Namika 3
3
Namika nowaakuphulhacha manyaaholhelhi o Uisraeli
1Mwaatti atawara o Uisraeli, Mwiiwelhelheke etu! Mwaattiva phi attu nnothananiya uchuwelha chittu cho ikekhiaye, 2nansho inyuva khannottuna upanga chittu choombone nansho nnottuna chittu cho uhilhoka. Nnowaakhava nrapalha attu aka, ni uthamiha inama mwiiruttuni mwaya. 3Nnowaapangelhacha ushilhilhi achihima inyu attu o Uisraeli thoko chinolia inyu inama. Ni nnowaakhava marapalha aya, ni wunthakacha makhuva aya, ni waatupulhacha thoko inama yo waapeiya, ni uhelhiya nyoopweni. 4Mahuku anoowa, attu vanohalha aya umunlhelha Apwiiya Nlhuku, nansho khannaakulhiya. Ni nihuku nno anoovitha ikhove awe, ukhalhawaya nhopanga chittu cho uhilhoka.
5Apwiiya Nlhuku aneera cho mwaha wa anamilhohi anaapoterihacha attu awe, anamilhohi anolhohera mpuha vanovahiya aya chittu, nansho khalhaka khanovahiya chittu anowoopopiha attu wo ikhoto. 6“Paahi etu inyuva anamilhohi uhiyu unoowa, nansho khannooria upatakulhelhiya, ni inookhalha ipiiphi nansho khannooria ulhohera. Ukhalhawaya anamilhohi ayo ahaattekihacha attu aka, paahi khaawo ata namilhohi ata mmoka nohalha upatakulhelhiya, ni khaawo nohalha ulhohera ittu iriyoothe.” 7Attu anooria ulhohera anoveehachiya, ni attu anoopa ntitti anowuulhihiya miuru, khanooria wuulhumacha, ittu iriyoothe, ukhalhawaya Nlhuku khanaakhulha nlhove niriyoothe nne.
8Nansho Apwiiya Nlhuku, ahokivaha machiri vamoka ni iphumu awe, kihovahiya uchuwelha ikekhiaye ni wooria waahimeria attu o Uisraeli mwaha o uwonya waya. 9Inyuva ahoolhelhi o Uisraeli, nhinottuna upanga chittu choombone nkiiwelhelhe mii. 10Mwaattiva nnootheka iwani yo Uyerusalemu, iwaani ya Nlhuku wo waathurulha attu chittu chaya. 11Attu owaamulha milhatu anopanga chittu chaya wo uhongiya, ni opochera ishaani aneettuchiha wo ulhiviya, ni anamilhohi anolhohera wo ulhiviya nchurukhu. Eepangaka wiira anonkhulhuvelha Apwiiya Nlhuku, eerachaka wiira, “Apwiiya Nlhuku, ri vamoka ni hii.” khaninophwanyiya ni ittu iriyoothe ilhe.
12Paahi wo nlhatu winyu, iwani yo Usayuni inookhalha imata. Ni iwani yo Uyerusalemu inookhalha mathalha, ni mwaako o inupa ya Nlhuku unoothakalha.
The Bible Version in Makua @The Word for The World International and Makua Language translators. All rights reserved.