Namika 2
2
Namika vamoka ni amalhaponi awe
1Ahothapana attu anolhakelha uwonya attu anorupa uhiyu ni wuupuwelha chittu cho uhilhoka! Ni washakaru, anoowonyacha thoko chilhakenlhe aya. 2Ukhalhawaya athananaka mamata anookushacha, ni athananaka inupa anookushacha, Anowaakha attu arina manupa vamoka ni ashilhoko aya, ni waakha mihakhu cha attu.
3Wo chiichammo etu, Apwiiya Nlhuku aneera wiira, “Kinouwiiherani mariro, nhinooria inyu ushemba. Ni uwannyu inookhalha phi ikatema yo uhilhoka, mena khannoria urwaa wo utinga. 4Mahuku anoowa, amalhaponi inyu anowuulhumacha miaha chinyu, ni anowiipacha nchipo no ichuku eeraka wiira.
Hiyaano nihorimelhihiya lhakalhaka!
Ni Apwiiya Nlhuku ahokusha ilhapo ihu
ni ahokusha mamata ihu ni waavaha attu anivarilhe.”
5Paahi etu, khannovahiya vakittu variwoothe vo ilhapo munlhokoni mwa attu a Apwiiya Nlhuku.
Amalhaponi a namilhohi
6Attu ahokihimeria mii wiira, “Uhinihimiachere chittu thoko cheechiyo. Ni khaninophwanyiya ni mariro ngu. 7Chani, inoreera ayari a Nayakhobo olhumacheke malhove thoko yayo? Chani, Apwiiya Nlhuku ahohiya uvilhelha waya? Chani, yayo anoopanga chittu thoko chilha?”
8Nansho Apwiiya Nlhuku aneera cho, “Inyu nnowaakelhelha attu aka thoko amalhaponi, Nnowaathurulha attu o umaalha ikuwo chaya, attu anovira eetaka mphironi wo uhoova, ni ahinoopuwelha ittu iriyoothe inaacha ikhoto.” 9Nnowoomolhacha mmanupani mwaya mwo ureera manyaahanu a attu aka, ni achishaana aya nhaathamihera nikhulhuvelho naka mahuku o uhimalha. 10Munkweke, nrwaacheke, khaawo vakittu vo wiittuwa va. Ni mariro anoowa wo nlhatu no uhikhulhuvelhiya winyu.
11“Yakaari ankhumelhelha ntu ni wuulhumacha malhove o woothacha eeraka wiira, ‘Kinoulhoherani wiira nnoopatta idivai ni utheka mwinchi,’ Ntu thoko yoyo anttuniya chinene ni attu alha.”
12“Nansho kinouthothokaniha vamoka, inyuva attu onkhaye o Uisraeli nhaanlhe. Ni kinowaathothokaniha vamoka thoko ikhondoro nhilhini, thoko nlhoko muulhupalhe wo ikhondoro unolhihiya, ni inyu nnookhalha nlhoko wa attu enchi.”
13Nlhuku anouhuulhelhani nlhako ni uhoolhelhani. Ni ayo anoophomolhacha nkhora o iwani ni ukhuma vathe. Amwene aya anowaaholhelha, Apwiiya Nlhuku mwaneene anowahoolhelha.
The Bible Version in Makua @The Word for The World International and Makua Language translators. All rights reserved.