo nlhatu na achishaana aya ni manyaahanu aya,
ni uchariha vanikukhuni vanokhalha aya vawo.
13Apwiiya Nlhuku o machiri onkhaye aneera wiira, “Miyaano phi mmalhaponi inyu. Ni kinoopahakacha mooro mikukuta chinyu. Ni attu o mphingo inyu kinoweevakacha ukhotoni, ni kinookusha kila ittu yaakushilhe inyu ukhuma ilhapo chikina. Ni khanneewa tho malhove a anamittenga inyu ayo.”
The Bible Version in Makua @The Word for The World International and Makua Language translators. All rights reserved.